Bible hea vixim kitem sangta?

Itihas 24:15, NW-ant “nitivont toxench onitivont munxanchem jivontponn astolem” mhunn sanglam. Tor morchea adim jea munxamnim Devachea utrak pallo dilo, tankam nitivont mhunnttleant. Ani tanchim nanvam jivitachea pustokar boroilʼlim asat. (Mal. 3:16) Punn jea munxank morchea adim Jehova vixim xikonk sondhi mellonk na, tankam onitivont mhunnttleant. Ani tanchim nanvam jivitachea pustokar boroilʼlim nant.

Juanv 5:28, 29-ant pasun, Itihas 24:15-nt sangleant teach lokanchea don zomeam vixim sanglam. Thoim Jezun mhunnttlem: ‘Zannim borem kelam tim jivit bhogunk, ani zannim vaitt kelam tim khast sosunk [“neai zaunk,” NW] uttʼttolim vo jivont zatolim.’ Tor nitivont munxamnim morchea adim borim kamam kelʼlim dekhun tanchim nanvam jivitachea pustokar boroilʼlim asat. Ani heach karonnak lagon tim jivit bhogunk jivont zatolim. Punn onitivont munxamnim morchea adim vaitt kamam kelʼlim dekhun tanchim nanvam jivitachea pustokar boroilʼlim nant. Hea karonnak lagon tancho neai zaunk tim jivont zatolim. Tea vellar tanchi porikxa zatoli. Ani tednam Jehova Deva vixim xikonk ani tannem tanchim nanvam jivitachea pustokar borounk tankam ek sondhi mellttoli.

Prokasovnni 20:12, 13, NW-ant, jivont zatolea sogleamnim “kovlleancher boroilʼlem asa” tem pallunk poddttolem mhunn sanglam. Tem mhunnttlear, novea sonvsarant Jehova Dev amkam ditolo te nove kaide sogleamnim pallunk poddttole. Punn jim konn te kaide pallinant tancho nas zatolo.—Iz. 65:20.

Daniel 12:2-ant, “konn-konn sasnnik jivitak, ani konn-konn loz ani sasnnak togta toslem nirbhag bhogunk” jivont zatolim mhunn bhasaunni kelʼli. Hea versant jivont zatolim tancho neai koso zatolo tea vixim sanglam. Tor 1,000 vorsanchea xevottak, thoddea zannank sasnik jivit favo zatolem ani thoddea zannancho sasnak nas zatolo.—Prok. 20:15; 21:3, 4.

Hea vixim anik bore toren somzonk ami ek udharonn polloum-ia. Novea sonvsarant jivont zatolea nitivont ani onitivont lokank, dusrea desant vochon ravonk sodhtat tea lokank ami sor korunk zata. Konnui dusrea desant vochon ravonk sodhtat zalear tankam thoinchea sorkara thaun visa gheunk poddtta. Tankam melltta tea visa pormonnem, thoddea lokank thoim vochon kam korunk melltta vo tim thoim ravonkui xoktat ani tankam thoddi svotontrtai asta. Tea lokank ami novea sonvsarant jivont zatolea nitivont munxank sor korunk zata. Punn thoddea lokank, tea desant fokot thoddeach vella khatir ravonk vo bhonvddi korunk visa melltta. Ani tim chodd temp tea desant ravonk sodhtat zalear thoincho sorkar sangta tem tannim pallunk poddttolem. Tor jivont zatat tea onitivont munxank ami hea lokank sor korunk zata. Karonn tim Sobit Bag zalʼle hea prithumer sasnak jieunk sodhtat zalear tannim Jehovache kaide pallunk poddttole, ani tim nitivont mhunn dakhoun diunk poddttolem. Tor eka munxa lagim kosli-i visa asum, to tea desache kaide pallina zalear taka tea desant ravonk dinant. Punn to tea desache kaide palltta zalear to thoincho nagrik pasun zaunk xokta. Tor to tea desacho nagrik zaunk purto asa kai na tem tacho sobhav ani vagnnukecher tharlolem asa. Teach bhaxen, novea sonvsarant jivont zatolim tanchem visvaxiponn ani vagnnuk polloun tankam sasnik jivit diunchem kai na tem Jehova Dev tharaitolo.

Jehova fokot ek doia-maia dakhoupi Devuch nhoi. Punn to ek neai-niticho Dev zaun asa. (D.S. 32:4; St. 33:5) Tor nitivont toxench onitivont munxank jivont korun to tankam aplo mog dakhoitolo. Punn teach borabor, borea ani vaitta vixim apnnem tharailole dorje tannim pallʼllole Jehova Devak zai. Tor jim konn Jehovacho mog kortat ani tachea dorjeam pormonnem jietat, fokot tankanch to novea sonvsarant sasnak jieunk ditolo.