Bible-achi xikounn lokanchem jivit sudharunk xokta. Hachim don udharonnam: Ricardo ani Andres.

RICARDO: 15 vorsancho astana, hanv eka gang-ant bhitor sorlom. Mhaka mhojea novea ixttancho sangat khub avddonk laglo. Mhaka koxe-i bhaxen 10 vorsam khatir jail-int vochonk zai aslem! Hem aikon tumkam ojap distolem. Punn amchea vattarant oslea lokank khub man asa. Dekhun hanv-ui jail-int vochonk sodhtalom.

Gang-antle lok jem kitem kortale, tem soglem hanvem kelem. Zoxem, drugs ghevop, onoitik kuddicho sombond dovorop ani hinvsa korop. Eke ratik gang-a sangata firing kortana, aiz mhozo jiv voitolo oxem mhaka dislem. Punn hanv vanchlom. Tea uprant, hem hanv koslem jivit jietam ani mhaka mhojea jivitant khorench kitem zai, mhunn hanv chintunk laglom. Ani hanv mhojem jivit bodoltolom mhunn hanvem nirnnoi ghetlo. Punn tem hanv koso kortolom? Mhaka konn modot kortolo?

Amchim choddxim soirim khuxal naslim. Tanchea jivitant zaite tras vo oddchonneo asleo. Punn mhojea eka mamachi famil khub khuxal asli. Tim khub borim munxam aslim. Tim aplem jivit Bible-a pormonnem jietalim. Ek pavtt tannim mhaka Devachem nanv Jehova mhunn sanglem. Dekhun tea firing-a uprant hanvem Jehovachem nanv gheun, mhaka modot kor mhunn magnnem kelem. Ani dusreach disa, Jehovacho ek sakxi mhojea ghora ailo, hem polloun hanv khub ojap zalom. Tannem mhaka Bible xikoilo.

Beginuch mhaka eka vhoddlea oddchonnecho fuddo korcho poddlo. Mhoje poilinche ixtt mhaka porot-porot tanchea borabor bhonvonk ieo mhunn sangtale. Ani tankam na mhunnop khub kotthin aslem. Punn hanv Bible xikot ravtolom mhunn hanvem ghott nichov kelʼlo. Ani hanvem ho nirnnoi kelo mhunn hanv khuxal. Mhojem purnn jivit bodolʼlem ani mhaka khori khuxalkai mellʼlli.

Gang-antlea lokam koddlean man melloun gheunk, dha vorsam khatir mhaka jail-int vochonk zai mhunn hanvem Deva lagim maglolem tem mhaka ugddas asa. Punn atam mhaka unneant-unnem dha vorsam khatir mhozo choddso vell Devachea sevent ghalunk zai aslo. Devan mhojem magnnem aikolem ani 17 vorsam thaun hanv oxem korit asam. Ani hanv tumkam hem-ui sangonk sodhtam ki mhaka jail-int vochonk poddonk na.

Mhoje choddxe poilinche ixtt zaitea vorsam thaun jail-int asat. Ani thodde moron pasun gele. Hanv fattim vollon polloitam tednam mhaka mhojea soireancho upkar attouncho-so dista. Bible-achea totvam pormonnem jieunk ani sonvsara thaun vegllim ravonk tannim khub vavr kelo, dekhun tanchea pasot mhozo resped vaddlo. Itlo resped hanv mhojea gang-antlea khoincheach munxak dinaslom. Punn sogleam poros chodd hanv Jehovacho upkari, karonn tannem mhaka jivitachi ekdom bori vatt dakhoili.

 ANDRES: Hanv eka gorib vattarant vaddlom, zoim drugs ghevop, luttop, khun korop ani xindollki oslim vaitt kamam choltalim. Mhozo bapui khub soro pietalo ani drugs ghetalo. To ani mhoji avoi sodanch zhogoddttalim. Tim eka-mekak gallio sovtalim ani martalim.

Bhurgeponnar thaunuch hanv soro pivonk ani drugs gheunk laglom. Mhozo choddso vell hanv rostear sartalom, hanv chorio kortalom, ani chorleat teo vostu viktalom. Hanv vhodd zalom tednam, mhojea bapain mhojea lagim ixttagott korunk mhaka chukicheo vostu xikoileo. Zoxem, drugs ani desant haddunk zainant teo vostu desant koxeo haddcheo ani vikcheo tem xikoilem. Taka lagon, hanvem thoddeach vellan bhorpur poixe zhoddle. Punn ek dis, pulisamnim ghora ieun mhaka arrest kelo ani hanvem eka munxacho khun korunk proitn kelo dekhun, mhaka 5 vorsanchi jail favo zali.

Ek dis sokallim, hanvem loudspeaker-acher ek suchounni aikoli. Tantunt sanglem ki Jehovache Sakxi koideam lagim Bible-a vixim uloitole. Hanvem thoim vochonk tharailem. Hanvem thoim jem kitem aikolem, tem mhaka sarkem dislem. Dekhun hanv sakxeam lagim Bible xikonk laglom. Mhaka vaitt disot mhunn chintun, Devachea unch dorjeam vixim xikounk te kednanch fatti soronk nant.

Mhojea jivitant bodol korunk, mhaka Devacho adar zai mhunn mhaka rokddench kollon ailem, karonn hanv jem kortalom tem thoddea koideank avoddnaslem ani te mhaka dhomkaunk lagle. Tor mhaka xokti ani zannvai di mhunn hanvem magnnem kelem. Ani Jehovan mhaka modot keli. Mhaka khub dhir mellʼllo ani tea pasot hanvem Bible xikpachem soddun diunk na. Titlench nhoi, hanv dusrea koideank pasun Bible-a vixim sangonk laglo.

Suttkecho vell lagim ailo tednam mhaka bhair vochonk bhirant disonk lagli. Karonn mhaka jail-int ravpachi sonvoi zalʼli. Hanv jail-intlean bhair sortalom tednam, zaite koidi mhaka pavounk aile. Thoddeamnim mhaka mhunnttlem, “Boro korun voch, dhakttea guruji.”

Devan mhaka tachea vixim xikpachi sondhi diunk nasli zalear, mhojea jivitachem kitem zata aslem tem chintun mhojea angar kantto ubo zata. Hanv Devacho khub-khub upkari, karonn to mhozo khub mog korta ani hanv kainch upeogacho na mhunn chintun tannem mhaka soddun diunk na. a