OBHEASACHO LEKH 36
GIT 89 Devak Aikon Pallo Di
Devachea Utra Pormonnem Choltat Toslim Zaiat
“Fokot utor aikotat toslim zainakat, punn tea pormonnem choltat toslim zaiat.”—JAK. 1:22.
MUKHEL MUD’DO
Devachem Utor sodanch vachunkuch nhoi, punn tea vixim chintunk ani amchea jivitant apnnaunk amchi itsa vaddounk ho lekh amkam modot kortolo.
1-2. Jehovachim sevokam khuxal kiteak asat? (Jakob 1:22-25)
JEHOVAK ani tachea mogall Putak ami sodanch khuxal aslolim zai. Hea vixim Stotr 119-achea boroupean oxem mhunnttlem: ‘Devachi khuxi pallttat tim, soglea kallzan taka sodhtat tim, khorench sukhest vo khuxal!’ (St. 119:2) Toxench Jezun mhunnttlolem: “Jim konn Devachem utor aikotat ani tea pormonnem choltat tim khuxal!”—Luk. 11:28.
2 Jehovachim sevokam zalʼlean khuxal ravonk amkam zaitim karonnam asat. Tantuntlem sogleam-von mhotvachem karonn mhunnttlear, ami dor disa Devachem Utor vachtat ani tantunt xiktat tem amchea jivitant apnnaunk amchean zata tem soglem kortat.—Jakob 1:22-25 vachat.
3. Devachea Utra pormonnem ami choltat tednam amkam koso faido zata?
3 Tor ami ‘Devachea utra pormonnem choltat’ tednam amkam zaite toren faido zata. Udharonnak, Devachea Utrant xiktat tem ami apnnaitat tednam ami Jehovak manvololim zatat, ani hem zannam zaun amkam khuxalkai melltta. (Up. 12:13) Toxench, tantunt dilʼlo solʼlo apnnailʼlean amchi famil ani bhav-bhoinnam sangata amcho sombond anikui ghott zata. Ani tumi chodd korun hem onnbhovlam astolem. Tea bhair, Devache kaide pallinant tankam je tras sosunk poddttat, te amkam sosunk poddonant. Khorench, Devachi somurt, adnea ani nirnnoi-am vixim Raza Davidan aplea gitant jem gailem, toxench amkam bhogta. Tannem mhunnttlem: “Tankam pallo diun to vhodd inam zoddta.”—St. 19:7-11.
4. Devachea Utrant xiktat tem amchea jivitant apnnaunk titlem sompem kiteak na?
4 Khorem mhunnttlear, Devachem Utor sodanch vachunk ani ami xiktat tem amchea jivitant apnnaunk titlem sompem na. Karonn amchem jivit khub bizi asta. Punn ami kitem kelʼlem Jehovak zai tem somzonk ami dor disa tachem Utor vachunk ani tacho obheas korunk vell kaddunk zai. Oxem korunk amkam modot zaunk, hea lekhant amkam thoddeo suchounneo dilʼleo asat. Toxench, ami vachtat tea vixim chintunk amkam koxi modot zaunk xokta, ani amchea jivitant tem koxem apnnaunk zata tem-ui hea lekhant dilʼlem asa.
BIBLE VACHUNK UMKOCH VELL THARAIAT
5. Amchea modlim choddxim zannam kiteak bizi astat?
5 Jehovachim choddxim sevokam ekdom bizi astat. Bible-ant sangleat teo mhotvacheo zobabdareo samballunk ami khub vell sartat. Zoxem amchea modlim zaitim zannam, amchem toxench amchea familichem pott bhorunk kam kortat. (1 Tim. 5:8) Toxench zaitea zannanchim ghorchim, zannttim vo duent asat. Tor tanchi kallji gheunk tim khub vell sartat. Tea bhair, amchea svotachea bholaikechi kallji gheunk pasun amkam vell kaddunk poddtta. Hachea sangata, amkam sobhent pasun zobabdareo astat, ani amkam sogleank ek mhotvachi zobabdari asa. Ti mhunnttlear, urben porgottnni korop. Tor heo sogleo zobabdareo samballttana, dor disak Bible vachunk, vachtat tacher niall korunk, ani tem amchea jivitant apnnaunk ami vell koso kaddunk zata?
6. Chukonastana Bible vachunk tumi kitem korunk zata? (Chitr pasun polloiat.)
6 Bible vachop eka Kristanvan korunk zai tem “chodd mhotvachem” kam zaun asa. Tor ami tem chukonastana korop gorjechem. (Filp. 1:10) Eka khuxal munxa vixim stotrachea poilea versant oxem sanglam: “Sorvesporachea updesancher tacho sontos, dis-rat Tache nem to monant niallit asa.” (St. 1:1, 2) Tor hantuntlean, Bible vachunk ami ek umkoch vell tharavop gorjecho mhunn kolltta. Tor oxem korunk sogleam-von boro vell khoincho? Ami khoinchea vellar Bible vachtolim tem ami svota vinchun kaddunk zata. Punn to oslo ek vell asonk zai jednam ami sodanch teach vellar Bible vachunk pavtolim. Hea vixim Victor nanvacho ek bhav sangta: “Mhaka sokallim Bible vachunk borem dista. Sokallim fuddem utthonk mhaka avoddnna tem khorem. Punn tea vellar mhojem dhean sompeponnim halona, ani hanv mon lavun bore bhaxen Bible vachunk pavtam.” Tumkam-i ghoddie oxench dista astolem. Tor tumkanch vicharat: ‘Bible vachunk mhojea pasot sogleam-von boro vell khoincho?’
Bible vachunk sogleam-von boro vell khoincho? Tumi oslo khoincho vell vinchun kaddunk zata jednam tumi sodanch teach vellar Bible vachunk pavtolim? (Peregraf 6 polloiat)
TUMI JEM VACHLAM TEA VIXIM CHINTAT
7-8. Kitem kelear ami vachtat tacho amkam faido zauncho na? Ek udharonn diun somzaiat.
7 Bible vachunk ek umkoch vell tharailea uprant, ami anik kitem tori korop ekdom mhotvachem. Tumkam kednam-i tori oxem ghoddlam ki tumi kitem tori vachlam ani thoddeach vella uprant tumi tem visorleant? Amkam sogleank oxem ghoddlam. Bible vachtana pasun oxench zaunk xokta. Dor disa umkech odheai vachtolim mhunn ami dhei dovorla astolo. Oxem korop borem! Karonn ami dhei dovrun te melloun gheunk zai. (1 Kor. 9:26) Punn ami fokot Bible vachloch mhunn zaina. Tantuntlean faido zaunk, jem vachlam tea vixim ami chintunk zai.
8 Oxem korop kiteak gorjechem tem somzonk, hea udharonna vixim chintat. Zhaddank udok ekdom gorjechem. Punn chintat ki thoddeach vella bhitor bhorpur paus poddlear tem udok zomnint bhitor voichem na punn vhanvon voitolem. Punn dor disa il’lo-il’lo paus poddlear tem udok zomnint bhitor voitolem, ani zhaddam bore bhaxen vaddonk pavtolim. Heach bhaxen, soddsoddit vo goddboddan Bible vachlear, ami kitem vachlam tem chintunk, ugddas dovrunk ani apnnaunk pavchimnant.—Jak. 1:24.
Paus zoddlea uprant udok zomnint bhitor vochonk vell lagta toso, Bible vachlea uprant tea vixim chintunk ani tem apnnaunk ami pasun vell gheunk zai (Peregraf 8 polloiat)
9. Tumkam Bible soddsoddit vachpachi sonvoim zalea zalear tumi kitem korunk zata?
9 Tumkam Bible soddsoddit vachpachi sonvoim zalea kai? Toxem zalear tumi kitem korunk zata? To sovkas vachat. Tumi kitem vachtat tea vixim chintunk vell gheiat vo vachun zalea uprant tumi kitem vachlam tea vixim chintat. Hem korop kotthin nhoi. Oxem korunk tumi tumcho obheas korcho vell vaddounk zata. Vo tumi ghoddie Bible-acho thoddoch bhag vachunk zata ani urlolo vell tea vixim chintunk uzar korunk zata. Hea vixim Victor, zachea vixim ami poilim uloilʼlim to sangta: “Hanv Bible-acho thoddosoch bhag vachtam, zoso ghoddie ek odheai. Ani hanv sokallim vachtam dekhun, hanvem kitem vachlam tea vixim akʼkho dis hanv niallunk pavtam.” Tor tumi kitlem vachtolim tem tumi vinchun kaddunk zata. Punn tem sovkas vachop gorjechem. Karonn oxem kelʼlean, kitem vachlam tem tumi chintunk pavtolim.—St. 119:97; “ Tumi Tumkanch Vicharunk Zatat Tosle Prosn” hem boks polloiat.
10. Ami xiktat tem ami koxem apnnaunk zata tem somzaunk ek udharonn diat. (1 Tesalonikekarank 5:17, 18)
10 Ami khoinchea vellar Bible vachtat ani to kitlo vell porian vachtat, hachea borabor ami vachtat tem amchea jivitant apnnavop pasun ekdom gorjechem. Ami Bible-acho ek umkoch bhag vachtat tednam ami amkanch vicharunk zata: ‘Hanv jem vachtam tem aiz vo ieunchea disamnim hanvem koxem apnnaunk zata?’ Udharonnak ami 1 Tesalonikekarank 5:17, 18 vachla mhunn chintum-ia. (Vachat.) Him donui versam vachlea uprant, thoddo vell ravon ami disak kitle pavtti Jehova lagim magnnem kortat ani tim magnnim khorench kallzantlean asat vo na tem chintunk zata. Toxench, ami khoinchea vostum pasot Jehovache upkar attounk zatat tem-ui ami chintunk zata. Oxem kelea uprant, ami ghoddie tin vostum pasot Jehovache upkar attoitolim mhunn nichov korit. Hea toren ami Bible-antlean xikleant tea vixim chintunk ami thoddoso vell pasun sartat zalear, Bible-ant kitem sanglam tem somzonk ani tem apnnaunk amkam modot zatoli. Ani oxe toren dor disak ami vachlam tem apnnaitat zalear, sovkas-sovkas korun ami Jehovachim anikui borim sevokam zaunk pavtolim. Punn ami khub vostuncher kam korunk zai mhunn amkam kolltta zalear kitem?
TUMI MELLOUN GHEUNK XOKTAT TOSLE DHEI DOVRAT
11. Bible vachtana ami thodde pavtti niraxi kiteak zaunk xoktat? Ek udharonn diat.
11 Bible vachtana ami khub vostuncher kam korunk zai mhunn amkam kollon ieit. Hea karonnak lagon ami thodde pavtti niraxi zaunk xoktat. Udharonnak, ami aiz Jakobacho dusro odheai vachtat mhunn chintum-ia. Tantunt bhedbhav korina zaunk solʼlo dilʼlo asa. (Jak. 2:1-8) Tor ami to vachtat tednam ami amchea vagnnukent bodol korunk zai mhunn amkam kolltta ani ami sudharnni korunk nichov kortat. Uprant dusrea disak ami Jakobacho tisro odheai vachtat mhunn chintum-ia. Tea odheai-ant ami amchea jiber tabo dovrop ekdom gorjechem mhunn sanglam. (Jak. 3:1-12) Tor ho odheai vachtana amkam kolltta ki ami ek-ek pavtti dusreank dukhoitat toslim utram uzar kortat. Tor hea fuddem oxem korina zaunk ani dusreank urba melltta tea toren ulounk ami nichov kortat. Magir tisrea disak ami Jakobacho chovto odheai vachtat. Tantunt hea sonvsaracho ixtt zaina zaunk solʼlo asa. (Jak. 4:4-12) Tor ami koslim ixttam ani monoronjon vinchun kaddttat tea vixim anikui chotrai dovrunk ami nichov kortat. Uprant chovto dis ieta mhunnosor, ami khub vostuncher kam korchem asa ani he sogle bodlav korop ekdom kotthin asa oxem amkam disonk xokta.
12. Bible vachlea uprant ami zaite bodlav korunk poddttole mhunn amkam kolltta tednam ami kiteak niraxi zaunchem nhoi? (Futtnott pasun polloiat.)
12 Ami ekuch borabor zaite bodlav korche asat mhunn amkam kolltta zalear ami niraxi zaunchem nhoi. Karonn ami sudharnni korunk sodhtat tem dakhoun dita ki ami khaltim asat ani Devachea Utra pormonnem ami amchea jivitant bodlav korunk sodhtat. Tor ami khaltim asat zalear ami Devachem Utor vachun tea pormonnem jieuncho proitn kortolim. a Toxench ami ugddas dovrum-ia ki ami ekuch pavtti “novi vagnnuk” apnnaunk xokonant, punn ti apnnaunk vavr korit ravonk zai. (Kol. 3:10; “is being made new” hacher aslolo study note polloiat.) Tor oxem korit ravonk amkam koxi modot zatoli?
13. Ami xiktat tem apnnaunk ami koxem suru korunk zata? (Chitr pasun polloiat.)
13 Ami sudharnni korunk zai tea sogleach vostuncher ami ekuch borabor kam korunk proitn korcho nhoi. (Mho. 11:2, NW) Ami ghoddie ek list korunk zata ani ami khoinchea vostuncher poilim kam kortolim tem tharaunk zata. Magir, tacher boroilʼlea dusrea vostuncher ami kam korunk zata. Tor ami khoinchea vostuncher poilim kam korunk zata?
Ami sudharnni korunk zai tea sogleach vostuncher ekuch borabor kam korunk proitn korchea bodlek, ami ek list korun tantuntlea ek vo don mudʼdeancher poilim kam korunk tharaunk zata (Peregraf 13-14 polloiat)
14. Tumi koslea dhei-acher poilim kam korunk vinchunk zata?
14 Tumkam melloun gheunk sompo zatolo toslea eka dhei-acher poilim kam korunk tumi ghoddie tharaunk zata. Vo jea babtint tumi chodd sudharnni korunk zai toslo ek dhei ghoddie tumi vinchunk zata. To dhei vinchun kaddlea uprant ghoddie Watch Tower Publications Index vo Research Guide for Jehovah’s Witnesses, him prokaxonam uzar korun tumi sodh korunk zata. Uprant, tumcho dhei melloun gheunk tumkam ‘itsa di ani ti itsa purnn korunk xokti-i di’ mhunn tumi Jehova lagim magonk zata. (Filp. 2:13) Magir, tumi xikleant tem tumchea jivitant apnnaunk proitn korunk zata. Tor tumi dovorlolo poilo dhei melloun gheunk pavlim mhunn tumi polloitat tednam, urlole dhei pasun melloun gheunk tumkam urba mellttoli ani te bodlav korunk tumkam sompem zait.
DEVACHEA UTRAK TUMCHEA JIVITACHER ‘PROBHAV GHALUNK’ DI-IT RAVAT
15. Bible vachpi zaitea lokam poros Jehovache lok koxe veglle asat? (1 Tesalonikekarank 2:13)
15 Aiz zaito lok apnnem Bible khub pavtti vachla oxem sangtat. Punn te khorench Bible-acher patietat kai? Vo Bible-ant dilʼle solʼle te aplea jivitant apnnaitat kai? Na! Choddxe lok toxe korinant. Punn Jehovachea lokam vixim kitem? Poilea xekddeantlea Kristanvam bhaxen, Bible “khorench Devachem utor zaun asa” mhunn ami mantat ani Bible-a pormonnem amchem jivit jieunk proitn kortat.—1 Tesalonikekarank 2:13 vachat.
16. Devachea Utra pormonnem choltat toslim munxam zaunk amkam koxi modot zaunk xokta?
16 Dor disa Bible vachop ani ami vachlam tem apnnavop sodanch sompem asona. Karonn Bible vachunk vell kaddunk amkam kotthin zata zait. Vo ami goddboddan vo soddsoddit vachtat astolim ani vachlam tea vixim chintunk vell ghenant zait. Vo ami khub vostuncher kam korunk zai mhunn chintun ami niraxi zatat astolim. Torui, Jehovachea modotin ami kosle-i oddchonnecho fuddo korunk xoktat. Tor Jehovachi modot gheunk, ani Devachem Utor fokot aikotat toslim nhoi punn tea pormonnem choltat toslim munxam zaunk ami ghott nichov korum-ia. Hea toren ami dor disa Devachem Utor vachtat ani vachlam tem apnnait ravtat tednam ami amchea jivitant khuxal astolim.—Jak. 1:25.
GIT 94 Devachem Utor Moladik Dennem
a jw.org-acher, Tumchim Ixttam Kitem Mhunnttat—Bible Vachop ho video polloiat.
