1. Apostl Pedru morchea thoddeach vella poilim Jehovan taka koslem kam dilem?

 APOSTL Pedrun zaitim vorsam poriant, visvaxiponnan Jehovachi seva keli. Tannem Jezu sangata mellon porgottnnechem kam kelem, Judev nhoi tea lokank porgottunk suru kelem, ani uprant to sonchalon monddollacho vangddi zalo. Magir tachea jivitachea xevottachea vellar, to anik chodd temp jieuncho na mhunn taka kollʼllem tednam, Jehovan taka anikui kam dilem. Tem mhunnttlear, sumar 62-64 K.X.-a modem, Jehovachea povitr xoktechea modotin tannem Poilo ani Dusro Pedru, heo Bible-ant asloleo chitteo boroileo. Ani apunn melea uprant Kristanvank hea chittintlean faido zatolo mhunn taka axa asli.—2 Ped. 1:12-15.

2. Pedrun boroilʼleo chitteo tea vellar jietolea Kristanvank kiteak ekdom faideacheo asleo?

² Pedrun heo chitteo tea vellar boroilʼleo jednam Kristanvank ‘jinsam-jinsanche upodre bhogche poddttale.’ (1 Ped. 1:6) Noxttim munxam Kristi sobhent khotti xikounn posraitalim ani vaitt kamam korunk urba ditalim. (2 Ped. 2:1, 2, 14) Ani Jeruzalemant ravtolim Kristanvam, beginuch “sogllea vostuncho xevott” pollounchim aslim. Tem mhunnttlear, Romi odhikari Jeruzalem xaracho ani mondiracho nas korche asle. (1 Ped. 4:7) Tor Pedrun boroilʼlea chittim thaun, Kristanvamnim tea trasancho fuddo koso korcho, ani fuddarak ieunche asat tea trasam pasot koxi toiari korchi tem zannam zaunk tankam modot zali. b

3. Pedrun boroilʼlea chittincher ami dhean divop kiteak gorjechem?

³ Pedrun boroilʼleo chitteo, poilea xekddeantlea Kristanvam pasot asleo tem khorem. Punn teo Jehovachea Utracho bhag zaun asat. Tor tantuntlean amkam pasun faido zaunk xokta. (Rom. 15:4) Karonn tea Kristanvam bhaxen, aiz ami pasun ek oslea sonvsarant jietat zoim choddso lok vaitt kamam korta. Ani hea  pasot Jehovak visvaxi ravonk amkam kotthin zaunk xokta. Tea bhair, ami beginuch ek vhodd sonkoxttacho fuddo korchim asat. Ani ho sonkoxtt Jeruzalem ani tachea mondirachea nisonttona poros vhodd astolo. Tor Pedruchea chittintlean ami xiktat tim lisanvam amkam Jehovachea disa pasot axeun ravonk, munxachi bhirant pois korunk, ani kallzantlean eka-mekacho mog korunk modot kortolim. Tea bhair sobhentlea bhav-bhoinnamnim tancho bhavarth ghott korunk, vhoddilamnim tankam koxi modot korunk zata tem tankam kollon ietolem.

4. 2 Pedru 3:3, 4-a pormonnem amcho bhavarth kiteak halonk xokta?

⁴ Ami oslea lokam modem jietat, zantuntlim choddxim zannam Bible-ant fuddara vixim jem boroilam tacher visvas dovornant. Ami zaitea vorsam thaun xevott beginuch ietolo oxem sangtat dekhun, tim amchim fokannam korit. Ani xevott kednanch ieunchona oxem thoddim zannam mhunnot. (2 Pedru 3:3, 4 vachat.) Ami porgottʼttat tea vattarantle lok, amchea borabor kam korpi, vo amchim ghorchim oxem sangtat tednam, amcho bhavarth halonk xokta. Tor oslea vellar amkam kitem modot korunk xokta, tem amkam Pedruchea chittintlean kollon ieta.

5. Xevotta vixim sarkem chintop dovrunk amkam kitem modot korunk xokta? (2 Pedru 3:8, 9)

⁵ Xevott haddunk Jehova khub vell laita oxem ghoddie thoddeank disot. Punn Pedruchea utrantlean sarkem chintop dovrunk amkam modot zata. Karonn tannem boroilʼlea utrantlean, vella vixim Jehova jem chintʼta ani munxam jem chintʼtat, tantunt khub ontor asa mhunn amchea ugddasak ieta. (2 Pedru 3:8, 9 vachat.) Jehovachea nodren ek hozar vorsam mhunnttlear ek dis. Ani taka konnachoch nas zalʼlo naka dekhun, to pasiensan ravla. Punn xevott haddunk tannem ek vell tharaila, ani tea vellar to xevott haddttoloch. Tor atam amchea lagim zo vell asa to uzar korun, soglea raxttrantlea lokank sakx diunk amkam ek vhodd sueog asa.

6. Jehovachea disa pasot ami koxem ‘axeun ravonk’ zata? (2 Pedru 3:11, 12)

⁶ Jehovachea disa pasot ‘axeun ravonk’ Pedrun amkam urba dili. (2 Pedru 3:11, 12 vachat.) Ami hem koxem korunk zata? Novea sonvsarant mellchim asat tea besanvam vixim ami zata zalear dor disa niallunk zata. Udharonnak, tumi xudʼdh vareant svas ghetat, tumchea bholaikek boreak poddtta toslem jevonn jevtat, tumchim mogachim melolim jivont zatat toxim tankam ieukar ditat, ani xekddeamnim vorsam poilim jielʼlea munxank Bible-antleo bhasaunneo koxeo purnn zaleo tea vixim xikoitat, hem tumi tumchea dolleam mukhar haddunk zai. Oxem kelʼlean, Jehovachea disa pasot axeun ravonk, ani ami atam khoreaninch nimannea disamnim jietat hachi khatri korun gheunk, amkam modot zatoli. Tor fuddara vixim “poilim thaunuch khobor” aslolean, khotti xikounn aikon ami ‘koddsoron voichim nant.’—2 Ped. 3:17.

7. Munxachi bhirant aslear kitem zaunk xokta?

⁷ Jehovacho dis ekdom lagim asa mhunn ami zannant dekhun, dusreank bori khobor porgottunk amchean zata tem soglem ami korunk sodhtat. Punn thodde pavtti oxem korunk ami fattim soronk xoktat. Karonn lok amche vixim kitem chintʼtolo vo amkam kitem kortolo mhunn ami bhieunk xoktat. Pedruk pasun oxench ghoddlem. Jezu morchea adlea ratik, Pedrun thoim aslolea thoddea munxank apunn tacho xis nhoi mhunn sanglem, ani tin pavtti Jezuk nakarlo. (Mt. 26:69-75) Punn uprant Pedrun munxachi bhirant pois keli, ani to oxem borounk pavlo: “Lokank jea vostunchi bhirant dista, tea vostunk bhienakat, nhoi mhunn bejar zainakat.” (1 Ped. 3:14) Tor Pedrun boroilʼlea utrantlean ami pasun munxachi bhirant pois korunk xoktat mhunn kolltta.

8. Ami munxachi bhirant koxi pois korunk zata? (1 Pedru 3:15)

 ⁸ Ami munxachi bhirant koxi pois korunk zata? Pedrun mhunnttlem: “Kristak tumchea kallzant Somi mhunn vollkhon taka povitr manat.” (1 Pedru 3:15 vachat.) Oxem korunk, ami amcho Somi ani Raza Jezuk kitli podvi ani xokti asa tea vixim niallunk zata. Dusreank Rajeachi bori khobor sangonk amkam sondhi melltta tednam, amkam bhirant dista vo kotthin zata zalear, ami amchea Raza Jezu vixim chintunk zai. Udharonnak, Jezu sorgar raz korta ani tachea bhonvtim lakʼkhamnim devdut asat, hem ami amchea dolleam mukhar haddunk zai. Toxench, ‘sorgar ani prithumer Jezuk soglo odhikar asa’ ani ‘sonvsarachea xevottachea vella poriant to amchea sangata astolo’ mhunn ami ugddasak haddunk zai. (Mt. 28:18-20) Amchea patienni vixim sangonk ami ‘sodanch toiar asonk zai’ oxem Pedrun sanglem. Tor kamachea zagear, iskolant, vo her khoinchea-i zagear tumi sakx diunk sodhtat zalear, tumi khoim ani kitem uloitolim tea vixim poilinch chintat. Dhira pasot magnnem korat ani munxachi bhirant pois korunk Jehova tumkam modot kortolo mhunn visvas dovrat.—D.I. 4:29.

9. Pedru ek pavtt bhav-bhoinnank mog dakhounk koso chuklo? (Chitr pasun polloiat.)

⁹ Bhav-bhoinnank koso mog dakhounk zai tem Pedru xiklolo. Oxem ami kiteak mhunnonk zata?  Jezun aplea xisank oxem sanglolem: “Hanv tumkam ek novi adnea ditam, tumi eka-mekacho mog korat. Zoso hanvem tumcho mog kela, tosoch tumi-i eka-mekacho mog korat.” (Ju. 13:34) Ani Jezun him utram mhunnttlolim tednam Pedru pasun thoim aslo. Tori astana, uprant Judev Kristanvachea bhirantik lagon, Pedrun Judev nhoi tea Kristanvam sangata jevop bond kelem. Pedrun jem kelem taka apostl Paulun “dhong” mhunnttlo ani taka khor xist dili. (Gal. 2:11-14) Hi xist Pedrun manun ghetli ani bodlav kele. Ani uprant tannem boroilʼlea donui chittimnim, amkam bhav-bhoinnancho mog aslearuch puro nhoi, punn ami to mog dakhovop gorjechem mhunn tannem sanglem.

10. Ami kitem kelear “bhavam modem asta toslo dhong naslolo mog” dakhounk pavtolim? Somzaiat. (1 Pedru 1:22)

¹⁰ Pedrun mhunnttlolem ki ami “bhavam modem asta toslo dhong naslolo mog” korunk zai. (1 Pedru 1:22 vachat.) Ami “sotachem utor manun” ghetlam zalear ami ho mog dakhounk pavtolim. Ani hea sotachea utrant, “Dev bhedbhav korina” hi xikounn pasun mellon asa. (D.I. 10:34, 35) Punn sobhentlea thoddea bhav-bhoinnancho ami mog kortat, ani thoddeancho korinant zalear, moga vixim Jezun dilʼli xikounn ami pallinant. Hem khorem ki heram poros thoddim bhav-bhoinnam amkam chodd lagim asot, zoxem Jezuk aslim. (Ju. 13:23; 20:2) Tori astana, Pedrun amchea ugddasak haddlem ki ami soglea bhav-bhoinnancho mog korunk zai. Karonn tim amchi famil koxim zaun asat.—1 Ped. 2:17.

11. ‘Kallzant thaun eka-mekacho mog korop’ mhunnttlear kitem?

¹¹ Toxench, Pedrun sanglolem ki ami ‘kallzant thaun eka-mekacho mog korunk’ zai. Hea versant “kallzant thaun” mhunnche, dusreank mog dakhounk kotthin zata tednam pasun ami tankam mog dakhounk zai. Udharonnak, ek bhav amkam dukhounk xokta. Tea vellar, taka mog dakhounchea bodlek, to amchea sangata vagla teach toren ami tachea sangata vagtolim oxem ami chintunk xoktat. Punn, vaittak-vaittan farik korop Jehova Devak manvona mhunn Pedru, Jezu thaun xiklolo. (Ju. 18:10, 11) Dekhun tannem oxem boroilem: “Vaitt kodinch vaittan farik korum nakat, vo beman bemanan; urfattim, tankam borem magat.” (1 Ped. 3:9) Tor ami kallzant thaun dusreancho mog kortat zalear, amkam dukhoilam tankam pasun ami doia dakhoitolim ani somzon ghetolim.

12. (a) Ami eka-mekacho kallzant thaun mog kortat zalear ami anik kitem kortolim? (b) Preserve The Precious Gift of Unity (Inglez bhaxen) ho video polloilea uprant tumi kitem korunk sodhtat?

¹² Pedrun aplea poilea chittint, ami eka-mekacho “kallzant thaun mog” korunk zai mhunn sanglem. Ho mog fokot thoddinch nhoi, punn “bhorpur patkam dhampta.” (1 Ped. 4:8) Him utram boroitana, Pedruk ghoddie, Jezun zaitea vorsam poilim bhogsonnea vixim xikol’lem lisanv ugddas ailem astolem. Tea vellar Pedrun, Jezuk mhunnttlolem ki apunn aplea bhavak “sat pavtti” bhogsunk toiar asa. Tor apunn udar kallzacho asa oxem taka distalem. Punn Jezun taka sanglem ki ami “77 pavtti,” mhunnttlear hixob dovornastana bhogsunk zai. (Mt. 18:21, 22) Hantuntlean amkam pasun xikonk melltta. Jehovachea soglea opurnn sevokank kednam-na-kednam dusreank bhogsunk kotthin zalʼlem. Tor amkam-i kotthin zata zalear ami niraxi zaunchem nhoi. Punn mhotvachem mhunnttlear, ami amchea bhav-bhoinnank bhogsunk ani xanti korunk goroz tim panvlam gheunk zai. c

13. Bhav-bhoinnanchi kallji gheunk vhoddilank kiteak kotthin zaunk xokta?

¹³ Jezun jivont zalea uprant jem sanglolem, tem Pedru kednanch visronk na mhunn ami  khatren sangonk zata. Jezun taka mhunnttlolem: “Mhojea dhakttea menddranchi kallji ghe.” (Ju. 21:16) Tor tumi vhoddil asat zalear, Jezuchim him utram tumkam-i lagu zatat mhunn tumi zannant. Punn hea mhotvache zobabdare pasot tumkam vell kaddunk kotthin zaunk xokta. Karonn vhoddilank sogleant poilim tanchea svotachea familicheo gorzo purnn korchi, tankam mog dakhounchi, ani Jehova sangata tanchi dor ekleachi ixttagot ghott korchi zobabdari asta. Toxench, te porgottnnechea kamant fuddakar ghetat. Itlench nhoi, sobhent, zomatimnim ani odhivexonamnim tankam bhag astat, jea pasot tannim toiari korchi asta. Tea bhair, thodde vhoddil HLC-che vangddi astat. Vo thodde zann, LDC Khateak modot kortat. Tor vhoddil khoreaninch khub bizi astat!

14. Vhoddilank bhav-bhoinnancho samball korunk koxi modot zaunk xokta? (1 Pedru 5:1-4)

¹⁴ Apostl Pedrun, her vhoddilank oxem sanglolem: “Hinddacho gonvlleam bhaxen samball korat.” (1 Pedru 5:1-4 vachat.) Tumi vhoddil asat zalear, tumkam bhav-bhoinnancho khub mog asa ani tumi tanchi kallji gheunk sodhtat mhunn dubhav na. Punn thodde pavtti tumi ghoddie itle thoklole astat, vo tumkam itlim kamam astat ki hi zobabdari purnn korunk tumkam kotthin zait. Tor tumi kitem korunk zata? Tumchea kallzant asa tem soglem Jehovak sangat. Pedrun mhunnttlolem: “Dev dita te ghottaien seva kor.” (1 Ped. 4:11) Bhav-bhoinnam oslea oddchonneancho fuddo kortat astolim, jeo hea sonvsarant purnn toren suttaveo zauncheo nant. Punn “Porom Gonvlli” Jezu Krist, tumi jem korunk xoktat, tachea poros vorte ritin tankam modot korunk xokta mhunn ugddas dovrat. To atam ani novea sonvsarant pasun oxem korunk xokta. Toxem zalear, tumi vhoddilamnim kitem kelʼlem Jehovak zai? Tumi bhav-bhoinnancho mog kelʼlo, tanchi kallji ghetloli, ani ‘hinddache nomunne zalʼle’ Jehovak zai.

15. Ek vhoddil, bhav-bhoinnanchi koxi kallji gheta? (Chitr pasun polloiat.)

¹⁵ Bhav William, zaitea tempa thaun vhoddil mhunn seva korta. Bhav-bhoinnank gonvlli bhett korop kitlem mhotvachem tem to zannam. COVID-19 pidda suru zali tednam, tannem ani tachea sobhentlea her vhoddilamnim, dor sumanak tanchea grupantlea dor ekleak sompork korunk nichov kelo. Kiteak? Bhav mhunntta: “Zaitim bhav-bhoinnam ghorant ekttinch aslim, ani tim niraxi zaunk xoktalim.” Tor bhav-bhoinnank osleo oddchonneo astat tednam, tankam kosle uske asat ani tankam kiteachi goroz  asa tem zannam zaunk bhav William tanchem dhean diun aikota. Uprant to website-icher, tankam modot korunk xoktat toslim prokaxonam ani video sodhta, ani te uzar korun to tankam urba dita. Bhav sangta: “Gonvlli bhett korop, poilim poros atam anikui gorjechem zaun asa. Lokank Jehova vixim xikounk ami khub vavr kortat tea bhaxen, sobhentlea bhav-bhoinnankui sotant ghott ravonk modot korunk ami titloch vavr korunk zai.”

16. Pedruchea chittintlean xiklolim lisanvam ami koxim apnnaunk zatat?

¹⁶ Hea lekhant Pedruchea donui chittintlim thoddim lisanvam ami xiklim. Ani tancher dhean dilʼlean, tumi khoim sudharnni korunk zai tem tumkam ghoddie kollon ailem astolem. Udharonnak, novea sonvsarant mellttolea besanvam vixim tumi anikui niall korunk sodhtat kai? Tumchea kamachea zagear, iskolant vo her khoinchea-i zagear dusreank sakx diuncho dhei tumi dovorla kai? Tumi anikui vattamnim bhav-bhoinnank kallzantlean mog dakhounk sodhtat kai? Vo tumi vhoddil asat zalear, tumi ap-khuxen ani urben Devachea hinddacho samball korunk sodhtat kai? Hea toren choukoxi kelʼlean tumi khoim tori sudharnni korunk zai mhunn tumkam kollon ieit. Punn niraxi zainakat. Karonn ‘Somi doiall,’ ani to tumkam sudharnni korunk modot kortolo. (1 Ped. 2:3) Toxench apostl Pedrun amkam oxi khatri dili: “Dev svota tumchem proxikxonn purnn kortolo . . . To tumkam thir kortolo, xoktivont kortolo ani thir ubim ravonk modot kortolo.”—1 Ped. 5:10.

17. Ami visvaxiponnan Jehovachi seva korit ravlear ani tachea thaun proxikxonn gheit ravlear kitem porinnam zatolo?

¹⁷ Apunn Jezu mukhar ubo ravonk pasun favona, oxem Pedruk distalem. (Luk. 5:8) Punn tannem soddun diunk na. Jehova ani Jezuchea modotin, to visvaxiponnan Jezucho pattlav korit ravonk pavlo. Tea pasot, Jehovan Pedruk ‘amcho Somi ani Salvar Korpi Jezu Kristachea sasnak urta tea Rajeant bhitor ghetlo.’ (2 Ped. 1:11) Pedruk kitlem vhoddlem inam mellʼllem nhoi! Tor ami pasun Pedru bhaxen soddun dinastana Jehovachi seva korit ravlear, ani tachea thaun proxikxonn gheit ravlear, Jehova amkam pasun sasnachea jivitacho inam ditolo. Hoi, ‘amchea bhavarthachem sopurnn foll, mhunnche, amchem purnn taronn amkam mellttolem.’—1 Ped. 1:9.