United Nations “sonvsarantlea soglea lokank urba dita” ki tannim sogleamnim ekamekak sohokar diuncho. Dusreanchea odhikarak man diuncho, ani vatavoronnachi kallji gheunchi. UN Chronicle hea masikent, Maher Nasser hannem, United Nations hi urba kiteak dita tem sanglem. Tannem mhunnttlem: “Sonvsarbhor havaman bodlot voita, oprad, bhed-bhav, ani zhuzam vaddot voitat. Khub lokank aplo des soddun dusrea desant pollon voichem poddtta. Atonkvadd ani rokddinch posortat toslim duensam-i vaddot voitat.”

Akʼkhea sonvsarant, ekuch sorkar ascho oso thoddeancho vichar aslo. Hea lokam modem, Italy-ntlo totvgineani, kovi ani rajki fuddari Dante (1265-1321) ani vidneanik Albert Einstein (1879-1955) asle. “Jea meren dor eka desak aplo sorkar asa, ani raxttram modem futt asa, tea meren sonvsarant xanti ieunk xokona” oxem Dante mhunnttalo. Tannem, Jezu Kristachea utrancho ulʼlekh korun oxem mhunnttlem: “Jea rajeant futt poddtta tem nas zatolem.”—Lukas 11:17.

Dusrea Vixv-zhuzant, don atom bomb uzar kele. Thoddea vella uprant, Albert Einstein-an, United Nations-achea, General Assembly-k, newspaper-acher oxi chitt boroili: “United Nations-an, akʼkhea sonvsarant surokxa haddunk, zata titlea begin panvlam gheunk zai. Ani oxem korunk tannim akʼkhea sonvsarant ekuch sorkar haddunk buniad ghalunk zai.”

Punn akʼkhea sonvsarant ekuch sorkar aslear pasun to sorkar choloupi munis promannik astole, porjechecher otʼteacher korchenant ani bore toren raj kortole mhunn gerentti asa kai? Te pasun vaitt rajki fuddaream bhaxen zaunche nant kai? Inglez itihaskar Lord Acton-an, mhunttlolem: “Podvi munxak broxtt korta, zachea lagim jitli vhoddli podvi asta, to titloch chodd broxtt zata.”

Akʼkhea sonvsarant ekvottkai astoli tednanch sonvsarant xanti ietoli tem khorem, punn tem koxem zatolem? Sogle lok ekvottan ravtole mhunn ami opekxa dovrunk zata kai? Hoi. Oxem zatolench mhunn Bible sangta. Punn ho ekvott munis haddunk xokona. Sonvsarantle sogle rajki fuddari mellon ekuch sorkar sthapon kelear pasun ekvott ieuncho na. Karonn, te broxtt zaunk xoktat. Punn sonvsarbhor ekvott fokot Devachoch sorkar haddttolo mhunn Bible sangta. Devak sonvsaracher raj korunk odhikar asa. Taka lagon, toch raj choloitolo ani tachea sorkarak Bible-ant, ‘Devachem Raj’ mhunnttlam.—Lukas 4:43.

Jezu Kristan, Devacho Sorkar ieum mhunn Deva koddem oxem magnnem kelem: “Tujem Raj ieum. Tuji khuxi . . . sonvsarant zaum.” (Matev 6:9, 10) Ho sorkar Devachi khuxi purnn kortolo, svarthi munxanchi nhoi, zankam fokot apli podvi samballpachi chintʼta asta.

Devachea Rajeak “sorginchem Raj” pasun mhunnttlam. (Matev 5:3) Oxem kiteak? Karonn Devacho Sorkar, prithumer thaun nhoi punn sorgar thaun raj choloitolo. Taka lagon, hea sorkarak tenko diunk lokamnim poixeancho adar diunchi goroz poddchina. Tor, tea rajea khala lok kitle somadhanan jietole tea vixim chintat!

Jezu Krist, hea Rajeacho raza zatolo, karonn Devan taka Raza mhunn nemla. Jezu vixim Bible mhunntta:

• “Tachea khandar odhikar ghalʼlo asa . . . Tachi razvottki soglleak pavtoli, ani tache xantik mitmer aschi na” —(Izaias 9 :5, 6)

•   “Taka dilo odhikar, obhiman ani raiponn; ani Tache sevek lagleo soglleo porza, sogllim raxtram ani sorv bhasancho lok. Tacho razodhikar . . . kednanch sompcho na.” —Daniel 7:14.

• “Sonvsarachem raj atam amchea Dhoniachem [Devachem] ani tachea Kristachem zalem.”—Prokasovnni 11:15.

Jezun zoxem magnnem kelʼlem toxench zatolem. Hea prithumer Dev aplem raj choloitana to apli khuxi purnn kortolo ani tache razvottke khala lok prithumecho boro samball kortole, jea udexim prithumek ani tacher aslolea jiv-jontuk kainch luksonn zaunchem na.

Sogleant mhotvachem mhunnttlear, Devachea Rajeant lokank borem xikxonn mellttolem. Dev sogleank ekuch toreche dorje xikoitolo. Lokam modem futt aschina. Bible sangta: “Konnuch vaitt korcho na vo dusream konnakuch nuksann haddcho na. Doria zoso udkan bhorlolo asa, toso Sorvesporache vollkhin sogllo des upott bhoron ietolo.” —Izaias 11:9

United Nations, jem korunk xokona tem Devachem Raj purnn kortolem. Akʼkhe prithumer lok ekvottan ani xantin jietole. Bible mhunntta: “Sogllech vatten tankam xantin jieunk mellttolem.” (Stotr 37:11) Hea vellar “oprad,” “produxonn,” “goribi” ani “zhuzam” him utram amkam kednanch aikonk mellchina. Punn hem soglem kednam zatolem? Dev aplo sorkar hea prithumer kednam haddttolo? Ani hea sorkara khala jieunk ami kitem korunk zai? Hea vixim atam ami polloum-ia.