1 Korintkarank 15:8-ant (Povitr Pustok – Novo Korar) Paulun oxem mhunnttlem: “Sorvxevttim, dis bhorchea adim zolmolʼlea porim mhaka-i dixtti poddlo.” Paulu hanga tannem Jezuk polloilʼlea dorxona vixim uloitalo. Tor “dis bhorchea adim zolmolʼlea porim,” oxem tannem mhunnttlem tednam eka orthan, her makhlolea Kristanvam poilinch to jivont zalo vo sorgar gelo mhunn adim amkam distalem. Punn tea versacher anik obheas kelolean tim somzonni chukichi asli ani bodlav korchi goroz asa mhunn amkam kollon ailem.

Paulu hanga to Kristanv zalo tea vellar kitem zalem tea vixim uloitalo tem khorem. Punn tannem “dis bhorchea adim zolmolʼlea porim” mhunnttlem tednam to kitem mhunnonk sodhtalo tacho veg-vegllo orth asonk xokta.

Paulu okosmat ek Kristanv zalo ani taka tras zale. Eka bhurgeacho zolm vella poilinch zata tednam to okosmat zata. Teach bhaxen, Saulu (zaka uprant Paulu mhunn vollkhonk lagle) Kristanvank dhumallo diunk, Damaskache vatter aslo tednam tannem jivont zalʼlea Jezuchem dorxon polloilem ani okosmat to ek Kristanv zalo. Oxem ghoddttolem mhunn tannem ani thoinchea Kristanvamnim pasun chintunk naslem. Toxench hea ghoddnnek lagon, thoddea vella pasot tachi dixtt geli ani haka lagon taka trasui sosunk poddle.—D.I. 9:1-9, 17-19.

Paulu “chukichea vellar” Kristanv zalʼlo. “Dis bhorchea adim zolmolʼlea porim” hea utrank uzar kelʼlea Grik utrancho orth, “chukichea vellar zolmolʼlea porim,” oso-i zaunk xokta. Pauluchea hea utram vixim The Jerusalem Bible-ant oxem sanglam: “Konnem chintunk na toslea vellar hanv zolmolʼlea porim zalo.” Paulun oxem kiteak mhunnttlem? Paulu Kristanv zaunchea poilinch Jezu jivont zaun sorgar gelʼlo. Jezu jivont zalea uprant, sorgar voichea poilim to zaitea zannank dixtti poddlo mhunn Paulun fattlea versamnim sanglem. Tanche bhaxen Paulun Jezuk pollounk na. (1 Kor. 15:4-8, Povitr Pustok – Novo Korar) Punn uprant, Jezu Pauluk okosmat dixtti poddlo tednam tem “chukichea vellar” zalʼlea porim aslear pasun, taka jivont zalʼlea Jezuk pollounk sondhi mellʼlli.

Apunn ek apostl zaunk favo na oxem Pauluk dislem. Pauluk aplea vixim unnemponn bhogtalem dekhun tannem him utram mhunnttlim mhunn thodde zannar sangtat. Tor Pauluk oxem distalem zalear apostl zauncho ho vhodd sueog taka favo na mhunn to manun ghetalo, oxem zatalem. Khorem mhunnttlear, aplea vixim Paulun oxem mhunnttlem: “Dhormdutam modem soglleam-von hanv hinn-holko; Devache Povitr-Sobhek hanvem dhumallo dilo dekhun, mhaka Dhormdutachem nanv porian favo na. Punn, Devachea funkeachea dennean, hanv khoro Dhormdut.”—1 Kor. 15:9, 10.

Tor atam meren ami polloilem toxem, “dis bhorchea adim zolmolʼlea porim,” him utram Paulun mhunnttlim tednam to ghoddie, Jezu taka okosmat dixtti poddlo tea vixim, vo konn chintina tea vellar apunn Kristanv zalo tea vixim, vo itlem ojapachem dorxon mellonk apleak favo naslem tea vixim sangtalo astolo. Pauluchea utrancho orth kitem-i asum, ho onubhov taka ekdom moladik aslo. Karonn hea vorvim Jezu melʼleantlo jivont zala mhunn taka khatri mellʼlli hantunt dubhav na. Ani Jezuchea jivontponna vixim Paulu dusreank porgottʼttalo tednam taka okosmat ghoddlolea hea ghoddnne vixim tannem zaite pavtti dusreank sanglem astolem.—D.I. 22:6-11; 26:13-18.