1-2. Upodexok 11:6-ant sanglam tem ani porgottnnechea kamak koslo sombond asa?

THODDEA desamnim, zaite lok sot zannam zaunk sodhtale dekhun bore khobrek rokddech kan ditat. Punn her desamnim lok, Deva vixim vo Bible-a vixim zannam zaunk sodhinat. Tumchea vattarant lok bori khobor aikotat vo nakartat? Te koxe-i vagom, Jehova puro mhunn sangta tea meren ami porgottnnechem kam korit ravonk zai.

² Porgottnnechem kam kednam bond zatolem, tem Jehovan adim fuddench tharailam. Uprant, “xevott ietolo.” (Mt. 24:14, 36) Tednam meren “vaurpachem thambo naka” hea utrank ami pallo ditat mhunn koxem dakhounk zata? *​—Upodexok 11:6 vachat.

3. Hea lekhant ami kitem bhasabhas kortolim?

³ “Monxank dhortat tosle kharvi” mhunnche, porgottnnechem kam bore toren korpi zaunk goroz asa teo char vostu ami fattlea lekhant polloileo. (Mt. 4:19) Amchi poristhiti kosli-i asum, porgottit ravonk ami ghott nichov korunk zai. Tor hea lekhant porgottit ravonk amcho nichov koso ghott samballunk zata, tacheo tin vatto ami polloum-ia. Teo mhunnttlear: (1) porgottnnechea kamak amchea jivitant poilo zago divop, (2) pasiens dakhovop, ani (3) bhavarth ghott dovrop.

4. Jehovan dilolea kamacher amchem dhean ami kiteak halounk diunk zaina?

⁴ Nimannea disamnim lok koxe astole, ani tea vellar kitem ghoddttolem, tea vixim Jezun aplea xisank adim fuddench sanglolem. Heo ghoddnneo, porgottnnechea kamant tanchem  dhean halounk xokta mhunn Jezu zannam aslo. Taka lagon, tannem aplea xisank ‘zagrut ravonk’ sanglem. (Mt. 24:42) Noahchea disamnim lok zaitea vostuncher aplem dhean dovortale dekhun, Noah ditalo tea xittkaunnecher tannim dhean diunk na. Ani teoch vostu aiz amchem dhean halounk xoktat. (Mt. 24:37-39; 2 Ped. 2:5) Takach lagon, Jehovan amkam aiz dilolea kamacher ami dhean diunk zai.

5. Itihas 1:6-8 vachtana, porgottnnechem kam khoim meren zatolem mhunn kolltta?

⁵ Aiz amchea jivitant ami porgottnnechea kamak poilo zago divop chodd gorjechem zaun asa. Apunn melea uprant pasun aple pattlavdar porgottnnechem kam korit ravtole, ani apnnam poros chodd porgottnni kortole mhunn Jezun sanglem. (Juanv 14:12) Jezu melea uprant, tache thodde xis, portun nusteacho dhondo korunk lagle. Jezu punorjivont zalea uprant, tannem ek vizmit korun aplea thoddea xisank zaitem nuste dhorunk modot keli. Tea vizmita uprant, khoinchea-i kamam poros porgottnnechem kam chodd gorjechem asa mhunn tannem zor dilo. (Juanv 21:15-17) Ani apnnem suru kelolem porgottnnechem kam Israelachea pranta bhair pasun choltolem mhunn Jezun aplea xisank sorgar voichea poilim sanglem. (Itihas 1:6-8.) Thoddea vorsam uprant, Jezun apostl Juanvak ek dorxon dilem, zantunt ‘Somiachea disa’ * kitem ghoddttole tem dakhoilem. Tantuntlea eka khas dorxonant, Juanvan eka devdutak polloilo. “Dor-eka desak, dor-eka kullak, dor-eke bhaxechea lokak, ani dor-eke porjek” tea ainza lagim “sasnnachem xubhvortoman” aslem. (Prok. 1:10; 14:6) Tor, sonvsarbhor cholta tem porgottnnechem kam purnn zai-sor tantunt ami vantto gheunk zai mhunn Jehova axeta.

6. Porgottnnechea kamank sodanch amchea jivitant poilo zago diunk amkam kitem modot korunk xokta?

⁶ Amkam modot korunk Jehova kitem  soglem korta, tachea vixim ami niallttat tednam porgottnnechea kamak ami poilo zago diunk pavtat. Udharonnak, tachea sangata amchi ixttagot samballunk amkam to zaiteo vostu dita. Kagdacher chhaplolim ani electronic prokaxonam, zaite audio ani video, ani internet-a vorvim amkam broadcasting dita. Chintat, amchea website-ir 1,000-a poros chodd bhasamnim mahiti asa! (Mt. 24:45-47) Sonvsarbhor, lok veg-vegllea raxttrank tenko ditat, te veg-veglle dhormache asat, ani thodde girest ani thodde gorib asat. Hea karonnak lagon, lokam modem ekvott na. Punn oixim lak’kham poros chodd Devache lok, sonvsarbhor ekvottan asat. Udharonnak, 2019 hea vorsa sonvsarbhor Jehovachea Sakxeamnim Sukrar Abril 19 tarker, disachem vers bhasabhas kelolo ek viddeo polloilo. Teach disa sanjer, Jezucho Mornnacho Dis ugddas korunk 2,09,19,041 lok mellon aile. Hantuntlean, Sakxeam modem aslolo ekvott dison ieta. Osleo kariavolli pollounk, ani tantunt bhag gheunk amkam aslolea sueoga vixim ami chintat tednam, porgottnnechem kam korit ravonk amkam urba melltta.

7. Jezuchi dekh ghetlolean porgottnnechea kamak amchea jivitant poilo zago ami koxim diunk pavtolim?

⁷ Porgottnnechea kamak amchea jivitant poilo zago diunk anik ek vatt mhunnttlear, Jezuchi dekh ghevop. Kosleach vostuk sota vixim porgott korchea kamacher aplem dhean halounk tannem diunk na. (Juanv 18:37) Soitan taka “sonvsarantleo soglleo razvottkio ani tancho dobazo” diunk toiar aslo tednam, Jezuk tachi as zaunk na. Toxench, lok taka raza korunk sodhtale tednam, tannem apunn raza zaunk chintunk na. (Mt. 4:8, 9; Juanv 6:15) Girestkaiechi axa, vo khor dhumallo tacher probhav ghalunk xokonk na. (Lukas 9:58; Juanv 8:59) Amchea bhavarthachi porikxa zata tednam, ami apostl Paulucho sol’lo ugddas dovortat zalear, porgottnnechea kamant ami amchem dhean dovrunk pavtolim. Tannem Kristanvank Jezuchi dekh gheun, ‘fatti soronastana, kalljidar zaunk’ urba dili!—Heb. 12:3.

8. Pasiens mhunnttlear kitem, ani khas korun aiz kiteak gorjechem?

⁸ Pasiens, ek poristhiti bodolta tea meren xantponnim ravpachi tank zaun asa. Ek kotthin poristhiti kednam kabar zatoli, tachi ami vatt polloit astat tednam, vo kitem tori borem zaunchem asa tachi ami vatt polloit astat tednam, amkam pasiensachi goroz asta. (Hab. 1:2) Udharonnak, Judant asloli hinvxebhorit poristhiti kednam kabar zatoli hachi, provadi Habakuk vatt polloit aslo. Devachea Rajeachi “veginch prokasnni zatoli,” ani Romi hukuma thaun tankam suttka mellttoli mhunn Jezuche xis axeun ravlole. (Lukas 19:11) Devachem Raj noxttemponn kaddun uddoitolem, ani promannik lokamnim bhorlolo ek novo sonvsar haddttolem, hachi ami vatt polloitat. (2 Ped. 3:13) Tednam meren ami pasiens dakhoun, to vell ieum porian Jehovacher patieun ravchi goroz asa. Pasiens dakhounk Jehova amkam xikoita teo thoddeo vatto ami polloum-ia.

9. Jehovak pasiens asa mhunn amkam khoinchea udharonnantlean kollon ieta?

⁹ Pasiens dakhoupant Jehovan ekdom borem udharonn dovorlam. Jehovan Noahk arkpett bandunk ani ‘Devak manta toslea jivitachi porgottnni’ korunk zai titlo vell dilo. (2 Ped. 2:5; 1 Ped. 3:20) Sodom ani Gomorra xarantlea noxttea lokancho nas korunk Jehovan nirnnoi ghetlo tednam Abrahaman tea vixim eka-fattlean-ek prosn vicharle. Punn Jehovan tachem pasiensan aikolem. (Ut. 18:20-33) Zaitea xekddeam meren ovisvaxi Israel raxttrak Jehovan khub pasiens dakhoilem. (Ne. 9:30, 31) Aiz pasun, ‘aplem jivit bodlunk’ sodhtat toslea soglea lokank Jehova zaito vell dita. (2 Ped. 3:9; Juanv 6:44; 1 Tim. 2:3, 4)  Jehovachea hea udharonnacher ami niallttat tednam pasiesan porgottit ravonk ani xikounk amkam urba melltta. Tea bhair, aplea Utrant aslolea eka vopare thaun pasun to amkam pasiensa vixim xikoita.

10. Jakob 5:7, 8-ant sanglolea xetkareachea udharonnantlean ami kitem xiktat?

¹⁰ Jakob 5:7, 8 vachat. Xet roita tea xetkarea thaun ami pasiesa vixim xikonk xoktat. Thoddim zhaddam rokddinch vaddttat tem khorem. Punn choddxea zhaddank foll diunk zaito vell lagta. Israel-ant ek xetkarean bim vomplea uprant pik ie-sor sov mhoine ravchem poddttalem. To xorod kallachea pavsa uprant bim vomptalo ani vosont kallachea pavsa uprant pik lunvtalo. (Marku 4:28) Xetkar dakhoita toslem pasiens ami dakhoitat zalear ami xannim zatolim. Punn hem korop ghoddie sompem aschem na.

11. Pasiens aslolean porgottnnent amkam koxi modot zata?

¹¹ Opurnn munxank chodd korun aplea vavrachem foll rokddench mell’llolem zai. Ami roilolea zhaddachem amkam foll mellonk zai zalear ami mati khonddonk zai, bim vompunk zai, ner kaddunk zai ani udok ghalunk zai. Xis korunk zai zalear ami khub vavurchi goroz asa. Amkam amchea Bible videartheanchea kallzant pavonk, bhed-bhavachim bhavnam kaddun uddounk, ani eka-mekacho mog korunk xikounk vell lagta. Lok amchem aikotat tednam pasun nirax zainastana ravonk amkam pasiensachi goroz asa. Lok amchem aikonk ani xikonk sodhtat tednam pasun amkam pasiensachi goroz asta. Bible videartheacho bhavarth vaddounk ami tacher dobhav ghalunk zaina. Thodde pavtt, Jezun xikoilolem tem somzonk Jezuchea xisank pasun chodd vell laglo. (Juanv 14:9) Ugddas dovrat, ami ghoddie vompit ani udok ghalit, punn tem vaddoupi Dev zaun asa.—1 Kor. 3:6.

12. Sakxi naslolea soireank ami pasiens koxem dakhounk zata?

¹² Sakxi naslolea amchea soireank sot ditana amkam ghoddie pasiens dakhounk kotthin  zaunk puro. Tea vellar amkam Upodexok 3:1, 7-ant aslolem totv modot korunk xokta. Thoim oxem mhunntta: “Dor-eke vostuk ek vell asa . . . ek vell ogim ravunk, ani ek vell ulounk.” Ami uloinastana pasun amchea borea vagnnuke udexim amchea soireank sakx diunk xoktat. Tori astana, ami tankam sota vixim sangonk sodanch toiar asonk zai. (1 Pet. 3:1, 2) Ami urben porgottunk ani xikounk zai. Punn amchea soireank ani her sogleank ami pasiens dakhounk zai.

13-14. Pasiens dakhoilolea thoddeanchim udharonnam diun, tanchea thaun ami kitem xikonk zata tem sangat?

¹³ Bible-antlea ani aichea tempa voilea, visvaxi lokanchea udharonnam thaun ami pasiens xikonk xoktat. Noxttemponn kednam kabar zatolem kai mhunn Habakuk vatt polloit aslo. Punn “mhojea pahreachea zagear ubo ravtolom” mhunn tannem sanglem tednam, tannem pasiens dakhoilem mhunn kolltta. (Hab. 2:1) Apostl Pauluk apli seva korun sompounk zai asli mhunn tannem sanglem. Tori astana, ‘xubhvortomana vixim porgottun tem xarti pavounk vo purnn toren korunk’ to pasiesan vavrit ravlo.—Itihas 20:24.

¹⁴ Gilead kors korun sompoilolea eka kazari zoddpeacho onnbhov polloum-ia. Tankam oslea eka desant dhaddlolem, zoim thoddinch sakxi aslim ani choddxe lok Kristanv dhormache nasle. Tor Bible obheas korunk thoddeach lokank itsa asli. Punn tanchea sangata Gilead korsant aslolim bhav-bhoinnam tankam dhaddlolea desamnim mell’llolea zaite borea Bible obheasa vixim sangtalim. Hem aikon nirax zaunchea bodlek tem zoddpem apleak dhaddlolea vattarant seva korit ravlem. Xevottak, att vorsam porgottnni kelea uprant, tanchea eka Bible videarthean bautizm ghetlo. Adlea kallachea ani aichea kalla voilea udharonnam thaun ami kitem xiktat? Hea visvaxi sevokamnim apli urba unni korunk na vo apleak dilolem kam bond korunk na. Tannim dakhoil’lea pasiensak lagon, Jehovan tancher besanv ghatlem. Tor, “aplea bhavarthan ani thiraien Devan bhasail’lem daiz zoddunk pavtat tanchi dekh” ami gheum-ia.—Heb. 6:10-12.

15. Porgottnni korcho amcho nichov ghott korunk bhavarth modot korta ti ek vatt khoinchi?

¹⁵ Ami porgott’ttat tea sondexacher amkam bhavarth asa dekhun ami zata titlea lokank porgottunk proitn kortat. Devachea Utrant aslolea bhasaunneancher amkam bhavarth asa. (St. 119:42; Iz. 40:8) Amchea disamnim Bible-ant asloleo bhasaunneo purnn zatat teo ami polloileat. Bible-antle sol’le lok aplea jivitant apnnaitat tednam tanchem jivit koxem sudhorlam tem ami polloilam. Hachea udexim soglea lokamnim Devachea Rajeachi bori khobor aikop gorjechem mhunn amkam khatri melltta.

16. Stotr 46:1-3-ant dakhoil’lea pormonnem, Jehovacher ani Jezucher amkam bhavarth asa zalear porgottnni korit ravcho amcho nichov koso ghott zata?

¹⁶ Ami porgott’ttat tea sondexachi zor Jehova zaun asa. Tor Jehovacher ani tannem vinchun kaddlolea Rajeacho Raza Jezucher pasun amkam bhavarth asa. (Juanv 14:1) Amchi poristhiti koxi-i asum Jehova sodanch amcho asro ani boll zaun asa. (Stotr 46:1-3 vachat.) Tea bhair, Jezu sorgar thaun Jehovan taka dil’li xokti ani odhikar uzar korun porgottnnechea kamak margdorxon dita mhunn amkam khatri asa.—Mt. 28:18-20.

17. Ami kiteak porgottnni korit ravonk zai tachem ek udharonn diat?

¹⁷ Amkam bhavarth asa zalear, amchea vavracher ami chintunk na tea vattamnim pasun Jehova besanv ghaltolo mhunn amkam khatri asta. (Up. 11:6) Udharonnak, mezar ani karttar dovorlolim ani lailolim amchim prokaxonam dor disa hozaramnim lok  polloitat. Hea toren porgottnni kelolean, faido zala kai? Hoi! Novembr 2014-antlo Our Kingdom Ministry hantunt ho onnbhov aslo. University-int xiktolea eka tornnattea videarthean Jehovachea Sakxeam vixim ek nibondh borounk chintlo. Taka amchem Raj-ghor mellonk na. Punn taka University-chea bhair Sakxeamnim dovorlolea mezar amchim prokaxonam dislim. Tantunt taka nibondh borounk zai asloli mahiti mell’lli. Fuddem, bautizm gheun tem ek Jehovachem Sakxi zalem ani atam niemit pioneer mhunn seva korta. Osle onnbhov ami aikotat tednam Rajeacho sondex aikonk zaite lok asat mhunn kollon ieta. Hantuntlean porgottnni korit ravonk amkam urba melltta.

18. Jehovak zai toxi Rajeachi bori khobor porgott zatoli mhunn amkam kiteak khatri asa?

¹⁸ Rajeachem kam sarkea vellar korun somptolem mhunn ami khatri dovrunk zata. Noah-chea disamnim kitem zalem tacher dhean diat. Jehova sogleo vostu ekdom sarkea vellar korta mhunn amkam kollon ieta. Buddtti ieunchea sumar 120 vorsam poilinch ti kednam ietoli tem Jehovan tharailolem. Punn zaitea vorsam uprant, Jehovan Noah-k arkpett bandunk sangli. Buddtti ieunchea ghoddie 40 vo 50 vorsam poilim Noah khub vavr korit ravlo. Lok tachem aikonasle tori astana arkpetti bhitor zonvarank haddunk Jehovan sangom porian to xittkaunnecho sondex porgottit ravlo. Uprant, Jehovan arkpettichem “dar bond kelem.”—Ut. 6:3; 7:1, 2, 16.

19. Ami vavurchem bond korinant zalear amkam fuddarak kitem pollounk mellttolem?

¹⁹ Rajeachi bori khobor porgottchem kam korun somplem mhunn Jehova beginuch sangtolo. Tea uprant, to Soitanacho sonvsar nas kortolo. Ani Jehovachem Utor pallttolea lokamnim bhorlolo ek novo sonvsar haddttolo. Tea meren, ami Noah, Habakuk, ani heranchi dekh gheum-ia zannim vavurchem kam bond korunk naslem. Porgottnnechea kamak tumchea jivitant poilo zago diat. Pasiens dakhoiat. Jehovacher ani tachea bhasaunneancher ghott bhavarth dovrat.