1940 vorsachea thoddeach vella uprant, mhojim mummy daddy Jehovachea Sakxeam sangata Bible xikonk laglim. Uprant, tannim to Bible obheas bond kelo. Punn mhoje mummy-k, Pahrogopur ani Zagrut Ravat! masikam ie-it ravlim. Magir 1950-ant, New York City-nt aslolea ontoraxttria odhivexonak hajir zaunk amkam amontronn mellʼllem, ani amchi famil thoim geli.

Tea uprant rokddoch, bhav Lawrence Jeffries amkam bhett diunk laglo. Tannem mhaka sot xikonk modot keli. Poilim-poilim, Jehovachim Sakxi zhuzant ani rajkaronnant bhag ghenant tem mhaka avoddnaslem. Hanvem taka mhunnttlem: “Amerikent konnuch zhuzant bhag ghenant zalear dusman amcher akromonn korunk xoktat.” Bhav Jeffries-an pasiensan mhojem aikolem ani mhaka oxem vicharlem: “Amerikent aslolim soglim zannam Jehovachi seva kortalim, ani tanchea dusmanamnim tancher akromonn kelʼlem zalear Jehova Dev kitem kortolo aslo oxem tuka dista?” Oslea ani her vixoi-am vixim bhav mhaka jem somzaitalo, tea vorvim mhojem chintop sarkem naslem mhunn mhaka kollon ailem. Tea pasot, Bible-achem sot xikonk mhoji umed anik vaddli.

Mhoje mummy-in samballun dovorlolim pornim Pahrogopur ani Zagrut Ravat! masikam vachunk hanv khub vell sartalo. Uprant, hench sot mhunn mhaka kollon ailem. Tea pasot, bhav Jeffries-a sangata Bible obheas korunk hanv toiar zalo. Toxench, hanv chukonastana mittingek vochonk laglo. Hanv xiktalo tea sotacho hanv khub mog kortalo ani hanv dusreankui bori khobor porgottunk laglo. Ani uprant, “Sorvesporacho Vhoddlo Dis lagim pavla” mhunn mhaka kollʼllem tednam hanvem mhozo dhei bodolʼlo. (Zef. 1:14) Tem mhunnttlear, university-chem xikop gheunchea bodlek, hanv dusreank Bible-antlem sot xikounk sodhtalo.

Jun 13, 1956-ant, mhojem iskolachem xikop somplem. Ani tin disam uprant, eke sorkitt zomatik hanvem  bautizm ghetlo. Punn tea vellar, Jehova vixim xikonk ani dusreank tache vixim xikounk vinchun kaddlolean, mhaka itlim besanvam mellttolim mhunn hanvem chintunkuch naslem!

Bautizm gheun sov mhoineamnim hanv ek niemit pioneer zalo. Tea uprant Dezembr 1956-ant, Kingdom Ministry-nt ek lekh ailo. Tacho vixoi aslo, “Can You Serve Where the Need Is Great?” Hem amontronn mhojea-i pasot aslem. Karonn thoddinch porgottnnaram asat thoim vochon porgottnni korunk, mhaka khub umed asli.—Mt. 24:14.

Hanv South Carolina-nt aslolea Edgefield xarant gelo. Thoinche sobhent fokot charuch porgottnnaram aslim. Ani hanv thoim gelea uprant, mhaka dhorun panch porgottnnaram zalim. Hanv dor mhoineak porgottnnent 100 voram ghaltalo. Ani mittingek ami eka bhavachea ghorant mellttalim. Porgottnni mittingo korunk ani sobhent bhaxonnam diunk hanv fuddakar ghetalo. Tor hanv ekdom bizi astalo. Punn Jehovache sevent hanv jitlem chodd kam kortalo, titloch hanv Jehova vixim anik xikonk pavlo.

Hanv eke bailecho Bible obheas ghetalo. Tiche lagim Johnston xarant ek zago aslo, zoim melʼlea munxank purunk toiari kortalim. Tinnem mhaka sumanachea thoddea disam pasot kam dilem. Toxench, tiche lagim aslolea eka lhanxea bilddingent tinnem amkam mittingo korunk dileo.

Hanv Bible xiktalo tea bhavacho put, Jolly Jeffries, Brooklyn, New York-a thaun hanv ravtalo thoim ailo. Ami dogui sangata mellon pioneer seva korunk lagle. Ani eka bhavan amkam uzar korunk dilʼlea lhanxea trailer ghorant ami ravonk lagle.

Hanga pagar khub unnem aslem. Ek dis kam korun amkam fokot don vo tinuch dollar mellttale. Ek dis, mhoje lagim posrear thaun jevnnacheo vostu gheunk zata titlech poixe asle. Ani teo ghetlea uprant, mhoje sogle poixe kabar zale. Punn thoinchean bhair sortanch eka munxan mhaka vicharlem: “Tuka kam zai? Hanv tuka eka vorak, ek dollar ditolo.” Ani tannem mhaka tin disam pasot eka bandkamachea zagear nitoll korpachem kam dilem. Khorench, Edgefield-ant ravonk Jehova mhaka modot kortalo mhunn mhaka sarkem kollon ailem. Mhoje lagim thoddech poixe asle, tori astana, 1958-ant New York City-nt zalʼlea ontoraxttria odhivexonak hanv hajir zaunk pavlo.

Odhivexonachea dusrea disa kitem tori khas zalem. Hanv Ruby Wadlington-ak mellʼllom. Tem Gallatin, Tennessee-nt, ek niemit pioneer mhunn seva kortalem. Amkam dogaim-kui mixinori zaunk zai aslem dekhun ami tea odhivexonant aslolea Gilead mittingek hajir zalim. Tea uprant, ami dogaim eka-mekak chitteo borounk laglim. Magir ek pavtti, mhaka Gallatin-antle sobhent jahir bhaxonn diunk apoilo. Hanvem hi sondhi uzar keli ani Ruby-k mhoje lagim kazar zatolem kai mhunn vicharlem. Uprant hanv Ruby-che sobhecho bhag zalo ani 1959-ant ami kazar zalim.

Hanv 23 vorsancho aslo tednam mhaka Gallatin-antlea sobhent, congregation servant mhunn nemlo (atam taka sobhentlea vhoddilancho sohokari mhunnttat.) Bhav Charles Thompson, sorkittachi dekhrekh korpi zaun poilech pavtti amche sobhek bhett diunk ailo. Taka khub onubhov aslo. Tori astana, sobhentlea  bhav-bhoinnank kiteachi goroz asa ani her sorkittachi dekhrekh korpi sobhechi kallji koxi ghetat tem tannem mhaka vicharlem. Tache thaun, dusreank prosn vicharop ani koslo-i nirnnoi gheunchea poilim tea vixim sogli mahiti zannam zaun ghevop ekdom gorjechem mhunn hanv xiklo.

May 1964-ant, South Lansing, New York-ant aslolea ek mhoineachea Raj Seva Korsak hajir zaunk mhaka amontronn mellʼllem. Hea korsant fuddakar ghetolea bhavamnim Jehova vixim anikui xikonk ani tachea sangata mhoji ixttagot ghott korunk mhoji itsa vaddoili.

Janer 1965-ant, mhaka ani Ruby-k sorkittachem kam korunk amontronn mellʼllem. Amcho sorkittacho vattar khub vhoddlo aslo. To mhunnttlear, Knoxville, Tennessee thaun Richmond, Virginia porian. Tantunt North Carolina, Kentucky, ani West Virginia, heo sobha mellon asleo. Tea vellar, hanv fokot kalle bhav aslolea sobhenkuch bhett ditalo. Karonn United States-achea dokxinn bhagant, sorkarachea kaidea pormonnem, kalle ani gore lok sangata mellon ieunk xokonasle. Amche kalle bhav khub gorib asle. Tor amche lagim aslem, tem gorjek sampoddlolea bhav-bhoinnank diunk ami xiklim. Khub tempa thaun sorkittachi dekhrekh kortolea eka bhavan mhaka ek ekdom mhotvachem lisanv xikoilem. Tannem mhaka sanglem: “Sobhentlea bhav-bhoinnancho patranv zainaka. Tancho bhav zav. Karonn tim tuka aplo bhav mhunn mantat zalearuch tum tankam modot korunk pavtolo.”

Ek pavtti, sorkittachi dekhrekh kortana ami eke lhan sobhek bhett dili. Tednam Ruby-n eke baile sangata Bible obheas suru kelo. Tea bailek, ek vorsachi dhuv asli. Punn thoim amchi bhett zalea uprant, tea sobhent aslolo konnuch ticho Bible obheas gheunk xokonaslo dekhun Ruby-n chitteo boroun tichea sangata to Bible obheas chaluch dovorlo. Uprant, ami porot tea sobhek bhett dili tednam ti bail chukonastana mittingek hajir zaunk lagli. Tea vellar, khas pioneer seva korpi don bhoinnank tea sobhent seva korunk dhaddlim. Uprant, tim tea bailecho obheas gheunk laglim. Ani magir tea bailen rokddoch bautizm ghetlo. Sumar 30 vorsam uprant 1995-ant, ami Patterson Bethel-ant aslim tednam ek tornnatti bhoinn Ruby-k zap korunk aili. Ani tichea lagim uloitana, ti bhoinn, Ruby Bible obheas ghetali tea bailechi ek vorsachi dhuv mhunn amkam kollon ailem. Ti bhoinn ani ticho ghov, Gilead Korsachea 100-avea klasichim vidʼdhearthi asli.

Amkam seva korunk dhaddlim tea dusrea sorkittachea vattarant, central Florida-ntleo thoddeo sobha mellon asleo. Tea vellar amkam ek gaddi zai asli. Tor ami unnea poixeam bhitor ek gaddi ghetli. Punn ekuch sumana bhitor tachem engine moddlem ani tem sarkem korunk amche lagim poixe nasle. Tor amkam modot korunk xoktolo tea eka bhavak ami fon kelo. Amchi gaddi sarki korunk tannem aplea eka kamdarak dhaddlo. Ani bhavan poixe pasun gheunk nant. Tannem mhunnttlem, “Poixe ani nakat, asum te.” Tachea bodlek, amchea khorchak lagon tannem amkam thodde poixe dile. Khorench hea onubhovantlean, Jehova aplea sevokanchi koxi kallji gheta tem hanvem polloilem. Toxench, udar kallzachim zavop kitlem gorjechem tem hanv xiklo.

Ami sobhank bhett ditalim tednam ami bhav-bhoinnanchea ghora ravtalim. Hea vorvim, ami zaitim borim ixttam korunk pavlim. Ek pavtti, hanv typewriter-acher sobhecho riportt type kortalo. Punn uprant to riportt thoinch sanddun hanv bhair sorlo. Hanv porot ailo tednam tea bhavachea tin vorsanchea putan, typewriter-acher mellttat te button marleat mhunn mhaka kollon ailem. Tea pasot mhaka to akʼkho riportt porot type korunk poddlo. Hea ghoddnne vixim hanv taka zaitim vorsam pasun challoitalom.

1971-ant, mhaka New York City-nt district-acho dekhrekh korpi mhunn nemla mhunn ek chitt mellʼlli. Ami ojap zalim! Ami thoim gelim tednam hanv fokot 34 vorsancho aslo. Thoinchea bhavamnim tanchea poilea kallea district-achea dekhrekh korpeak ek boro ieukar dilo.

District-acho dekhrekh korpi zalolean, dor sumanachea xevottak zatolea sorkitt zomatik, Jehova vixim xikounk mhaka ekdom borem distalem. Thoinchea zaitea sorkittachi dekhrekh korpeank mhojea poros chodd onubhov aslo. Tanchea modlea eka bhavan mhojea bautizmachem bhaxonn dilʼlem. Toxench, Theodore Jaracz nanvacho anik ek bhav, uprant Sonchalon Monddollacho sodoxio zalo. Tea bhair, tantuntle zaite bhav, Brooklyn Bethel-ant seva kortale ani tankam-i zaito onubhov aslo. He sorkittachi dekhrekh korpi ani Bethel-antlea bhavanchea bore vagnnukek lagon, tanchea sangata kam korunk mhaka modot zali. He bhav Devachea Utracher patietale ani Jehovache  songottnnek visvaxiponnan tenko ditale tosle mogall gonvlli asle mhunn hanvem polloilem. Toxench tanche khaltikaiek lagon, tanchea district-acho dekhrekh korpi mhunn seva korunk mhaka sompem zalem.

1974-ant, Sonchalon Monddollan, sorkittachi dekhrekh korpi thoddea dusrea bhavank district-achi dekhrekh korpachem kam dilem ani mhaka porot South Carolina-nt sorkittachi dekhrekh korpi mhunn nemlo. Tednam mhunnttlear, United States-achea dokxinn bhagant aslole kalle ani gore bhav sangata mellon ieunk xoktale. Ani hea pasot sogle bhav ekdom khuxal asle!

1976-achea xevottak, Atlanta ani Columbus-achea modem aslolea Georgia sorkittant mhaka dhaddlo. Mhaka boro ugddas asa, ki hanvem panch kallea bhurgeanchea mornnachem bhaxonn dilʼlem. Hea familichea ghorak konnem tori uzo ghatlo dekhun tea panchui bhurgeancho jiv gelo. Ani tanche avoik mar laglo dekhun tika hospital-ant ghatli. Tednam zaitim gorim ani kallim bhav-bhoinnam tea bhurgeanchea avoi-bapaink bhuzvonn diunk hospital-ant ie-it ravtalim. Jehovacho lok hea toren eka-mekak doia-maia dakhoita dekhun amchea jivitant kitle-i vhoddle tras ailear pasun ami te sosunk pavtat.

1977-ant, eka project-acher kam korunk thoddea mhoineam pasot amkam Brooklyn Bethel-nant apoilim. To project kabar zauncho aslo tednam Sonchalon Monddollachea don sodoxiamnim mhaka ani Ruby-k, ami Bethel-antuch seva korunk toiar astolim kai mhunn vicharlem. Ani ami tem amontronn manun ghetlem.

24 vorsam pasot hanvem Seva Khateant kam kelem. Hea khateant bhavank kotthin prosnanche zobab suttave korunk poddttat. Sonchalon Monddoll sodanch Bible-achea totvam adarit Seva Khateak margdorxon dita. Hea margdorxonak lagon, Seva Khateantle bhav kotthin prosnanche zobab diunkuch nhoi, punn sorkittachi dekhrekh korpeank, vhoddilank ani pioneer-ank pasun proxikxonn diunk pavtat. Hea proxikxonnak lagon zaitea bhav-bhoinnank vaddavoll korunk modot zalea ani Jehovachem songotton bore bhaxen cholta.

1995 tem 2018 porian, hanv mukhel ofisacho prothinidi aslo dekhun hanv veg-vegllea xakha ofisank bhett ditalo. Hanv Xakha Somitintlea ani Bethel-antlea bhav-bhoinnank, toxench mixinorink mellon tanchi urba vaddounk ani tancheo somosia suttaveo korunk modot kortalo. Ani bhav-bhoinnanche onubhov aikon Ruby-k ani mhaka sodanch urba mellttali. Udharonnak, 2000-ant ami Rwanda-nt bhett diunk gelim. Thoim 1994-ant, ek akʼkhe zatik jivexim marunk proitn kelʼlo. Hea pasot zaitea zannanchim mogachim bhair poddlim. Ani Bethel-antlea, toxench her bhav-bhoinnank khub tras sosunk poddle. Tori astana, hea bhav-bhoinnamnim bhavarth ani bhorvonso dovrun khuxalkaien hem soglem soslem. Tancho onubhov khorench amchea kallzak laglo!

Atam amchi pirai 80 vorsam poros chodd zalea. Gelʼlea 20 vorsam thaun hanv United States-antlea Xakha Somitint seva korta. Hanv kednanch university-nt vochonk na. Punn Jehova ani tachea songottnne thaun mhaka sogleam-von borem xikxonn mellʼllam. Hea pasot, lokank sasnak faido zaunk xokta toslem Bible-antlem sot hanv tankam xikounk pavla. (2 Kor. 3:5; 2 Tim. 2:2) Bible-antlea sondexak lagon lokank tanchea jivitant sudharnni korunk ani tanchea Rochnnara sangata ek ixttagot zoddunk koxi modot zalea tem hanvem polloilam. (Jak. 4:8) Tor Ruby-k ani mhaka sondhi melltta tednam Jehova vixim xikonk ani dusreank Bible-antlem sot xikounk ami bhav-bhoinnank urba ditat. Karonn ho Jehovachea sevokank aslolo vhoddantlo-vhodd sueog zaun asa!