1-2. 1 Timotak 6:20- a pormonnem, Timotan kitem korunk zai aslem?

AMCHEO moladik vostu samballunk ami teo chodd korun dusreank ditat. Udharonnak, ami amche poixe bank-int dovrunk puro. Oxem kortat tednam amche poixe surokxit urtole ani te sanddchenant vo chorun vhorchenant mhunn amkam khatri asta. Tor amchi moladik vost eka munxak diun patievop mhunnche kitem tem ami somzotat.

² 1 Timotak 6:20 vachat. Timotak kitem tori moladik mell’llam mhunn apostl Paulun tachea ugddasak haddlem. Ti moladik vost mhunnttlear munxa pasot Devacho ud’dhex hea vixim khorem ginean. Jehovan Timotak ‘sondex porgottunk’ ani ‘Xubhvortoman porgottunk bhar gheuncho’ sueog pasun dil’lo. (2 Tim. 4:2, 5) Timotak jem kitem dil’lem tem rakhunk vo samballunk Paulun taka urba dili. Timota bhaxen amkam pasun moladik vostu rakhunk dileat. Teo khoincheo? Ani Jehovan dil’leo heo vostu ami kiteak rakhunk zai?

3-4. Bible-antlim sotam moladik asat mhunn ami kiteak mhunnonk zata?

³ Aplem Utor Bible-antlean khorem ginean diun Jehovan amkam doia dakhoilea. Him Bible-antlim sotam amkam moladik zaun asat. Karonn tim amkam Jehova sangata ixttagot koxi zoddunk zata ani jivitant khoro sontos koso melltta tea vixim sangtat. Ami him sotam manun ghetat ani tea pormonnem jietat tednam khottea xikounneamnim ami fosonant ani noitik ritin amchem jivit nitoll urta.—1 Kor. 6:9-11.

⁴ Devachea Utrant aslolim sotam moladik asonk anik ek karonn asa. Tem mhunnttlear, Jehova tim fokot “sasnik jivit zoddunk favo” aslolea khaltea lokankuch kolloita. (Itihas 13:48, NW) Amchea disamnim visvaxi ani xanno chakor amkam  Bible-a vixim xikoita mhunn he khalte lok manun ghetat. (Mt. 11:25; 24:45) Him sotam somzonk amkam modotichi goroz asta ani him somzololean amkam tim sogleam-von moladik zatat.—Mho. 3:13, 15.

5. Jehovan amkam ani kitem dilam?

⁵ Jehovan amkam dusreank apnna vixim sot xikounk ani aplo ud’dhex sangcho sueog pasun dila. (Mt. 24:14) Ami sangtat to sondex khub moladik zaun asa, karonn oxem kelolean to lokank Jehovachea familicho bhag zaunk ani sasnik jivit melloun gheunchi sondhi dita. (1 Tim. 4:16) Ami kortat ti porgottnni chodd asum vo unni, punn tantunt vantto ghetlolean aichea kallar zata tea sogleam-von mhotvachea kamak ami tenko ditat. (1 Tim. 2:3, 4) Deva sangata kam korcho kitlo vhoddlo man amkam asa!—1 Kor. 3:9, Povitr Pustok – Novo Korar.

6. Apnnak dil’leo vostu samballunk na tanchem kitem zalem?

⁶ Timotachea tempar thoddea Kristanvamnim Deva sangata kam korchea sueogacho valor korunk na. Demasak sonvsarachea vostuncho mog aslo dekhun tannem Paulu sangata seva korcho aplo sueog soddun dilo. (2 Tim. 4:10) Pauluk soscho poddlo toslo dhumallo apnnakui soscho poddttolo mhunn chintun Fijel ani Hermojen bhiele dekhun tannim ghoddie apli porgottnni bond keli. (2 Tim. 1:15) Himenev, Aleksandr, ani Filet he sot soddun dhorm-broxtt korpi zale. (1 Tim. 1:19, 20; 2 Tim. 2:16-18) Eka tempar he sogle Jehovacho mog kortale. Punn uprant Devan dil’leo vostu moladik mhunn tannim chintunk na.

7. Soitan amchea add kosle fas uzar korta?

⁷ Jehovan amkam dileat teo moladik vostu ami soddun diuncheo mhunn Soitan koso proitn korta? Soitan kosle thodde fas uzar korta tacher dhean diat. To T.V, internet ani her sahit’tiam uzar korun amchem chintop ani sobhav bodolcho proitn korta. Hachea udexim ami hollu-hollu Jehovacho mog korcho soddun diunk xoktat. Dusrim amchea vixim kitem chintat vo mhunnttat tachi bhirant to amchea kallzant ghalta ani toxench dhumallo uzar korun amchi porgottnni bond korunk sodhta. Ani ami sot soddun diunk zai mhunn dhorm-broxtt korpeanche ‘fottkire zannvaiek’ kan diunk to amkam uksaita.—1 Tim. 6:20, 21, Povitr Pustok – Novo Korar.

8. Bhav Daniel-achea udharonnantlean tumi kitem xiktat?

⁸ Ami chotrai dovornant zalear ami hollu-hollu sot soddunk xoktat. Ek udharonn polloum-ia. Daniel-ak, * viddeo game-i khellonk avoddttaleo. To mhunntta: “Hanv sumar dha vorsancho aslo tednam thaun viddeo game-i khellttalom. Survatek hanv boreo game-i khellttalom, punn sovkas hanv  hinvsebhorit ani ghaddieponnak sombondit asloleo viddeo game-i khellonk laglo.” Uprant to dor disa sumar 15 voram viddeo game-i khellttalo. To fuddem mhunntta: “Osleo game-i khellonk itlo vell ghaltalo dekhun hanv Jehova thaun pois sortalo mhunn mhaka khobor asli. Punn Bible-ant sanglam tem mhaka lagu zaina mhunn hanv chintunk laglo.” Ami chotrai dovornant zalear, oslem monoronjon amkam sota thaun pois vhoronk xokta. Amchea lagim oxem ghoddtta zalear Jehovan diloleo moladik vostu ami samballunk pavchimnant.

9. 1 Timotak 1:18, 19-a pormonnem, Paulun Timotak konnak sor kelo?

⁹ 1 Timotak 1:18, 19 vachat. Paulun Timotak eka soinikak sor kelo. Ani eka ‘borea soinika sarko zhuzonk’ zai mhunn tannem taka sanglem. Punn Paulu hanga eka zhuzantlea soinika sangata zhuzchea vixim uloinaslo. Tor Kristanvam khoinchea vattamnim soinikam sarkim zhuztat? Kristache soinik zal’lean ami kosle gunn utpon korunk zai? Paulun dil’lea udharonnantlean ami xikonk zatat tim panch lisanvam polloum-ia. Tim lisanvam amkam sotant ravonk modot korunk xoktat.

10. Devachi bhokti korchi itsa mhunnttlear kitem, ani hem amkam kiteak gorjechem?

¹⁰ Devachi bhokti korchi itsa vaddoiat. Devachi bhokti korchi itsa mhunnche visvaxiponnan Devak chittkon ravop. Ek boro soinik visvaxi asta. To mog korta tea munxak vo vostuk rakhunk khub vavurta. Paulun Timotak Devachi bhokti korchi itsa vaddounk urba dili. (1 Tim. 4:7) Deva pasot mog ani bhokti jitli ami vaddoitolim titli sotant ravchi amchi itsa ghott zatoli.—1 Tim. 4:8-10; 6:6.

11. Ami amkanch kiteak proxikxonn diunk zai?

¹¹ Sarkem tem korunk tumi tumkanch proxikxonn diat. Eka soinikan sodanch zhuzak toiar asonk zai zalear tannem apleak proxikxonn diunk zai. Vaitt vondovnneam thaun pois ravonk, Devak manta tosle gunn vaddounk ani bhav-bhoinnam sangata vell sarunk Paulun Timotak sol’lo dil’lo. Ho sol’lo apnnailolean Soitanachea probhava add Timot zhuzonk pavlo. (2 Tim. 2:22) Hem korunk tannem apnnakuch proxikxonn diunk zai aslem. Amchea chukichea anvddeam add aslolem hem zhuz ami zhiktolim zalear amkam proxikxonnachi goroz asa. (Rom. 7:21-25) Tea bhair, ami amcho poilincho sobhav soddun bore gunn vaddounk ami amkanch proxikxonn diunk proitn korit ravonk zai. (Ef. 4:22, 24) Disachea xevottak ami thoklear pasun mittingek hajir zaunk ami amkanch proxikxonn diunk zai.—Heb. 10:24, 25.

12. Ami khoinchea vattamnim Bible anik bore toren uzar korunk xoktat?

¹² Eka soinikan aplim hot’tearam uzar korchi apli kola vaddounk zai. Hem korunk tannem sodanch apnnank proxikxonn divop gorjechem. Devachem Utor uzar korchi amchi kola vaddounk zai zalear ami oxench korunk zai. (2 Tim. 2:15) Osleo thoddeo kola ami mittingent xikonk xoktat. Punn Bible-antlem sot dusreank faideak poddtta mhunn tannim pasun manun gheunk ami modot kortolim zalear ami amcho svotacho Bible obheas korop gorjecho. Ami amcho bhavarth ghott korunk Devachem Utor fokot vachlear pavona. Ami vachtat tachi sarki somzonni mellonk ani tem apnnaunk, tacher ami niall korunk zai ani amchea prokaxonamnim sodh korunk zai. (1 Tim. 4:13-15) Oxem kelolean dusreank xikounk ami Devachem Utor uzar korunk pavtolim. Hem korunk pasun ami tankam Bible-antlem ek vers vachlear pavona. Tem vers tankam somzonk ani tannim tem apnnaunk ami tankam modot korunk zai. Ami chukonastana svotacho Bible obheas kortat zalear Devachea Utrantlean ami dusreank anik bore toren xikounk pavtolim.—2 Tim. 3:16, 17.

13. Hebrevank 5:14 pormonnem, borem ani vaitt somzunchi amchi tank ami kiteak vaddounk zai?

 ¹³ Borem ani vaitt somzunchi tumchi tank vaddoiat. Eka soinikak ek poristhiti polloun tantunt aslolo dhoko vollkhun tachea thaun pois ravchi tank asonk zai. Ami pasun eka poristhitint aslolo dhoko vollkhun tachea thaun pois ravchi tank vaddounk zai. (Mho. 22:3; Hebrevank 5:14 vachat.) Udharonnak, ami monoronjon vinchun kaddttana xanneponnan vinchun kaddunk zai. T.V-cher choddxim amkam onoitik kamam dakhoitat. Jehova oslea kamancho dves korta ani je lok oslim kamam kortat te apnnank ani dusreank trasant ghaltat. Oslem monoronjon ami polloitat zalear hollu-hollu Jehova pasot aslolo amcho mog unno zaunk xokta.—Ef. 5:5, 6.

14. Borem ani vaitt somzunchi tank vaddoilolean Daniel-ak koxi modot zali?

¹⁴ Daniel zachea vixim ami poilim uloil’lim, taka uprant hinvxebhorit ani ghaddieponnam sombondit viddeo game-i khellop chukichem mhunn somzolem. Tachi hi sonvoim soddunk modotik lagon tannem Watchtower Library-cher sodh kelo. Hacho tacher koslo porinnam zalo? Tannem teo vaitt game-i khellop bond kelem. Online game-inchem subscription tannem bond kelem ani dusrea khellpeam sangata khellop tannem soddun dilem. Daniel sangta, “Viddeo game-i khellchea bodlek hanv mhozo vell bhair thoddeo vostu korunk vo sobhechea bhav-bhoinnam sangata mellon ieunk uzar korunk laglom.” Atam Daniel ek pioneer ani vhoddil mhunn seva korta.

15. Khotteo kanneo kiteak dhokeacho zaun asat?

¹⁵ Timota bhaxen ami anik eka dhokea thaun, mhunnche dhorm-broxtt korpeamnim posrailolea khottea mahiti thaun pois ravonk zai. (1 Tim. 4:1, 7; 2 Tim. 2:16) Udharonnak, te amchea bhavam vixim khotteo kanneo vo Jehovachea songottnne vixim amchea monant dubhav ghalunk proitn korunk puro, zaka lagon amcho bhavarth halonk xokta. Te sangtat tea mahiticher ami kiteak patieunk zaina? Karonn osleo kanneo sangtat tosleank ‘budh-ginean na ani sotachi vollokh na.’ Te ‘vad-vivad ani utram dhorun zhogddim’ korunk axetat. (1 Tim. 6:4, 5) Ami tancheo khotteo kanneo patielolim ani amchea bhavancher dubhavlolim tankam zai.

16. Amchem dhean halounk xokta tosleo khoincheo vostu ami pois dovrunk zai?

¹⁶ Tumchem dhean halonk diunk nakat. Timot “Jezu Kristacho bollvont soinik” aslolean tannem sonvsaracheo vostu ektthaim korunk  vo aplea jivitant her dhei melloun gheunk chodd dhean diunchea bodlek porgottnnechea kamacher dhean diunk zai aslem. (2 Tim. 2:3, 4) Tannem girestkaiek vo her vostunk lagon aplem dhean halonk diunk na toxench ami pasun girestkaie fattlean vochona zaunk chotrai dovrunk zai. ‘Girestkaiechi bhul vo fosounk xokta tea girestkaiechi tank’ Jehova pasot amcho mog, tachea Utra pasot amchem upkariponn ani sevent amchi umed unni korunk xokta. (Mt. 13:22) Ami amchem jivit sadem dovrunk zai ani ‘Devachem Raj amcho vhoddantlo vhodd usko’ mhunn ugddas dovrun amcho vell ani amchi takot uzar korunk zai.—Mt. 6:22-25, 33.

17-18. Jehova sangata amchi ixttagot samballunk ami kitem korunk zata?

¹⁷ Rokddench pavl gheunk toiari korat. Eka soinikan apli rakhonn korunk poilinch toiari korunk zai. Toxench ami dhoko polloitat tednam rokddench pavl ghetlear Jehovan amkam dilam tem ami rakhunk pavtolim. Ami rokddench pavl koxim gheunk xoktat? Poilinch toiari korun.

¹⁸ Udharonnak, lok eka hall-ant ek kariavoll pollounk ektthaim zatat tednam tea hall-a thaun “bhair soronk” kitlim daram asat tem kariavoll suru zaunchea poilinch sangtat. Kiteak? Oxem kelolean akantachea vellar tim rokddinch bhair soronk xoktolim. Teach bhaxen, ami internet uzar kortana vo T.V-cher ek kariavoll vo cholchitr polloitana onoitik chitram, hinvsa vo dhorm-broxtta sombondit mahiti amchea dolleam mukhar aili zalear ami koxim bhair sortolim vo ami kitem pavl ghetolim tea vixim poilinch chintunk zai. Ami poilinch toiari keli zalear, Jehova sangata amchi ixttagot samballunk ani tachea nodre mukhar nitoll uronk ami rokddinch pavl gheunk xoktolim.—St. 101:3; 1 Tim. 4:12.

19. Jehovan amkam dil’leo moladik vostu ami samballttat zalear amkam koslim besanvam mellttolim?

¹⁹ Jehovan amkam moladik Bible sotam ani dusreank xikouncho sueog dila. Heo moladik vostu ami rakhunk vo samballunk zai. Ami oxem kortat tednam amkam ek nitoll ontoskoronn astolem, amchea jivitak orth astolo ani dusreank Jehova vixim zannam zaunk modot korcho sontos mellttolo. Jehovachea modotin tannem dil’leo vostu ami samballunk pavtolim.—1 Tim. 6:12, 19.