Obheas korunk toiari kortana, ami amkanch vichartat astolim: ‘Hanv jem vachtam tantuntlean mhaka kitem xikonk mellttolem?’ Ami ghoddie umkench xikonk chintlam astolem, punn teach borabor ami ugddas dovrunk zai ki Jehova amkam jem kitem novem xikoita tem pasun xikonk ami toiar asonk zai. Koxem?

Jehova lagim zannvai magat. Jehova tumkam atam kitem xikounk sodhta tem somzonk tache lagim modot magat. (Jak. 1:5) Khoinchea-i vixoi-acher obheas kortana, tea vixim tumi poilim kitem zannant tantunuch dhadoxi zainakat.—Mho. 3:5, 6.

Devachea Utrak aslole xoktek tumchea jivitant kam korunk diat. “Devachem utor jivem” asa. (Heb. 4:12) Tor ami dor ek pavtt “Devachem utor” vachtat tednam amkam kitem tori novem xikonk melltta. Tea vorvim amkam amchea jivitant zaitea vattamnim modot zata. Punn oxem zaunk, Dev amkam kitem xikoita tem ami manun gheunk zai.

Jehova tumkam xikoita tea soglea pasot tache upkar attoiat. To amkam jem kitem xikoita tem “ruchik-svadik khannanchem ek vhoddlem jevonn” koxem zaun asa. (Iz. 25:6) Tor tumkam borem lagta tench khainakat. Dusrea utramnim sangchem zalear, tumkam avoddttolo koso dista fokot teach vixoi-acher obheas korinakat. Punn Jehovan dilʼlem soglem jevonn jevun dhadoxi zaiat. Tumi oxem kortat tednam tumkam faido zatolo itlench nhoi, punn Dev tumkam jem kitem xikoita tacho obheas korunk tumchi khuxalkai anikui vaddttoli!