1. Zannttim zatat toxim ami kitem korunk vavrunk zata?

AMI zannttim zatat toxim amchi bholaiki bigoddtta. Ani hea karonnak lagon, ami poilim kortalim tem ami atam korunk xokonant. Tor ami Jehovak valorachim nant oxem amkam disonk puro. Punn zaitea vorsam thaun amkam mell’llea ti zannvai ani onnbhov uzar korun ami amchea tornnatteank Jehovachi seva korunk ani anik zobabdareo melloun gheunk modot korunk zata. Hea vixim, zaitea vorsam thaun vhoddil mhunn seva kelolo ek bhav oso mhunntta, “Zanntteponnak lagon hanv poilim korunk xoktalom tem atam korunk xokona. Punn tem kam korunk torrnnatte bhav asat tem polloun hanv khub khuxal zata.”

2. Hea lekhant ami kitem polloitolim?

² Ami fattlea lekhant polloilolem ki tornnattim, zannttea bhav-bhoinnanchi vollokh korun ghetat tednam tankam faido zata. Tor hea lekhant ami zannttea bhav-bhoinnank khoinche gunn aslolean tankam tornnatteank modot korunk sompem zatolem tem polloitolim. Te char gunn zaun asat; khalti asop, mannsugen vagop, upkariponn dakhovop ani udar kallzachim asop. Ani tim osle gunn dakhoitat tednam sobhent aslolea sogleank faido zatolo.

3. Filipkarank 2:3, 4-a pormonnem, khaltikai mhunnttlear kitem, ani amchim zannttim bhav-bhoinnam khaltim asat zalear kitem kortolim?

³ Zannttim bhav-bhoinnam tornnatteank modot korunk sodhtat zalear tannim khaltim asop chodd gorjechem zaun  asa. Karonn khatlim astat tim dusrim aplea poros vortim mhunn chint’tat. (Filipkarank 2:3, 4 vachat.) Amchea zannttea bhav-bhoinnamnim ghoddie ek kam korunk umkich vatt apnnailea astoli, punn tim khaltim astat tednam tem kam korunk Bible-a add vochonant tosleo anikui zaiteo vatto asat mhunn tim somzon ghetat. (Up. 7:10) Karonn “hea sonvsarachem rup bodlot asa” mhunn tim ugddas dovortat. (1 Kor. 7:31, NW) Tea pasot, tim noveo-noveo vatto apnnaunk toiar astat. Punn apunn xikleant tem tornnatteank sangonk tim fattim soronant.

4. Sorkittachi dekhrekh korpi bhav adlea kallachea Levitam sarke khaltikai koxi dakhoitat?

⁴ Zannttim bhav-bhoinnam khaltim astat tednam tim poilim kortalim titlich seva atam korunk xokonant mhunn somzon ghetat. Hachem ek borem udharonn mhunnttlear, sorkittachi dekhrekh korpi bhav. Adlea kallar Levit 50 vorsanche zalea uprant, tombuchem kam soddun tankam ek vegllem kam korchem poddttalem. Punn hem novem kam korunk ani tornnatteam Levitank aplea kamant modot korunk te khuxal asle. (Lok. 8:25, 26) Teach bhaxen, sorkittachi dekhrekh korpi bhav 70 vorsanche zalea uprant tankam ek veglli zobabdari samballchi poddtta. He bhav khub vorsam thaun zaitea sobhank bhett ditale ani bhav-bhoinnank modot kortale. Tor tankam ghoddie hench kam korit ravonk dista astolem. Tori astana, te Levitam bhaxen apleak dilolem khoinchem-i kam korunk toiar astat. Apleak asloli zobabdari tornnatte bhav anik bore  toren korunk xoktat mhunn te somzon ghetat ani te asat tea sobhentlea bhav-bhoinnank modot korunk ani urba diunk te khub vavurtat.

5. Dan ani Katie-chea udharonna thaun zannttim bhav-bhoinnam kitem xiktat?

⁵ Hea vixim sorkittachi dekhrekh korpi bhav Dan-achem udharonn ami polloum-ia. To 23 vorsam thaun sorkittachem kam kortalo ani 70 vorsanchea piraier taka ani tachi bail, Katie-k khas pioneer mhunn dhaddlim. Punn hea novea kamant pasun tim khub vavurtat. Bhav Dan sobhent veg-veglleo zobabdareo samballta, bhavank sobhecho sevok zaunk proxikxonn dita toxench bhav-bhoinnank xarant porgottnni korunk ani jail-int vochon porgottnni korunk proxikxonn dita. Hantuntlean tumi zannttim bhav-bhoinnam kitem xiktat? Tumi purnn vellachea sevent asum vo nasum, tumi kitem korunk xokonant tacher dhean diunchea bodlek tumi kitem korunk xoktat tantunt khuxalkaien vavrat ani nove-nove dhei dovrat.

6. Zannttea bhav-bhoinnamnim mannsugen vagop kiteak gorjechem? Ek udharonn diat.

⁶ Zannttea bhav-bhoinnamnim mannsugen vagop gorjechem. Hacho orth, apleachean kitem korunk zata vo zaina tem tannim somzon gheunk zai. Oxem tim kortat tednam tim khuxal astolim ani Jehovachi seva korit ravonk xoktolim. Hem somzonk ami ek udharonn polloum-ia. Ek gaddi choddtter choddtta tednam driver-ak ti gaddi 1^st vo 2^nd gear-ant ghalchi poddtta. To oxem korta tednam gaddiechi speed unni zatoli ti khori punn gaddi bond poddonastana fuddem vochot ravtoli. Teach bhaxen, zannttim bhav-bhoinnam apleachean kitem korunk zaina tem somzon gheun, apnna lagim zata tem korunk vavurtat tednam tim sovkas-sovkas Jehovachi seva ani toxench dusreank modot korit ravonk pavtolim.—Filp. 4:5.

7. Barzillai mannsugen koso vaglo?

⁷ Mannsuge vixim amkam Barzillai-achem ek borem udharonn asa. To 80 vorsancho aslo tednam, Raza Davidan taka aplea dorbarant seva korunk apoilo. Punn aplea piraiek lagon apleachean tem kam korunk zaunchem na mhunn Barzillai-an somzon ghetlem. Hea pasot tannem tornnattea Kimhamak tem kam korunk dhaddlo. (2 Sam. 19:35-37) Tor Barzillai-a bhaxen zanntte bhav apleachean kitem korunk zaina tem somzon gheun, tornnattea bhavank tem kam korunk sondhi ditat.

8. Raza David mannsugen koso vaglo?

⁸ Raza David pasun mannsugen vaglo. Taka Jehova pasot devmondir bandunk zai aslem. Punn ti sondhi taka diunchea bodlek, Jehovan tacho put Solomon-ak ditolo mhunn sanglem. (1 It. 17:4) Tednam aplo put Solomon “ozunui bhurgo ani onnbhov naslolo” ani apnnem tem kam kelear borem zatolem aslem, oxem tannem chintunk na. (1 It. 29:1) Tachea bodlek, Jehovan sanglem tem tannem manun ghetlem ani tea bandkamak apleachean zata to soglo tenko tannem dilo. (1 It. 22:5) Karonn tem kam borem zaunk, aplo onnbhov vo pirai nhoi, punn Jehovachem besanv gorjechem aslem mhunn tannem ugddas dovorlo. Teach bhaxen, zannttim bhav-bhoinnam pasun apunn poilim kortalim tem kam atam tornnattim kortat tem polloun Jehova tancher besanv ghaltolo mhunn khatri dovortat ani apunn sod’dheak asat tea kamant vavrit ravtat.

9. Bhav Shigeo mannsugen koso vaglo?

⁹ Amchea disamnim pasun zanntte bhav mannsugen koxe vagtat tem zannam zaunk ami bhav Shigeo-chem udharonn polloum-ia. 1976-ant, to 30 vorsancho aslo tednam taka Xakha Somitint seva korunk sondhi mell’lli.  Ani 2004-ant taka Xakha Somiticho sohokari mhunn nemlo. Punn uprant, poilim kortalo teach bhaxen atam seva korunk apleak titlem boll na mhunn bhav Shigeo-n somzon ghetlem. Tannem tea vixim magnnem kelem ani hem kam atam eka tornnattea bhavak dilear boreak poddttolem mhunn tannem chintlem. Ani atam, to Xakha Somiticho sohokari mhunn seva korina zalear pasun to Xakha Somitintlea her bhavam sangata apleachean korunk zata tem kam khuxalkaien korta. Tor Barzillai, Raza David ani bhav Shigeo-chea udharonnantlean amkam kollon ieta ki zanntte bhav khalti ani mannsugeche astat tednam te tornnatteanchea oskotaiencher nhoi, punn tannim kitem korunk zata tacher dhean ditat. Ani tanchea sangata apleak sor korchea bodlek, te tanchea sangata kam korunk khuxal zatat.—Mho. 20:29.

10. Zannttea bhav-bhoinnank sobhentlea tornnantteam vixim koxem dista?

¹⁰ Zannttim bhav-bhoinnam, tornnatteank Jehova thaun ek dennem mhunn lekhtat. Karonn zannttea bhav-bhoinnank poilim asli titli xokti na. Punn tornnatteank ti xokti asa ani tim Jehovak ani sobhek lagon khub vavrunk xoktat. Taka lagon, zannttim bhav-bhoinnam tornnattea bhav-bhoinnanchim khub upkari asat.

11. Ruth 4:13-16-ntlean, zannttim tornnatteanchi modot ghetat tednam tankam koso faido zata tem somzaiat.

¹¹ Ami Naomi-chem udharonn polloum-ia. Tika apli sun, Ruth-a thaun modot mell’lli mhunn ti tache upkari asli. Naomi-cho put bhair poddlo tednam tinnem Ruth-ak porot tachea ganv-ghora vochonk sanglem. Punn tichi modot korunk Ruth tichea sangata Bethlehem-ant ieunk fuddem sorli tednam  Naomi-n tichi modot manun ghetli. (Ruth 1:7, 8, 18) Oxem kelolean tankam dogaim-kui besanv mell’llem! (Ruth 4:13-16 vachat.) Tor heach bhaxen, zannttim bhav-bhoinnam khaltikaien tornnatteanchi modot ghetat tednam tankam faido zatolo.

12. Apostl Paulu, Jehovak ani bhav-bhoinnank kiteak upkari aslo?

¹² Bhav-bhoinnam thaun modot mell’lli mhunn apostl Paulu pasun tanche upkari aslo. To urben hozaramnim kilometr pois vochon porgott’ttalo ani sobhank bhett ditalo. Punn tannem sodanch khaltikaien bhav-bhoinnanchi modot ghetli. Udharonnak, Filipintlea Kristanvamnim taka kitem tori dan kelem tednam tachea pasot tannem tankam upkar attoile. (Filp. 4:16) Toxench, Timotan taka kel’lea modotik lagon pasun tannem tache upkar attoile. (Filp. 2:19-22) Tea bhair, taka Romant koidi mhunn vhortale tednam bhav-bhoinnamnim ieun taka urba dili mhunn tannem Jehovak upkar attoile.—Itihas 28:15.

13. Zannttim bhav-bhoinnam tornnatteam pasot upkarim asat mhunn koxim dakhounk xoktat?

¹³ Tor zannttea bhav-bhoinnamno, tumchea sobhent Jehovan tornnatteank voddun haddleant mhunn tumi ‘taka dhinvaxi vo upkari’ koxim zaunk xoktat? (Juanv 6:44; Kol. 3:15) Tumkam bazar korpak vo khoim vhoron pavoupak vo anik khoinche-i toren tornnattim modot korunk sodhtat tednam upkari kallzan tanchi modot gheiat. Karonn hea toren Jehovacho mog tumkam dison ietolo ani tornnatteam sangata tumi bori ixttagot korunk pavtolim. Toxench, tumi tankam Jehova sangata ixttagot ghott korunk modot kortat tednam, tim sobhent kortat ti vaddavoll polloun tumi khuxal asat mhunn tankam sangtat tednam, ani tumchea jivitantle onnbhov tankam sangtat tednam tumi tanchea pasot upkari asat mhunn dakhoitolim.—1 Tes. 5:18.

14. Raza David udar kallzacho aslo mhunn amkam koxem kolltta?

¹⁴ Zanttim bhav-bhoinnam Raza Davida thaun anik ek gunn xikonk xoktat. Tem mhunnttlear, udar kallzachim asop. Devmondir bandlea uprant tem Solomonan bandlam oxem lok mhunnttole mhunn David zannam aslo. Tori astana, tannem bandkama pasot poixe ani moladik vostu dan keleo. (1 It. 22:11-16; 29:3, 4) Teach bhaxen, aiz zannttim bhav-bhoinnam Jehovachea songottnnechea bandkamant chodd korunk xokonant. Punn tachea pasot tim apleachean zata titlem dan korunk xoktat. Tea bhair, bandkama vixim tankam onnbhov vo ginean asa zalear tem uzar korun tannim tornnatteank modot korunk zata.

15. Apostl Paulu udar kallzan Timotak kitem diunk pavlo?

¹⁵ Apostl Paulu pasun udar kallzacho aslo. Tannem Timotak aplea sangata mixinori kamant sangat diunk apoilo. (Itihas 16:1-3) Tea bhair, tannem Timotak porgottchi ani xikounchi kola udar kallzan xikoili. Jea toren Paulun Timotak proxikxonn dilem, tantuntlean Timot fokot ek boro porgottpi ani xikoupi zaunk na, punn to dusreank-ui Paulu bhaxen proxikxonn diunk pavlo.—1 Kor. 4:17.

16. Bhav Shigeo-n Xakha Somitintlea her bhavank proxikxonn kiteak dilem?

¹⁶ Aiz zaite zanntte bhav, tornnattea bhavank proxikxonn ditat dekhun sobhent aslolea sogleank kitlo faido zata! Tannim oxem kelem zalear sobhent tanchi goroz aschi na oxem te chintinant. Udharonnak, bhav Shigeo, zachea vixim ami poilim polloil’lem, to Xakha Somitint aplea poros piraien lhan aslolea bhavank proxikxonn di-it ravlo. Karonn tea desant Jehovachem kam fuddem vhoronk oxem korop mhotvachem mhunn to zannam aslo. Haka lagon, bhav Shigeo zanntto zalo  tednam tannem proxikxonn dil’lo anik ek bhav ti zobabdari samballunk pavlo. Bhav Shigeo gel’lea 45 poros chodd vorsam thaun Xakha Somitint kam korta. Tachea onnbhova thaun Xakha Somitichea her bhavank khub adar zala.

17. Lukas 6:38-ant dil’lem totv zannttea bhav-bhoinnamnim koxem apnnaunk zata?

¹⁷ Zannttea bhav-bhoinnamno, tumcho bhavarth ani visvas ami polloitat tednam Jehovachi seva korop jivitant sogleant bori vatt mhunn amkam kollon ieta. Tumchea udharonnantlean Bible-antlim totvam xikon tim amchea jivitant apnnavop kitlem faideachem tem tumi dakhoun ditat. Tumchea onnbhovantlean thoddeo vostu poilim koxeo kortalim tem tumi zannant. Punn vell bodolta toso atam tumi zaite bodlav keleat ani teo vostu eke nove toren korunk xikleant. Tumi halinch bautizm ghetla zalear pasun hea piraiecher Jehovachi vollokh ghetlolean tumkam kitlo sontos mell’lla tea vixim tumi tornnattea bhav-bhoinnank sangonk zata. Tumi xikleant tim lisanvam ani tumche onnbhov aikonk tim khub khuxal zatolim. Ani tumchea lagim aslolea zannvaiechea bhanddarantlem tumi dusreank ‘ditat’ tednam Jehova tumcher khub besanv ghaltolo.—Lukas 6:38 vachat.

18. Zannttim ani tornnattim sangata mellon kam kortat tednam tacho kitem porinnam zata?

¹⁸ Zannttim toxench tornnattim bhav-bhoinnam eka-mekak khub valorachim zaun asat. Karonn zanntteam lagim khub tempacho onnbhov ani zannvai asa, ani tornnatteam lagim takot asa. Tor tim sangata mellon kam kortat tednam tim borim ixttam zaunk pavtat ani eka-mekak tenko diunk pavtat. (Rom. 1:12) Hea vorvim, tim sorginchea Bapak mhoima haddunk pavtat ani sobhent aslolea sogleank faido zata.