OBHEASACHO LEKH 38
Tornnatteamno—Tumchem Jivit Koxem Aslolem Tumkam Zai?
“Somjikai tuji rakhonn kortoli.”—MHO. 2:11.
GIT 135 Xannim Zaun Jehovak Khuxal Korat
KITEM XIKTOLIM a
1. Jehoashak, Uzziak, ani Josiak kosle kotthin poristhiticho fuddo korunk poddlo?
TUMKAM khub lhan piraier vo tornnattponnar Devachea lokancher raz cholounk vinchun kaddlear tumi kitem kortolim? Tumi tumcho odhikar ani xokti koxim uzar kortolim? Ekdom lhan piraier Judache raza zalʼle tosle zaitea tornnatteam vixim Bible-ant sanglam. Udharonnak, Jehoash 7 vorsancher raza zalʼlo, Uzzia 16 vorsancher, ani Josia 8 vorsancher. Tor hea piraier raza zavop ani itli vhoddli zobabdari samballop tankam khub kotthin aslem. Tori astana, Jehovache ani heranche modotin tannim zaiteo boreo vostu keleo.
2. Jehoash, Uzzia, ani Josia vixim ami kiteak zannam zaunk zai?
2 Ami raza vo ranni nant tem khorem. Punn ami hea tigui tornnatteam koddlean zaitim lisanvam xikonk zatat. Tannim tanchea jivitant bore toxech vaitt nirnnoi ghetlole. Tor tanchea udharonnantlean ami bore sangati kiteak vinchun kaddunk zai, khalti kiteak ravonk zai, ani sodanch Jehovachi khuxi kitem asa ti zannam zaunk proitn kiteak korunk zai tem ami zannam zatolim.
BORE SANGATI VINCHUN KADDAT
Ami borea ixttancho solʼlo aikotat zalear ami Jehoashachi dekh gheunk pavtolim (Peregraf 3, 7 polloiat) c
3. Porom Iadnik Jehoiadak lagon, Raza Jehoash kosle bore nirnnoi gheunk pavlo?
3 Jehoasha bhaxen bore nirnnoi gheiat. Jehoash lhan aslo tednam tacho bapui bhair poddlo. Tor Porom Iadnik Jehoiadan taka aploch put koso vaddoilo, ani taka Jehova vixim xikoilo. Jehoiadan dilʼlo solʼlo apnnailʼlean Jehoash bore nirnnoi gheunk pavlo. Jehoiadan bori dekh dovorlolean, Jehoash Jehovachi seva korunk fuddem sorlo ani lokankui toxem korunk modot keli. Tea bhair, Jehovachem Devmondir sarkem korunk tannem manddavoll keli.—2 It. 24:1, 2, 4, 13, 14.
4. Ami Jehovachea adneancho mog kortat ani te pallttat tednam amkam koso faido zata? (Mhonnʼnneo 2:1, 10-12)
4 Tumchim avoi-bapui vo anik konnui tumkam Jehovacho mog korunk ani tache dorje pallunk xikoitat tednam, tem ek dennem koxem lekhat. (Mhonnʼnneo 2:1, 10-12 vachat.) Avoi-bapaimnim aplea bhurgeank zaitea vattamnim proxikxonn diunk zata. Udharonnak, bhoinn Katya-cho bapui tika bore nirnnoi gheunk koso modot kortalo tacher dhean diat. Dor disa to tika iskolak vhortalo tednam, to tiche lagim tea disachea versa vixim uloitalo. Bhoinn sangta: “Daddy mhoje lagim hea toren uloitalo dekhun tea disak kosli-i oddchonn ietali tednam, sarkem tem korunk mhaka modot zatali.” Tumchim avoi-bapui, Bible-achea adarit tumchea pasot thodde kaide korunk xoktat. Punn hea kaideank lagon, tumkam zai toxem korunk mellona, oxem tumkam disot. Tori astana, te manun gheunk tumkam koxi modot zatoli? Bhoinn Anastasia sangta ki tichim avoi-bapui tichea pasot kaide kortalim tednam, te kiteak keleat tem tim somzaitalim. Ti mhunntta: “Oxem kelʼlean, mhojea avoi-bapain mhojer tabo cholounk te kaide korunk nant, punn tim mhozo mog kortat dekhun mhoji rakhonn korunk tannim te keleat hem somzonk mhaka modot zatali.”
5. Tumi je nirnnoi ghetat tea vorvim tumchea avoi-bapaik ani Jehovak koxem bhogtolem? (Mhonnʼnneo 22:6; 23:15, 24, 25)
5 Tumchea avoi-bapain Bible-antlean dilʼle solʼle tumi apnnaitat tednam tim khuxal zatolim. Ani mhotvachem mhunnttlear, tumi Jehova Devak khuxal korunk pavtolim, ani tachea sangata tumchi ixttagot anikui ghott zatoli. (Mhonnʼnneo 22:6; 23:15, 24, 25 vachat.) Tor tornnattea Jehoashachi dekh gheunk amkam kitlim borim karonnam asat nhoi!
6. Jehoiada melea uprant Jehoash konnachem aikonk laglo, ani porinnam kitem zalo? (2 Itihas 24:17, 18)
6 Jehoashachea vaitt nirnnoi-am thaun xikat. Jehoiada melea uprant, Jehoashan vaitt munxam sangata ixttagot keli. (2 Itihas 24:17, 18 vachat.) Jehovacho mog korinasle tea Judachea kunvranchem to aikonk laglo. Tannem tanchea thaun pois ravonk zai aslem, oxem tumkam disot. (Mho. 1:10) Punn Jehoashan toxem korunk na. Itlench nhoi, tacho cousin Zakarias taka solʼlo diunk ailo tednam tannem taka jivexim marunk hukum dilo. (2 It. 24:20, 21; Mt. 23:35) Kitlem vaitt zalem nhoi! Jehoashan kitlem vhoddlem pixeponn kelem. To lhan aslo tednam tannem bore nirnnoi ghetlole. Punn dukhachem mhunnttlear, uprant to ek dhorm-broxtt munis ani khuni zalo. Xevottak, tacheach sevokamnim taka jivexim marun uddoilo. (2 It. 24:22-25) Jehoashan sodanch, Jehovachem ani tacho mog kortat tanchem aikolʼlem zalear, tachem jivit kitlem vegllem astolem aslem nhoi! Tor tachea vaitt nirnnoi-a thaun ami kitem xiktat?
7. Tumi koslim ixttam vinchun kaddunk zai? (Chitr pasun polloiat.)
7 Ek lisanv mhunnttlear, ami oslim ixttam vinchun kaddunk zai jim Jehovacho mog kortat ani taka khuxal korunk sodhtat. Karonn tim amkam borim kamam korunk modot kortolim. Ami amchea poros vhodd vo lhanam sangata pasun ixttagot korunk zata. Zoxem Jehoash, tacho ixtt Jehoiada poros khub lhan aslo. Tor tumchea ixttam vixim tumi tumkanch osle prosn vicharunk zatat: ‘Jehovacher mhozo bhavarth ghott korunk tim mhaka modot kortat kai? Tim Jehovacheo adnea pallunk tanchean zata tem soglem kortat kai, ani toxem korunk mhaka-i urba ditat kai? Tim Jehova ani Bible-antlea sotam vixim uloitat kai? Tim Devachea dorjeank man ditat kai? Mhaka jem aikonk avoddttolem tench tim mhaka sangtat, vo hanv chuktam tednam mhaka nittaier haddttat?’ (Mho. 27:5, 6, 17) Khorem sangchem mhunnttlear, tumchim ixttam Jehovacho mog korinant zalear, tanchea sangata ixttagot dovorchi kainch goroz na. Punn tim Jehovacho mog kortat zalear, tankam chittkon ravat. Karonn tim tumkam sarkem tem korunk sodanch modot kortolim!—Mho. 13:20.
8. Ami social media uzar kortat zalear, ami kitem ugddas dovrunk zai?
8 Aiz social media uzar korun amchi famil ani ixttam sangata ulounk khub sompem zata. Punn zaitim zannam show marunk social media uzar kortat. Zoxem tannim kitem haddlem, vo kitem kelem, tache tim fottu ani video ghaltat. Tor ami social media uzar kortat zalear, ami amkanch vicharunk zai: ‘Hanv tem koslea karonnank lagon uzar kortam? Hanv dusream sangata kitem tori borem vanttunk sodhtam dekhun, vo dusreamnim mhoji vhoddvik kelʼli zai dekhun? Dusrim social media-cher jem ghaltat tem polloun hanv-ui toxench kortam kai? Tanchem ulovop, chintop ani vagnnuk hanv apnnaitam kai?’ Sonchalon Monddollacho vangddi mhunn seva korpi, bhav Nathan Knorr-an, ek pavtti oso solʼlo dilʼlo: “Munxank khuxal korunk proitn korinakat. Karonn oxem kelear, tumi konnakuch khuxal korunk pavchimnant. Punn Jehovak khuxal korunk vavr korat. Karonn oxem kelear, Jehovacho mog kortat tankam sogleank tumi khuxal korunk pavtolim.”
KHALTIM RAVAT
9. Jehovan Uzziak kitem korunk modot keli? (2 Itihas 26:1-5)
9 Uzzia bhaxen bore nirnnoi gheiat. Tornnatto astana Raza Uzzia khalto aslo. To ‘Jehovachea bhirantin’ choltalo. To 68 vorsam jielo. Ani tantuntlo choddso kall Jehovan tacher besanv ghatlem. (2 Itihas 26:1-5 vachat.) Tannem dusmananchea zaitea raxttrancher zoit vhelʼlem, ani Jeruzalem xarachi rakhonn korunk panvlam ghetlolim. (2 It. 26:6-15) Tor Jehovachea modotin to jem kitem korunk pavlo tea pasot to khuxal aslo.—Up. 3:12, 13.
10. Uzziak kitem ghoddlem?
10 Uzziachea vaitt nirnnoi-am thaun xikat. Raza aslolean dusreamnim kitem korunk zai tem Uzzia tankam sangtalo. Ghoddie haka lagon apnnem kitem-i korunk zata, oxem Uzziak dislem astolem. Ek pavtti to Devmondirant bhitor sorlo, ani razamnim korunk zaina tem korunk fuddem sorlo. Mhunnche, to vedicher dhump lasunk gelo. (2 It. 26:16-18) Porom Iadnik Azarian taka toxem korinaka mhunn sanglem. Punn Uzzia ekdom ragan bhorlo. Dukhachem mhunnttlear, to Jehovak ovisvaxi zalo ani Jehovan koddachi pidda dhaddun taka xikxa laili. (2 It. 26:19-21) Uzzia Jehovak khalto ravlolo zalear, tachem jivit kitlem vegllem astolem aslem nhoi!
Ami Jehovache sevent jem kitem korunk xoktat tachi boddai marche bodlek, ami Jehovak vakhannʼnni diunk zai (Peregraf 11 polloiat) d
11. Ami khaltim asat vo na tem koxem kollon ieta? (Chitr pasun polloiat.)
11 Uzzia xoktivont zalo tednam, tache lagim asloli girestkai ani boll Jehovanuch taka dilʼlem mhunn to visrolo. Hantuntlean ami kitem xiktat? Amchea jivitant asat teo sogleo boreo vostu, toxench Jehovache sevent amkam asat te sueog tannench amkam dileat mhunn ami ugddas dovrunk zai. Tor ami jem korunk xoktat tachi boddai marchea bodlek, ami Jehovak vakhannʼni diunk zai. b (1 Kor. 4:7) Ami opurnn asat ani sudharnni korchi goroz asa mhunn ami khaltikaien vollkhon gheunk zai. Sumar 60 vorsanchea eka bhavan oxem mhunnttlem: “Dusrim mhaka mhojeo chuki sangtat tednam, hanvem ragar vo niraxi zaunchem nhoi mhunn hanv xiklam. Mhaka xist melltta tednam hanv sudharnni korunk, ani Jehovak mhojem boreantlem-borem diunk vavr kortam.” Tor ami Jehovacheo adnea pallttat ani khalti ravtat tednam, ami khoreponnim khuxal astolim.—Mho. 22:4.
SODANCH JEHOVACHI KHUXI ZANNAM ZAUNK PROITN KORAT
12. Tornnatto astana Josian Jehovachi khuxi zannam zaunk koxem suru kelem? (2 Itihas 34:1-3)
12 Josia bhaxen bore nirnnoi gheiat. Tornnatto astanach Josian Jehovachi khuxi zannam zaunk suru kelem. To Jehova vixim zannam zaunk ani taka manvota tem korunk sodhtalo. Punn oxem korop, taka sompem naslem. Karonn tachea bhonvtonnim aslolo choddso lok khottea devanchi bhokti kortale, ani tankam addaunk dhirachi goroz asli. Ani Josian khorench dhir dakhoilo! 20-am poros unnea vorsancho astanach, tannem akʼkhea raxttra thaun khotti bhokti kaddun uddounk suru kelem.— 2 Itihas 34:1-3 vachat.
13. Tumchem jivit Jehovak somorponn kelea uprant dor disa tumi kitem korunk vavurtolim?
13 Tumi lhan asat zalear pasun, tumi Josiachi dekh gheunk zata. Tumi lhanponnim thaunuch Jehovachi khuxi zannam zaunk, toxench tachea vixim ani tachea gunnam vixim xikonk vavr korunk zata. Oxem kelʼlean tumchem jivit taka somorponn korunk tumi fuddem sortolim. Hacho tumchea jivitacher koslo porinnam zatolo? 14 vorsanchea piraier bautizm ghetlolo bhav Luke sangta, “Atam thaun Jehovachi seva hanv mhojea jivitant poilea zagear dovortolom, ani taka khuxal korunk mhojean zata tem soglem kortolom.” (Mk. 12:30) Tumi pasun Luke-a sarko dhei dovorlo zalear, Jehova tumkam besanvamnim bhortolo!
14. Thoddim tornnattim Raza Josiachi dekh koxi ghetat?
14 Tornnatteamno, tumkam koslea oddchonneancho fuddo korunk poddtta? Hea don tornnatteanchea onnbhovancher dhean diat. 12 vorsancher bautizm ghetlolo bhav Johan sangta ki tachea klasintle bhurge electronic sigrett voddunk vo vaping korunk tacher dobhav ghaltat. Punn hea dobhavam thaun pois ravonk taka koxi modot zata? Vaping kelʼlean tachi bholaiki, toxench Jehova sangata tachi ixttagot piddʼddear zatoli mhunn to ugddasak haddtta. Toxench 14 vorsancher bautizm ghetlolea bhoinn Rachel-ak, iskolant ietolea oddchonneancho fuddo korunk koxi modot zata? Tem sangta, “Hanv oslea vostuncher dhean diunk proitn kortam, jea vorvim mhaka Bible-acher ani Jehovacher mhojem dhean dovrunk modot zata. Udharonnak, itihasa vixim xiktana, hanv Bible-antli ek ghoddnni vo bhasaunni mhojea monant haddttam. Vo dusream lagim uloitana, Bible-antlem khoinchem vers sanglear taka faideak poddttolem tea vixim hanv chintʼtam.” Tornnatteamno, tumcheo oddchonneo ghoddie Raza Josiak ailʼleo tachea poros veglleo asot. Tori astana, tumi tache bhaxen xannim zaunk xoktat ani Jehovak visvaxi ravonk xoktat. Tornnattim astana tumi oddchonneancho bore toren fuddo kelo zalear, fuddarak ietolea her oddchonneancho fuddo korunk tumi toiar astolim.
15. Josia visvaxiponnan Jehovachi seva kiteak korunk pavlo? (2 Itihas 34:14, 18-21)
15 26 vorsancher Raza Josian Jehovachem Devmondir sarkem korchem kam suru kelem tednam, “Moizesa udexim porjek dilʼlem Somurtichem Pustok” mellʼllem. Tea pustokant Jehovache Kaide asle. Tantunt boroilam tem aikolea uprant, tem Josiachea kallzak laglem ani tannem rokddench panvl ghetlem. (2 Itihas 34:14, 18-21 vachat.) Tumi chukonastana Bible vachunk sodhtat? Tumi ghoddie to dor disa vachunk suru kela astolo. Tor tumkam to vachunk avoddtta? Tumkam faideak poddttolim toslim versam tumi boroun dovortat kai? Luke zachea vixim ami poilim uloilʼlim, to aplea dairy-nt taka faideak poddttat tosle mudʼde boroun dovorta. Tumi pasun oxench kitem kelear tumkam Bible-antlim versam vo tantunt xiklolim lisanvam ugddas dovrunk modot zatoli. Bible-ant boroilam tem somzonk ani tache pasot mog vaddounk tumi jitlo proitn kortolim, titlich chodd Jehovachi seva korunk tumchi itsa vaddttoli. Ani Raza Josiak modot kelʼli toxi, tumkam pasun Devachem Utor sarkem tem korunk modot kortolem.
16. Josia vhoddli chuk kiteak korunk pavlo, ani amkam kitem lisanv asa?
16 Josiachea vaitt nirnnoi-am thaun xikat. Sumar 39 vorsancher Josian ek vhoddli chuk keli. Jehovachem margdorxon gheunchea bodlek, to svotacher patieun ravlo. Tea pasot tannem aplo jiv hogddailo. (2 It. 35:20-25) Tor amkam kitem lisanv asa? Ami piraien kitlim-i vhodd asum vo ami zaitea vorsam thaun sotant asum, ami Devachi khuxi zannam zauncho proitn korit ravonk zai. Mhunnche, ami margdorxona pasot sodanch Jehova lagim magnnem korunk zai, Devachea Utracho obheas korunk zai, ani sotant ghott aslolim bhav-bhoinnam amkam solʼle ditat tednam, tanchem aikonk zai. Oxem kelear, ami chodd korun vhoddli chuk korunk pavchimnant ani khuxal astolim.—Jak. 1:25.
TORNNATTEAMNO—TUMI JIVITANT KHUXAL ASONK XOKTAT
17. Judachea tin razanchea udharonnam thaun amkam kitem kollon ieta?
17 Tornnatteam lagim zaiteo boreo vostu korunk sondhi asta. Jehoash, Uzzia, ani Josiachea udharonnam thaun kollon ieta ki tornnattim bore nirnnoi gheunk xoktat, ani Jehovak manvota toslem jivit jieunk xoktat. Hem khorem ki tea tigui tornnatteamnim chuki keleo ani tankam tacho vaitt porinnam bhogunk poddlo. Punn ami tanchea vaitt kamanchi nhoi, punn tannim kelʼlea borea kamanchi dekh gheunk zata. Ani oxem kelʼlean, tumi tumchea jivitant khuxal ravonk pavtolim.
Tornnatto David Jehovak lagim sorlo dekhun taka Jehovachi maniotai mellʼlli ani to jivitant khuxal aslo (Peregraf 18 polloiat)
18. Tumi jivitant khuxal asonk xoktat mhunn Bible-antlea khoinchea udharonnantlean kollon ieta? (Chitr pasun polloiat.)
18 Bible-ant amkam oslea anikui tornnatteam vixim vachunk melltta, zannim Jehova lagim ixttagot keli ani tankam Jehovachi maniotai mellʼlli. Tea pasot te jivitant khuxal asle. Hea vixim amkam Davidachem udharonn asa. Lhan piraie thaunuch to Jehovacho ixtt aslo, ani uprant to ek visvaxi raza zalo. Tachea lagim chuki ghoddleo tem khorem. Punn Devache nodren to ek visvaxi sevok aslo. (1 Raz. 3:6; 9:4, 5; 14:8) Tor Davida vixim obheas kelʼlean, visvaxiponnan Jehovachi seva korit ravonk tumkam modot zatoli. Toxench, tumi Marku vo Timota vixim pasun obheas korunk zata. Tannim lhan piraie thaunuch Jehovachi seva korunk suru keli, ani visvaxiponnan seva korit ravle. Hea pasot Jehova khuxal zalo, ani te pasun khuxal asle.
19. Tumkam koslem jivit mellonk xokta?
19 Aiz tumi je nirnnoi ghetat, tacho porinnam tumchea akʼkhea jivitacher poddttolo. Tea pasot svotacher nhoi, punn Jehovacher patieun ravat. Oxem kelʼlean, to tumkam bore nirnnoi gheunk modot kortolo ani tumi khuxal astolim. (Mho. 20:24) Tumi jem kitem kortat tacho Jehova valor korta mhunn ugddas dovrat. Ani Jehovachi seva korchea poros anik khoinchich bori vatt na!
GIT 144 Tujem Dhean Inamacher Dovor!
a Tornnatteamno, thodde pavtti sarkem tem korunk tumkam kotthin zaunk xokta mhunn Jehova zannam. Tor Jehovak manvotat tosle bore nirnnoi gheunk tumi kitem korunk zata? Hea lekhant, Judache raza zale tea tin tornnatteancher ami dhean dium-ia, ani tannim ghetlolea nirnnoi-antlean kitem xikonk zata tem polloum-ia.
b jw.org-acher “How Important Is Online Popularity?” hea lekhant, “Beware of the ‘Humble Brag’” hem boks polloiat.
