1-2. (a) Mhonn’nneo 16:31-a pormonnem, ami amchea zannttea bhav-bhoinnank koxim lekhunk zai? (b) Hea lekhant ami khoinchea prosnanche zobab polloitolim?

AMERIKENT ek bag asa zoim lokank vatter cholta-bhonvtanach hire mellonk xoktat. Punn te hire tasun chok-chokit korunk nant dekhun te fatra bhaxenuch distat. Hea pasot te hire lokanchea dolleam mukhar aslear pasun tancher lokanchi nodor poddona.

² Hea hiream bhaxen amchim zannttim bhav-bhoinnam pasun khub valorachim. Ani hea pasot Bible-ant tanchea dhovea kensank manacho mukutt mhunnttlolo asa. (Mhonn’nneo 16:31 vachat; 20:29) Punn thoddea pavtti, amchim zannttim bhav-bhoinnam kitlim valorachim asat hem somzonk ami chukonk xoktat. Punn him zannttim bhav-bhoinnam khub valorachim asat mhunn ami zannam zaun ghetat tednam amkam khub faido zatolo. Tor hea lekhant ami tin prosnanche zobab polloitolim. Jehova zannttea bhav-bhoinnank valorachim mhunn kiteak lekhta? Jehovachea songottnnent tim mhotvachim kiteak zaun asat? Ani tanchea udharonnantlean amkam faido zaunk ami kitem korunk zata?

3. Stotr 92:12-15 pormonnem, amchim zannttim bhav-bhoinnam Jehova Devak kiteak valorachim zaun asat?

³ Jehova amchea zannttea bhav-bhoinnancho khub mog korta ani valor korta, karonn tankam zaite sobit gunn asat. Tankam asloli zannvai tim tornnatteank ditat tednam Jehova khub khuxal zata. (Job 12:12; Mho. 1:1-4) Toxench kotthin poristhitinim, tannim dakhoil’lea bhavarthacho ani sosnikaiecho to khub valor korta. (Mal. 3:16) Toxench, fuddara  vixim tankam aslolo bhorvonso tannim aiz pasun thir-ghott dovorla. Ani “mhatare piraier legun” tim porgottnni korit asat mhunn Jehova tancho khub mog korta. —Stotr 92:12-15 vachat.

4. Tumi zannttim zaleant zalear kitem ugddas dovorlolean tumkam urba mellonk xokta?

⁴ Tumi zannttim zaleant zalear tumi valorachim nant, oxem chintinakat. Karonn tumi kel’lo soglo vavr Jehova visorna. (Heb. 6:10) Zoxem tumi urben porgottnni kelea, tras aslear pasun sosnikaien tancho fuddo kela, Bible-achea totvam pormonnem jieleant ani tea vixim dusreank sanglam. Toxench, tumi songottnnent zaiteo zobabdareo samball’lleat ani dusreank proxikxonn dilam. Tea bhair, Jehovachea songottnnent zatat te bodlav manun ghetleat, purnn vellachea sevent kam kortoleank urba ani tenko dila ani mhotvachem mhunnttlear, tumi Jehovak visvaxi ravleant. Hem soglem tumi kelam mhunn Jehova tumcho khub mog korta ani “aplea bhoktank to kodinch sanddcho na” mhunn tannem utor dilam! (St. 37:28) Toxench, “tumche kens pikosor Hanv tumkam samballun vhortolom,” mhunn Jehova tumkam khatri dita. (Iz. 46:4) Tor tumi tachea songottnnent khub valorachim zaun asat!

5. Amchea zannttea bhav-bhoinnamnim kitem ugddas dovrunk zai?

⁵ Amchea zannttea bhav-bhoinnank tornnattea piraier asloli takot aiz ghoddie na asot. Tori punn, tim Jehovachea songottnnent khub mhotvachim zaun asat, karonn tankam zaito onnbhov asa. Ani hea piraier pasun Jehova tankam veg-vegllea toren uzar korunk xokta. Tor hem somzonk, adlea tempa voilim ani atanchea kallachea thoddea zannttea bhav-bhoinnanchim udharonnam polloum-ia.

6-7. Zannttea piraier pasun apleachi seva kortoleancher Jehovan besanv ghatlem. Oslea thoddeanchim udharonnam diat.

⁶ Zanntte piraier pasun Jehovachi seva korit ravlim toslea bhav-bhoinnanchim udharonnam amkam Bible-ant mellttat. Udharonnak, Moizes sumar 80 vorsancho aslo tednam Jehovan taka aplo provadi ani Israel raxttracho fuddari mhunn vinchun kaddlo. Toxench, Daniel sumar 90 vorsam  poros chodd piraiecho aslo tednam pasun Jehova taka aplo provadi mhunn uzar kortalo. Ani Jehovan apostl Juanvak, Prokasovnni pustok borounk prerit kelo tednam to-ui sumar 90 vorsam poros chodd piraiecho aslo.

⁷ Anikui zaitea zannamnim pasun visvaxiponnan Jehovachi seva keli. Punn choddso lok tankam vollkhonasle. Tori astana, tannim zanntteponnant kelolea sevecho Jehovan valor kelo. Udharonnak, Simeon-a vixim polloum-ia. Bible-ant tachea vixim chodd kai sangonk na. Punn to ek “promannik ani bhoktivont” munis aslo. Ani tannem kel’lea seve pasot Jehovan tacher besanv ghatlem. Jezu zolmolo tednam, taka ani tachea avoik pollounk ani tanchea vixim bhakit korunk taka ek sondhi mell’lli. (Lukas 2:22, 25-35) Toxench, ami Anna vixim pollounk zata. Ti zanntti vidva provadin 84 vorsanchi asli. Tori astana ‘ti devmondir sanddinasli vo chukonastana devmondirant ietali.’ Ti visvaxiponnan seva kortali dekhun tika pasun Jezuk pollounchi sondhi mell’lli.—Lukas 2:36-38, Povitr Pustok - Novo Korar.

8-9. Ek bhoinnicho ghov bhair poddlea uprant pasun ti Jehovachi seva koxi korit ravli?

⁸ Aiz pasun, oslim zaitim bhav-bhoinnam asat jim tornnatteank ekdom borim udharonnam zaun asat. Atam ami bhoinn Lois Didur-achem udharonn polloum-ia. Ti 21 vorsanchi astanach ek khas pioneer mhunn Canada-nt seva korunk lagli. Uprant ticho ghov, John ani tinnem zaitim vorsam sorkittachem kam kelem. Toxench, 20 vorsam poros chodd vorsam tannim Canada-ntlea Bethel-ant seva keli. Ani bhoinn Lois 58 vorsanchi asli tednam, tankam Ukraine-ant seva korunk apounnem mell’llem. ‘Atam amchi pirai zali,’ oxem chintun fatti sorchea bodlek tim thoim vochonk toiar zalim. Ani thoim gelea uprant, bhav John-ak thoinchea Xakha Somitint seva korunk nemlo. Sat vorsam uprant bhav John bhair poddlo. Punn bhoinn Lois thoinch ravon apli seva korit ravli. Aiz bhoinn Lois 81 vorsanchi zaun asa ani Ukraine Bethel-ant visvaxiponnan Jehovachi seva korit asa. Ani thoinchim bhav-bhoinnam ticho khub mog kortat.

⁹ Aiz pasun bhoinn Lois-a bhaxen zaiteo vidva bhoinno asat. Tankam ghoddie choddxim bhav-bhoinnam vollkhonant astolim vo tancher chodd dhean dinant astolim. Punn tim khub valorachim asat. Ani zaitim vorsam, tannim aplea ghovank Jehovachi seva korunk tenko dila ani aiz pasun tim visvaxiponnan tachi seva korit asat dekhun Jehova tancho khub mog korta. (1 Tim. 5:3) Toxench, tim tornnatteank Jehovachi seva korunk urba ditat.

10. Eksuro ravon pasun bhav Tony-n koslem borem udharonn dovorlam?

¹⁰ Amchea modem oslim zaitim zannttim bhav-bhoinnam asat jim eksurim ravtat. Tim pasun khub valorachim asat. Ami bhav Tony-chem udharonn polloum-ia. Agost 1942-ant, to 20 vorsancho aslo tednam  tannem Pennsylvania, U.S.A.-nt bautizm ghetlo. Bautizm ghetlea uprant, taka soineant bhorti zaunk lailo. Punn tannem nakarlem dekhun taka oddez vorsam bondkhonnint ghatlo. Tannem ani tachi bail, Hilda-n tanchea donui bhurgeank sotant vaddoilim. Bhav Tony-n khub vorsam thaun tin veg-vegllea sobhamnim, sobhentlea vhoddilancho sohokari toxench sorkitt zomaticho dekhrekh korpi mhunn kam kelem. To eka jail-int pasun bhett korun mittingo ani Bible obheas ghetalo. Aiz bhav Tony 98 vorsancho asa ani to eksuro ravta. Tori astana, to sobhentlea bhav-bhoinnam sangata mellon Jehovachea sevent apleachean zata titlem korunk vavurta.

11. Eksurim ravtolim bhav-bhoinnam valorachim asat mhunn ami koxem dakhounk zata?

¹¹ Tor eksurim ravtolim oslim zannttim bhav-bhoinnam valorachim asat mhunn ami koxem dakhounk zata? Tankam mitting aikonk vo thoim hajir zaunk, ani porgottnnent bhag gheunk vhoddilamnim tanchea pasot manddavoll korunk zata. Ami tankam bhett diunk zata vo video call korun tanchea lagim ulounk zata. Thoddim zannttim bhav-bhoinnam ghoddie aplea vixim sangonk fatti ravonk xoktat. Punn ami tankam prosn vicharun tanchem aikotat tednam Jehovachea sevent tankam mell’llolea borea onnbhovam vixim tim amkam sangonk xoktat. Tor eksurim ravtolea ani khas korun sobhentlea vattara thaun pois ravtolea oslea zannttea bhav-bhoinnank ami kednanch visorchem nhoi.

12. Amchea zannttea bhav-bhoinnanchi ami vollokh korun ghetli zalear amkam kitem kollon ietolem?

¹² Amchea sobhent aslolea zannttea bhav-bhoinnank vollkhon gheunk ami vell kaddunk zai. Karonn ami oxem kortat tednam ami tancho anik valor korunk pavtolim. Atam ami bhoinn Harriette-a vixim polloum-ia. Tinnem zaitim vorsam New Jersey, U.S.A.-nt aplea sobhent visvaxiponnan Jehovachi seva keli. Punn ti aplea dhuve sangata ravonk geli tednam tea sobhentlea bhav-bhoinnamnim tichi vollokh korun ghetli. Sumar 1925 hea vorsa, ti poilech pavtt sot xikli tednam tinnem koxi porgottnni keli tem tankam kollon ailem. Udharonnak, ti porgottnnek voitana sodanch toothbrush gheun voitali, karonn tea vellar kednam konn tika dhorun bondkhonnint ghaltolo hem ti noko asli. Ani 1933-ant, tika oxench ghoddlem jednam don pavtti tika ek suman bondkhonnint sarchem poddlem. Ani hea vellar ticho ghov zo sotant naslo tannem tanchea tin lhan bhurgeanchi kallji ghetli. Tor hea toren, bhoinn Harriette-a sarkim sobhent aslolea amchea zannttea bhav-bhoinnanchi vollokh korun ghetat tednam tim kitlim valorachim asat tem amkam kollon ietolem.

13. Amchim soglim zannttim bhav-bhoinnam kitlim valorachim asat mhunn ami xiklim?

¹³ Tor amchim soglim zanttim bhav-bhoinnam Jehovachea songottnnek khub valorachim zaun asat. Karonn Jehovan aplea songottnnecher ani tancher koxem besanv ghatlam tem tannim polloilam. Toxench, tannim kel’lea chukintlean tim khub lisanvam xikleant. Tor ami tankam ‘zannvaiechi zhor’ mhunn polloum-ia. (Mho. 18:4) Ani tanchi vollokh korun gheun, tanchea onnbhovantlean xikon amcho bhavarth ghott korum-ia!

14. Dusri Somurt 32:7 amkam kitem korunk urba dita?

¹⁴ Amchea zannttea bhav-bhoinnanchi dixtt ani ulovop ghoddie poilim bhaxen na asot. Tori punn, tim zaitem korunk vavurtat. Ani tannim Jehova mukhar ek “borem nanv” kelam. (Up. 7:1) Elisha vixim chintat. Tannem Elijak kednanch sanddunk na. Tin pavtti tannem  Elijak, “hanv tuka sanddchomna!” oxem mhunnttlem. (2 Raz. 2:2, 4, 6) Ani xevottacho dis pasun to tachea sangata ravlo. Tor ami pasun amchea zannttea bhav-bhoinnank man diunk zai ani tanchea lagim ulounk poilem pavl gheunk zai. (Dusri Somurt 32:7 vachat.) Toxench, Jehova tancho khub valor korta mhunn ami ugddas dovrunk zai.

15. Zannttea bhav-bhoinnam lagim uloitana ami tankam kosle prosn vicharunk zatat?

¹⁵ Zannttea bhav-bhoinnam lagim uloitana tanchea vixim zannam zaunk, ami tankam prosn vicharunk zatat ani kan diun tanchem aikonk zata. (Mho. 1:5; 20:5) Hea toren, ami tankam man ditat mhunn dakhoitolim. (1 Tim. 5:1, 2) Tankam vicharunk zatat tosle thodde prosn mhunnttlear: “Tumi tornnattim aslim tednam hench sot mhunn tumkam koxi khatri zali?” “Tumchea jivitant jem kitem ghoddlam tachea vorvim Jehovak lagim soronk tumkam koxi modot zali?” ani, “Jehovachea sevent khuxal ravonk tumkam koxi modot zalea?”—1 Tim. 6:6-8.

16. Ami zannttea bhav-bhoinnam lagim uloilolean kitem zaunk pavtolem?

¹⁶ Tor hea toren, ami tornattim, amchea zannttea bhav-bhoinnam lagim uloitat tednam Jehova aplea sevokanchi kallji gheta mhunn amchi khatri vaddttoli. (Rom. 1:12) Toxench, amchea zannttea bhav-bhoinnankui man mellttolo. Ani Jehovan tankam dil’lea besanvam vixim amkam sangonk tim khub khuxal zatolim.

17. Amchim bhav-bhoinnam zannttim zatat titlinch anikui sobit zait voitat oxem ami kiteak mhunnonk zata?

¹⁷ Ami zannttim zatat toxim amchi bhaili sobitkai unni zait voita. Punn Jehovak visvaxi aslolim amchim zannttim bhav-bhoinnam anikui sobit zait voitat. (1 Tes. 1:2, 3) Oxem ami kiteak mhunnonk zata? Karonn hea zannttea bhav-bhoinnamnim, Jehovachea povitr xoktechea modotin aplea jivitant bodlav keleat ani apnnam bhitor bore gunn tim vaddounk pavleant. Tor ami tanchea vixim zannam zaunk proitn kortat tednam ami tankam man diunk, tanchea koddlean xikonk ani tankam anik valorachim mhunn lekhunk pavtolim.

18. Ami fuddlea lekhant kitem polloitolim?

¹⁸ Ami amchea zannttea bhav-bhoinnank valorachim mhunn lekhtat. Teach bhaxen tannim pasun sobhent aslolea tornnatteancho valor korunk zai. Ani oxem korun sobha ghott urtoli. Tor hem tannim koxem korunk zata tem ami fuddlea lekhant polloitolim.