1. Jezun kelʼlem vizmit polloun Pedruk koxem dislem?

 AKʼKHI rat koxtt kelea uprant pasun Pedruk ani tachea sangateank kainch nustem mellonk na. Tori astana, Jezun taka sanglem: “Vhoddem khol udok asa thoim gheun voch, ani thoim tujem zall ghal.” (Luk. 5:4) Pedruk distalem ki tankam ek pasun nustem mellchem na. Tori astana, Jezuchem aikon tannem aplem zall udkant ghatlem. Ani ojapachem mhunnttlear, tankam itlem nustem mellʼllem ki tanchim zallam pinzonk laglim. Jezun vizmit kelʼlem mhunn tankam kollʼllem tednam, Pedru ani tachea borabor aslole “ekdom ojap zale.” Ani Pedrun Jezuk mhunnttlem: “Mhojea thaun pois voch Somia, karonn hanv ek patki munis.” (Luk. 5:6-9) Tor apunn Jezu fuddem ubo pasun ravonk favona, oxem Pedruk chodd korun dislem astolem.

2. Ami Pedruchea udharonnacher kiteak dhean diunk zai?

² Apunn “ek patki munis,” him Pedrun mhunnttlolim utram ekdom khorim aslim. Karonn Bible-ant amkam vachunk melltta ki thodde pavtti tannem chuki keleo, jea vixim uprant taka vaitt dislem. Tumkam pasun Pedru bhaxen dista kai? Tumche bhitor oslem kitem unnemponn asa, zacher tumi khub tempa thaun kam korit asat? Hoi zalear, Pedruchem udharonn tumkam faideak poddttolem. Koxem? Hea vixim chintat. Jehovak zai zalear, tannem Pedrucheo chuki Bible-ant boroinastana dovrunk zataleo. Punn tachea thaun lisanvam xikonk teo boroun dovorleat. (2 Tim. 3:16, 17) Pedruchea oskotaiam vixim ani taka koxem bhoglem tea vixim zannam zalʼlean, amkam kollon ieta ki Jehova amchea koddlean poripurnntai opekxa korina. Punn amkam oskotaio aslear pasun, ami visvaxiponnan tachi seva korit ravlolim taka zai.

3. Ami soddun dinastana visvaxiponnan Jehovachi seva kiteak korit ravonk zai?

³ Ami soddun dinastana visvaxiponnan Jehovachi seva kiteak  korit ravonk zai? Karonn ami kiteacherui kam korit ravtat tednam, ami tem bore toren korunk pavtat. Hem somzonk hea udharonnacher dhean diat. Gitar vazoupi ek munis, tem bore toren vazounk zaitim vorsam practice korta. Punn tem vazounk xiktana to zaiteo chuki korta. Tori astana, to soddun dina zalear, to tem bore toren vazounk xiktolo. Tem vazounk huxar zalea uprant pasun, tachea lagim kednam-i chuk zaunk xokta. Punn ti chuk porot korina zaunk to practice korit ravta. Teach bhaxen, amchea oskotaiancher zoit vhoronk kam kelea uprant pasun, ami ti chuk porot korunk xoktat. Punn ami tacher kam korit ravonk zai. Karonn ami soglim kednam-na-kednam osleo vostu kortat vo mhunnttat jea vixim amkam uprant vaitt dista. Punn ami soddun dinant zalear, sudharnni korit ravonk Jehova amkam modot kortolo. (1 Ped. 5:10) Tor Pedru soddun dinastana, visvaxiponnan Jehovachi seva koso korit ravlo tacher dhean dium-ia. Karonn taka oskotaio aslear pasun, Jezun taka jea toren doia-maia dakhoili, tea vorvim visvaxiponnan Jehovachi seva korit ravonk amkam urba mellttoli.

4. Lukas 5:5-10 pormonnem, Pedrun apnna vixim kitem sanglem, punn Jezun taka kitem mhunnon urba dili?

⁴ Pedrun apleak “patki munis” kiteak mhunnttlo vo tannem kelʼlea khoinchea chukim vixim ugddas korun tannem oxem mhunnttlem tem Bible amkam sangona. (Lukas 5:5-10 vachat.) Tannem ghoddie thoddeo gombhir chuki kelʼleo astoleo. Tea pasot apunn kainch faideacho na oxem taka distalem zait. Tor to kiteak bhietalo tem Jezuk khobor asli. Punn to apnnak visvaxi ravonk xokta hem pasun Jezu zannam aslo. Dekhun Jezun mogan, Pedruk “bhienaka” mhunn sanglem. Jezuk tacher zo visvas aslo tea vorvim Pedrucher khub boro porinnam zalo. Uprant Pedrun ani tacho bhav Andren tancho nusteacho dhondo soddun dilo. Ani te purnn vell Jezucho pattlav korun porgottnni korunk lagle dekhun, Jehovan tankam zaitim besanvam dilim.—Mk. 1:16-18.

5. Pedrun tachea oskotaiank tacher zoit vhoronk diunk na mhunn taka koslim besanvam mellʼllim?

⁵ Jezucho pattlavdar zalea uprant, Pedruk zaitim besanvam mellʼllim. Jezun duentank borim kelim, lokam voile noxtte dut kaddun uddoile, toxench meloleank jivont kelim. Him soglim vizmitam tannem polloilim. b (Mt. 8:14-17; Mk. 5:37, 41, 42) Itlench nhoi, Jezuk Devachea Rajeant, Raza mhunn ji podvi mellchi asli tachem ek ojapachem dorxon pollounk taka sondhi mellʼlli. Pedru tem dorxon kednanch visronk na. (Mk. 9:1-8; 2 Ped. 1:16-18) To Jezucho pattlavdar zalʼlo dekhun taka hem soglem pollounk  mellʼllem. Tor tannem aplea oskotaiank apleacher zoit vhoronk diunk na mhunn to kitlo khuxal zalo astolo nhoi! Na zalear taka him besanvam pollounk mellchim naslim.

6. Pedru rokddoch aplea oskotaiancher zoit vhoronk pavlo kai? Somzaiat.

⁶ Jezun kelʼlem tem soglem polloilea ani aikolea uprant pasun, Pedrun zaiteo chuki keleo. Udharonnak, Bible-antlea bhasaunneam pormonnem, apleak kitle tras sosun moronk poddttolo hem Jezu sangtana, Pedrun taka tapoilo. (Mk. 8:31-33) Toxench porot-porot Pedru ani her apostl tanchea modem konn vhoddlo tea vixim vad-vivad kortale. (Mk. 9:33, 34) Tea bhair, Jezu morchea adlea ratik, Pedrun eka munxacho kanuch katrun uddoilo. (Ju. 18:10) Ani teach ratik Pedrun munxachea bhirantin, Jezu aplo ixtt nhoi mhunn sanglem ani taka tin pavtti nakarlo. (Mk. 14:66-72) Tea pasot to dukhamnim roddlo.—Mt. 26:75.

7. Jivont zalea uprant Jezun Pedruk kosli sondhi dili?

⁷ Punn aplea niraxi zalʼlea apostlak Jezun soddun diunk na. Jivont zalea uprant Jezun Pedruk, to azunui aplo mog korta mhunn dakhounk taka sondhi dili. Tannem Pedruk khaltikaien aplea menddranchi gonvllea porim kallji korunk sanglem. (Ju. 21:15-17) Pedrun hi zobabdari manun ghetli. Ani tea pasot, Ponʼnasavea Disa Jeruzalemant ektthaim zalʼlea, sumar 120 lokank poile pavtti povitr xokten makhlim tednam, Pedru pasun thoim aslo.

8. Antiokant astana Pedrun kosli gombhir chuk keli?

⁸ Jehovan Pedruk povitr xokten makhlea uprant pasun, to aplea oskotaiam add zhuzot aslo. 36 K.X.-ant, Jehovan taka Kornelachea ghora dhaddlo, zo ek Judev naslo. Jehovan Kornelak povitr xokten makhlo. Hea vorvim “Dev bhedbhav korina,” ani Videxi raxttrantle lok pasun Kristi sobhecho bhag zaunk xoktat mhunn tannem dakhoun dilem. (D.I. 10:34, 44, 45) Hachea uprant, Pedru Videxi raxttrantlea lokam sangata jevunk laglo, jem tannem poilim kednanch korunk naslem. (Gal. 2:12) Punn thoddea Judev Kristanvank, oxem korop sarkem nhoi oxem distalem. Tor tanchea modlim thoddim Kristanvam Antiokant ailim tednam, tankam vaitt distolem mhunn bhieun, Pedrun Videxi raxttrantlea lokam sangata jevop bond kelem. Apostl Paulun hem polloilem tednam, tannem Pedruk sogleam hujir khor xist dili. (Gal. 2:13, 14) Tor Pedrun chuk keli tem khorem. Punn tannem Jehovachi seva korop soddun diunk na. Oxem korunk taka koxi modot zali?

9. Juanv 6:68, 69-antlean, Pedru visvaxi aslo mhunn koxem kolltta?

⁹ Pedru visvaxi aslo. Tannem koslea-i karonnak lagon Jezucho pattlav korop bond korunk na. Zoxem ek pavtti, Jezun oxem kitem mhunnttlem jem tachea xisank somzonk na. (Juanv 6:68, 69 vachat.) Tednam to kitem sangonk sodhtalo tem vicharchea bodlek, vo tacho orth to somzaitolo mhunn ravchea bodlek, zaitea zannamnim tacho pattlav korop soddun dilem. Punn Pedrun toxem korunk na. Karonn “sasnachea jivitachim utram” fokot Jezu lagim asat mhunn to zannam aslo.

10. Jezuk Pedrucher visvas aslo mhunn koxem kolltta? (Chitr pasun polloiat.)

¹⁰ Jezun pasun Pedruk soddun diunk na. Morchea adlea ratik, Pedru toxench her apostl apleak soddun voitole, mhunn Jezu zannam aslo. Punn Pedru aplo pattlav korop bond korcho na ani to visvaxi ravtolo, hi khatri Jezuk asli mhunn tannem mhunnttlolea utrantlean kollon ieta. (Luk. 22:31, 32) Tachem “mon toiar asa, punn kudd oskot asa” mhunn Jezun somzon ghetlem. (Mk. 14:38) Tea pasot, Pedrun taka tin pavtti nakarlea uprant pasun, Jezun taka soddun diunk na. Jezu jivont zalea uprant, to chodd korun, Pedru ekloch aslo tednam taka mellonk gelo. (Mk. 16:7; Luk. 24:34; 1 Kor. 15:5) Apnnem jem kelʼlem tea vixim Pedru ekdom dukhi  aslo. Punn Jezuk polloun taka kitli urba mellʼlli astoli nhoi!

11. Jehova Pedrucheo gorzo purnn kortolo mhunn Jezun taka koxi khatri dili?

¹¹ Itlench nhoi, Jehova tacheo gorzo purnn kortolo mhunn Jezun Pedruk khatri dili. Koxi? Jivont zalea uprant, Jezun porot ek pavtti vizmit kelem, jea udexim Pedruk ani tachea sangata aslolea apostlank zaitem nustem mellʼllem. (Ju. 21:4-6) Tor hea vizmita udexim, Jehova apleo gorzo purnn kortolo mhunn Pedruk porot khatri mellʼlli. Ani ‘Devachem Raj sodanch poilea zagear dovortat’ tancheo gorzo Dev purnn kortolo, him Jezuchim utram ghoddie tea vellar tachea monant ailim astolim. (Mt. 6:33) Hea pasot Pedrun aplea nusteachea dhondeak nhoi, punn porgottnnechea kamak aplea jivitant poilo zago dilo. Uprant 33 K.X.-ant Ponʼnasavea Disa, Pedrun dhiran Jezu vixim lokank sakx dili, jea udexim hozaramnim lokamnim bori khobor manun ghetli. (D.I. 2:14, 37-41) Tea uprant, tannem Samaritkarank ani Videxiank Jezuche xis zaunk modot keli. (D.I. 8:14-17; 10:44-48) Khorench, Jehovan soglea torechea lokank Kristi sobhent haddunk, Pedruk ekdom vhodd ritin uzar kelo!

12. Ami zaitea vorsam thaun eke umkech oskotaiecher zoit vhoronk proitn kortat zalear, ami Pedru bhaxen kosli khatri dovrunk zata?

¹² Ami zaitea vorsam thaun eke umkech oskotaiecher zoit vhoronk proitn kortat zait. Oxem korop amkam kotthin zata astolem. Punn apli seva korit ravonk Jehova amkam modot korunk xokta. Thodde pavtti, amcheo oskotaio Pedruchea oskotaiam poros anikui kotthin asat, oxem amkam disot. Tori astana, soddun dina zaunk Jehova amkam boll diunk xokta. (St. 94:17-19) Udharonnak, sot xikchea poilim, ek bhav khub vorsam poriant gay lokam bhaxen jietalo. Punn sot xiklea uprant, tannem aplea jivitant purnn toren bodlav kelo, ani to Bible-antlea dorjeam pormonnem jieunk laglo. Torui, oxem kelea uprant pasun, kednam-kednam tachea monant vaitt vondovnneo ietaleo. Tor visvaxiponnan Jehovachi seva korit ravonk taka koxi modot zali? To sangta: “Jehova mhaka boll dita . . . Tachea povitr xoktechea modotin . . . hanv taka manvota tem korit ravonk xokta mhunn mhaka kollon ailem . . . To mhaka aplea sevent uzar korit asa, ani oskotaio aslear pasun to mhaka ghottai di-it ravta.”

13. Itihas 4:13, 29, 31-a pormonnem, ami Pedruchi dekh koxi gheunk zata? (Chitr pasun polloiat.)

¹³ Ami polloilʼlea bhaxen, munxachea bhirantik lagon Pedrun thoddeo gombhir chuki keleo. Punn dhirvont zaunk tannem Jehova lagim  magnnem kelem, ani Jehovan taka modot keli. (Itihas 4:13, 29, 31 vachat.) Tor amkam bhirant dista tednam ami kitem korunk zata? Dusrea Vixv Zhuza vellar, Germany-nt ravtolea Horst nanvachea eka tornnattea bhavachem ami udharonn polloum-ia. To lhan astana, iskolant taka “Heil Hitler!” mhunnonk laitale tednam, to bhieun thodde pavtti mhunnttalo. Tednam tachea avoi-bapain taka tapounchea bodlek, tachea sangata boson taka dhir di mhunn Jehova lagim magnnem kelem. Tor avoi-bapaichea modotin, ani to Jehovacher patieun ravlo dekhun, to dhirvont zaunk pavlo ani tannem oxem mhunnttlem: “Jehovan mhaka kednanch soddun diunk na.” c

14. Nirax zalʼlea bhav-bhoinnank vhoddilamnim koxi bhuzvonn diunk zata?

¹⁴ Jehova ani Jezu amkam pasun kednanch soddun diunche nant. Jezuk nakarlea uprant, Pedruk ek mhotvacho nirnnoi gheuncho aslo. To mhunnttlear, to Jezucho pattlav korit ravtolo vo soddun ditolo. Pedrucho visvas unno zaina zaunk, Jezun Jehova lagim vinoti keli. Hea vinoti vixim tannem Pedruk sanglem. Toxench, Pedru fuddarak aplea bhavank ghottai ditolo hi khatri taka asa, oxem-i sanglem. (Luk. 22:31, 32) Pedru Jezuchea hea utram vixim chintʼtalo tednam taka kitli ghottai mellʼlli astoli nhoi! Amkam pasun mhotvacho nirnnoi gheuncho asta tednam, Jehova vhoddilank uzar korun ami visvaxiponnan tachi seva korit ravonk pavtolim mhunn khatri diunk xokta. (Ef. 4:8, 11) Oxench, zaitea vorsam thaun vhoddil aslolo bhav Paul korta. Bhav-bhoinnank jednam Jehovachi seva soddun diunk dista tednam, to tankam tea vellacho ugddas korta, jednam tankam Jehovan sotant voddun haddlolim. Hea toren Jehova azunui tancho mog korta dekhun, to tankam kednanch soddun diuncho na mhunn bhav tankam khatri  dita. To mhunntta, “Jehovachea modotin zaitim niraxi zalʼlim bhav-bhoinnam visvaxiponnan tachi seva korunk pavleant.”

15. Pedru ani bhav Horst-achea onnbhovantlean, Matev 6:33-ant sanglolim utram khorim zaun asat mhunn amkam koxem kolltta?

¹⁵ Jehovan, Pedru ani her apostlanchea gorzanchi kallji ghetli toxi, ami pasun tachi seva amchea jivitant poilea zagear dovorli zalear, to amchea gorzanchi pasun kallji ghetolo. (Mt. 6:33) Bhav Horst zachea vixim ami poilim uloilʼlim, tannem pasun hem onnbhovlem. Dusrea Vixv Zhuza uprant, tannem pioneer seva korunk chintlem. Punn to gorib aslo dekhun pioneer seva kelear, apunn aplea gorzanchi koxi kallji ghetolo tea vixim to chintʼtalo. Tor Jehova apli kallji ghetolo kai na tem pollounk, sorkittachi dekhrekh korpeachi bhett asli tednam tannem akʼkhem suman porgottnni keli. Sumanachea xevottak, dekhrekh korpi bhavan taka ek envelope dilem. Punn tacher konnachench nanv naslem. Tem envelope polloun bhav ekdom ojap zalo. Karonn tantunt itle poixe asle ki to zaite mhoine poriant susegad pioneer seva korunk xoktalo. Taka mellʼllolo gift polloun, Jehova aplea gorzanchi kallji ghetolo mhunn bhavak khatri zali. Ani tannem aplea akʼkhea jivitant Jehovachi seva poilea zagear dovorli.—Mal. 3:10.

16. Ami Pedruchea udharonnacher ani tannem boroilʼlea chittincher kiteak dhean diunk zai?

¹⁶ Pedrun Jezuk aplea thaun pois vochonk sanglem tednam, Jezun toxem korunk na mhunn Pedru kitlo khuxal zalo astolo nhoi! Jezu Pedruk proxikxonn di-it ravlo, jea udexim to ek visvaxi apostl zaunk, ani soglea Kristanvank bori dekh dovrunk pavlo. Pedruk mellʼllolea proxikxonna thaun ami zaitem xikonk zata. Tantuntleo thoddeo vostu, Pedrun poilea xekddeantlea Kristanvank boroilʼlea don chittimnim vachunk mellttat. Tor fuddlea lekhant ami tantuntlea thoddea vixoi-ancher dhean ditolim ani aiz te koxe apnnaunk zatat tem polloitolim.