1-2. Ami Samsona vixim kiteak zannam zalear borem?

 SAMSON hem nanv aikotana tumchea monant kitem ieta? To ekdom bollixtt aslo, hem ghoddie tumchea monant ailem astolem. Hem khorem ki to ekdom bollixtt aslo. Punn tannem ek chuk keli, zacho taka vaitt porinnam bhogcho poddlo. Tori astana, Samsonan visvaxi ravonk jivitbhor kitem kelʼlem tacher Jehovan dhean dilem, ani amkam faido zaunk Jehovan tache vixim Bible-ant boroun dovorlem.

² Aple vinchun kaddlole Izrael porjek modot korunk, Jehovan Samsona udexim zaitim ojapachim kamam kelim. Ani Samson moron xemboramnim vorsam uprant, Jehovan aplea visvaxi sevokanchea nanvam modem Samsonachem nanv borounk, apostl Pauluk prerit kelo. (Heb. 11:32-34) Samsonachea udharonna thaun aiz amkam urba melltta. Karonn, kotthin poristhitint pasun to Jehovacher patieun ravlo. Tor hea lekhant ami Samsona thaun kitem xikonk zata, ani tachem udharonn amkam koxi urba dita tem polloum-ia.

3. Samsonak kosli zobabdari dilʼli?

³ Samson zolmolʼlo tednam, Izrael porza Filistevkaranchea tabeant asli. (Fudd. 13:1) Filistevkar ekdom krur asle dekhun Izraelitkarank khub tras sosunk poddle. Tea pasot Jehovan “Filistini lokachea hatantli Israel-porjek nivarunk” Samsonak vinchun kaddlo. (Fudd. 13:5) Hem kam khub kotthin aslem. Ani Jehovacher patieunuch, to hi zobabdari purnn korunk xoktolo aslo.

4. Jehovan Samsonak koxi modot keli? (Fuddari 15:14-16)

⁴ Samsonan Jehovacher koso visvas dovorlo, ani Jehovan  taka koxi modot keli tea vixim ek udharonn polloum-ia. Ek pavtti Filistevkaranchi fouz Samsonak dhorunk, Lehi mhunnttlolea zagear aili. Ho zago ghoddie Judant aslo. Tednam Judache munis itle bhiele ki tannim Samsonak dusmananchea hatant diunk nirnnoi ghetlo. Tannim taka don novea doramnim bandlo ani Filistevkaranchea adhin kelo. (Fudd. 15:9-13) Punn, ‘Sorvesporacho svas tacher denvlo vo Jehovachi povitr xokti tacher kam korunk lagli’ ani to tea dorantlean suttlo. Uprant, taka ‘gaddvachem daddmonneachem tajem hadd mellʼllem’ ani tem uzar korun tannem 1,000 Filistevkarank jivexim marle!—Fuddari 15:14-16 vachat.

5. Samsonak Jehovacher visvas aslo mhunn tannem koxem dakhoilem?

⁵ Gaddvachem daddmonneachem hadd, dusmanam add zhuzpachem hotʼtear naslem. Toxem zalear Samsonan tem kiteak uzar kelem? Karonn Filistevkaram add zhuzonk Jehova apnnak modot kortolo mhunn taka khobor asli. Tor tea vellar tache lagim jem kitem aslem tem uzar korun Jehovan dilʼlem kam tannem purnn kelem. Khorench, to Jehovacher patieun ravlo dekhun taka itlem vhodd zoit mellʼllem!

6. Amkam asloleo zobabdareo purnn korchea vixim ami Samsona thaun kitem xikonk zata?

⁶ Jehovachea songottnnent amkam asloleo zobabdareo purnn korunk, to amkam pasun xokti diunk xokta. Osleo zobabdareo pasun jeo amchean zauncheoch na, oxem amkam disot. Thodde pavtti ami chintunk na tea toren Jehova amkam modot korunk xokta. Tor modoti pasot ami Jehovacher patieun ravtat tea mhunnosor, tannem Samsonak modot keli toxi, to amkam-i modot kortolo mhunn ami visvas dovrunk zata.—Mho. 16:3.

7. Ami magnnem korun Jehovachem nirdexon ghevop kiteak gorjechem? Ek udharonn diat.

⁷ Songottnnechea bandkamak tenko diupi zaitea bhav-bhoinnamnim, tim Jehovacher visvas dovortat mhunn dakhoun dilam. Koxem? Adim, fuddakar gheupi bhav choddxim novim Raj-ghoram ani her bilddingache design toiar kortale ani tim bandtale. Punn songottnnent vaddavoll zaunk lagli, ani chodd-ani-chodd lok bautizm gheunk laglo toso, hantunt  thoddo bodlav korunk poddlo. Fuddakar gheupi bhavamnim Jehovachea nirdexona pasot magnnem kelem ani noveo vatto apnnaunk proitn kelo. Zoxem, te bilddingam viktim gheunk lagle, ani tim renovate korunk lagle. Hea vixim Robert nanvacho bhav oxem sangta: “Survatek hi novi vatt apnnaunk titlem sompem naslem.” Bhavan halinchea vorsamnim sonvsarbhor zatolea zaitea bandkamamnim tenko dila. To fuddem mhunntta: “Ami adim kortalim tache poros hi vatt khub veglli asli. Punn bhav bodlav korunk toiar asle. Ani Jehova hea manddavollicher besanv ghalta tem ami polloilem.” Apli khuxi purnn korunk Jehova aplea sevokank koso margdorxon dita, tachem hem ek udharonn zaun asa. Tor ami vella-vellar amkanch vicharunk zai: ‘Hanv magnnem korun Jehovachem nirdexon gheunk, ani songottnnent zatat tea bodlavam pormonnem kam korunk toiar asam kai?’

8. Ek pavtti Samsonak khub tan lagloli tednam tannem kitem kelem?

⁸ Samsonan kelʼlea anikui ojapachea kamam vixim tumi ghoddie vachlam astolem. Zoxem ek pavtti, tannem ekleanuch eka xinvak marun uddoilo. Ani uprant Ashkelonachea xarant aslolea 30 Filistevkarank jivexim marun uddoile. (Fudd. 14:5, 6, 19) Hem soglem apunn svotachea bollan nhoi, punn Jehovachea bollanuch korunk xokta mhunn Samson zannam aslo. Ami oxem kiteak mhunnonk zata? Karonn ek pavtti tannem 1,000 Filistevkarank marun uddoilea uprant taka khub tan lagloli tednam, apunn zaun udok sodhunk voichea bodlek, tannem Jehovacho adar maglo.—Fudd. 15:18.

9. Samsonan Jehova lagim modot magli tednam kitem zalem? (Fuddari 15:19)

⁹ Jehovan Samsonachem magnnem aikolem ani vizmit korun udkachi ek zhor toiar keli. Samson tem udok pielo tednam, “tachi xokti porot aili ani to jivan bhorlo.” (Fuddari 15:19 vachat.) Zaitea vorsam uprant, provadi Samuelan Devachea preronnan Fuddari pustok boroilʼlem tednam pasun hi zhor asli. Ani jea Izraelitkaramnim hi zhor polloilʼli, tankam ugddasak ietalem ki Jehovacher patieun ravlear to aplea visvaxi sevokank tanchea gorjeche vellar modot kortolo.

10. Jehovan dilʼlem kam vo zobabdari ami bore toren kednam korunk pavtolim? (Chitr pasun polloiat.)

¹⁰ Amche lagim kitli-i kola asum vo Jehovache sevent ami zaitem kelam astolem. Punn modotik lagon ami pasun sodanch Jehovacher patieun ravonk zai. Karonn ami Jehovacher patieun ravlearuch, tannem amkam dilʼlem kam vo zobabdari, ami bore toren korunk pavtolim mhunn ami khaltikaien manun gheunk zai. Jehovan dilʼlem udok pieun, Samsonak ghottai mellʼlli. Teach bhaxen, Jehovan amchea pasot ji manddavoll kelea tacho ami boro upeog kortat tednam, amkam ghottai mellttoli ani Jehovachi seva korit ravonk modot zatoli.—Mt. 11:28.

11. Ami Jehovacher patieun ravonk kitem korunk zai? Ek udharonn diat.

¹¹ Russia-ntlea amchea zaitea bhavank krur dhumallo sosunk poddtta. Tori astana, te dhiran Jehovachi seva kortat. Zoxem bhav Aleksey-cho amkam onnbhov asa. Ekdom kotthin poristhitint pasun tacho bhavarth ghott samballunk taka koxi modot zalea? To ani tachi bail poilinch thaun chukonastana Jehovachea bhokte sombondit aslolim kamam kortalim. Bhav sangta: “Chukonastana svotacho Bible obheas korunk, ani dor disa Bible vachunk hanv khub proitn kortam. Toxench dor sokallim, hanv ani mhoji bail disachem vers vachtat ani sangata magnnem kortat.” Hantuntlean ami kitem xiktat? Ami svotacher nhoi punn Jehovacher patieun ravonk zai. Koxem? Amcho bhavarth ghott kortat tim kamam ami chukonastana korit ravonk zai. Zoxem Bible-acho  obheas korop, magnnem korop, mittingek hajir zavop ani porgottnni korop. Oxem kelear, Jehova amchea vavracher bhorpur besanvam ghaltolo. Tannem Samsonak ghottai dilʼli toxi, to amkam-i ghottai ditoloch!

12. Samsonan koslo chukicho nirnnoi ghetlo, ani ho nirnnoi tachea her nirnnoi-am poros vegllo koso aslo?

¹² Samson amchea bhaxen opurnn aslo. Dekhun thodde pavtti tache koddlean pasun chuki zaleo. Zoxem ek pavtt, tannem oslo nirnnoi ghetlo, zacho taka ekdom vaitt porinnam bhogcho poddlo. Thoddea tempa pasot fuddari mhunn seva kelea uprant, to ‘Sorek nanvachea falkea lagim ravpi eke ostorechea mogant poddlo; tichem nanv Delilah.’ (Fudd. 16:4) Punn hachea poilim, eke Filistevkar baile lagim Samsonachi mudi zalʼli. Ani hachea fattlean ‘Jehovacho hat aslo.’ Karonn to “Filistinikaram lagim zhogddem manddunk soeg sodtalo.” Uprant Samson, Filistevanchea Gaza xarant ek xindoll bailechea ghora ravlo. Tea vellar Jehovan Samsonak tea xarachim daram ubarun vhoronk xokti dili, jea udexim Filistevkaram add zhuzonk taka anikui sompem zalem. (Fudd. 14:1-4; 16:1-3) Punn to Delilah lagim kazar zalʼlo zalear, taka ti sondhi mellchi nasli. Karonn ti ghoddie chodd korun Izraelitkar asli.

13. Delilah-n Samsonak koso fottoilo?

¹³ Samsonacho ghat gheunk Delilah-n Filistevkaram koddem zaite poixe ghetlole. Delilah apleak fottoita mhunn Samsonak kiteak kollonk na? To tachea mogan itlo piso zalʼlo kai? Karonn kitem-i asum, Samsonak itli xokti kiteak asa tem zannam zaunk Delilah tachea fattik laglolem. Tem taka itlem sotaitalem ki Samsonan xevottak taka sot sangon soddlem. Dukhachem mhunnttlear, Samsonan aple chukik lagon thoddea vella pasot Jehovachi  maniotai, toxench apleak asloli xokti hogddaili.—Fudd. 16:16-20.

14. Delilah-cher patielʼlean Samsonak koslo vaitt porinnam bhogunk poddlo?

¹⁴ Jehovacher patieun ravchea bodlek, Samson Delilah-cher patielo dekhun taka ekdom vaitt porinnam bhogunk poddlo. Filistevkaramnim taka dhorlo ani tache dolle umttun kaddle. Uprant tannim taka Gaza xarant bondkhonnint ghatlo. Khorem mhunnttlear, adim Samsonan heach xarachim daram aplea bhuzancher ubarun vhelʼlim. Punn atam taka bondkhonnint chakor kelʼlo ani danno dollpachem kam dilʼlem. Uprant Filistevkaram, Dagon nanvachea tanchea khottea devak vhoddlo iodn bhettounk zomlolim. Karonn tankam distalem ki tanchea devan Samsonak tanchea hatant dilʼlo. Ani ‘mouz marunk vo Samsonachim fokannam korunk’ tannim taka bondkhonnintlean tea zagear haddlo.—Fudd. 16:21-25.

15. Samson Jehovacher porot patieunk laglo mhunn tannem koxem dakhoilem? (Fuddari 16:28-30) (Masikachem fuddlem chitr polloiat.)

¹⁵ Samsonan ekdom gombhir chuk kelʼli. Tori astana tannem Jehovachi seva korop soddun diunk na. Jehovan taka dilʼlem kam purnn korunk to sondhi sodhit ravlo. (Fuddari 16:28-30 vachat.) Ani taka sondhi mellʼlli tednam tannem roddon Jehovak oxi vinoti keli: ‘Mhaka Filistevkaram add sudd gheum di.’ Jehovan tachem magnnem aikolem ani taka porot xokti dili. Tea pasot, tannem itle Filistevkarank marun uddoile, jitle tannem hachea poilim kednanch marunk nant.

16. Samsona koddlean ami kitem xikonk zata?

¹⁶ Samsonak aple chukik lagon vaitt porinnam bhogcho poddlo tem khorem. Punn Jehovachi seva korop tannem bond korunk na. Hantuntlean ami kitem xiktat? Amche lagim chuk ghoddtta ani amkam xist melltta vo kosli-i zobabdari hogddaitat tednam, ami soddun diunk favona. Jehova amkam bhogsunk toiar asa mhunn ami ugddas dovrunk zai. (St. 103:8-10) Ami chuklim zalear pasun, Jehovan Samsonak xokti dili toxi, apli khuxi purnn korunk to amkam-i xokti ditolo.

17-18. Bhav Michael-achea onnbhova vixim tumkam khas korun kitem avoddlem? (Chitr pasun polloiat.)

¹⁷ Hea vixim amkam Michael nanvachea eka tornnattea bhavacho onnbhov asa. To Jehovache sevent khub bizi aslo. To sobhecho sevok toxench niemit pioneer mhunn seva kortalo. Punn dukhachem mhunnttlear, tache lagim ek vhoddli chuk zali, ani tea pasot sobhent taka asloleo zobabdareo tannem  hogddaileo. To sangta: “Soglem borem choltalem ani hanv umedin Jehovachi seva kortalom. Punn okosmat hanv Jehovache sevent kainch korunk xokona oxem mhaka dislem. Jehova mhaka soddchona mhunn hanv zannam aslom. Punn tachea sangata mhoji ixttagot poilim bhaxen astoli kai, vo hanv poilim kortalom tech toren tachi seva korunk xoktolo kai, mhunn hanv chintʼtalom.”

¹⁸ Khuxechi khobor mhunnttlear, Michael-an soddun diunk na. To fuddem sangta: “Chukonastana magnnem korun, Bible-acho obheas korun, ani tacher niall korun, hanvem Jehova sangata mhoji ixttagot porot ghott korunk vavr kelo.” Vell gelo toso, bhavak tacheo zobabdareo porot mellʼlleo. Aiz to ek vhoddil ani niemit pioneer mhunn seva korta. To sangta, “Sobhe thaun, ani khas korun vhoddilam thaun mhaka ji urba ani tenko mellʼllo, tea vorvim Jehova azun poriant mhozo mog korta mhunn mhaka kollʼllem. Hanv ek nitoll ontoskornnan porot Jehovachi seva korunk xoktam. Mhaka jem ghoddlem tantuntlean mhaka kollon ailem ki khoreanich poschatap kortat tankam Jehova bhogxita.” Amchea lagim pasun chuki ghoddleat zait. Punn ami sudharnni korunk amchean zata tem soglem kortat, ani Jehovacher sodanch patieun ravtat zalear, Jehova amkam aple sevent uzar kortolo ani amkam besanvam ditolo mhunn ami khatri dovrunk zata.—St. 86:5, NW; Mho. 28:13.

19. Samsonachea udharonnantlean tumkam koxi ghottai mellʼlli?

¹⁹ Tor hea lekhant, ami Samsonachea jivitantlea thoddea khas ghoddnneam vixim zannam zalim. Opurnn aslolean tachea koddleanui chuki zaleo. Zoxem, Delilah-chea mogan poddon tannem chuk kelʼli. Punn tannem Jehovachi seva korop soddun diunk na. Ani Jehova pasun taka uzar korit ravlo. Tannem ekdom ojapache ritin, porot ek pavtti Samsona vorvim aplo udʼdhex purnn kelo. Jehovache nodrent to ek visvaxi munis aslo. Dekhun Hebrevank odheai 11-nt, visvaxi sevokanchea nanvam modem tachem-i nanv asa. Tor jednam amkam oddchonneo astat ani modotichi goroz asta, tednam amcho mogall Bap Jehova amkam ghottai diunk axeta hem zannam zaun amkam kitli bhuzvonn melltta nhoi! Tor Samsona bhaxen ami Jehova lagim oxi vinoti korum-ia: “Mhozo ugddas kor . . . mhaka novean xokti di.”—Fudd. 16:28.