1. Jezu rokddoch kitem korcho asa?

 BEGINUCH vhoddle-vhoddle bodlav zaunche asat toslea eka kallar ami jietat. Prithumer jietolea dor eka munxachi Jezu zhoddtti korcho asa. Punn neai vo zhoddtti korchea poilim kitem ghoddttolem tem Jezun dakhoun dilam. ‘Sonvsarachea xevottachea vella vixim’ Jezun aplea xisank ek “khunna” diloli. (Mt. 24:3) Tea vixim amkam Matev odheai 24 ani 25, toxench Marku odheai 13 ani Lukas odheai 21-ant vachunk melltta.

2. Hea lekhant ami kiteacher dhean ditolim, ani toxem kelolean amkam koxi modot zatoli?

² Ami toiar ravonk Jezun tin vopareo uzar keleo, jeo amkam xittkaunneo koxeo zaun asat. Teo mhunnttlear, menddream ani bokddeanchi vopar, xannim ani murkh ankvareanchi vopar ani talentanchi vopar. Dor ek vopar, munxanche vagnnuke pormonnem tanchi zhoddtti koxi zatoli tem somzonk amkam modot kortoli. Tor tantuntlean amkam kitem xikonk melltta, ani tem ami koxem apnnaunk zata tem ami polloum-ia. Poilim ami menddream ani bokddeanche voparicher dhean dium-ia.

MENDDRE ANI BOKDDEANCHI VOPAR

3. Jezu lokancho neai kednam kortolo?

³ Menddre ani bokddeanche voparint Jezun sanglem ki lok bore khobrek koso kan dita ani aplea makhlolea bhavank koso tenko dita tachea adarit Jezu tancho neai kortolo. (Mt. 25: 31-46) Ani hem to Armageddonachea poilim ‘vhodd sonkoxttachea’ vellar korcho asa. (Mt. 24:21) Zoso ek gonvlli, bokddeank ani menddreank kuxin kaddtta, tech bhaxen aplea makhlolea bhavank visvaxiponnan tenko ditat ani dinant tankam Jezu kuxin kaddttolo.

4. Izaias 11:3, 4-a pormonnem, Jezu sodanch sarke toren neai kortolo mhunn amkam kiteak khatri asa? ( Chitr pasun polloiat.)

⁴ Jehovan neai korunk Jezuk nemla ani to sodanch sarke toren neai kortolo mhunn amkam Bible-antlean kolltta. (Izaias 11:3, 4 vachat.) Lok kitem kortat, te kitem chintʼtat ani kitem uloitat, toxench te makhlolea bhavam sangata koxe vagtat tacher to dhean ditolo. (Mt. 12:36, 37; 25:40) Oxem kelʼlean, tachea makhlolea bhavank ani tanchea kamak konn tenko ditat, hem taka kollttolem. a Tor ami Kristachea bhavank tenko ditat mhunn dakhoun diunk ek sogleam-von mhotvachi vatt mhunnttlear, porgottnnent bhag ghevop. Jim konn hea kamant bhag gheun tankam tenko ditat, tankam Jezu “nitivont” mhunn tharaitolo ani tankam hea prithumer “sasnik jivit mellttolem.” (Mt. 25:46; Prok. 7:16, 17) Ho tanchea pasot kitlo vhoddlo inam asa nhoi! Toxench, vhodd sonkoxttachea vellar ani uprant pasun tim visvaxi ravlim zalear tanchim nanvam “jivitachea pustokant” boroilʼlim urtolim.—Prok. 20:15.

5. Menddream ani bokddeam vixim aslolea vopari thaun ami kitem xiktat, ani konnem tacher dhean diunk zai?

⁵ Tumi visvaxi asat mhunn dakhoun diat. Menddream ani bokddeam vixim Jezun dilʼli vopar khas korun prithumer jieunk bhorvonso asloleank lagu zata. Porgottnnechea kamant bhag gheunk tim Kristachea bhavank tenko ditat titlench nhoi, punn xanno ani visvaxi chakra thaun ieta tem margdorxon pasun tim visvaxiponnan pallttat. Karonn makhloleank Jezun vinchun kaddleat mhunn tankam khatri asa. (Mt. 24:45) Punn sorgar jieunk bhorvonso asloleank pasun hea voparint xittkaunni melltta. Ti mhunnttlear, tim koxim chintʼtat, vagtat ani uloitat, tacherui Jezu dhean dita. Tor tannim visvaxi ravop gorjechem. Khorem mhunnttlear, hea vixim Jezun dilʼlea anik don voparimnim, makhloleank tannem khas xittkaunneo dileat. Teo amkam Matev odheai 25-ant pasun vachunk mellttat. Atam ami xannea ani murkh ankvareanchea voparicher dhean dium-ia.

XANNEA ANI MURKH ANKVAREANCHI VOPAR

6. Panch ankvareamnim apunn xannim asat mhunn koxem dakhoun dilem? (Matev 25:6-10)

⁶ Ankvareanchea voparint novreak mellonk gelʼlea dha ankvaream vixim Jezu sangta. (Mt. 25:1-4) Tankam novrea sangata kazarachea jevnnank vochonk zai aslem. Hea voparint panch ankvareo “xanneo” asleo ani panch “murkh” asleo mhunn Jezu sangta. Xanneo ankvareo toiar ani zagrut asleo. Novreak ieunk kitli-i rat zalear pasun taka ravonk tannim toiari kelʼli. Tannim aplea sangata telache dive toxench battlent subez telui ghetlolem. Oxem kelʼlean, novreak ieunk uxir pasun zalear tancho divo palouncho naslo. (Matev 25:6-10 vachat.) Hea toren novro ailea uprant tachea sangata kazarachea jevnnak vochpak tim toiar aslim. Tech bhaxen, Jezu ieum poriant, jim makhlolim Kristanvam visvaxi ani zagrut ravon apunn toiar asat mhunn dakhoitat tim sorgar Jezu sangata raz choloitolim. b (Prok. 7:1-3) Punn tea panch murkh ankvaream vixim kitem?

7. Panch murkh ankvaream sovem kitem ghoddlem, ani kiteak?

⁷ Novro ailo tednam xanneo ankvareo toiar asleo toxeo, teo panch murkh ankvareo  nasleo. Tanche dive palonk ailʼle ani tannim tanchea sangata subez tel pasun haddunk naslem. Ani novro ieta mhunn tankam kollʼllem tednam tim tel viktem gheunk gelim. Tor novro ailo tednam tim thoim naslim. Tea vellar, “jeo ankvareo toiar asleo teo tachea borabor kazarachea jevnnak bhitor geleo, ani dar bond kelem.” (Mt. 25:10) Uprant jednam murkh ankvareo tel gheun aileo ani jevnnak bhitor soronk sodhtaleo tednam novrean tankam mhunnttlem: “Hanv tumkam vollkhona.” (Mt. 25:11, 12) Novro iesor taka ravonk tea panch murkh ankvareamnim toiari korunk nasli. Hantuntlean makhlolea Kristanvank kitem xikonk melltta?

8-9. Dha ankvareanchea voparintlean makhlolea Kristanvamnim kitem xikonk zata? (Chitr pasun polloiat.)

⁸ Tumi toiar ani zagrut asat mhunn dakhoun diat. Jezun hi vopar sangli tednam makhlolea Kristanvam modlim thoddim toiar astolim ani thoddim toiar aschimnant mhunn to sangonk sodhinaslo. Khorem mhunnttlear, xevott ieum poriant visvaxi ravonk tannim toiari korunk na zalear, kitem zatolem aslem tem hea vopari udexim to tankam dakhounk sodhtalo. Tem mhunnttlear, tankam tancho inam mellcho naslo. (Ju. 14:3, 4) Hem kitlem gombhir aslem nhoi! Tor amkam sorgar vo prithumer jieuncho bhorvonso asum, hea voparint dilʼli xittkaunni amkam sogleank lagu zata. Xevott ieum poriant, thir ravonk ami zagrut ravonk zai ani toiari korunk zai.—Mt. 24:13.

⁹ Dha ankvareanchi vopar uzar korun toiari korop ani zagrut ravop kitlem mhotvachem tem tankam sanglea uprant, Jezun tankam talentanchi vopar sangli. Hi vopar uzar korun, allxi zainastana khub vavr korop kiteak gorjechem tem Jezun tankam dakhoilem.

TALENTANCHI VOPAR

10. Don chakramnim aplea dhoniak visvaxiponn koxem dakhoilem? (Matev 25:19-23)

¹⁰ Talentanche voparint Jezun don chakram vixim sanglem, je aplea dhoniak visvaxi asle, punn tisro taka visvaxi naslo. (Mt. 25:14-18) Tea donui visvaxi chakramnim khub vavr korun aplea dhoniak anik poixe zoddle. Pordesant voichea poilim, dhonian tankam talent vo zaite  poixe dilʼle. Donui visvaxi chakramnim khub vavr kelo ani apleak dilʼle poixe xanneponnan uzar kele. Tor tancho dhoni porot ieta mhunnosor tannim te poixe dobrad kele. Tem polloun, dhonian tankam xabaski dili ani te tachea ‘sangata khuxal zale.’ (Matev 25:19-23 vachat.) Punn tisrea chakra vixim kitem? Dhonian dilʼle poixe gheun tannem kitem kelem?

11. “Allxi” chakra sovem kitem ghoddlem, ani kiteak?

¹¹ Tisrea chakrak ek talent dilʼlo, punn to chakor “allxi” aslo. Tannem to xanneponnan uzar kelʼlo tachea dhoniak zai aslem. Punn tannem to zomnint purun dovorlo. Tor tacho dhoni porot ailo tednam, tea ek talenta bhair, aplea dhoniak diunk tache lagim anik kainch naslem. Toxench, hea chakracho sobhav boro naslo. Karonn, aplea dhonia pasot to subez poixe zoddunk pavonk na dekhun apli chuk manun gheunchea bodlek, aplo dhoni “ek koddok munis” mhunn tannem tacher arop ghatlo. Hea pasot, taka aplea dhoniachi maniotai mellonk na. Toxench, tache koddlean to talent kaddun ghetlo ani taka tachea dhoniachea ghoranneantlo bhair kaddlo.—Mt. 25:24, 26-30.

12. Voparint sanglole don visvaxi chakor aiz konn zaun asat?

¹² Voparint sanglole don visvaxi chakor mhunnttlear, visvaxi makhlolim Kristanvam zaun asat. Tancho dhoni Jezu tankam ‘aplea sangata khuxal zaunk’ apoita. Hacho orth, tankam tancho sorgincho inam melltta. Tem mhunnttlear, poilem jivontponn. (Mt. 25:21, 23; Prok. 20:5b) Punn allxi chakrachea udharonnantlean tankam ek xittkaunni pasun melltta. Ti kosli?

13-14. Talentanchea voparintlean makhlolea Kristanvank kitem xikonk melltta? (Chitr pasun polloiat.)

¹³ Tumi khub vavr kortat mhunn dakhoun diat. Hea voparint pasun, thoddim makhlolim Kristanvam allxi zatolim mhunn Jezu sangonk sodhinaslo. Punn tanchi urba unni zali zalear, kitem zaunk xoktalem tem to tankam somzaunk sodhtalo. Tem mhunnttlear, tankam ‘jem apounnem mellʼllam ani jea pasot tankam vinchun kaddleant, tea pasot tim purtim zaun urchim naslim’ ani tankam sorginchea Rajeant bhitor soronk mellchem naslem.—2 Ped. 1:10.

¹⁴ Dha ankvareo ani talentanchea voparintlean soglea makhlolea Kristanvamnim toiar ani  zagrut ravonk zai ani allxi zainastana khub vavr korunk zai mhunn amkam kolltta. Punn Jezun makhlolea Kristanvank anikui ek xittkaunni dilʼli. Ti amkam Matev 24:40, 41-ant vachunk melltta.

KONNAK “BORABOR VHORTOLE”?

15-16. Matev 24:40, 41-ant makhlolea Kristanvamnim chotur ravonk zai mhunn koxem kollon ieta?

¹⁵ Heo tin vopareo sangchea poilim, makhlolea Kristanvanchi nimanni zhoddtti zatoli mhunn Jezun sanglolem, jea vorvim konnank maniotai mellttoli tem kollon ietolem. Tannem xetant kam kortolea don dadleam vixim ani danteacher dollttole don bailam vixim sanglem. Te donui dadle ek torechem kam kortale ani teo bailo pasun ek torechem kam kortaleo. Punn Jezun sanglem ki tanchea modlea “ekleak borabor vhortole ani dusreak soddun ditole.” (Matev 24:40, 41 vachat.) Uprant Jezun aplea xisank oxem mhunnttlem: “Taka lagon zagrut ravat, karonn tumcho Somi khoinchea disak ieta tem tumkam khoborna.” (Mt. 24:42) Jezun ankvareanchi vopar sanglea uprant oxench kitem mhunnttlolem. (Mt. 25:13) Tor Jezu kitem sangonk sodhtalo zait? Khoreponnim makhloleank ani jim visvaxi asat, fokot tankanch Jezu sorginchea Rajeant ‘vhortolo.’—Ju. 14:3.

¹⁶ Tumi chotur asat mhunn dakhoun diat. Jim makhlolim Kristanvam chotur ravonant tankam ‘vinchun kaddloleam’ sangata ektthaim korchimnant. (Mt. 24:31) Punn Jezun dilʼli hi xittkaunni prithumer jieuncho bhorvonso asa tankam pasun lagu zata. Tor tannim sogleamnim chotur ani visvaxi ravonk zai.

17. Jehova amchea disamnim thoddea Kristanvank makhlolim mhunn vinchun kaddtta dekhun amkam usko korchi kiteak goroz na?

¹⁷ Ami Jehovachi bore toren vollokh ghetlea dekhun, to soglea vellar sarkem tench kortolo mhunn amkam tacher visvas asa. Thoddea Kristanvank Jehova halinchea disamnim makhlolim mhunn vinchun kaddtta. Punn hea vixim amkam usko korchi goroz na. c Hea vellar Jezun sangloli drakxanchea molleant kam korpi manaianchi vopar amchea ugddasak ieta. (Mt. 20:1-16) Sokallim fantear ailolea manaiank ani sanjechea sumar panchank ailolea manaiank ekuch pagar mellʼllo. Tech bhaxen khub vorsam poilim makhlolea Kristanvank, toxench halinchea disamnim makhlolea Kristanvank, tim visvaxi ravlear tankam sogleank sorgincho inam mellttolo.

JEZUN DILʼLEA XITTKAUNNEANK KAN DIAT

18-19. Jezun dilʼlea vopaream thaun amkam koslim lisanvam xikonk mellttat?

¹⁸ Atam meren ami kitem xiklim? Jea lokank hea prithumer sasnak jieuncho bhorvonso asa, tankam menddream ani bokddeam vixim aslolea vopari thaun ek mhotvachem lisanv xikonk melltta. Tem mhunnttlear, atam toxench vhodd sonkoxttachea vellar tannim Jehovak visvaxi ravonk zai. Tannim oxem kelear, Jezu fuddarak tankam ‘sasnachem jivit’ ditolo.—Mt. 25:46.

¹⁹ Toxench, ami Jezun dilʼlea anik don vopareancher dhean dilem, jea vorvim makhlolea Kristanvank xittkaunni melltta. Jezun dha ankvaream vixim dilʼlea voparint, panch xanneo asleo. Karonn novro ieum poriant taka ravonk tannim toiari kelʼli ani tim zagrut aslim. Punn tea dusrea panch murkh ankvareamnim toiari korunk nasli. Tor novro ailo tednam tannem tankam kazarachea jevnnak bhitor soronk diunk na. Tech bhaxen xevott ieunk kitlo-i vell lagom, ami pasun visvaxi ravonk toiar asonk zai mhunn kolltta. Toxench, Jezun talenta vixim dilʼlea voparint ami don visvaxi chakram vixim polloilem, zannim aplea dhonia pasot dobrad poixe zoddunk khub vavr kelo.  Oxem kelʼlean, tankam tanchea dhoniachi maniotai mellʼlli. Punn tea tisrea allxi chakrak dhonian nakarlo. Hantuntlean ami kitem xiktat? Xevott ieum poriant, ami Jehovachea sevent bizi ravonk zai. Nimannem ami polloilem ki makhlolea Kristanvank sorgincho inam mellonk Jezun ‘vhorom’ poriant, tannim chotur ravonk zai. Tim sorgar Jezu sangata ‘ektthaim zatolim’ tea vellak axeun ravleant. Armageddonachea zhuza uprant Menddreachea kazara vellar tim Jezuchim vhokol zatolim.—2 Tes. 2:1; Prok. 19:9.

20. Aplea xittkaunneank kan ditat tanchea pasot Jehova kitem kortolo?

²⁰ Jezu beginuch neai korunk ieuncho asa mhunn ami bhieunchi goroz na. Ami visvaxi ravlim zalear, amcho mogall sorgincho Bap amkam ‘munxachea xokte poros khub vorti xokti’ ditolo ani ti amkam “salvar zaunk ani munxachea Puta mukhar ubim ravonk” modot kortoli. (2 Kor. 4:7; Luk. 21:36) Tor amkam sorgar vo prithumer jieuncho bhorvonso asum, ami Jezun dilʼlea vopareamnim sanglolea xittkaunneank kan dilo zalear ami Jehovachem kalliz khuxal kortolim ani Jehova favo nasloli doia dakhoun amchim nanvam jivitachea ‘pustokar boroun’ dovortolo mhunn ami khatri dovrunk zata.—Dan. 12:1; Prok. 3:5.