Iskolachea eka trip-ir gelʼle astana, thodde tornnatte chedde dusrea eka cheddeacher loingik otʼteacher kortat. He sogle bhurge Canada-ntlea eka borem nanv aslolea iskolant xiktale. Hea ghoddnne uprant Ottawa Citizen newspaper-ant, ripottor Leonard Stern-an oxem boroilem: “Bhurgim kitlim-i girest ghorantlim asum vo xikpant huxar asum vo kitlea-i borea iskolant xikom, tori astana tim vaitt kamam korunk pavtat.”

Toch ripottar fuddem boroita: “Bhurgeank bore dekhin vaddounk tankam kitem borem ani kitem vaitt tem xikovop gorjechem. Punn choddxeank hoch husko asta ki tanchea bhurgeank bore marks, borem kam ani zaite poixe zhoddunk mellche.”

Khorem mhunnttlear, iskolachem xikxonn gorjechem asa. Punn kitlem-i borem xikxonn aslear pasun eka munxak vaitt anvdde vo vaitt sonvoiancher tabo dovrunk tem modot korina. Tor, borim munxam zaunk amkam noitik xikxonn khoim mellttolem?

Bible eka arxea bhaxen asa, zo amcheo oskotkaieo ani unnemponnam spoxtt ritin dakhoita. (Jakob 1:23-25) Itlench nhoi, Bible amkam goroz te bodlav korunk ani osle gunn vaddounk modot korta, jea udexim ami dusream sangata xantin ani bore toren vagonk xoktat. He gunn mhunnttlear, boreponn, doiallai, pasiens, svotacher tabo dovorop ani mog. Mog “sogleank ekvottan dovorta” oxem Bible-ant sanglam. (Koloskarank 3:14) Mog itlo kiteak khas zaun asa? Bible hea vixim kitem sangta tem polloiat.

• “Mog pasiens dakhoita ani doia dakhoita. Mog nattkai korina, boddai marina, gorvan fulona, vaitt toren vagona, aploch faido polloina, ragan bhorona, aplea add kelʼlea chukincho hixob dovorna. To vaittponnak lagon khuxal zaina punn sotak lagon khuxal zata. Mog sogleo vostu sosun gheta, . . . soglea vostumnim thir ravta. Mog kednanch na zaunchona.”—1 Korintkarank 13:4-8.

• “Mog aplea xezareak vaitt korina.”—Romkarank 13:10.

• “Sogleant mhotvachem mhunnttlear, eka-mekacho kallzant thaun mog korat. Karonn mog zaitim patkam dhampta.”—1 Pedru 4:8.

Amcho khub mog kortat toslea lokam modem ami astat tednam amkam koxem bhogta? Amkam koslich bhirant vo uske asonant, karonn tim sodanch amchem borem chintʼtat ani kednanch amkam mudʼdom vaitt korchimnant mhunn amkam khatri asta.

Dusream pasot mog aslear ami tanchea pasot -goroz te bodlav ani teag korunk pasun toiar astolim. Eklea dadlean oxench kelem. Taka 50 vorsam thaun sigrett voddchi sonvoi asli. Tache dhuvek put zolmota tednam, to tachea sangata vell sarunk sodhtalo. Punn tachea dhuvechea ghovak tannem bhurgea sangata vell sarlolo naka aslo. Karonn toxem kelear bhurgeak tem mal poddttolem. Tor, tea dadlean kitem kelem? Tannem sigrett voddop soddun dilem. Khorench, mogak khub xokti asa.

Mog ho gunn koso dakhounk zai tem ami xikchem poddtta. Avoi-bapain aplea bhurgeank dusreancho mog korunk xikounchi goroz asa. Bore avoi-bapui  aplea bhurgeancheo jevnna-khannacheo gorzo purnn kortat, tanchi rakhonn kortat ani tim duent poddttat vo tankam mar lagta tednam, tanchi kallji ghetat. Tim tanchea lagim ulounk vell kaddttat ani tankam bori dekh ditat. Toxench, tim chuktat tednam tankam kitem borem ani kitem vaitt tem xikoun tankam nittaier haddttat. Toxench, borim avoi-bapui aplea bhurgeam pasot ek borem udharonn dovortat.

Punn dukhachem mhunnttlear, thoddim avoi-bapui apli zobabdari pallunk chukleant. Tor tanchim bhurgim kednanch borim munxam zaunk pavchimnant kai? Na. Toxem nhoi. Zaitim bhurgim vhodd zaun apleam jivit sudharunk pavleant. Hantunt oslim-i munxam asat zankam avoi-bapain mog dakhounk na ani bori dekh diunk na. Tori astana, tim borim munxam zaunk pavleant. Tea bhair, oslim-i munxam asat jim kednanch sudhorchimnant oxem distalem. Punn tannim pasun aplea jivitant bodol kela. Hea vixim ami fuddlea lekhant polloitolim.