1. Amchea borabor iskolant xiktat vo kam kortat tim amkam kitea vixim prosn vicharunk xoktat?

 TUMCHEA sangata iskolant xiktat vo tumchea borabor kam kortat tim, tumchea patienni vixim prosn vichartat tednam tumkam koxem dista? Tumi ghoddie abuz zaunk xoktat. Zaitea zannank oxench ghoddtta. Punn tanchea prosnam vorvim tim kitem chintʼtat vo patietat tem somzonk ani tankam sota vixim sangonk amkam sondhi mellonk xokta. Tea bhair, thoddim ghoddie amchea lagim vad-vivad korunk sodhtat, vo ami kortat tem sarkem nhoi oxem tankam dista dekhun, tim amkam prosn vichartat. Punn ami ojap zainant. Karonn choddxe pavtti dusreamnim tanche kan bhorlole astat. (D.I. 28:22) Itlench nhoi, ami “nimannea disamnim” jietat, jea kallar zaitim zannam “darunn kallzachim” ani “nixttur” pasun asat.—2 Tim. 3:1, 3.

2. Ami movallaien kiteak vagonk sodhtat?

² Tumi ghoddie chintit, ‘Mhojea patienni vixim konnui vad-vivad korunk sodhta zalear, hanvem taka xantponnim ani mogan koso zobab diunk zata?’ Hea vellar amkam movallai ho gunn modot korunk xokta. Ek movall munxak konnui rag haddtta, vo tea vellar koso zobab diuncho tem taka somzona tednam pasun to xant asta. (Mho. 16:32) Punn tumi ghoddie oxem mhunnot, ‘Tem sangonk sompem, punn korunk kotthin.’ Tor movallai ho gunn ami koso vaddounk zata? Amchea patienni vixim konnui prosn vicharta tednam ami taka movallaien koso zobab diunk zata? Ani avoi-bapaimnim aplea bhurgeank tanchea patienni vixim dusreank movallaien zobab diunk koxem xikounk zata? Hancho zobab ami fuddem polloum-ia.

3. Ek movall munis oskot nhoi, punn xoktivont asa oxem ami kiteak mhunnonk zata? (2 Timotak 2:24, 25)

³ Ek munis movall asa hacho orth, to oskot asa oxem nhoi. Karonn eka oskot munxa lagim kotthin poristhitint xant ravonk zaina. Movallai “povitr xoktechem foll” zaun asa. (Gal. 5:22, 23) Ami svota zaun ho gunn vaddounk xokonant. Punn to vaddounk ami Jehova lagim magnnem korun tachi povitr xokti magonk zai. Ani amchim zaitim bhav-bhoinnam oxem korun movallai ho gunn vaddounk pavleant. Udharonnak, tankam dusreamnim rag haddunk proitn kelo tednam, tim movallaien vaglim. Ani hea vorvim Sakxi nhoi tea her lokancher boro probhav poddlo. (2 Timotak 2:24, 25 vachat.) “Movallai” hea utrak uzar kel’lem Grik utor, thodde pavtti proxikxonn dil’lea ghoddea vixim sangonk uzar kelam. Proxikxonn dilea uprant to ghoddo xant zata, punn tachi xokti unni zaina. Teach bhaxen, ek munis movall aslear pasun to xoktivont asta. Hem koxem tem polloum-ia.

4. Movallaien vagchea vixim Izaka thaun ami kitem xiktat?

⁴ Movallai ho gunn kitlo moladik asa tem amkam Bible-antlea zaitea ghoddnneantlean kollon ieta. Zoxem amkam Izakachem udharonn asa. To Gerar nanvachea Filistevanchea vattarant ravtalo tednam, tache xezarche Filistevkar tacher khub zollttale. Tea pasot, Izakachea bapaichea sevokamnim bandloleo baim-o tannim purun uddoileo. Punn tea vellar, tanchea lagim zhogoddchea bodlek, Izak aplea familik gheun eka dusrea vattarant ravonk gelo, ani tannem thoim anik baim-o marleo. (Ut. 26:12-18) Punn thoim pasun Filistevkar, tem udok tanchem mhunn zhogddonk lagle. Tori astana, Izak xantponnim vaglo. (Ut. 26:19-25) Tor dusrim taka tiddok haddttalim tednam pasun movallaien vagonk taka koxi modot zali? To aplea avoi-bapai koddlean xiklo mhunn kainch dubhav na. Tacho bapui Abraham dusream sangata xant toren koso vagtalo, toxench tachea avoicho “xant ani dulob sobhav” polloun to zaitem xiklo.—1 Ped. 3:4-6; Ut. 21:22-34.

5. Movallai ho gunn kitlo moladik asa tem avoi-bapaimnim aplea bhurgeank koxem xikounk zata? Udharonn diun somzaiat.

⁵ Avoi-bapaimno tumi pasun tumchea bhurgeank movallai ho gunn kitlo moladik asa tem xikounk zata. 17 vorsanchea Mark-achea b udharonnacher dhean diat. Taka iskolant, toxench porgottnnent oslea lokancho fuddo korunk poddttalo jim ragixtt aslim. Punn tachea avoi-bapain taka movallai ho gunn vaddounk mogan ani pasiesan modot keli. Tim mhunnttat: “Mark-ak kollon ailem ki ragan vagchea bodlek, movallaien vagonk chodd vavr lagta. Hacho orth, movallaien vagta to chodd xoktivont asta.” Mark movallai ho gunn vaddounk pavlo hem kitlem borem nhoi!

6. Magnnem kelʼlean movallai ho gunn vaddounk amkam koxi modot zaunk xokta?

⁶ Punn konnui mud’dom zaun amkam tiddok haddtta toslim kamam korta, zoxem Jehovachem nanv pidd’ddear korta vo Bible-achim fokannam korta zalear, ami kitem korunk zata? Tea munxa lagim movall toren vagonk ami Jehova lagim zannvai ani povitr xokti magonk zai. Punn oslea poristhiticho fuddo kelea uprant, ami titlea bore toren vagonk nant mhunn amkam kolltta zalear kitem? Ami tea vixim porot Jehova lagim magnnem korunk zata, ani fuddle pavtti anik movall ritin vagonk ami kitem kortolim tea vixim chintunk zata. Oxem kelear, amcho rag tabeant dovrunk, toxench anikui movall ritin vagonk Jehova amkam apli povitr xokti ditolo.

7. Bible-antlim umkinch versam tonddpatt kelʼlean amkam koso faido zaunk xokta? (Mhonnʼnneo 15:1, 18)

⁷ Kotthin poristhitint movallaien vagonk, Bible-antlim zaitim versam amkam modot  korunk xoktat. Ani Devachi povitr xokti amkam tim versam ugddasak haddunk xokta. (Ju. 14:26) Udharonnak, Mhonn’nneo pustokant oslim totvam dileant, jim amkam movallaien vagonk modot kortat. (Mhonnʼnneo 15:1, 18 vachat.) Toxench, kotthin poristhitint movallaien vaglolean kitem faido asa tem-ui tantunt sanglam.—Mho. 10:19; 17:27; 21:23; 25:15.

8. Ami somjikaien kiteak vagonk zai?

⁸ Movallaien vagonk somjikai pasun amkam modot korunk xokta. (Mho. 19:11) Karonn somjikaiechea munxak tachea patienni vixim konnui rag haddtta tosle prosn vicharta tednam, to sompeponnim ragar zaina. Zaite pavtti lok amkam prosn vicharta tednam, to kiteak vicharla tem tim amkam sangonant. Tea pasot tankam zobab diunchea poilim, tannem to prosn kiteak vicharla tem amkam ghoddie khobor na mhunn ami vollkhon ghetolim.—Mho. 16:23.

9. Efraimachea dadleam sangata Gideon somjikaien ani movallaien koso vaglo?

⁹ Gideon Efraimachea dadleam sangata koso vaglo tacher dhean diat. Tannem survatekuch tankam zhuzak kiteak vhoronk nant mhunn tannim ragan taka vicharlem. Gideonan tancho opman kelo oxem tankam dislem astolem. Te ragar zaunk karonn kitem-i asum, Gideonan somjikai  dakhoili. Te toxe kiteak vagle tem tannem somzon gheunk proitn kelo ani movallaien zobab dilo. Porinnam kitem zalo? “Tancho rag samkoch nivlo.”—Fudd. 8:1-3.

10. Konnui amkam prosn vicharta tednam ami kitem korunk zai? (1 Pedru 3:15)

¹⁰ Ghoddie tumchea sangata kam korpi vo iskolant xikpi, tumi Bible-antlea dorjeam pormonnem kiteak jietat mhunn vicharit. Tea vellar tancho opman korinastana, Bible-antlea dorjeam pormonnem cholop kiteak sogleam-von bori vatt zaun asa tem ami tankam somzaitolim. (1 Pedru 3:15 vachat.) Tor konnui amkam prosn vicharta tednam, tim amchim fokannam korunk vo amkam khala uddounk proitn kortat oxem ami chintchimnant. Tachea bodlek, tachea monant kitem chol’lam vo taka kitem sanglear faideak poddttolem tem ami chintunk zai. Prosn vicharunk karonn kitem-i asum, ami xantponnim ani doiallaien tacho zobab diunk proitn korunk zai. Oxem kel’lean, tim jem kitem mantat tem sarkem asa vo na tem chintunk tankam modot zaunk xokta. Tim amchea lagim ragan vo opmanachea ritin uloilear pasun, ami doiallaien vagtolim mhunn nichov korum-ia.—Rom. 12:17.

11-12. (a) Amkam konnui kotthin prosn vicharta tednam rokddoch zobab diunchea poilim ami kitem chintunk zai? (Chitr pasun polloiat.) (b) Oxem kel’lean tache lagim ulounk amkam sompem koxem zaunk xokta? Ek udharonn diun somzaiat.

¹¹ Udharonnak, amchea sangata kam korpi ami birthday kiteak korinant mhunn vicharta zalear, taka zobab diunchea poilim ami hea vixim chintunk zata: Amkam dusream sangata moja korunk mellona oxem taka dista kai? Vo ami birthday korinant dekhun, amkam lagon company-nt kam kortoleam modem ixttagot pidd’ddear zatoli oxem taka dista kai? Tannem to prosn vicharla mhunn ami taka poilim xabaski diunk zata, ani amkam-i dusream borabor boro vell sarunk avoddtta mhunn khatri diunk zata. Oxem kel’lean, Bible-ant birthday vixim kitem sanglam tea vixim ulounk amkam sompem zaunk xokta, ani to-ui amchem aikonk ghoddie toiar zatolo.

¹² Toxench, tim amkam her toreche kotthin prosn vichartat tednam pasun, ami oxench kitem korunk zata. Zoxem amchea klasintlo konnui, apleach linga sangata sombond dovorpi munxam vixim, ami amchem chintop bodlunk zai mhunn sangta zalear, taka rokddoch zobab diunchea bodlek ami hea vixim chintunk zata: Apleach linga borabor sombond dovorpi munxam vixim Jehovachim Sakxi kitem mantat tem taka sarkem khobor asa kai? Vo tacho ixtt vo soiro gay asa kai? Vo jim gay asat tancho ami dves kortat oxem taka dista kai? Taka toxem dista zalear, ami soglea lokancho mog kortat ani dor ekleak apleak zai tem vinchun kaddunk hokʼk asa, hem ami manun ghetat mhunn ami taka poilinch sangonk poddttolem. c (1 Ped. 2:17) Ani uprant, Bible tea vixim kitem sangta, ani tantunt sanglam tem pall’llolean ami ek khuxal jivit jieunk xoktat mhunn ami somzaunk zata.

13. ‘Dev asa mhunn patievop pixeponn’ oxem mhunnttat tankam ami koxi modot korunk zata?

¹³ Konnui Bible-antlem umkench sot manun ghena tednam, ‘to kitem chintʼta tem mhaka khobor asa’ oxem ami rokddench chintchem nhoi. (Tit. 3:2) Udharonnak, tumchea klasintlo konnui oxem mhunnot, ‘Dev asa mhunn patievop pixeponn.’ Tednam, to evolution manta ani taka tea vixim zaitem khobor asa oxem ami rokddench chintʼtolim kai? Khorem mhunnttlear, tannem ghoddie dusreanchem aikon toxem sanglem astolem. Tor evolution sarkem nhoi mhunn lecture diunchea bodlek, taka chintunk laita tosli mahiti ami sangonk zata. Zoxem ami taka jw.org-acher, rochnne vixim dilʼli mahiti sangonk zata. Oxem kel’lean, thoim dil’lea video vo lekha vixim ulounk to uprant ghoddie toiar  astolo. Tor hea ritin ami taka man ditat tednam, Bible kitem sangta tea vixim anik zannam zaunk to ghoddie fuddem soronk xokta.

14. Jehovachea Sakxeam vixim aslolem chukichem chintop pois korunk Naveen-an website-icho boro upeog koso kelo?

¹⁴ Jehovachea Sakxeam vixim aslolem chukichem chintop pois korunk, Naveen nanvachea tornnattean website-icho boro upeog kelo. To oxem sangta: “Hanv science-acher nhoi, punn kanneanchea pustokacher (Bible-acher) visvas dovortam mhunn mhojea klasintlo bhurgo mhaka zaite pavtti sangtalo.” Naveen taka, apunn kitem manta tem somzaunk proitn kortalo, punn to tachem aikonk sodhinaslo. Dekhun tannem taka jw.org-ant aslolo “Science and the Bible” ho bhag pollounk sanglo. Uprant, ti mahiti tannem vachlea mhunn Naveen-ak kollon ailem, ani jivit koxem suru zalem tea vixim to ulounk pavlo. Tumi pasun oxench onnbhovlam astolem.

15. Aplea bhurgeank modot korunk avoi-bapaimnim kitem korunk zata?

¹⁵ Bhurgeank tanchea patienni vixim konnui vicharta tednam, tannim movallaien koso zobab diunk zata tem avoi-bapaimnim tankam xikounk zata. (Jak. 3:13) Thoddim avoi-bapui kuttumbik bhokte vellar, aplea bhurgeank oxem korunk xikoitat. Iskolant tankam khoinchea vixoi-ancher prosn vicharunk xoktat tem tim chintʼtat, ani tannim kitem sangonk zata ani movallaien koso zobab diunk zata, tem tim uloitat ani practice kortat.—“ Famil Zaun Practice Korat,” hem boks polloiat.

16-17. Practice kelʼlean tornnatteank koxi modot zaunk xokta?

¹⁶ Hea toren practice kel’lean, tornnatteank, tim kitem patietat tachi svota khatri korun gheunk, ani dusreank tea vixim sangonk modot zata. JW.ORG-acher (Inglez bhaxen) “Teenagers” hea bhagant worksheets asat, jim heach pasot toiar keleant. Tim uzar kelʼlean tornnatteank  tanchi patienni ghott korunk, toxench tanchea svotachea utramnim dusreank zobab diunk modot zata. Tor Teenagers ho bhag, toxench Young People Ask hantuntli mahiti, ek famil koxi ami obheas kortat tednam, ami dusreank mogan ani movallaien koso zobab diunk zata tem sogleank xikonk melltta.

¹⁷ Hea toren practice kel’lean, Matthew nanvachea tornnatteak koxi modot zali tacher dhean diat. Klasint kosle prosn vicharunk xoktat tea vixim, to ani tachim avoi-bapui kuttumbik bhokte vellar sodh kortat. Matthew sangta: “Dusrim kosle prosn vicharit tea vixim ami chintʼtat, ani ami sodh kel’lea mahitichea adarit tankam koso zobab diunk zata tem ami practice kortat. Tor hanv umkench kiteak patietam tea vixim mhaka khatri zata tednam, mhaka bhirant disonam ani movallaien dusreank zobab diunk mhaka sompem zata.”

18. Koloskarank 4:6-a pormonnem ami kitem korop mhotvachem?

¹⁸ Hem khorem ki ami lokam lagim kitle-i khatren vo bore bhaxen uloilear pasun, soglim amchem aikotolim oxem nhoi. Punn ami xanneponnan ani movallaien uloilear, ghoddie tacho porinnam boro zaunk xokta. (Koloskarank 4:6 vachat.) Amchea patienni vixim lokank sangop, bol uddoun khell’llea bhaxen zaun asa. Ami bol ek tor sovkas, vo forsan uddounk xoktat. To sovkas uddoilear amchea sangata khellpi to dhorunk xoktolo ani khell chalu urtolo. Teach bhaxen ami lokam lagim xanneponnan ani movallaien uloilear, tim chodd korun amchem aikonk toiar astolim ani ulovop chalu urtolem. Punn thoddim fokot amchea lagim vad-vivad korunk vo amchim fokannam korunk ulounk sodhtat zalear, tanche lagim ulovop chalu dovorchi goroz na. (Mho. 26:4) Punn soglinch ghoddie toxim aschimnant. Choddxim zannam amchem aikonk toiar asot.

19. Ami kitem ugddas dovorlolean movallaien vagonk pavtolim?

¹⁹ Tor ami polloilem ki movallai ho gunn vaddoilʼlean zaito faido asa. Amchea patienni vixim konnui prosn vicharta vo fokannam korta tednam, tankam movallaien zobab diunk ami Jehova lagim xokti magom-ia. Karonn movallaien zobab dilʼlean vad-vivad zaunche nant. Tea bhair, oxem kel’lean, amchea vixim ani Bible-antlea sotam vixim thoddea zannanchem chintop bodlonk xokta. Tor amchea patienni vixim ‘osleank zobab diunk sodanch toiar ravom-ia.’ Punn “movallaien ani kallzantlean resped dakhoun” toxem korum-ia. (1 Ped. 3:15) Khorench, tumi movall astat tednam tumi xoktivont astat!