1-2. (a) Paulun Judev Kristanvank chitt boroili tednam thoim poristhiti koxi asli? (b) Hi chitt sarkea vellar boroilʼli oxem ami kiteak mhunnonk zata?

 33 K.X.-ant Jezu melea uprant, Jeruzalem ani Judeiantlea Kristanvank zaitea oddchonneancho fuddo korcho poddlo. Tea vellar Kristi sobha stapon zaun rokddench tankam khub dhumallo ailo. (D.I. 8:1) Magir sumar 20 vorsam uprant, tankam bhuk ani goribicho fuddo korunk poddlo. (D.I. 11:27-30) Punn sumar 61 K.X.-ant, thoddea vella pasot tankam xanti asli. Heach vellar, Jehovan apostl Pauluk tanchea pasot ek chitt borounk prerit kelo. Tea chittint dilʼlea solʼleantlean, fuddarak jem kitem zaunchem aslem tea pasot toiar zaunk tankam modot zali.

² Hi chitt tankam sarkea vellar boroilʼli mhunn ami mhunnonk zata. Karonn tankam asloli xanti sodanch togchi nasli. Paulun hea chittint tankam faideak poddttat tosle solʼle boroilʼle, jea vorvim fuddarak ieuncho aslo tea sonkoxttacho tim fuddo korunk pavtolim aslim. Tem mhunnttlear, Jeruzalemacho nas zauncho aslo mhunn Jezun sanglolem. (Luk. 21:20) Hem kednam zatolem tem Paulu toxench Judeiantlea Kristanvank pasun khobor nasli. Punn bhavarth ani sosnikai osle Kristi gunn vaddoun, tannim adim fuddench hea vella pasot toiar ravonk zatalem.—Heb. 10:25; 12:1, 2.

3. Hebrevank boroilʼlea chitticher aiz ami kiteak dhean diunk zai?

³ Hebrev Kristanvank jea sonkoxttacho fuddo korcho poddlo tachea poros amkam anikui vhoddlea sonkoxttacho fuddo korcho poddttolo. (Mt. 24:21; Prok. 16:14, 16) Tor Jehovan tankam  dilʼlea thoddea solʼleancher ami dhean ditolim. Oxem kelʼlean, tankam faido zalo toso amkam-i faido zaunk xokta.

“AMI BHAVARTHANT GHOTT ZAUNK PURNN TOREN VAVR KORUM-IA”

4. Judev Kristanvank koslea oddchonneancho fuddo korunk poddlo? (Chitr pasun polloiat.)

⁴ Kristanv dhorm apnnailʼlea Judevank tanchea jivitant vhodd-vhodd bodlav korunk poddle. Oxem korop tankam sompem naslem. Eka vellar, te Jehovan vinchun kaddlole lok asle. Ani zaitim vorsam meren, Jeruzalem ekdom mhotvacho zago aslo. Karonn Jehovan vinchun kaddlolo raza thoim thaun razvottki choloitalo. Toxench, Judev lok Jehovachi bhokti korunk Jeruzalemant aslolea mondirant voitale. Tea bhair, sogle visvaxi Judev lok Moizesa udexim dilʼle Kaide, toxench dhormik fuddareamnim kelʼle kaide pallttale. Tantunt jevnna vixim, sunoti vixim ani Videxi lokam sangata koxem vagchem tea vixim pasun kaide asle. Punn Jezu melea uprant, Judev lok Devmondirant je iodn bhettoitale te Jehova manun ghenaslo. Tor Kristanv dhorm apnnailʼlea Judevank tim jea toren Jehovachi bhokti kortalim tantunt bodol korunk ekdom kotthin zalem. (Heb. 10:1, 4, 10) Apostl Pedru sarkea ghott bhavarth aslolea Kristanvank pasun hantuntle thodde bodlav manun gheunk kotthin zalem. (D.I. 10:9-14; Gal. 2:11-14) Tor Kristanvanche patiennek lagon Judev dhormik fuddari tankam dhumallo diunk lagle.

5. Hebrev Kristanvamnim kiteak chotur ravonk zai aslem?

⁵ Hebrev Kristanvank don torechea lokam thaun dhumallo sosunk poddlo. Tannim Judev dhorm soddlolo dekhun, Judev dhormik fuddari tankam dhorm-broxtt aslolea porim lekhtale. Toxench sobhent aslolim thoddim zannam, Kristanvamnim Moizesa udexim dilʼle Kaide pallunkuch zai mhunn sangtalim. Tancher dhumallo ieuncho nhoi mhunn ghoddie tim oxem sangtalim. (Gal. 6:12) Tor Hebrev Kristanvank Jehovak visvaxi ravonk koxi modot zatoli asli?

6. Paulun bhav-bhoinnank kitem korunk urba dili? (Hebrevank 5:14–6:1)

⁶ Hebrevank boroilʼlea chittint, Paulun bhav-bhoinnank Devachea Utracho kholaien  obheas korun tacher niall korunk urba dili. (Hebrevank 5:14–6:1 vachat.) Tannem Hebrev Bhaxent Boroilʼlim Pustokam uzar korun Judev lok jea toren Jehovachi bhokti kortale tachea poros Kristanvam jea toren bhokti kortalim tem kiteak odik borem aslem tem somzailem. a Tor Paulun Kristanvank Devachea Utrantlem sot anik bore toren vollkhon tem somzonk urba dili. Oxem kelʼlean, tim khotti xikounn vollkhon ti nakarunk pavtolim aslim.

7. Aiz amkam koslea oddchonneancho fuddo korunk poddtta?

⁷ Jehovachea dorjeam add voita tosli mahiti ani chintop posraitat toslea lokancho aiz amkam pasun fuddo korunk poddtta. Jehovachim Sakxi sex-a vixim Bible-antli adnea pallttat dekhun tim jem kortat tem chukichem asa oxem thoddim mhunnttat. Punn hea sonvsarantlea lokanchem chin­top dor disa Jehovachea chintpa add vochot asa. (Mho. 17:15) Hea pasot ami chukichem chintop vollkhon tem nakarop ekdom mhotvachem. Oxem kelʼlean amchea virodheank zai toxem ami korchimnant. Tem mhunnttlear, ami dhir soddun diunchimnant ani Jehovachi seva kednanch bond korchimnant.​—Heb. 13:9.

8. Bhavarthant ghott zaunk amkam koxi modot zatoli?

⁸ Bhavarthant ghott zaunk Paulun Hebrev Kristanvank dilʼlo solʼlo ami pasun apnnaunk zai. Oxem korunk, ami kholaien Bible-acho obheas korunk zai ani Jehovachem chintop zannam zaunk proitn korunk zai. Hem ami somorponn korun bautizm ghetlea uprant pasun korit ravonk zai. Tor ami kitlim-i vorsam thaun sotant asum, ami chukonastana Bible vachun tacho obheas korunk zai. (St. 1:2) Oxem kelear ami amcho bhavarth vaddounk pavtolim. Ani Paulun aplea chittint Hebrev Kristanvank hoch gunn vaddounk sanglolem.​—Heb. 11:1, 6.

‘BHAVARTH DOVRUN APLO JIV VACHOITAT TANCHEA MODLIM ZAIAT’

9. Hebrev Kristanvank ghott bhavarthachi kiteak goroz asli?

⁹ Judeiant ietolea sonkoxtta thaun Hebrev Kristanvanchi rakhonn zaunk tankam ghott bhavarthachi goroz asli. (Heb. 10:37-39) Karonn soinik Jeruzalemak veddo ghaltat tem Jezuchim pattlavdaram polloitolim tednam, Jezun tankam pollon vochonk sanglolem. Tannem dilʼlo ho solʼlo, xarant toxench xarachea bhair aslolea soglea Kristanvank lagu zatalo. (Luk. 21:20-24) Khorem mhunnttlear, khoinchi-i soin akromonn korunk ietali tednam xarachea bhair ravtole lok asro gheunk xarachea bhitor ietale. Karonn xarachea vontteam udexim tanchi rakhonn zatali. Tor xarachea bhitor asro gheunchea bodlek, dongrar pollon vochop munxachea nodren pixeponn aslem. Mhunnttoch Jezun dilʼlo solʼlo apnnaunk tankam ghott bhavarth zai aslo.

10. Ghott bhavarth aslear Hebrev Kristanvam kitem korunk pavtolim aslim? (Hebrevank 13:17)

¹⁰ Toxench, sobhank margdorxon diunk Jezu jea munxank uzar kortalo tancher visvas dovrunk pasun Hebrev Kristanvamnim xikonk zai aslem. Hea Kristanvamnim koxem ani kednam pollon voichem tea vixim fuddakar gheupi bhavamnim tankam chodd korun umkench nirdexon dilem astolem. (Hebrevank 13:17 vachat.) Ani Hebrevank 13:17-nt, ‘adnea pallop’ hea utrak jem Grik utor uzar kelam, tantuntlean ek munis dusreak taka nirdexon diunk odhikar asa dekhun nhoi, punn apleak tacher visvas asa dekhun tachi adnea palltta mhunn kolltta. Tor Hebrev Kristanvamnim sonkoxtt ieunchea poilim thaunuch fuddakar gheupi bhavancher  visvas dovrop ekdom gorjechem aslem. Karonn oxem kelear, sonkoxtta vellar tanchem nirdexon pallunk tankam sompem zatolem aslem.

11. Aiz amkam ghott bhavarthachi kiteak goroz asa?

¹¹ Hebrev Kristanvam bhaxen, aiz amkam pasun ghott bhavarthachi goroz asa. Karonn ami jietat tea kallar choddso lok xevott lagim pavla mhunn maninant. Ani ami hem mantat dekhun tim amchim fokannam kortat. (2 Ped. 3:3, 4) Toxench vhodd sonkoxtta vellar kitem zatolem tea vixim thoddeo vostu amkam Bible-ant sangleat tem khorem. Punn tea vixim anikui zaiteo vostu amkam khobor nant. Tor xevott sarkea vellar ietolo ani tea vellar Jehova amchi kallji ghetolo mhunn amkam ghott bhavarth asonk zai.​—Hab. 2:3.

12. Vhodd sonkoxtta vellar salvar zaunk ami kitem korunk zai?

¹² Toxench, aiz amkam margdorxon diunk Jehova ‘visvaxi ani xannea chakrak’ uzar korta mhunn amkam ghott bhavarth asonk zai. (Mt. 24:45) Romi soinikamnim Jeruzalemak gherav ghatlo tednam, Hebrev Kristanvank tancho jiv salvar korunk umkench margdorxon mellʼllem toxem, vhodd sonkoxttachea vellar amkam pasun umkench margdorxon mellonk xokta. Tor Jehovache songottnnent fuddakar ghetat tancher ami atam thaunuch visvas dovrop khub gorjechem asa. Karonn oxem korunk atam amkam kotthin zata zalear, vhodd sonkoxtta vellar tannim dilʼlem margdorxon pallunk amkam anikui kotthin zatolem.

13. Hebrevank 13:5-ant dilʼlo solʼlo Hebrev Kristanvank mhotvacho kiteak aslo?

¹³ Hebrev Kristanvank pollon vochonk margdorxon melltta mhunnosor, tannim sadem jivit jieunk zai aslem ani “poixeancho mog” korunk zainaslo. (Hebrevank 13:5 vachat.) Thoddeamnim bhuk ani goribicho fuddo kelʼlo. (Heb. 10:32-34) Eka vellar bore khobrek lagon tannim zaite tras soslole tem khorem. Torui, thoddim zannam salvar zaunk girestkai ektthaim korpacher dhean diunk laglim. Punn Jeruzalemacho nas zata tednam tanchi girestkai tankam salvar korunk xokchi nasli. (Jak. 5:3) Khorem mhunnttlear, tankam poixeancho mog aslo zalear, tanchi girestkai ani ghor-dar fatti soddun pollon vochonk tankam anikui kotthin zatolem aslem.

14. Ghott bhavarth aslear girestkaie vixim ami koslem chintop dovortolim?

¹⁴ Jehova beginuch hea noxttea sonvsaracho nas korcho asa mhunn amkam ghott bhavarth asa zalear ami girestkai ektthaim korchea vixim chintchimnant. Vhodd sonkoxtta vellar poixeank kosloch valor aschona. Bible sangta ki tea vellar lok ‘aplem rupem bhair rostear uddoitolim.’ Karonn “Sorvesporachea krodhachea disa tankam rakhunk tanchea rupeak ani bhangarak podvi na” mhunn tankam kollttolem. (Ez. 7:19) Tor zata title poixe ektthaim korpacher ami dhean diunchem nhoi. Punn ami osle nirnnoi gheunk zai, jea vorvim amkam amchem toxench amchea familichem pott bhorunk ani teach borabor Jehovachi seva korunk mellttoli. Osle nirnnoi gheunk ami amchea lagim zata tachea poros chodd khorch korcho nhoi, ani amchea lagim asloleo vostu samballunk ami chodduch vell ghalcho nhoi. Tea bhair, amchea lagim aslolea vostunk ami amchea jivitant poilo zago diuncho nhoi. (Mt. 6:19, 24) Karonn hea noxttea sonvsaracho xevott lagim pavta toso, ami Jehovacher visvas dovortat vo amchea girestkaiecher tem ami vinchun kaddunk poddttolem.

“SOSNIKAI DAKHOIAT”

15. Hebrev Kristanvank khas korun sosnikaiechi kiteak goroz asli?

¹⁵ Judeiant rokddich poristhiti khub vaitt zaunchi asli dekhun, Jehovak visvaxi ravonk thoinchea Kristanvank sosnikaiechi goroz asli. (Heb. 10:36) Tanchea modlea thoddeank adim khor dhumalleacho fuddo korunk poddlo tem  khorem. Punn zaiteank dhumallo sosunk poddonk naslo. Tor fuddem ietolea dhumallea pasot toiari korunk ani Jezu bhaxen moro poriant visvaxi ravonk Paulun tanchea ugddasak haddlem. (Heb. 12:4) Karonn khub zannam Kristi dhorm apnnaitalim dekhun zaite Judev lok ragan ani hinvsen bhorlole. Thoddeach vorsam poilim, Jeruzalemant porgottnni kortana, eka zomean Paulucher akromonn kelʼlem. Toxench 40-am poros chodd Judevamnim, ‘ek ievzonn korun soput ghetlolo ki Pauluk jivexim marchea poilim te kitem-i khaunche vo pieunche nant’ mhunn. (D.I. 22:22; 23:12-14) Tor tankam dves ani virodhacho fuddo korunk poddttolo aslo tem khorem. Torui, sangata mellon ieun bhokti korop, bori khobor porgottop ani tancho bhavarth ghott korop tannim soddun diunk zainaslem.

16. Hebrevank boroilʼlea chittintlean oddchonneam vixim sarkem chintop dovrunk amkam koxi modot zatoli? (Hebrevank 12:7)

¹⁶ Hebrev Kristanvank oddchonneam vellar sosnikai dakhounk koxi modot zatoli asli? Tannim oddchonneam vixim sarkem chintop dovrunk zai mhunn Paulu zannam aslo. Tea pasot Kristanvank oddchonneancho fuddo korunk poddtta tednam, Dev tea udexim tankam proxikxonn diunk xokta mhunn tannem somzailem. (Hebrevank 12:7 vachat.) Oxem kelʼlean, Jehovak manvota tosle gunn apnnaunk vo vaddounk tankam modot zatoli asli. Tor oddchonneancho fuddo kelʼlean koslo boro porinnam zaunk xokta tacher dhean dilʼlean, Hebrev Kristanvank sosnikai dakhounk anikui sompem zatolem aslem.​—Heb. 12:11.

17. Dhumallo soschea vixim Paulu kitem zannam aslo?

¹⁷ Oddchonneancho fuddo kortana anikui dhir dakhounk ani soddun dina zaunk Paulun Hebrev Kristanvank urba dili. Ani ho solʼlo diunk to purto aslo. Karonn Kristanv zaunchea poilim tannem svota Kristanvank khor dhumallo dilʼlo. Tor Kristanvank kosle torecho dhumallo sosunk poddtta tem to bore bhaxen zannam aslo. Toxench, to dhumallo koso soscho hem-ui Paulu zannam aslo. Karonn Kristanv zalea uprant tannem zaitea torechea virodhacho  fuddo kelo. (2 Kor. 11:23-25) Tor sosnikai dakhounk kiteachi goroz asa tem to boro zannam aslo. Hea pasot, tannem Kristanvanchea ugddasak haddlem ki oddchonneancho fuddo kortana tannim svotacher nhoi punn Jehovacher patieun ravonk zai. Ani Paulu dhiran oxem mhunnonk pavlo: “Jehova mhozo modot korpi zaun asa, hanv bhieunchona.”​—Heb. 13:6.

18. Fuddara vixim kitem zannam zalʼlean dhumallo sosunk amkam modot zatoli?

¹⁸ Amchim thoddim bhav-bhoinnam atam dhumallo sostat. Tor tancho mog kortat mhunn dakhounk ami tanchea pasot magnnem korunk zata ani ghoddtta tea bhaxen modot korunk zata. (Heb. 10:33) Bible amkam spoxttponnim sangta: “Krist Jezuchim xis koxim Devachi bhokti korit jieunk sodhtat tankam sogleank dhumallo soschoch poddttolo.” (2 Tim. 3:12) Tor dhumallea pasot ami sogleamnim toiar asonk zai. Ami purnn toren Jehovacher visvas dovrum-ia. Ani amkam kosli-i oddchonn ailear, to amkam modot kortolo mhunn khatri dovrum-ia. Aplea favo tea vellar, to aplea soglea visvaxi sevokank suttka ditolo.​—2 Tes. 1:7, 8.

19. Vhodd sonkoxtta pasot toiar ravonk ami atam kitem korunk zata? (Chitr pasun polloiat.)

¹⁹ Paulun Hebrevank boroilʼlea chittintlean, poilea xekddeantlea Kristanvank fuddarak ieunchea dhumalleacho fuddo korunk khorench modot zali. Tea chittint, Paulun tankam Devachea Utracho kholaien obheas korunk ani tem bore bhaxen somzonk urba dili. Oxem kelʼlean, tancho bhavarth oskot korunk xokta tosleo xikounneo vollkhon teo nakarunk tankam modot zatoli asli. Toxench, tannem tankam tancho bhavarth vaddounk urba dili. Oxem kelʼlean, Jezu ani sobhent fuddakar ghetoleam thaun mellttalem tem margdorxon rokddench pallunk tim fuddem sortolim aslim. Tea bhair, tankam sosunk poddttolea tras vo dhumallea vixim sarkem chintop dovrunk ani tanchea vorvim tancho mogall Bap tankam proxikxonn dita mhunn ugddas dovrunk Paulun tankam sanglem. Oxem korun tannem tankam sosnikai vaddounk modot keli. Tor Bible-antlo ho solʼlo ami pasun apnnaunk zai. Oxem kelʼlean, xevott poriant Jehovak visvaxi ravonk amkam pasun modot zatoli.​—Heb. 3:14.