OBHEASACHO LEKH 39
Amchim Mogachim Jehovak Soddun Voitat Tednam
“Kitle pavtti . . . tannim Taka okman kelo!”—ST. 78:40.
GIT 102 ‘Oskotank Adar Dium-ia’
KITEM XIKTOLIM *
1. Amcho mogacho konnui Jehovak soddun voita tednam amkam koxem bhogta?
AMCHO mogacho konnui Jehovak soddun voita tednam amchean sosunk zaina titlem dukh amkam zata. Hilda * nanvachi ek bhoinn oxem mhunntta: “Kazarachea 41 vorsam uprant, mhozo ghov bhair poddlo tednam mhojem kalliz tutton gelem. Hachea poros anik vhoddlem dukh na oxem mhaka dislem. Punn uprant, mhojea putan Jehovachi bhokti korop soddun dili ani to aplea bail-bhurgeankui soddun gelo tednam tem dukh mhojean sosunkuch zaina zalem.”
Amcho mogacho konnui Jehovak soddun voita tednam amkam kitlem dukh zata tem Jehova somzota (Peregraf 2-3 polloiat) *
2-3. Stotr 78:40, 41-a pormonnem, amcho mogacho konnui Jehovak soddun voita tednam taka koxem bhogta?
2 Thodde devdut Jehovachea add vochon tachea familintle bhair sorle. (Judas 6) Toxench, Israel raxttr porot-porot tachea add gelem. Tednam Jehova Devak kitlem dukh zalem tea vixim chintat. (Stotr 78:40, 41 vachat.) Tor aiz amcho mogacho konnui Jehovak soddun voita tednam taka pasun khub dukh zata, to amchem dukh somzota ani amkam goroz ti bhuzvonn ani modot diunk toiar asa mhunn ami khatri dovrunk zata.
3 Tor amcho mogacho konnui Jehovak soddun voita tednam ami Jehovachi modot koxi gheunk zata, toxench sobhentlea bhav-bhoinnamnim oslea oddchonnecho fuddo kortat tankam koxi modot korunk zata, tem ami hea lekhant xiktolim. Punn poilim, ami koslem chukichem chintop pois korunk zai tem polloum-ia.
TUMICH ZOBABDAR MHUNN CHINTINAKAT
4. Aplim bhurgim Jehovak soddun voitat tednam choddxea avoi-bapaink koxem dista?
4 Aplim bhurgim Jehovak soddun voitat tednam choddxim avoi-bapui tea pasot apunn zobabdar mhunn chintat. Udharonnak, bhav Luke-achea putak sobhentlean bhair kaddlo tednam tannem oxem mhunnttlem: “Mhozo put Jehovak soddun vochonk hanvuch zobabdar oxem mhaka distalem. Mhaka vaitt sopnam poddonk laglim, hanv khub roddttalo ani mhaka khub dukh zatali.” Toxench, bhoinn Elizabeth-achea putak pasun sobhentlean bhair kaddlo tednam tika koxem bhoglem tem ti sangta: “Mhojea putak sotant bore toren vaddounk hanv khoim tori chukli oxem mhaka dislem.”
5. Bhurgim sot soddttat tednam tacho zobabdar konn?
5 Tor oslea avoi-bapimnim sodanch ugddas dovrunk zai ki Jehova Devan amkam sogleank borem ani vaitt vinchun kaddpachi svotontrtai dilea. Tor apunn Jehovachi seva kortolo kai na hem dor eklean vinchun kaddunk zai. (Josh. 24:15) Zoxem, thoddea avoi-bapaimnim aplea bhurgeank ek bori dekh dovrunk na. Tori punn, tanchea bhurgeamnim visvaxiponnan Jehovachi seva keli. Dusrea vatten, thoddea avoi-bapaimnim aplea bhurgeank Jehovacho mog korunk xikoilo. Punn tim bhurgim vaddlim toxim tim sot soddun gelim. Tor oxem ghoddtta tednam apunn zobabdar asa mhunn avoi-bapaimnim kednanch chintchem nhoi.
6. Ek avoi vo bapui Jehovak soddun voita tednam tanchea bhurgeank koxem dista?
6 Punn thodde pavtti, avoi vo bapui Jehovak ani aplea familik pasun soddun voitat. (St. 27:10) Tea vellar tanchea bhurgeank khub dukh zata. Karonn tim bhurgim tanchea dekhin choltalim. Tor oxem ghoddtta tednam tankam koxem bhogta tem somzonk ami Esther-achea vixim polloum-ia. Tachea paik sobhentlean bhair kaddlolo. Tednam taka koxem dislem tea vixim tem sangta: “Mhozo pai hollu-hollu Jehova thaun pois vochonk na punn mud’dom zaun to Jehovak soddun gelo mhunn hanv khub roddttalem. Ani hanv paicho khub mog kortalem dekhun tachem atam kitem zatolem mhunn chintun hanv khubuch husketalem ani bhietalem.”
7. Tumchim avoi vo bapui Jehovak soddun geleant zalear Jehovak tumchea vixim koxem dista?
7 Bhurgeamno, tumchim avoi vo bapui Jehovak soddun geleant zalear tumchea pasot amkam khub dukh bhogta mhunn zannam zaiat. Tumchea avoi-bapaichea nirnnoiak lagon tumi zobabdar nant mhunn ugddas dovrat. Karonn ami poilim polloilem toxem Jehovan zonn ekleak borem-vaitt vinchun kaddpachi svotontrtai dilea. Ani Jehovak somorponn korun bautizm ghetlolea dor eklean “ap-aplem ojem uklun vhorchem asa.” (Gal. 6:5) Punn Jehova tumchem dukh bore bhaxen somzota. Toxench, to ani sobhentlim bhav-bhoinnam tumcho khub mog kortat ani tumchem visvaxiponn polloun khub khuxal zatat mhunn tumi khatri dovrunk zata.
8. Tumcho mogacho Jehova lagim portun ieta mhonnsor tumi kitem korunk zata? (“ Jehova Lagim Porot Ieiat” hem boks pasun polloiat.)
8 Tumcho mogacho konnui Jehovak soddun gela zalear to porot ietolo mhunn tumi tachi vatt polloit asat astolim. Punn tea mhonnsor, Jehova sangata tumchi ixttagot ghott korunk vavrat. Oxem kelolean tumchea familichea her sodoxiank ani Jehovak soddun geloleak tumi ek bori dekh dovrunk pavtolim. Toxench, hem dukh sosunk tumkam-i modot zatoli. Tor hem ami koxem korunk zata tem atam polloum-ia.
JEHOVA SANGATA TUMCHI IXTTAGOT GHOTT KORUNK TUMI KITEM KORUNK ZATA?
9. Jehova sangata tumchi ixttagot ghott korunk tumi kitem korunk zata? (“ Tumcho Mogacho Konnui Jehovak Soddun Gela Zalear Him Versam Tumkam Bhuzvonn Diunk Xoktat” hem boks pasun polloiat.)
9 Poilem mhunnttlear, Jehova sangata tumchi ixttagot ghott korunk sodanch Bible vachat, tacher niall korat ani mittingek hajir zavop chukoinakat. Toxench, tumchea familichea her sodoxiank-ui oxem korunk modot korat. Hea vixim amkam bhoinn Joanna-chem ek borem udharonn asa. Ticho bapui ani bhoinn Jehovak soddun gelim tednam Jehova lagim apli ixttagot samballunk tika koxi modot zali tea vixim ti sangta: “Hanvem Abigail, Esther, Job, Juze ani Jezu vixim Bible-ant vachlolean ani JW gitam aiklolean mhaka khub modot zali. Mhaka monachi xanti mell’lli, borem kitem zata tacher hanv dhean diunk pavlem ani mhaka urba mell’lli.”
10. Ami dukhi astat tednam Stotr 32:6-8-a pormonnem, ami kitem korunk zai mhunn amkam kollon ieta?
10 Dusrem mhunnttlear, tumche sogle huske ukteponnim Jehovak magnneant sangat. Tor, ami dukhi astat tednam amchim khorim bhavnam Jehova Devak sangonk amkam kotthin zaunk xokta. Punn Jehova amkam somzota, to amcho khub mog korta ani amchim soglim bhavnam ami ukteponnim taka sanglolim zai mhunn ami ugddas dovrunk zai. (Sutt. 34:6; St. 62:7, 8) Tor ami magnnem korchem bond korunk zaina. Punn ti poristhiti Jehova jea ritin polloita teach nodren ami pollounk ani amkam ‘updes diun khoinchi vatt dhorchi ti dakhounk’ modot kor mhunn ami Jehova lagim magonk zai.—Stotr 32:6-8 vachat.
11. Hebrevank 12:11-a pormonnem, patok korta taka xikxa vo xist divop, hi Jehovachi ek bori manddavoll mhunn ami kiteak mhunnonk zata? (“ Sobhentlean Bhair Kaddpachea Manddavollintlean Amkam Jehovacho Mog Dison Ieta” hem boks pasun polloiat.)
11 Tisrem mhunnttlear, vhoddilamnim ghetlolea nirnnoiak tenko diat. Patok korta taka sobhentlean bhair kaddop, hi Jehovachi ek manddavoll. Hea toren xist dilolean, patok korta taka ani sobhent aslolea sogleank boreak poddtta. (Hebrevank 12:11 vachat.) Tor vhoddilamnim sarko nirnnoi gheunk na mhunn konnui tumkam sangta zalear tumi he don vixoi ugddas dovrunk zai. Ek mhunnttlear, to munis patok adarla tachea vixim sogli mahiti tumkam sangona astolo. Ani dusrem, tumkam tea vixim sogli khobor asona. Tor vhoddil ‘Jehova pasot’ neai kortat mhunn ugddas dovrun, tannim Bible-achea totvam pormonnem nirnnoi ghetla mhunn ami patieun ravonk zai.—2 It. 19:6.
12. Elizabeth ani tichea ghovan xist diunchea nirnnoiak tenko dilo mhunn tankam koso faido zalo?
12 Xist diunchea nirnnoiak ami tenko ditat tednam Jehovak soddun gelolea amchea familichea sodoxiak, tachea lagim porot ieunk ami modot kortat. Hea vixim bhoinn Elizabeth, jichea vixim ami poilim uloilolim ti sangta, “Mhojea putak sobhentlo bhair kaddlo tednam tachea lagim kosloch sombond dovorna zaunk amkam khub kotthin zalem. Punn jednam to Jehova lagim porot ailo, tannem amkam sanglem ki vhoddilamnim ghetlolo nirnnoi sarko aslo ani hea xisti thaun taka zaitem xikonk mell’llem. Tor Jehovachi xist sodanch faideak poddtta mhunn mhaka kollon ailem.” Toxench, ticho ghov Mark sangta: “Jehovachea utrak pallo diun, amchea puta lagim kosloch sombond dovorna zaunk tannem amkam modot keli mhunn ami khorench khub khuxal. Karonn oxem kelolean mhojea putak Jehova lagim porot ieunk modot zali mhunn tannem mhaka uprant sanglem.”
13. Amchem dukh sosunk amkam konnam thaun modot mellonk xokta?
13 Chovtem mhunnttlear, tumkam somzon ghetat toslea ixttam lagim uloiat. Karonn tim tumkam borem asa tacher dhean diunk modot korunk xoktat. (Mho. 12:25; 17:17) Bhoinn Joanna, jichea vixim ami poilim uloilolim, tinnem pasun oxench kelem. Ti mhunntta: “Mhaka khub eksurponn bhogtalem. Punn hanv patieunk xokta toslea ixttam lagim uloilem tednam tannim mhaka khub modot keli.” Punn thodde pavtti amchea bhav-bhoinnanchim utram amkam dukhounk xoktat. Hea vellar ami kitem korunk zata?
14. Ami eka-mekak kiteak ‘sosunk ani bhogsunk zai’?
14 Amchea opurnntaiek lagon ami soglim chuktat ani noko astana ami eka-mekak dukhounk xoktat. (Jak. 3:2) Taka lagon amchim bhav-bhoinnam amkam dukhoitat tednam ami tankam pasiens dakhoupachi goroz asa. Ami Apostl Paulun dil’lo sol’lo sodanch ugddas dovrunk zai. Tannem mhunnttlem: “Dusreacher garannem korunk nimit aslear, tumi ekamekak sosunk zai ani bhogsunk zai.” (Kol. 3:13) Ek bhoinnichea familichea sodoxiak sobhentlean bhair kaddlo tednam tinnem oxench kelem. Ti mhunntta: “Mhaka modot korunk sodhtat tim bhav-bhoinnam mhaka dukhounk pavlim tednam tankam bhogsunk Jehovan mhaka modot keli.” Tor, Jehovak soddun geleant tanchea familichea sodoxiank sobhentlea bhav-bhoinnamnim koxi modot korunk zata?
SOBHENTLEA BHAV-BHOINNAMNIM KITEM KORUNK ZATA?
15. Sobhentlean konnakui bhair kaddlo zalear bhav-bhoinnamnim tachea familik koxi modot korunk zata?
15 Eka familint konnakui sobhentlean bhair kaddla zalear, tea famili sangata bhav-bhoinnamnim doiall ritin vagonk zai. Miriam nanvache ek bhoinnichem udharonn ami polloum-ia. Tichea bhavak sobhentlean bhair kaddlo tednam sobhentlim bhav-bhoinnam kitem mhunnttolim mhunn ti uskeunk lagli. Punn kitem ghoddlem tem ti sangta: “Sobhentlim bhav-bhoinnam mhojea sangata roddlim ani mhojea bhava vixim kainch vaitt ulounk nant. Taka lagon hanv eksurem na mhunn mhaka dislem.” Toxench anik ek bhoinn mhunntta: “Mhojea putak sobhentlean bhair kaddlo tednam sobhentlea bhav-bhoinnamnim ieun mhaka bhuzvonn dili. Thoddeank kitem sangop tem kollona zalem. Tori astana tannim mhojea sangata roddon vo ek lhan chitt boroun mhaka khub urba dili.”
16. Sobhentlean bhair kaddla tachea familik, sobhentlea bhav-bhoinnamnim bhuzvonn ani adar koso di-it ravonk zata?
16 Thodde pavtti sobhentlim bhav-bhoinnam, sobhentlean bhair ghatla tachea famili lagim ulovop bond kortat. Punn oxem korop sarkem nhoi! Karonn hea vellar tankam sobhentlea bhav-bhoinnanchea mogachi ani urbechi chodd goroz asta. (Heb. 10:24, 25) Chodd korun, jea tornnatteanchim avoi vo bapui Jehovak soddun geleant, tankam bhav-bhoinnamnim urba divop khub mhotvachem. Zoxem, bhoinn Maria-chea ghovak sobhentlo bhair kaddlo ani to aple familik soddun gelo tednam bhav-bhoinnamnim tika koxi modot keli tea vixim ti sangta: “Sobhentlim thoddim ixttam mhojea ghora ailim ani tannim mhaka randunk ani mhojea bhurgeam sangata obheas korunk modot keli. Tannim mhoji dukh somzon ghetli ani tim mhojea borabor roddlim. Toxench, dusrim mhojea vixim vaitt khobro kortalim tednam tim mhojea pasot uloilim. Tor hea toren tannim mhaka khub urba dili!”—Rom. 12:13, 15.
Jehovak soddun geleant tanchea familichea sodoxiank modot korun sobhentlea bhav-bhoinnamnim tankam mog dakhounk zata (Peregraf 17 polloiat) *
17. Sobhentlean bhair kaddla tachea familichea sodoxiank vhoddilamnim koxi modot korunk zata?
17 Tumi vhoddil asat zalear, sobhentlean bhair kaddla tachea familichea sodoxiank tumi bhuzvonn koxi diunk zata? Poilem mhunnttlear, osleank bhuzvonn diunchi ek khas zobabdari tumkam asa mhunn ugddas dovrat. (1 Tes. 5:14) Zoxem, mitting suru zaunchea poilim ani somplea uprant tanche lagim uloiat. Toxench, tankam bhett diun tanchea sangata magnnem korat. Porgottnnent tanchea sangata kam korat vo tumi kuttumbik bhokti kortat tednam tankam-i apoiat. Oxem kelolean tumi tankam goroz ti bhuzvonn diunk ani mog dakhounk pavtole.—1 Tes. 2:7, 8.
POROT IETOLIM MHUNN TANCHI VATT POLLOIAT ANI JEHOVACHER VISVAS DOVRAT
18. 2 Pedru 3:9-a pormonnem, gombhir patok korta tannem kitem kelolem Jehovak zai?
18 Jehovak ‘konnachench nisontton zal’lem naka punn sogleamnim aplem jivit bodol’lolem taka zai.’ (2 Pedru 3:9 vachat.) Tannem amcho dor ekleacho jiv salvar korunk ek vhoddlem mol farik kelam. Tem mhunnttlear, aplea ekleach Putachem bolidan dilam. Tor ek gombhir patok korta tacho jiv pasun Jehovachea nodren khub moladik. Ani Jehova tancho mog korta mhunn to tankam aplea lagim porot ieunk modot korta. Jezun dilolea sanddlolea putachea voparintlean apnnak soddun geleant tim apleaxim porot ietolim mhunn Jehova vatt polloita hem amkam kollon ieta. (Lukas 15:11-32) Ani oxem zaitim zannam Jehova lagim porot ailolim asat. Ani sobhentlea bhav-bhoinnamnim tankam khuxalkaien ieukar dila. Hench bhoinn Elizabeth, jichea vixim ami poilim uloilolim tinnem onnbhovlem. Ticho put Jehova lagim porot ailo tednam ti ekdom khuxal zali. Ani tinnem mhunnttlem, “Amcho bhorvonso ghott samballunk amkam modot keli ani urba dili tea bhav-bhoinnank hanv khub upkari asa.”
19. Ami Jehovacher kiteak visvas dovrunk zata?
19 Ami Jehovacher amcho visvas ghott dovrunk zata. Karonn to udar kallzacho ani doiall Bapui zaun asa. Ani apli bhokti kortoleancho to khub mog korta. Ani tankam sodanch faideak poddtta toslem margdorxon dita. Toxench, ami dukhi astat tednam to amkam kednanch sanddchona punn ‘amkam vorti podvi vo xokti’ di-it ravtolo mhunn ami khatri dovrunk zata. (Heb. 13:5, 6; 2 Kor. 4:7) Mark, zachea vixim ami poilim uloilolim to sangta: “Jehovan amkam kednanch sanddunk nant. Punn amkam oddchonneo ietat tednam to sodanch amchea laginch asa.” Tor amcho mogacho konnui Jehovak soddun voita tednam pasun tim porot ietolim mhunn vatt polloun ami taka visvaxi ravonk zata.
GIT 44 A Prayer of the Lowly One
^ per. 5 Amcho mogacho konnui Jehovak soddun voita tednam amkam khub dukh zata. Toxench tachea familikui dukh zata. Tor hea lekhant ami tin vixoi polloitolim. Ek, hea vixim Jehovak koxem dista; dusrem, hem dukh sosunk ani aplo bhavarth ghott dovrunk tea familin kitem korunk zai; ani tisrem, sobhentlea bhav-bhoinnamnim tea familik bhuzvonn ani tenko koso diunk zata.
^ per. 1 Hea lekhant aslolim thoddim nanvam bodol’leant.
