1. Jezun char kharveank koslem amontronn dilem, ani tannim kitem kelem?

PEDRU, Andre, Jakob, ani Juanv he Jezuche xis nusteacho dhondo kortale. Jezun tankam: “Mhoje pattlean ieiat ani tumkam Hanv monxank dhortat tosle kharvi kortolom” mhunn apoilem tednam te kitle ojap zale astole tem chintat. * Tannim kitem kelem? Bible sangta: “Rokddech, zallam sanddun, te Tache pattlean gele.” (Mt. 4:18-22) Tanchea hea nirnnoi-ak lagon tanchem ak’khem jivit bodolchem aslem. Atam te nustem dhorchea bodlek ‘munxank dhorche’ asle. (Lukas 5:10.) Aiz pasun sotacho mog kortolea promannik lokank Jezu hench amontronn dita. (Mt. 28:19, 20) Munxank dhortat toslim kharvi zaunk Jezun dilolem hem amontronn tumi manun ghetlam kai?

2. Munxank dhortat tosle kharvi zauncho nirnnoi kiteak bore bhaxen chintun gheunk zai, ani ho nirnnoi gheunk amkam koxi modot zatoli?

² Tumkam ghoddie Bible xikon zaito temp zala astolo ani tumchea jivitant tumi zaite bodlav keleat astole. Tor atam tumi bori khobor porgottunk fuddem sorcho nirnnoi gheunk zai. Ho nirnnoi gheunk tumi fatti-fuddem zatat zalear nirax zainakat. Ho ek mhotvacho nirnnoi aslolean tumi ghoddie fatti-fuddem zatat astolim. Pedru ani tache sangati ‘rokddech’ aplim zallam sanddun tachea pattlean gele mhunn Bible sangta. Punn hacho orth, tannim to nirnnoi chintinastana ghetlo oxem nhoi. Sov mhoineam poilinch, Jezu Mesias mhunn tankam khobor asli ani tannim taka manun ghetlolo. (Juanv 1:35-42) Teach bhaxen, tumi pasun Jehova ani Jezu vixim zaitem xikleant ani Jehovak lagim sorot ravonk sodhtat astolim. Punn tumi ek porgottnnar zaunchea vixim chintat tednam tumi to nirnnoi chintun gheunk zai. Ho nirnnoi chintun gheunk Pedru, Andre ani herank koxi modot zali?

3. Jezuchem amontronn manun gheunk tumkam khoinche gunn modot kortole?

 ³ Jezuchea poilea xisank itsa asli, tankam tanchea kamam vixim borem ginean aslem, te dhirvont asle, ani korunk zai aslolem tem korche gunn tankam aslo. Heach gunnank lagon, te porgottnnechem kam bore toren korunk pavle. Porgottnnechem kam bore bhaxen korunk ani dusreank xikounk he gunn tumi koxe utpon korunk zatat? Hachea vixim ami hea lekhant bhasabhas kortolim.

4. Pedru nustem kiteak dhortalo?

⁴ Pedru aplea familik posunk nusteacho dhondo kortalo. Hem to fokot ek kam mhunn korinaslo, punn chodd korun taka nustem dhorunk avoddttalem. (Juanv 21:3, 9-15) Teach toren, munxank dhorta toslo kharvi zaun vavurchea kamam pasot tannem mog vaddoilo. Ani Jehovachea modotin Pedru hem kam ekdom borea bhaxen korunk pavlo.—Itihas 2:14, 41.

5. Lukas 5:8-11 pormonnem, Pedru kiteak bhielo, ani oslich bhirant amkam ieta tednam amkam kitem modot korunk xokta?

⁵ Porgottnni korchem amchem mukhel karonn mhunnttlear, Jehova pasot amkam aslolo mog. Hem kam korunk ami purtim na oxem amkam dista zalear pasun Jehova pasot aslolo amcho mog amkam hem korunk modot korta. Jezun Pedruk munxank dhorta toslo kharvi zaunk apoilo tednam Jezun taka mhunnttlem: “Bhieum naka.” (Lukas 5:8-11 vachat.) Pedruk, apunn Jezucho xis zalo zalear kitem zatolem tachi bhirant nasli. Bodlek, Jezun tankam kitlem nustem dhorunk modot keli tem polloun to ojap zalo. Tem vizmit Jezun kelem mhunn taka khobor asli. Ani tachea sangata kam korunk apunn purto na oxem taka dislem. Tumkam-i Pedru bhaxen disonk puro. Kristacho xis zaun tuka kitem soglem korchem poddttolem, hem chintun  ghoddie tuka usko zaunk puro. Toxem zalear, Jehova pasot, Jezu pasot, ani xezaream pasot tumcho mog ghott korat. Tednam munxank dhorpi kharvi zaunk Jezun dilolem amontronn manun gheunk tumchi itsa vaddttoli.—Mt. 22:37, 39; Juanv 14:15.

6. Her khoinchea karonnank lagon ami porgott’ttat?

⁶ Her khoinchim karonnam porgottnni korunk amchi itsa vaddoitat, tacher dhean diat. Ami Jezun diloli hi adnea pallunk sodhtat: “Vochun . . . xis korat.” (Mt. 28:19, 20) Tea bhair, ‘lok dogdovlole ani niradari asat.’ Tor Rajea vixim sot xikop chodd gorjechem asa dekhun ami porgott’ttat. (Mt. 9:36) Soglea munxank sotachem khorem ginean mellon, tim salvar zalolim Jehovak zai.—1 Tim. 2:4.

7. Porgottnnechem kam mhotvachem asa mhunn Romkarank 10:13-15 koso dakhoita?

⁷ Amchem porgottnnechem kam lokancho jiv koso salvar korta, tea vixim ami chintat tednam porgott korchi amchi itsa vaddttoli. Ek kharvi, apnnem dhorlole nustem vikta vo khata. Punn ami munxank ‘dhortat,’ mhunnche, tankam Jezuche xis kortat, jea udexim tancho jiv salvar zata.—Romkarank 10:13-15 vachat; 1 Tim. 4:16.

8-9. Eka kharveak kitem khobor asonk zai, ani kiteak?

⁸ Jezuchea disamnim eka Israelitkar kharveak, apnnem kosle torechem nustem dhorunk zai tem khobor asonk zai aslem. (Lev. 11:9-12) Tea bhair, tem nustem taka khoim mellttolem, hem pasun taka khobor asonk zai aslem. Nustem choddxem oslea zagear asta, zoim taka zai toslem udok ani khaunk melltta. Ek kharvi khoinchea vellar nustem dhorunk voita tem pasun mhotvachem. Nustem dhorunk umko vell asta mhunn Pacific doriant aslolea eka zunvear ravtolea mixinorik kollon ailem. Ek dis tea zunvea voilea eka bhavan tea mixinorik ek dis nustem dhorunk apoilo. Tea mixinorin, “faleam sokallim nnov vorancher mellum-ia” mhunn sanglem. Punn tea bhavan mhunnttlem: “Amkam zai tea vellar nhoi, punn jea vellar nustem melltta, tea vellar ami nustem dhorunk vochonk zai.”

⁹ Teach toren, poilea xekddeant munxank dhortat tosle kharvi zalole Jezuche xis “nustem” asta, mhunnche lok asta tea zagear ani vellar porgottnni korunk voitale. Udharonnak, Jezuche xis Devmondirant, devstanamnim, ghor-ghoramnim ani bazaramnim vochon porgott’ttale. (Itihas 5:42; 17:17; 18:4) Teach toren, porgottnni korunk amchea vattarant aslolo lok khoinchea vellar, khoinchea zagear astole tem amkam khobor asonk zai. Ani tea vellar ani zagear vochon porgottnni korunk amchim her kamam fatti-fuddem ghalunk ami toiar asonk zai.—1 Kor. 9:19-23.

10. Jehovachem songotton amkam koslim sadhonam dita?

¹⁰ Eka kharvean nustem dhorunk sarkim sadhonam uzar korunk zai, ani tim koxim uzar korop tem taka khobor asonk zai. Amchea porgottnnent pasun amchea lagim sarkim sadhonam asonk zai ani tim bore toren koxim uzar korop, hem amkam khobor asonk zai. Bori khobor koxi porgottunk zai, tea vixim Jezun aplea xisank xikoilem. Porgottnnek voitana kitem vhoronk zai, khoim porgottnni korunk zai, ani kitem sangonk zai, hem tannem tankam sanglem. (Mt. 10:5-7; Lukas 10:1-11) Teach toren, aiz Jehovachea songottnnen amkam Seve Pasot Mukhel Prokaxonam dileant. Tantunt porgottnnek faideak poddttat toslim sadhonam asat. * Ani tim sadhonam ami koxim uzar korunk zai, tem pasun amkam xikoilam. Hem proxikxonn mell’llolean ami khatren porgottnni korunk ani borim xikoupi zaunk pavtat.—2 Tim. 2:15.

11. Munxank dhortat toslea kharveank dhirachi kiteak goroz asa?

¹¹ Kharveank dhirachi goroz asta. Karonn thodde pavtt doriantlem vatavoronn okosmat bodlonk xokta. Vo tankam eka vadollacho fuddo korcho poddtta. Tea bhair te ratik, choddxe pavtti kallkhant kam kortat. Munxank dhortat toslea kharveank pasun dhirachi goroz asa. Ami porgott’ttat tednam ani ami Jehovachim Sakxi mhunn dusreank sangtat tednam amchi famil amcho virodh korit, amchim ixttam amchim fokannam korit, ani thodde lok amcho sondex aikochenant. Hem soglem “vadolla” sarkem asonk xokta. Punn hem polloun ami ojap zainant. Karonn tache xis virodh kortolea lokam modem porgott’ttole mhunn Jezun adim fuddench sanglolem.—Mt. 10:16.

12. Joshua 1:7-9-ant sanglolea pormonnem, dhir vaddounk amkam kitem modot korunk xokta?

¹² Tumi tumcho dhir koso vaddounk xoktat? Poilem, Jezu sorgar thaun porgottnnechea kamank margdorxon di-it asa mhunn tumkam khatri asonk zai. (Juanv 16:33; Prok. 14:14-16) Dusrem, Jehova tumchi kallji ghetolo, hea bhasaunnecher tumi tumcho bhavarth ghott korunk zai. (Mt. 6:32-34) Tumcho bhavarth jitlo ghott zatolo, titlim tumi dhirvont zaunk pavtolim. Pedru ani tachea vangddeamnim aplo nusteacho dhondo soddun, Jezucho pattlav kelo tednam tannim ghott bhavarth dakhoilo. Teach toren, tumi tumchea ixttank ani familichea sodoxiank tumi Jehovachea Sakxeam sangata Bible xiktat ani tanchea mittingek hajir zatat mhunn sanglem tednam tumi pasun ghott bhavarth dakhoilo. Tea bhair, tumi Jehovachea nitichea dorjeam  pormonnem jieunk, tumchea sobhavant ani jivitant vhodd bodlav kelo tednam pasun tumkam bhavarth ani dhirachi goroz asli. Tumi tumcho dhir vaddoitat toxim ‘tumi voitat thoim Jehova tumchea sangata astolo’ mhunn tumkam khatri astoli. —Joshua 1:7-9 vachat.

13. Tumi niall kelolean ani magnnem kelolean tumcho dhir koso vaddonk xokta?

¹³ Tumi anik koxe toren tumcho dhir vaddounk xoktat? Dhira pasot, Jehova lagim magat. (Itihas 4:29, 31) Jehova tumchea magnneancho zobab ditolo ani to tumkam sodanch tenko ditolo. Tea bhair, Jehovan adim aplea sevokank koxim salvar kelim tea vixim tumi niall korunk zata. Toxench tumkam aslolea oddchonneancho fuddo korunk ani tumchea jivitant bodlav korunk Jehovan tumkam koxi modot kelea tea vixim chintat. Aplea lokank Tambddea Doria thaun salvar kel’lo Dev, Jezucho xis zaunk tumkam modot kortoloch mhunn dubhav na. (Sutt. 14:13) Stotrkarak asloli hi khatri tumkam pasun astoli: “Sorvespor mhojea bhagak asa: tor kosli bhirant? monis mhaka kitem korunk xokta?”—St. 118:6.

14. Masae ani Tomoyo-chea udharonnantlean tumi kitem xiklim?

¹⁴ Dhir vaddounk anik ek vatt asa. Lojetale tea lokank Jehovan koxe dhirvont kele tea vixim xiklolean ami dhir vaddounk xoktat. Ami Masae nanvachea bhoinnicho onnbhov polloum-ia. Ti lojetali ani apleachean porgottnnechem kam kednanch korunk zaunchem na mhunn tika distalem. Tika onvollkhi lokam lagim ulounk khub kotthin zatalem. Hem korop, apleachean choddonk zaunchench na toslea eka vhodd dongra sarkem asa mhunn tika distalem. Tinnem Deva pasot ani xezaream pasot aslolo aplo mog vaddounk khas proitn kelo. Magir, porgottnni korop kitlem gorjechem tea vixim bariksannen chintun, porgottnni korchi itsa vaddounk tinnem Jehova lagim magnnem kelem. Tika asloli bhirant pois zali ani tinnem niemit pioneer mhunn pasun seva keli. ‘Kalljidarponnan ravonk vo dhirvont zaunk’ Jehova novea porgottnnarank pasun modot korunk xokta. Tomoyo nanvachea eka bhoinnicho onnbhov polloum-ia. Tinnem ghor-ghoramnim porgottnni suru keli tednam poileach ghorant eke bailen tika bob marun oxem mhunnttlem: “Jehovachea Sakxeam lagim mhaka ulounk naka.” Ani magir tinnem forsan dar bond kelem. Tomoyo-n dhiran aplea sangata aslolea bhoinnik mhunnttlem: “Tunvem polloilem? Hanvem tika kainch mhunnonk naslem tori astana hanv ek Jehovachem Sakxi mhunn ti vollkholi. Hanv khub khuxal asa!” Tomoyo atam ek niemit pioneer mhunn seva korta.

15. Porgottnni korunk kotthin zata tednam ami kharvea sarkim koxim zaunk xoktat, ani Kristanvamnim kharvea sarkem asop kiteak gorjechem?

¹⁵ Korunk zai tem korcho proitn korop hem eka borea kharveak asonk zai to gunn zaun asa. Eka kharveak fatodder uttchem poddtta, ani vatavoronn borem na zalear pasun taka kam korit ravchem poddtta. Tea bhair, aplem kam purnn zaisor tachean tem kam soddun vochonk zaina. Amkam dilolem tem kam korit ravonk ani purnn korunk amkam pasun eka kharvea sarko gunn asonk zai.—Mt. 10:22.

16. Amkam kotthin zatat tim kamam korunk, amkam kitem modot korunk xokta?

¹⁶ Ami chodd korun ek kam zata titlea sompea toren korunk proitn kortat. Punn chodd korun, jim kamam chodd mhotvachim astat tim korunk sompem asona. Tor korunk zai aslolem tem korunk proitn korop, ho gunn ami vaddovop gorjecho. Toxem zalolean jim kamam korunk kotthin asat tim korunk ami amkanch proxikxonn diunchi goroz asa. Ani hem korunk Jehova aplea povitr xokte udexim amkam modot korta.—Gal. 5:22, 23.

17. 1 Korintkarank 9:25-27-ant sanglolea pormonnem, jem korunk zai aslolem tem korunk, apostl Pauluk kitem korchem poddlem mhunn to sangta?

 ¹⁷ Korunk zai aslolem tem korunk proitn korcho gunn apostl Pauluk aslo. Punn sarkem tem korunk aplea ‘kuddik donddvonnunk vo boddounk’ poddli mhunn tannem manun ghetlem. (1 Korintkarank 9:25-27 vachat.) Apnnakuch xist diun ani ‘soglem mannsugen ani manddavollin zaunk’ tannem herank urba dili. (1 Kor. 14:40) Bori khobor porgottit ravonk ani xikoit ravonk, toxench, Jehovachea bhoktek sombondit aslolim her kamam korunk ami khub proitn korunk zai.—Itihas 2:46.

18. Jehovachea nodren ami amchea porgottnnechea kamant iesosvi zaunk zai zalear kitem korunk zai?

¹⁸ Ek kharvi zaitem nustem dhorta zalear taka iesosvi kharvi mhunnttat. Punn amchem porgottnnechem kam vegllem asa. Ami kitlea lokank Jehovache Sakxi zaunk modot kortat tantuntlean ami iesosvi zainant. (Lukas 8:11-15) Bodlek, ami bori khobor porgottit ravtat zalear ani xikoit ravtat zalear Jehovachea nodren ami iesosvi zatat. Kiteak? Karonn Jehovan ani tachea Putan sanglolem tem ami pallttat.—Marku 13:10; Itihas 5:28, 29.

19-20. Aiz porgottnni korunk amkam khoinchem khas karonn asa?

¹⁹ Thoddea desamnim, vorsak thoddech mhoine nustem dhorunk porvangi asta. Toslea desamnim, nustem dhorop bond kortat te mhoine lagim pavtat toxe, kharvi nustem dhorcho chodd proitn kortat. Teach bhaxen, hea sonvsaracho xevott lagim pavta toso porgottnnechea kamant chodd vavrunk ami amchi urba vaddounk zai. Jiv salvar korchem tem porgottnnechem kam korunk vell khub unno asa. Tumchea jivitant soglem borem astolem tednam tumi hem mhotvachem kam kortolim mhunn rakhon ravonakat.—Up. 11:4.

²⁰ Porgottnni korchi itsa vaddounk, Bible-a vixim tumchem ginean vaddounk, tumcho dhir vaddounk ani korunk zai aslolem tem korunk atam vavrat. Sonvsarbhor, oixim lakham poros chodd lok bori khobor porgottchem kam kortat. Tanchea sangata tumi mellon kam kortat zalear, Jehova dita to sontos tumi onnbhovtolim. (Ne. 8:10) Hea kamant zata titlo vavr korit ravat ani Jehova puro mhunn sangta tea meren tem kam korit ravat. Ami fuddlea lekhant, munxank dhorpi kharvea sarkim Rajeachi bori khobor porgottit ravonk amcho nichov ghott korunk tin vatto polloum-ia.