1-2. Jehovan amkam dusreank diun chodd khuxalkai melloun gheunchi tank dilʼlean amkam koso faido zata?

 JEHOVAN amkam oxe toren rochleant ki dusream koddlean gheunchea poros dusreank diunk amkam chodd khuxalkai melltta. (D.I. 20:35) Punn dusrim amkam kitem-i ditat tednam amkam khuxalkai mellona oxem nhoi. Tori astana, ami dusreank ditat tednam amkam chodd khuxalkai melltta. Jehovan amkam hea toren rochleant dekhun amkam khoreaninch khub faido zata. Koso?

² Ami svota zaun amchi khuxalkai vaddounk xoktat. Toxench, ami dusreank diunk veg-veglleo vatto sodhun anikui chodd khuxalkai melloun gheunk zata. Tor Jehovan amkam hi tank diun kitle bore toren rochleant nhoi!—St. 139:14.

3. Bible-ant Jehovak ek ‘khuxal Dev’ kiteak mhunnttla?

³ Ami dusreank ditat tednam, ami khuxal astat mhunn Bible amkam sangta. Tor Bible-ant, Jehovak ek ‘khuxal Dev’ kiteak mhunnttla tem ami sompeponnim somzonk xoktat. (1 Tim. 1:11) Karonn dusreank diunk sogleam poros poilim tannem survat keli. Ani to jitlo dusreank dita tachea poros chodd anik konnuch diunk xokona. Apostl Paulun sanglem toxem, fokot Jehova Devak lagon “ami jivim asat, choltat-bhonvtat ani ostitvant asat.” (D.I. 17:28) Khorench, “dor ek borem ani poripurnn dennem” Jehova koddleanuch amkam melltta.—Jak. 1:17.

4. Amchi khuxalkai vaddounk ami kitem korunk zai?

⁴ Amkam sogleank dusreank dilolean khuxalkai melltta ti vaddounk zai. Oxem korunk, ami Jehova bhaxen udar kallzachim zaunk zai. (Ef. 5:1) Hea lekhant, dusreank diunchea vixim Jehovan ek borem udharonn koxem dovorlam tea vixim ami polloitolim. Toxench ami dusreank ditat tednam, tim amkam upkariponn dakhoinant oxem amkam dista zalear, ami kitem korunk zata  tem-ui ami polloitolim. Oxem kelolean, dusreank di-it ravon amchi khuxalkai ami samballunk ani vaddounk pavtolim.

JEHOVA BHAXEN UDAR KALLZACHIM ZAIAT

5. Jehova amkam udar kallzan kitem-kitem dita?

⁵ Jehova amkam udar kallzan kitem-kitem dita? Ami thoddim udharonnam polloum-ia. Poilem mhunnttlear, Jehova amcheo gorzo purnn korta. Jehova ghoddie amkam vhodd-vhodd vostu diunchona, punn amkam jem kitem goroz asa tem to ditolo. Zoxem jevonn, kopdde ani ravonk zago. (St. 4:8; Mt. 6:31-33; 1 Tim. 6:6-8) Punn Jehova amkam hem soglem fokot diunk zai mhunn dita kai? Na! Tor hem soglem to kiteak lagon amkam dita?

6. Matev 6:25, 26-antlean ami kitem xiktat?

⁶ Jehova amcho mog korta dekhun to amchea gorzanchi kallji gheta. Matev 6:25, 26-ant Jezun kitem mhunnttlem tacher dhean diat. (Vachat.) Suknneam vixim sangon tannem oxem mhunnttlem: “Tim roinant, lunvnant ani gudanvamnim bhorun dovornant.” Punn Jezun fuddem kitem mhunnttlem tacher dhean diat. Tannem sanglem: “Tumcho sorgincho Bap tankam khaunk dita. Tor tumi tanchea poros chodd molachim nhoi?” Hantuntlean ami kitem xiktat? Zonvaram poros Jehovachi bhokti kortat tim tachim sevokam taka chodd moladik asat. Tor to zonvaranchi kallji gheta zalear, to amcheo-i gorzo polloun ghetolo mhunn ami tacher khatri dovrunk zata. Ek mogall bapui aplea familichi kallji gheta toso, Jehova pasun mogan aplea familichi kallji gheta.—St. 145:16; Mt. 6:32.

7. Ami khoinche eke vatten Jehova bhaxen udar kallzachim zaunk xoktat? (Chitr pasun polloiat.)

⁷ Jehova bhaxen ami pasun amchea bhav-bhoinnancho mog kortat dekhun, ami tankam gorjecheo vostu diunk fuddem soronk zata. Tumi eka oslea bhavak vo bhoinnik vollkhotat, zaka jevnnachi vo kopddeanchi goroz asa? Tacheo heo gorzo purnn korunk Jehova ghoddie tumkam uzar korunk xokta. Ani khas korun odruxtta vellar, Jehovachim sevokam eka-mekak modot korunk rokddinch fuddem sortat. Zoxem COVID-19 pidde vellar, thoddea bhav-bhoinnamnim tanche lagim aslolem jevonn, kopdde ani her gorjecheo vostu, gorjek sampoddlolea bhav-bhoinnam sangata vanttleo. Toxench, zaitea zannamnim sonvsarbhor zatolea kama pasot udar kallzan denngim dilim. Hea vorvim, sonvsarbhor aslolim amchim bhav-bhoinnam jim odruxttak lagon gorjek sampoddlolim tankam modot mellʼlli. Tor udar kallzan tankam modot korpi bhav-bhoinnamnim Hebrevank 13:16-ntlim utram apnnailim, zoim mhunnttlam: “Borem korunk ani tumchea lagim  asat teo vostu dusreank vanttunk visornakat, karonn Devak osle iodn khub manvotat.”

8. Jehova amkam xokti diun koso modot korta? (Filipkarank 2:13)

⁸ Jehova amkam xokti dita. Jehovak bhorpur xokti asa ani aplea visvaxi sevokank to udar kallzan ti dita. (Filipkarank 2:13 vachat.) Ek umkech torechi tallnni nakarunk vo umkech torechea oddchonnecho fuddo korunk tumi Jehova lagim xokti magloli astoli. Vo dor ek dis sarunk tumkam goroz titlem boll di mhunn tumi Jehova lagim maglolem astolem. Ani Jehovan tumchea magnneacho zobab dilo tednam, apostl Paulu bhaxen tumi pasun onnbhovlem astolem. Tannem mhunnttlolem: “Zo mhaka boll dita tacheach udexim soglea vostunt mhaka xokti melltta.”—Filp. 4:13.

9. Ami Jehovachi dekh gheun amchi xokti koxi uzar korunk zata? (Chitr pasun polloiat.)

⁹ Jehova sarki amche lagim bhorpur xokti na. Toxench, amchi xokti ami dusreank diunk xokonant. Punn Jehova bhaxen amchi xokti uzar korun ami dusreank modot korunk zata. Udharonnak, ami amchea zannttea vo oskot bhav-bhoinnank tanchem ghor nitoll korunk vo gorjecheo vostu haddun diunk modot korunk zata. Toxench ghoddtta zalear, Raj-ghor nitoll dovrunk ani tacho samball korunk ami ap-khuxen fuddem soronk zata. Hea toren, amchi xokti bore toren uzar korun ami bhav-bhoinnank modot korunk zata.

10. Ami amchea utram vorvim dusreank koxi modot korunk zata?

¹⁰ Toxench, amchea utrank pasun xokti asa mhunn ami visorchem nhoi. Amchea eka bhavak vo bhoinnik xabaski vo bhuzvonnechi goroz asa mhunn amkam kolltta zalear, ami amchea utram vorvim tankam ti diunk zata. Ami ghoddie tankam mellon, vo fon korun, vo ek kardd, email, vo message dhaddun oxem korunk zata. Oxem korunk, amchim utram ekdom borim asonk zai hem gorjechem nhoi. Ami mogan uloilʼlim sadim utram pasun tanchea kallzak lagonk xoktat. Ani amchea utram vorvim Jehovak visvaxi ravonk vo tim valorachim asat mhunn ugddas dovrunk tankam modot zait.—Mho. 12:25; Ef. 4:29.

11. Jehova amkam apli zannvai koxi dita?

¹¹ Jehova amkam zannvai dita. Jakoban mhunnttlem: “Tumchea modlea konnankui zannvaiechi goroz asa zalear tannem ti Deva lagim magot ravchi . . . Karonn Dev konnacheoch chuki sodhinastana sogleank udar kallzan dita.” (Jak. 1:5; ftn.) Tor hea utrantlean amkam kollon ieta ki Jehova apli zannvai apleach lagim dovorna, punn zankam goroz asa tankam sogleank udar kallzan to dita. Tea bhair Jehova zannvai dita tednam, to “konnakuch unno mhunn lekhinastana” vo “konnacheoch chuki sodhinastana” dita mhunn kolltta. Toxench, amkam tachea zannvaiechi goroz asa mhunn ami vollkhon ghetat dekhun, amkam kednanch loz bhogloli taka  naka. Tachea bodlek, amkam zannvai di mhunn ami tache lagim maglolem taka zai.—Mho. 2:1-6.

12. Ami khoinchea vattamnim amchi zannvai dusreank diunk zata?

¹² Jehova bhaxen ami amchi zannvai dusreank koxi diunk zata? (St. 32:8) Ami zaitea vattamnim oxem korunk zata. Udharonnak, ami novea porgottnnarank, porgottnni koxi korchi tem xikounk zata. Toxench vhoddilamnim, sobhechea sevokank ani bautizm ghetlolea her bhavank tankam sobhent asloleo zobabdareo tannim koxeo samballcheo tem pasiensan xikounk zata. Tea bhair, songottnnechem bandkam ani maintenance-achem kam korpi bhav-bhoinnamnim, titlo onnbhov na tea bhav-bhoinnank tem kam koxem korchem tem xikounk zata.

13. Dusreank xikoitana ami Jehovachi dekh koxi gheunk zata?

¹³ Jehova zoso udar kallzan dusreank xikoita, toxench ami-i korunk vavr kortat. Ami tankam xikoilear tim amchea poros borim zatolim vo amcho zago ghetolim mhunn chintun ami tankam xikounk fattim soronant. Toxench, ‘Mhaka tor konnench xikounk na, tor hanv taka kiteak xikoum? Taka svota zaun xikom-di,ʼ oslem chintop pasun ami dovornant. Ami tankam xikounkuch nhoi, ‘punn amcho jiv pasun tanchea pasot diunk’ toiar asat. (1 Tes. 2:8) Hea vorvim, ‘tim dusreank xikounk favo tea ritin purtim zaunk pavtolim’ mhunn ami bhorvonso dovortat. (2 Tim. 2:1, 2) Hea toren ami dusreank udar kallzan xikoilear, amchi toxich tanchi pasun zannvai ani khuxalkai vaddttoli.

DUSRIM AMCHE UPKARI NANT OXEM AMKAM DISTA TEDNAM

14. Ami dusreank modot kortat tednam zaitim zannam kitem kortat?

¹⁴ Ami dusreank, khas korun amchea bhav-bhoinnank modot kortat tednam tim choddxe pavtti amche upkar attoitat. Zoxem, zaitim zannam amchea pasot ek ‘Thank you’ kardd korun dhaddit vo her vattamnim amche upkar attoit. (Kol. 3:15) Tim oxe toren amche upkar attoitat tednam amchi khuxalkai anik vaddtta.

15. Dusrim amche upkari asonant tednam ami kitem ugddas dovrunk zata?

¹⁵ Punn thodde pavtti ami dusream pasot jem kitem kortat, tea pasot tim amche upkari asat mhunn dakhoinant. Ami amcho vell kaddun, amchi xokti uzar korun vo amchea lagim asloleo vostu uzar korun tankam modot kelea zait. Punn tacho tim valor pasun korinant mhunn amkam disot. Oxem zata tednam, amchi khuxalkai hogddaina zaunk ami kitem korunk zata? Hea lekhant aslolem mukhel vers ami ugddasak haddunk zata. Tem mhunnttlear, Itihas 20:35. Amchi khuxalkai, dusrim amche upkari asat vo na tacher tharloli na. Tim amche upkari nant zalear pasun, dusreank modot korun ami khuxalkai melloun gheit ravonk zata. Koxi? Ami thoddeo vatto polloum-ia.

16. Kitem ugddas dovorlolean ami dusreank khuxalkaien di-it ravonk pavtolim?

¹⁶ Dusreank ditat tednam ami Jehovachi dekh ghetat mhunn ami ugddas dovrum-ia. Lok Jehovak upkari nant zalear pasun to tankam boreo vostu dita. (Mt. 5:43-48) Tor ami pasun “porot mellpachi axa dhorinastana” dusreank ditat tednam, amkam “vhodd inam mellttolo” mhunn Jehova bhas dita. (Luk. 6:35) Tor dusrim amche upkari nant zalear pasun ami niraxi zaunchem nhoi. Dusreank ‘khuxen diunkʼ ani tankam modot korunk ami zo vavr kortat, tea pasot Jehova amkam farik kortolo mhunn ami ugddas dovrum-ia.—Mho. 19:17; 2 Kor. 9:7.

17. Dusreank ditana ami anik khoinche vatten Jehovachi dekh gheunk zata? (Lukas 14:12-14)

¹⁷ Dusreank ditana ami anik khoinche vatten Jehovachi dekh gheunk zata tem Jezun Lukas 14:12-14-nt sanglam. (Vachat.) Ami ghoddie oslea munxancho poramos kortat zait vo oslea munxank udar kallzan ditat zait, jim  amkam porot diunk xoktat. Hantunt kaim chukichem na tem khorem. Punn ami choddxe pavtti oxem kortat mhunn amkam kolltta zalear, ami Jezun dilʼlo solʼlo apnnaunk zai. Ami oslea lokank diunk zai, jim amkam porot kainch diunk xokonant. Oxem kelear, ami Jehovachi dekh gheunk pavtolim ani khuxal astolim. Toxench, dusrim amkam upkariponn dakhoitolim mhunn ami opekxa korinant tednam ami amchi khuxalkai samballunk pavtolim.

18. Dusrim amkam upkari asat mhunn dakhoinant tednam ami kitem korchem nhoi, ani kiteak?

¹⁸ Dusrim onupkari asat mhunn chintinakat. (1 Kor. 13:7) Dusrim amkam upkari asat mhunn sangonant tednam, ami amkanch vicharunk zata: ‘Tim khorench onupkari asat kai, vo tim upkar attounk visorlim kai?ʼ Tim upkari asat mhunn sangona zaunk dusrim karonnam asonk xoktat. Thoddim kallzant thaun upkari astat, punn tem sangonk tankam kotthin zaunk xokta. Ghoddie adim tim dusreank modot kortalim zait, punn atam dusrim tankam modot kortat dekhun tankam unnemponn bhogta astolem. Punn kitem-i karonn asum, ami amchea bhav-bhoinnancho kallzant thaun mog kortat tednam, tim onupkari asat mhunn ami chintchimnant ani tankam di-it ravon ami khuxalkai melloun gheunk pavtolim.—Ef. 4:2.

19-20. Dusreank ditana amchi khuxalkai samballunk amkam anik kitem modot korunk xokta? (Chitr pasun polloiat.)

¹⁹ Pasiens dakhoiat. Zannvaien bhorlolea Raza Solomonan oxem boroilem: “Tujem jevonn udkant sodd, tem tuka zaitea disam uprant melltolem.” (Up. 11:1) Hantuntlean amkam kollon ieta ki dusreank modot korun ‘zaitea disam vo tempa uprantʼ tim amche upkar attounk xoktat. Hea vixim ek onnbhov polloum-ia.

²⁰ Khub vorsam poilim, sorkittachea dekhrekh korpeache bailen, bautizm ghetlole eke bhoinnik urba diunk ek chitt boroili. Tea chittint, Jehovak visvaxi ravop kitlem mhotvachem tem tinnem boroilem. Ani sumar atth vorsam uprant, dekhrekh korpeachea baileche upkar attounk tea bhoinnin tika ek chitt boroili. Tinnem boroilem: “Tuka ghoddie khobor aschina, punn tuje chitti udexim gelʼlea vorsamnim mhaka khorench khub modot zali. Tujim  doiall utram mhojea kallzak laglim ani tunvem tea chittint boroilʼlem vers hanv kednanch visronk na.” a Tika fuddo korunk poddlolea thoddea oddchonneam vixim sanglea uprant, tinnem tea chittint fuddem oxem boroilem: “Thodde pavtti mhaka asloleo sogleo zobabdareo mhaka soddun diunk koxeo distaleo. Jehovachi seva korop pasun hanv bond korunk sodhtalem. Punn tea vellar, tunvem boroilʼlem vers hanv mhojea ugddasak haddttalem ani tea vorvim, Jehovak visvaxi ravonk mhaka modot zatali. Fattlim atth vorsam, tuje chitti vorvim ani tantunt aslolea tea versa vorvim mhaka jitli modot zali, titli anik kiteanuch zaunk na.” Tor tea bhoinnin ‘zaitea disam vo tempa uprantʼ boroilʼlea hea chitti vorvim, tea dekhrekh korpeache bailek kitli khuxalkai mellʼlli astoli tem ami chintunk zata. Heach toren, ami dusreank modot korun zaitea tempa uprant tim ghoddie amche upkar attounk xoktat.

21. Jehovachi dekh gheun udar kallzan dusreank di-it ravonk tumi kiteak nichov kela?

²¹ Ami atam meren polloilem toxem, Jehovan amkam ek khas tank diun rochleant. Ti mhunnttlear, gheunchea poros dusreank diunk amkam chodd khuxalkai melltta. Tor ami amchea bhav-bhoinnank modot kortat ani tim amche upkar attoitat tednam, amkam borem dista tem khorem. Punn tannim amche upkar attoum vo na, ami sarkem tem kelem hem zannam zaun amkam khuxalkai melltta. Toxench, ami dusreank ditat ‘tachea-von odik amkam diunk Sorvesporak podvi asa’ mhunn ami kednanch visorchem nhoi. (2 It. 25:9) Jehovan amkam jem kitem dilam, tachea poros chodd ami dusreank kednanch diunk pavchimnant. Ani Jehova dita to inam sogleam-von boro asta. Tor amchea sorginchea Bapachi dekh gheun, udar kallzan dusreank di-it ravonk ami ghott nichov korum-ia.