Ami Deva Vixim Zannam Zaun Tachea Lagim Ixttagot Koxi Korunk Zata?
Povitr Pustok dakhoita ki Devak zaite bore gunn asat. Ani hea gunnam vixim ami zannam zaun tachea lagim sorlolim Devak zai. (Juanv 17:3; Jakob 4:8) Atam ami tachea vixim zannam zaum-ia.
Devak Ek Nanv Asa
“Somest lokamno, Devak vakhannat! Sorvoi porzamno, Yahvek navaddat.”—STOTR 117:1.
Rochnnar Dev ekuch asa mhunn Povitr Pustok sangta. Tachem nanv Yahve vo Jehova. Tannench sorg, sonvsar ani tantunt asa titlem-i rochlam. Taka lagon, ami fokot tachich bhokti korunk zai oxem Povitr Pustok sangta.—Prokasovnni 4:11.
Jehova Ek Mogall Dev Zaun Asa
“Dev mhollear Moguch!”—1 JUANV 4:8.
Devak zaite bore gunn asat. Tacho khas gunn mhunnttlear mog zaun asa ani to amkam Bible-a udexim ani tachea rochnnem udexim dison ieta. Jitlim ami tachea vixim xiktolim, titlinch ami tacho mog korunk pavtolim.
Jehova Bhogxita Toslo Dev Zaun Asa
“Tum bhogxita toslo Dev.”—NEHEMIAS 9:17.
Amchea lagim chuki ghoddttat mhunn Jehova zannam. Tea pasot, to amkam bhogsunk sodanch toiar asta. Amchea chuki pasot poschatap korun ami Deva lagim bhogsonnem magonk zai ani ti chuk porot korchim nant mhunn ami ghott nichov korunk zai. Oxem kelear, Jehova amkam bhogxitolo ani tea chuki pasot to amkam xikxa diuncho na.—Stotr 103:12, 13.
Jehovak Ami Tache Lagim Magnnem kelʼlem Zai
“Khorea monan ulo martat tankam, Sorvespor sodam laginch asa . . . tanchi bob aikota.”—STOTR 145:18, 19.
Jehovak ami tache lagim magnnem kelʼlem zai. Zoxim mogall avoi-bapui aplea bhurgeanchem dhean diun aikotat, tosoch amcho mogall Bapui Jehova amchim magnnim dhean diun aikota. Tache lagim magnnem kortana ami riti-rivazo, fottu vo imajeo uzar kelʼleo taka naka.
