“Aichea pillgen technology vatten, vidneana vatten, ani poixeam vatten, poilinchea pillge poros chodd udorgott zata ti polloilea . . . Tori astana, hich pillgi sonvsarachem rajkaronn, poixe ani vatavoronn purnn toren ibadd kortoli oxem dista.”—The Global Risks Report 2018, World Economic Forum.

ZAITEA XIKLOLEA LOKANK MUNXANCHEA ANI PRITHUMECHEA FUDDARA VIXIM USKO KITEAK ZALA? AMCHEA MUKHAR ASAT TEA THODDEA ODDCHONNEAM VIXIM CHINTAT.

• CYBERCRIME: The Australian newspaper oxem mhunntta, “Internet disan-dis oprad kortoleank ek oddʼddo koso zala. Hanga bhurgeank vaitt kortoleank, dusreank dhomkaitoleank ani computerachi mahiti hack kortoleank khub sompepomnim aplim vaitt kamam korunk sondhi melltta. Ekleachi mahiti chori korop ho oprad sonvsarant ekdom vaddot voita toslo oprad zaun asa. . . . Internet-ak lagon, lokank apleo vaitt itsa doia nastana ani ekdom krur toren purnn korunk sondhi melltta.”

• GORIB ANI GIRESTAM MODEM ONTOR VADDOT VOITA: Oxfam International ripotta pormonnem sonvsarantlea ordhea lokam lagim jitlo poiso asa, titlo poiso sonvsarantlea atth sogleant girest lokam kodden asa. Tea ripottant, fuddem oxem-i mhunnttlam: “Hea poristhitik lagon girest lok disan-dis girest zait voita ani gorib lok anikui gorib zata, ani tantunt choddxim bailam asat.” Hea ontorak lagon thoddea lokam modem zhogddim pasun zaunk xokta oxem thoddeank dista.

• ZHOGDDIM-ZHUZAM: United Nations Refugee Agency-chea (2018) ripottant oxem sanglam: “Poilim poros chodd aiz lokank aplem ghor-dar soddun pollon voichem poddtta.” Zhogddim-zhuzak lagon 6,80,00,000 poros chodd lok aplem soglem soddun pollon geleant. Ho ripott fuddem oxem-i sangta: “Dor eka minttak, 30 lokank aplem soglem soddun pollon voichem poddtta.”

• VATAVORNNAK DHOKO: The Global Risks Report 2018 sangta: “Zaitim suknnim, zonvaram ani veg-vegllim zhaddam kabar zait asat.” Tantunt oxem-i sanglam: “Vareant ani doriant vaddtta tea produxonnak lagon, munxache bholaikek dhoko zala.” Thoddea desamnim ful-pake ani musa sarke jiv khub fast kabar zait asat. He mus fulam-follam zaunk khub gorjeche dekhun vidneanik mhunnttat ki tancho nas zavop vattavoronak ek vhoddlo dhoko zaun asa. Toxench, doriantlea zhaddank pasun dhoko asa. Vidneanikam pormonnem, gelʼlea 30 vorsant doriantlim ordhim zhaddam kabar zaleant.

Hea sonvsarant surokxa haddunk ami goroz te bodlav korunk xoktat kai? Lokank xikxonn dilear hi oddchonn suttavi korunk zata oxem thoddeank dista. Tor, lokank kosle xikxonn divop gorjechem hem ami fuddlea lekhant polloitolim.