OBHEASACHO LEKH 39
Tumchem Nanv ‘Jivitachea Pustokant’ Boroilʼlem Asa Kai?
“Jim konn Sorvesporachem bhem dhortat . . . tanchim nanvam ghalun Tachea fuddeant ek ugddasachem pustok boroun kaddlem.”—MAL. 3:16.
GIT 61 Sakxeamno, Ghottaien Pavlam Fuddem Marat!
KITEM XIKTOLIM a
Abelachea kallar thaun aiz porian, Jehova Dev ‘jivitachea pustokant’ nanvam boroit asa (Peregraf 1-2 polloiat)
1. Malaki 3:16 pormonnem Jehova koslem pustok boroit asa, ani tannem tantunt kitem boroilam?
HOZARAMNIM vorsam thaun, Jehova Dev eka khas pustokant aplea visvaxi sevokanchim nanvam boroit asa. Hea pustokant sogleam-von poilim, Jehovacho poilo visvaxi sevok Abelachem nanv asa. b (Luk. 11:50, 51) Ani aiz meren Jehovan tantunt anikui lakʼkhamnim lokanchim nanvam boroileant. Bible-ant hea pustokak, “ugddasachem pustok,” ‘jivitachem pustok’ ani ‘jiveanchem pustok vo jivitacho kovllo’ oxem mhunnttlolem asa. Hea lekhant ami hea pustokak ‘jivitachem pustok’ oxem mhunnom-ia.—Malaki 3:16 vachat; Prok. 3:5; 17:8.
2. Jivitachea pustokant Jehova konnanchim nanvam boroita, ani tantunt amchim nanvam asonk zai zalear ami kitem korunk zai?
2 Hea khas pustokant Jehova konnachim nanvam boroita? Jim konn tache bhirantin choltat, respedan tachi bhokti kortat ani tachea nanvacho mog kortat, tanchim nanvam Jehova hea pustokant boroita. Ani hea lokank sasnak jieuncho bhorvonso melltta. Tor amkam sorgar vo hea prithumer jieuncho bhorvonso asum, amkam amchim nanvam hea pustokant boroilʼlim zai. Punn ami Jezuchea soddvonnecher bhavarth dovrun, Jehova sangata ek lagxilʼli ixttagot zoddlearuch to amchim nanvam hea pustokant boroitolo.—Ju. 3:16, 36.
3-4. (a) Amchim nanvam sodʼdheak jivitachea pustokant boroilʼlim asat zalear amkam sasnachem jivit mellttolench oxem kai? Somzaiat. (b) Hea ani fuddlea lekhant ami kitem zannam zatolim?
3 Punn Jehova Dev hea pustokant amchim nanvam boroita hacho orth, amkam sasnachem jivit mellttolench oxem nhoi. Karonn Suttka 32:33-ant, Jehova Devan Moizesak oxem mhunnttlem: “Mhojer patok kelam tea monʼxak Mhojea pustokantlo Hanv bhair uddoitolom.” Hantuntlean, Jehova Dev tea pustokantlean amchim nanvam kaddun uddounk xokta mhunn amkam kollon ieta. Tor survatek Jehova Dev amchim nanvam hea pustokant boroita tednam tannem tim pencil-en boroilʼlea sarkim asat oxem ami mhunnonk zata. (Prok. 3:5) Punn uprant, Jehova amchim nanvam pen-an boroitolo, mhunnche, amchim nanvam thoim sodanch urtolim mhunn ami khatri korun gheunk zai.
4 Tor amchea monant thodde prosn ieunk puro. Zoxe, jivitachea pustokant zanchim nanvam boroileant ani borounk nant tanche vixim Bible kitem sangta? Hea pustokant zanchim nanvam urtat tankam sasnachem jivit kednam mellttolem? Ani morche poilim Jehova vixim xikonk sondhi mellonk na tea lokam vixim kitem? Tanchim nanvam hea pustokant boroilʼlim asat kai? Hea prosnanche zobab amkam hea ani fuddlea lekhant zannam zaunk mellttole.
JIVITACHEA PUSTOKANT KONNACHIM NANVAM BOROILʼLIM ASAT?
5-6. (a) Filipkarank 4:3-a pormonnem, jivitachea pustokant konnachim nanvam boroilʼlim asat? (b) Tanchim nanvam hea pustokant sodankal kednam boroilʼlim urtolim?
5 Jivitachea pustokant konnachim nanvam boroilʼlim asat? Hea prosnacho zobab zannam zaunk panch torechea zomeam vixim ami polloum-ia. Hantuntlea thoddeanchim nanvam hea pustokant boroilʼlim asat ani thoddeanchim borounk nant.
6 Poilea zomeant, Jezu sangata sorgar raj cholounk vinchun kaddleant tim munxam asat. Sodʼdheak tanchim nanvam jivitachea pustokant boroilʼlim asat kai? Hoi. Paulun Filipint aslolea aplea ‘sohokariank’ mhunnttlolea utrantlean Jezu sangata raj korpi makhlolea Kristanvanchim nanvam jivitachea pustokant boroilʼlim aslim mhunn amkam kollon ieta. (Filipkarank 4:3 vachat.) Punn tanchim nanvam hea pustokant uronk zai zalear tannim visvaxi ravchi goroz asa. Oxem kelear, tim morchea adim vo vhodd sonkoxtt suru zaunchea poilim tankam nimanno xikʼko mellttolo tednam tanchim nanvam hea pustokant sodankal boroilʼlim urtolim.—Prok. 7:3.
7. Prokasovnni 7:16, 17 pormonnem, her menddranchea vhodd urponjent asloleanchim nanvam jivitachea pustokant sodankal kednam boroilʼlim urtolim?
7 Dusrea zomeant, her menddranchi vhodd urponz asa. Sodʼdheak tanchim nanvam jivitachea pustokant boroilʼlim asat kai? Hoi. Ani tim Armageddonantlean salvar zalea uprant pasun tanchim nanvam hea pustokant boroilʼlim astolim. (Prok. 7:14) Karonn menddram sarkim aslolea hea lokank “sasnik jivit mellttolem” oxem Jezun sanglem. (Mt. 25:46) Punn tankam sasnachem jivit rokddench mellchem na. Karonn tanchim nanvam adim pencil-en boroilʼlea sarkim aslim toxinch astolim. Ani Kristachea Ek Hozar Vorsanchea Razvottkechea vellar, Jezu “tancho Gonvlli zatolo ani To tankam jivea udkachea zhorim-xim pavoitolo.” Tea vellar tannim Jezuchem margdorxon apnnailear, ani uprant xevottachea porikxent tim visvaxi mhunn Jehovan tancho neai kelo zalear tanchim nanvam jivitachea pustokant sodankal boroilʼlim urtolim.—Prokasovnni 7:16, 17 vachat.
8. Jivitachea pustokant konnachim nanvam boroilʼlim nant, ani tanchem kitem zatolem?
8 Tisrea zomeant, Armageddonant nas zatolo to bokddeam sarko lok asa. Tanchim nanvam jivitachea pustokant boroilʼlim nant. Hea lokancho “sasnak nas zatolo” oxem Jezun sanglem. (Mt. 25:46) Toxench, Paulun pasun “sasnnachea ghorttannache khastik tim sampoddtolim” oxem sanglem. (2 Tes. 1:9; 2 Ped. 2:9) Tea bhair, aiz meren jea lokamnim mudʼdom zaun Devachea povitr xokte add patok adarlam tea lokancho pasun sasnak nas zatolo. Hacho orth, tim melea uprant jivont zaunchim nant. (Mt. 12:32; Mk. 3:28, 29; Heb. 6:4-6) Tor atam, hea prithumer jivont zatolim tea don torechea lokanchea zomea vixim zannam zaum-ia.
KONN JIVONT ZATOLIM
9. Itihas 24:15 pormonnem, hea prithumer khoinche don zome jivont zatole, ani tanche modem kitem ontor asa?
9 Bible-ant, jivont zatolim tea lokanchea don zomeam vixim sanglam. Te mhunnttlear, ‘bore’ ani “vaitt.” Tankam hea prithumer sasnak jieunchi sondhi mellttoli. (Itihas 24:15 vachat.) Morchea adim visvaxiponnan Jehovachi seva keli, tankam ‘borim vo nitivont’ munxam mhunnttleant. Punn morchea adim jea lokamnim Jehovachi seva korunk na punn vaitt kamam kelim, tankam ‘vaitt vo onitivont’ munxam mhunnttleant. Tor hea donui zomeantle lok jivont zatole hacho orth, tanchim nanvam jivitachea pustokant boroilʼlim asat oxem kai? Hem zannam zaunk, dor eka zomea vixim ami fuddem polloum-ia.
10. ‘Nitivont’ munxam kiteak jivont zatolim, ani tantuntlea thoddeank koslo sueog mellttolo? (Prithumer zatolea jivontponna vixim hea masikent aslolo “Vachpeam Thaun Prosn” ho lekh pasun polloiat.)
10 Chovtea zomeant, ‘nitivont munxam’ asat. Tim jivont aslim tednam tanchim nanvam jivitachea pustokant boroilʼlim aslim. Toxem zalear, tim melea uprant tanchim nanvam tea pustokantlean kaddlim kai? Na. Karonn tim Jehovachea ugddasant azun porian “jivim” asat. Ani Bible-ant Jehova “meloleancho nhoi, bogor jiveancho Dev . . . Tache mukhar sogllim jivim” oxem sanglolem asa. (Luk. 20:38) Hacho orth, him nitivont munxam jivont zatat tednam tea pustokant tanchim nanvam Jehovan poilim “pencil-en” boroilʼlea sarkim aslim toxinch astolim. (Luk. 14:14) Ani hantuntlea thoddea zannank, Jehova Dev “akʼkhe prithumecher kunvor” mhunn nemtolo.—St. 45:16, NW.
11. ‘Onitivont munxanchim’ nanvam jivitachea pustokant boroilʼlim asonk zai zalear tannim kitem korunk poddttolem?
11 Panchvea zomeant, ‘onitivont munxam’ asat. Hea munxank ghoddie Jehovache kaide khobor nasle, ani hea pasot morchea poilim tim khub vaitt jivit jielim. Dekhun tanchim nanvam jivitachea pustokant boroilʼlim nant. Tor tankam jivont korun, tanchim nanvam jivitachea pustokant boroilʼlim asonk Jehova tankam ek sondhi ditolo. Punn hea ‘onitivont munxank’ tanchea jivitant bodlav korunk khub modot zai poddttoli. Karonn morchea poilim tannim ekdom vaitt kamam kelim astolim. Tor tankam Jehovachea nitivont dorjeam pormonnem jieunk xikounk poddttolem. Ani hea pasot, Devachea Rajea udexim poilim kednanch zaunk na title vhodd ritin xikoupachem kam zatolem.
12. (a) Onitivont munxank konn xikoitolim? (b) Apunn xiktat tem apnnainant tanchem kitem zatolem?
12 Tor vhodd urponjecho lok ani jivont zalʼlim nitivont munxam, hea onitivont munxank xikoitolim. Hea onitivont munxanchim nanvam jivitachea pustokant boroilʼlim asonk zai zalear tannim Jehova sangata ek lagxilʼli ixttagot zoddunk zai ani aplem jivit Jehovak somorponn korunk zai. Ani tim xiktat tem tim koxim apnnaitat tem Jezu ani makhlolim Kristanvam sorgar thaun bariksannem polloitolim. (Prok. 20:4) Tea vellar, konnui hi xikounn apnnaina zalear to 100 vorsancho aslear pasun taka sasnak jieunk mellchem na. (Iz. 65:20) Karonn Jehova Dev ani Jezu kallzam topasunk xoktat ani te novea sonvsarant konnakuch koslench vaitt korunk diunche nant.—Iz. 11:9; 60:18; 65:25; Ju. 2:25.
TIM JIVIT BHOGUNK ANI NEAI ZAUNK JIVONT ZATOLIM
13-14. (a) Juanv 5:29-ant, Jezun sanglolea utrancho orth kitem mhunn ami adim somzotalim? (b) Ani tea versantlea khoinchea utrancher ami dhean diunk zai?
13 Jezu prithumer zatolea jivontponna vixim pasun uloilo. Udharonnak, tannem mhunnttlem: “Hache vixim ojap zaum nakat: somadhimnim asat tim sogllim, Tacho tallo aikun tantlim bhair sortolim: zannim borem kelam tim Jivit bhogunk, ani zannim vaitt kelam tim khast sosunk utthtolim - oslo vell ieuncho zalo!” (Ju. 5:28, 29) Tor Jezuchea hea utrancho orth kitem aslo?
14 Jivont zatolim tim, jivont zalea uprant borim vo vaitt kamam kortolim, oxem Jezun mhunnttlolem mhunn adim ami somzotalim. Punn tachea utrancher dhean dilear, Jezun oxem mhunnttlem: “Zannim borem kelam . . . ani zannim vaitt kelam.” Hantuntlean, tim jivont zalea uprant nhoi, punn tannim morchea adim kelʼlea borea vo vaitt kamam vixim Jezu uloitalo mhunn amkam kollon ieta. Ani hem mhunnop sarkem zaun asa. Karonn vaitt munxamnim morchea adim zaitim vaitt kamam kelʼlim astolim. Punn novea sonvsarant konnakuch vaitt korunk mellchem na. Toxem zalear, tim “Jivit bhogunk” ani “khast sosunk utthtolim” mhunn Jezun mhunnttlem tednam to kitem sangonk sodhtalo?
15. “Jivit bhogunk” konn ‘jivont zatolim,’ ani kiteak?
15 Nitivont munxamnim morchea poilim kelʼlea borea kamank lagon tanchim nanvam jivitachea pustokant boroilʼlim aslim. Hea karonnak lagon tim ‘jivit bhogunk jivont zatolim.’ Hacho orth, Juanv 5:29-ant ‘jivit bhogunk uttʼttolim tim borim vo nitivont’ munxam, ani Itihas 24:15-nt sanglolim ‘borim vo nitivont’ munxam, ekuch mhunn amkam kollon ieta. Ani hi somzonni, Romkarank 6:7-a pormonnem sarki zaun asa. Karonn tea versant oxem mhunnttlam: “Monxam mortat tednam tim patkache podventlim suttlim.” Tor him nitivont munxam melim tednam Jehovan tanchim patkam bhogxilim. Punn tim jivont aslim tednam tannim kelʼlim borim kamam Jehova sodanch ugddas dovortolo. (Heb. 6:10) Tori astana, jivont zalea uprant tanchim nanvam jivitachea pustokant boroilʼlim uronk zai zalear tannim visvaxi ravonk zai.
16. Onitivont munxam ‘neai zaunk jivont zatolim’ hacho orth kitem?
16 Tor vaitt kamam korun meleant tea onitivont munxam vixim kitem? Tim melim tednam tanchim patkam Jehovan bhogxilim tem khorem. Punn tim jivim aslim tednam tannim Jehovachi seva korunk na dekhun tanchim nanvam jivitachea pustokant boroilʼlim nant. Hacho orth, Juanv 5:29-ant “khast sosunk [“neai zaunk,” NW]” uttʼttolim tim ‘vaitt vo onitivont’ munxam ani Itihas 24:15-nt sanglolim ‘vaitt vo onitivont’ munxam ekuch mhunn amkam kollon ieta. c Tor onitivont munxancho neai zatolo hacho orth, tanchi porikxa zatoli. (Luk. 22:30) Mhunnche, tanchim nanvam jivitachea pustokant borounk zatat kai na, tem tharaunk Jezu thoddo vell ghetolo. Tor tannim aplim vaitt kamam soddun, Jehovak tanchem jivit somorponn kelearuch, Jehova tanchim nanvam jivitachea pustokant boroitolo.
17-18. Prithumer jivont zatat tea sogleamnim kitem korchem poddttolem, ani Prokasovnni 20:12, 13-nt khoinchea ‘kornneam’ vixim sanglam?
17 Tor jivont zatat tim, nitivont vo onitivont munxam asum, tankam sogleank 1,000 vorsanchea vellar ugoddttolea novea kovlleantle kaide pallunk poddttole. Hem apostl Juanvan eka dorxonant polloilʼlem. Tea vixim tannem sanglolem: “Hanvem melʼleank polloilim, vhoddank toxem lhanank. Tim xinvasona mukhar ubim aslim ani kovlle ugoddle. Punn anik ek kovllo ugoddlo; to mhunnttlear jivitacho kovllo. Tea kovlleant boroilʼlem asa tachea adarit melʼleanchea kornneam pormonnem tancho neai zalo.”—Prok. 20:12, 13, NW.
18 Tor jivont zatat tancho neai khoinchea ‘kornneam’ pormonnem zatolo? Tannim morchea adim kelʼlea ‘kornneam’ pormonnem tancho neai zauncho na. Karonn tim melim tednam Jehovan tanchim patkam bhogxilim. Punn tim jivont zalea uprant, tankam novea sonvsarant mellttoli xikounn tim koxim apnnaitat tea pormonnem tancho neai zatolo. Noah, Samuel, David ani Daniela sarkea nitivont munxank pasun Jezu vixim xikonk poddttolem ani tachea bolidanacher bhavarth dovrunk poddttolo. Nitivont munxank itlem xikonk poddttolem zalear, onitivont munxank anik kitlem xikonk poddttolem nhoi!
19. Ho itlo vhoddlo sueog nakartat tanchem kitem zatolem?
19 Punn ho itlo vhoddlo sueog nakartat tanchem kitem zatolem? Prokasovnni 20:15 hacho zobab dita. Thoim sanglam: ‘Zanchim nanvam jiveanchea vo jivitachea pustokant boroilʼlim naslim, tankam sogleank ujeachea konddant xevttilim.’ Hacho orth, tancho sasnak nas zatolo. Tor jivitachea pustokant amchem nanv boroilʼlem asop ani tem thoim urop ekdom gorjechem zaun asa!
Ek bhav, Kristache Ek Hozar Vorsanche Razvottkechea vellar vhodd ritin zatolea xikoupachea kamant bhag gheta (Peregraf 20 polloiat)
20. Kristachea Ek Hozar Vorsanchea Razvottkechea vellar koslem khas kam zatolem? (Masikachem fuddlem chitr polloiat.)
20 Khorench, Kristacho Ek Hozar Vorsancho Razvottkecho vell ekdom khuxalkaiecho astolo! Karonn adim hea prithumecher kednanch zaunk na title vhodd toren xikoupachem kam zatolem. Teach borabor, nitivont ani onitivont munxanchi porikxa pasun zatoli. (Iz. 26:9; D.I. 17:31) Tor hem xikoupachem kam koxem zatolem, ani hea manddavolle pasot ami kiteak upkari asonk zai tem ami fuddlea lekhant xiktolim.
GIT 147 Life Everlasting Is Promised
a Juanv 5:28, 29-ant, Jezun “jivit bhogunk” ani ‘neai zaunk jivont zatolim’ tanche vixim sanglam. Punn hea vixim atam amche somzonnent bodol zala. Tor hea utrancho orth kitem, toxench “jivit bhogunk” ani ‘neai zaunk’ konn jivont zatolim tem ami hea lekhant zannam zatolim.
b Jehova Dev hem pustok “sonvsarachea survatek thaun” borounk laglo. Ho sonvsar mhunnttlear oslo lok, zankam Jezuchea soddvonne udexim patkantlean suttka mellonk xokta. (Mt. 25:34; Prok. 17:8) Tor jivitachea pustokant sogleam-von poilim nitivont munis Abelachem nanv asa mhunn ami mhunnonk zata.
c Juanv 5:29-ant sanglolim, “khast sosunk [“neai zaunk,” NW]” uttʼttolim hea utrancho orth, jivont zatat tankam Jehova khast laitolo oso aslo mhunn ami adim somzotalim. “Neai zaunk” hea utrancho orth ghoddie oso asonk xokta. Punn Jezun hea vellar him utram mhunnttlim tednam to khast launche vixim nhoi, punn Grik bhaxen aslole ek Bible-ache dictionary-nt sanglam toxem, “konnachi-i vagnnuk bariksannen topasche vixim vo konnachi-i porikxa korche vixim” uloitalo.
