1. Aiz sonvsarant lokank eka-mekacher visvas dovrunk kotthin zata tem polloun ami kiteak ojap zainant?

 SOITANACHEA hea sonvsarant lokank eka-mekacher visvas dovrunk khub kotthin zata. Karonn veapar-dhondo kortat tannim, rajki ani dhormik fuddareamnim lokancho visvas moddla. Toxench, thoddeank tanchea ixttancher, xezareancher ani familichea sodoxiancher pasun visvas dovrunk khub kotthin zata. Punn ami ojap zainant. Karonn Bible-ant adim fuddench oxem boroilʼlem aslem: “Nimannea disamnim . . . Monxam zatolim . . . bhokti naslolim [“ovisvaxi,” NW] . . . boglantti . . . ghatki.” Ani aiz amkam osloch lok dixtti poddtta. Tim hea sonvsaracho dev, Soitana bhaxen vagtat, zacher ami matui visvas dovrunk xokonant.—2 Tim. 3:1-4; 2 Kor. 4:4.

2. (a) Ami konnancher purnn toren visvas dovrunk xoktat? (b) Thoddim ghoddie kitem chintunk puro?

² Kristanv zalolean ami purnn toren Jehovacher visvas dovrunk xoktat mhunn ami zannant. (Jer. 17:7, 8) Jehova amcho khub mog korta ani aplea ixttank to ‘kednanch sanddina’ mhunn amkam khatri asa. (St. 9:10) Toxench, Jezu Kristan amche pasot jiv dila dekhun ami tacher visvas dovrunk zata. (1 Ped. 3:18) Tea bhair, Bible-ant amkam patieupa sarkem margdorxon melltta ani hem ami amchea svotachea onubhovantlean zannant. (2 Tim. 3:16, 17) Tor ami Jehova, Jezu ani Bible-acher purnn toren visvas dovrunk xoktat. Punn ami heach toren sobhentlea bhav-bhoinnancher pasun sodanch visvas dovrunk zata kai, mhunn thoddim ghoddie chintit. Hoi zalear, tancher ami kiteak visvas dovrunk zata?

3. Amkam koslo vhodd sueog mellʼlla? (Marku 10:29, 30)

³ Jehovan amkam sonvsarbhor aslolea aplea sevokanchea familicho bhag zaunk vinchun kaddleant. Hea pasot amkam zaito faido zala. Khorench, ho amkam ek vhodd sueog zaun asa! (Marku 10: 29, 30 vachat.) Karonn sonvsarbhor aslolim amchim bhav-bhoinnam Jehovacho mog kortat ani tachea dorjeam pormonnem jieunk apleachean zata tem soglem kortat. Amchi bhas, sonskrutai ani nhesop vegllem asonk puro. Tori astana, ami tancho khub mog kortat. Toxench, ami tankam poilech pavtti mellʼllear pasun, ami tankam ekdom bore toren vollkhotat oxem amkam dista. Ani khas korun, tanchea sangata amchea mogall sorginchea Bapachi bhokti ani vakhannʼnni korunk amkam khub avoddtta!—St. 133:1.

4. Amkam amchea bhav-bhoinnanchi kiteak goroz asa?

⁴ Poilim poros, ami atam amchea bhav-bhoinnam sangata ekvott samballop chodd gorjecho. Karonn amchim bhav-bhoinnam amkam veg-veglle toren modot kortat. Thodde pavtti, amcho trasancho bhar ubarunk tim amkam adar kortat. (Rom. 15:1; Gal. 6:2) Toxench, Jehovache sevent vavr korit ravonk ani Jehova sangata lagxilʼli ixttagot samballunk tim amkam urba ditat. (1 Tes. 5:11; Heb. 10:23-25) Hea vixim chintat. Amkam modot korunk amchim bhav-bhoinnam amchea sangata naslim zalear, Soitanacho fuddo korunk ani tachea hea vaitt sonvsarant jieunk amkam kitlem kotthin zata aslem nhoi! Beginuch, Soitan ani tachea tabeant aslole hea sonvsarantle lok Jehovachea sevokancher akromonn kortole. Punn tednam amchim bhav-bhoinnam amchea sangata astolim ani ami ekttinch aschimnant mhunn ami kitlim khuxal!

5. Thodde pavtti amchea bhav-bhoinnancher visvas dovrunk amkam kiteak kotthin zaunk puro?

⁵ Punn amchea modlea thoddea zannank, bhav-bhoinnancher visvas dovrunk kednam kotthin zaunk xokta? Eka bhavan vo bhoinnin ghoddie amcho visvas moddla astolo. Tim konnank sangchimnant mhunn visvas dovrun ami ghoddie tankam kitem sanglem astolem. Punn uprant, tannim tem dusreank kolloilem zait vo apnnem dilʼlem utor ghoddie samballunk na zait. Vo tanchea utramnim vo kornneamnim tannim amkam khub dukhoilam zait. Tumkam kednam-i oxem ghoddlam kai? Toxem zalear bhav-bhoinnancher visvas dovrunk tumkam koxi modot zaunk xokta?

6. Ami bhav-bhoinnancher visvas dovrun tancho mog korop kiteak gorjecho? (1 Korintkarank 13:4-8)

⁶ Ami bhav-bhoinnancher visvas dovortolim zalear poilim ami tancho mog korunk zai. 1 Korintkarank odheai 13 vachlear amkam moga vixim anik zaitem kollon ieta, jea udexim amchea bhav-bhoinnancher visvas vaddounk vo to moddla zalear tancher porot visvas dovrunk modot zata. (1 Korintkarank 13:4-8 vachat.) Udharonnak, vers 4 mhunntta: ‘Mog konnachem-i kitem-i sosun gheta vo pasiensan vagta, ani sogleam thaim doiall-movall.’ Chintat. Ami zaiteo chuki kortat, tori astana Jehova amchea sangata pasiensan vagta. Tor bhav-bhoinnamnim amkam utramnim vo kornneamnim dukhoilear vo rag haddlear pasun ami tanchea sangata pasiensan vagonk zai. Vers 5 mhunntta: “Pritimog rag choddunk dina; koslench vaitt monant dhorina.” Tor bhav-bhoinnamnim amkam khub dukh dilam zalear pasun, tannim kelʼlea chukincho porot ugddas korunk, ami tacho hixob dovrinant. Upodexok 7:9 mhunntta: “Sompeponnim ragar zainaka, tujea ragacher tabo dovor.” Toxench, Efezkarank 4:26-ant boroilam: “Vell poddo-sor rag dhorun ravum nakat.” Tor ami hem amchea jivitant apnnailear kitlem borem zatolem nhoi!

7. Matev 7:1-5-ant aslolim totvam amkam bhav-bhoinnancher visvas dovrunk koxim modot kortat?

⁷ Ami bhav-bhoinnancher visvas dovortolim zalear ami tankam Jehova polloita teach nodren pollounchi goroz asa. Jehova tancho khub mog korta ani tanchea chukincho hixob dovrina. Ami pasun toxench korunk zai. (St. 130:3) Tanchea chukincher dhean diunchea bodlek, tanchea borea gunnancher ani tim kitem borem korunk xoktat tacher ami dhean diunk zai. (Matev 7:1-5 vachat.) Toxench, tim sarkem tem korunk sodhtat ani mudʼdom zaun amkam kednanch dukhounk sodhinant mhunn ami tancher patieunk zai. Karonn mog “dusreancher visvas dovorta.” (1 Kor. 13:7) Punn hacho orth, ami dolle dhampun sogleancher visvas dovorlolo Jehovak zai oxem nhoi. Tachea bodlek, apunn patieupa sarkim asat mhunn dakhoun dilam tancheruch ami visvas dovorlolo taka zai. b

8. Bhav-bhoinnancher visvas dovrunk ami kitem korunk zata?

⁸ Ami dusreanchea sangata vell sartat ani tanchi bori vollokh korun ghetat toxim, tanchea pasot amcho resped anik vaddtta. Amchea bhav-bhoinnancher pasun visvas dovrunk ami oxench kitem korunk zai. Ami tanchi bori vollokh korun gheunk zai. Oxem korunk ami mittingek tanchea sangata ulounk zai ani porgottnnent tanchea sangata kam korunk zai. Toxench, ami tanchea sangata pasiensan vagonk zai. Hea toren, tim patieupa sarkim asat mhunn dakhoun diunk ami tankam sondhi ditolim. Poilim-poilim, ami tankam amche vixim ghoddie soglench sangchimnant. Punn vell voita toso, amchea kallzant kitem asa tem ami tankam ghoddie sangonk puro. (Luk. 16:10) Punn eka bhavan vo bhoinnin amcho visvasghat kelo zalear kitem? Oxem zata tednam tanchea sangata tumchi ixttagot rokddich moddinakat. Tankam thoddo vell diat. Toxench, eka bhavan vo bhoinnin tumcho visvasghat kela dekhun, sobhentlim soglinch toxem kortolim oxem chintinakat. Adlea tempa voilim Jehovachim zaitim sevokam dusreancher visvas dovrunk sodhinaslim. Tori astana, tannim koxe toren dusreancher visvas dovorlo tea vixim thoddim udharonnam atam polloum-ia.

9. (a) Jehovan nemlolea iadnikamnim chuki keleo, tori astana Anʼnan Jehovan dovorlolea manddavollicher visvas koso dovorlo? (b) Jehovan dovorlolea manddavollicher visvas dovorche vixim Anʼna thaun tumi kitem xiklim? (Chitr polloiat.)

⁹ Sobhent fuddakar ghetolea eka bhavachea vagnnukek lagon tacher visvas dovrunk tumkam kednam-i tori kotthin zalam kai? Toxem zalear, Anʼnachea udharonnantlean tumkam modot zaunk  xokta. Tea vellar, Israelant Porom Iadnik Eli, Jehovache bhoktent fuddakar ghetalo. Punn tachea putamnim herank ek bori dekh dovrunk na. Te iadnik asle. Tori astana, te porot-porot vitt haddttat toslim onoitik kamam kortale. Hem khobor asonui tanchea bapain, Elin tankam xist diunk na. Tori astana, Jehovan Elik porom iadnik mhunn seva korunk dilo. Hem soglem zannam zaun pasun, Eli porom iadnik asosor, tombunt ieun Jehovachi bhokti korunk Anʼna fattim soronk na. Toxench, ek pavtti, Anʼna ekdom khontint asli ani roddon Jehova lagim magnnem kortali. Tednam tichi poristhiti somzon gheunchea bodlek, ti pieun tombunt ailea, oxem Elin mhunnttlem. (1 Sam. 1:12-16) Tori astana, tem kallzak lavun gheunchea bodlek, Anʼnan apleak ek put zolmolo zalear, apunn taka jivitbhor Jehovachi seva korunk bhettoitoli mhunn tinnem soput ghetlo. Aplo put Elichea dekhrekhe khala astolo mhunn Anʼna zannam asli. Tori punn ti oxem korunk toiar zali. (1 Sam. 1:11) Ani uprant Jehovan Anʼnacher besanv ghatlem ani tika Samuel zolmolo. (1 Sam. 1:17-20) Punn Elichea putam vixim kitem? Jehovan tankam sarkea vellar khast laili.—1 Sam. 4:17.

10. Thoddeamnim Davidacho visvasghat kelo, tori astana tannem dusreancher visvas dovrop bond korunk na mhunn amkam koxem kolltta?

¹⁰ Tumchea eka lagxilʼlea ixttan tumcho visvasghat kela kai? Hoi zalear, Raza Davidachea udharonnantlean tumkam modot zatoli. Ahithofel nanvacho ek munis Davidacho ghott ixtt aslo. Punn Davidacho put Absalanvan, aplea bapaichi razvottki gheuncho proitn kelo tednam Ahithofelan Absalanvak tenko dilo. Aplo put ani Ahithofel aplea add ube ravle tednam Davidak kitlem dukh zalem astolem tea vixim chintat. Punn tannim apleak visvasghat kelo dekhun Davidan dusreancher visvas dovrop bond kelo kai? Na. Tannem aplo ixtt, Hushai-acher visvas dovorlo. Karonn Hushai visvaxi aslo ani tannem Absalanvak tenko diunk na. Uprant, Hushai-an aplo jiv pasun dhokeant ghalun Davidak modot keli. Tor Hushai-acher visvas dovrunk Davidak borim karonnam aslim.—2 Sam. 17:1-16.

11. Visvas dovorche vixim Nabalachea eka chakran ek borem udharonn koxem dovorlem?

¹¹ Visvas dovorche vixim ami Nabalachea eka chakra thaun pasun xikonk zata. Nabalache chakor tacho hindd rakhtale tednam David ani tachea munxamnim, doiall toren tanchi rakhonn keli. Uprant, ek dis Davidan aplea munxank thoddeo jevnnacheo vostu magonk Nabala lagim dhaddle. Punn tea vellar, Nabal tanchea sangata ekdom vaitt toren vaglo ani tankam dhanvddaun ghatle. Hea karonnak lagon David itlo ragan bhorlo, ki Nabal ani tachea ghoranneantlea dor eka  dadleak apunn jivexim martolo mhunn tannem nirnnoi ghetlo. Hi khobor Nabalachea eka chakrak kollʼlli. Aplo jiv dhokeant asa mhunn zannam zaun pasun pollon voichea bodlek to Abigaila lagim gelo ani tika ti khobor sangli. Nabalachea ghoracho sodoxia zalolean, aplo jiv ti salvar korunk xoktoli mhunn taka khobor aslem. Abigail ek zannvaiechi bail zalolean hi poristhiti ti sarki korunk xokta mhunn tannem ticher visvas dovorlo. Ani Abigailacher visvas dovrun hea chakran khorench sarkem tem kelem mhunn amkam kollon ieta. Karonn uprant Abigail dhiran vagli. (1 Sam. 25:2-35) Ti David ani tachea munxank mellonk geli ani Davida lagim uloili. Ani David sarkem tem kortolo mhunn tinnem tacher visvas dovorlo.

12. Aplea opurnn xisancher apleak visvas asa mhunn Jezun koxem dakhoilem?

¹² Jezuchea xisamnim pasun zaiteo chuki keleo. Tori astana, Jezun tancher visvas dovrop bond korunk na. (Ju. 15:15, 16) Ek pavtti, Jakob ani Juanvan, Jezu lagim tachea Rajeant tankam ek khas podvi di mhunn vinoti keli tednam, te svarthak lagon Devachi seva kortat mhunn Jezu tancher dubhavunk na vo tannem tankam aple apostl mhunn nakarunk nant. (Mk. 10:35-40) Toxench, Jezuk dhorun vhelo tea ratik, tache sogle apostl taka soddun gele. (Mt. 26:56) Tori astana, Jezun tancher visvas dovorlo. To tanchim unnemponnam bore bhaxen zannam aslo. Tori punn, “tannem sopurnnaien tancho mog korun dakhoilo.” (Ju. 13:1) Koso? Jivont zalea uprant, Jezun aplea 11 visvaxi apostlank, xis korchem kam ani aplea moladik xellianchi kallji gheunchi ek vhodd zobabdari dili. (Mt. 28:19, 20; Ju. 21:15-17) Ani Jezuchea xisamnim moro porian visvaxi ravon, te visvas dovorpa sarke munis asle mhunn dakhoun dilem. Tor Anʼna, David, Nabalacho chakor, Abigail ani Jezun, opurnn munxancher visvas dovorpa vixim ek borem udharonn dovorlem.

13. Amkam dusreancher visvas dovrunk kednam kotthin zaunk xokta?

¹³ Tumi kednam-i eka bhavak, tumkam dusreank kollʼlloli naka tosli mahiti sanglea kai? Ani uprant tea bhavan ti mahiti herank sangli mhunn tumkam kollon ailam kai? Hea toren konnui amcho visvas moddtta tednam amkam khub dukh zata. Oxench eke bhoinnik ghoddlem. Tinnem eka vhoddilak aplea vixim kitem tori sanglem, jem tika dusreank kollʼllolem naka aslem. Ani dusrea disa tea vhoddilache bailen, tea bhoinnik urba diunk fon kelo. Tea vellar, apnnem tea vhoddilak sangloli khobor tannem aple bailek sanglea mhunn he bhoinnik kollon ailem. Ani tika ekdom dhoko boslo. Tor tea vhoddilacher visvas dovrunk te bhoinnik ekdom kotthin zalem. Punn uprant, tinnem ek borem kam kelem. Kitem ghoddlolem tea vixim tinnem dusrea eka vhoddilak sanglem ani tannem, vhoddilancher porot visvas dovrunk tika modot keli.

14. Vhoddilancher porot visvas dovrunk eka bhavak koxi modot zali?

¹⁴ Anik ek onubhov polloum-ia. Ek bhav zaitea tempa thaun don vhoddilancher ekdom bejar aslo. Ani hea pasot, taka tancher visvas dovrunk khub kotthin zalem. Punn uprant, to khub resped ditalo tea eka bhavan kitem sanglolem tea vixim to chintunk laglo. Tea bhavan mhunnttlolem: “Soitan amcho dusman, amchim bhav-bhoinnam nhoi!” Tor bhavan hea utrancher niall kelo ani tannem kitem korunk zai tea vixim bariksannen chintlem. Uprant tannem Jehovachi modot magli. Ani to tea donui vhoddilam sangata xanti korunk pavlo.

15. Dusreancher porot visvas dovrunk amkam khub vell kiteak lagonk xokta? Ek udharonn diat.

¹⁵ Tumkam sobhent asloli ek zobabdari tumchea thaun kaddun ghetlea kai? Oxem ghoddtta tednam amkam khub dukh bhogta. Ani sobhent fuddakar gheupi bhavancher visvas dovrunk amkam kotthin zata. Grete nanvache eke bhoinnik oxench ghoddlem. Dusrea Vixv Zhuza vellar, Grete ani tichi avoi, Nazi Germany-nt visvaxiponnan Jehovachi seva kortalim. Ani bhoinn Grete-ak, bhav-bhoinnam pasot Pahrogopur masikacheo kopi type korpacho sueog aslo. Punn uprant, bhoinnicho bapui sotacho virodh korta mhunn bhavank kollon ailem. Ani to bhav-bhoinnam vixim virodheank sangon di-it, mhunn bhirantin tannim bhoinni koddlean to sueog kaddun ghetlo. Itlench nhoi, Dusrem Vixv  Zhuz kabar zaisor, te bhav, bhoinnik ani tiche avoik masikacheo kopi pasun dinasle. Ani te tankam vatter mellttale tednam tankam zap pasun korinasle. Haka lagon, bhoinnichem kalliz ekdom tuttlem. Tika itlem dukh zalem ki tankam bhogsunk ani tancher porot visvas dovrunk tika khub temp laglo. Punn uprant, Jehovan tankam bhogxileat, tor tinnem pasun tankam bhogsunk zai mhunn tinnem vollkhon ghetlem. c

16. Bhav-bhoinnancher visvas dovrunk ami kiteak vavr korunk zai?

¹⁶ Tumkam-i oxench kitem ghoddlam zalear, tumkam khub dukh zalam mhunn dubhav na. Punn tumchea bhav-bhoinnancher porot visvas dovrunk vavr korat. Tumkam vell lagtolo khoro. Punn tumi oxem korunk proitn kelo zalear tumkanch boreak poddttolem. Hea vixim chintat. Umkech torechem jevonn jevun tumchem pott piddʼddear zalem zalear, hea fuddem tumi soglech torechem jevonn jevop bond kortolim kai? Na. Teach bhaxen, eka bhavan vo bhoinnin tumcho visvas moddla dekhun, tumi konnacheruch visvas dovorchimnant oxem chintinakat. Ugddas dovrat, ami soglim opurnn asat ani chuktat. Punn ami bhav-bhoinnancher porot visvas dovortat tednam ami khuxal astolim, ani sobhent eka-mekacher visvas vaddounk ami kitem korunk zata tacher dhean diunk pavtolim.

17. Ami eka-mekacher visvas dovrop kiteak gorjechem, ani fuddlea lekhant ami kitem polloitolim?

¹⁷ Soitanachea hea sonvsarant, choddxe lok eka-mekacher visvas dovornant. Punn sonvsarbhor Jehovache songottnnent aslolim bhav-bhoinnam eka-mekacher visvas dovortat. Karonn ami eka-mekacho mog kortat. Ani hea visvasak lagon, aiz amche modem khuxalkai ani ekvott asa, toxench fuddarak ieunche asat tea trasancho fuddo korunk amkam modot zatoli. Punn tumcho visvasghat zala zalear kitem? Hem ugddas dovrat. Tea poristhiti vixim Jehovak koxem dista tem chintat, Bible-antlim totvam apnnaiat, bhav-bhoinnam pasot kallzant thaun mog vaddoiat ani Bible-antlea udharonnam thaun xikat. Oxem kelolean tumi porot tea bhav-bhoinnancher visvas dovrunk pavtolim ani tumkam ‘bhavam poros visvaxi’ aslolim zaitim ixttam mellttolim. (Mho. 18:24) Punn fokot amich dusreancher visvas dovorlear puro nhoi. Dusreamnim pasun amcher visvas dovrunk zai. Tor oslim munxam zaunk ami kitem korunk zai tem fuddlea lekhant polloum-ia.