Khoreponinch hi Ek Bibliachi Xinkoun Gai?

ZOR Trinidad khori, ti ugtteponni ani thirsanen Bibliant mukar soroileli uronk zai. Kiteak? Karan, apostlani khonditkaen sanglam, Biblia vortouta mun Devachem utor jea vorvim Dev apleakuch ugddapo korta munxeakullak. Ani zednam amkam goroz Devak volkunk Tachi favo te porim bogti korchea khatir, Dev kon to amkam kollit korunk Biblia ugto uronk zai.

Poilea xeckdeachea bavarteanim Povitr Pustok Devan ugddapem kelolem ani khorem utor mun mandun ghetlem. Hich vortouli tanche pattiennechi bunniad ani xevtacho adikar. Udaharenenk, apostle Paulan Beroea gaumchea lokak bori khobor porgottli tedna, “thoimchea lokan Devachem utor vodde urben ghetlem, tem khorem zalear polleunk te dispottim vodd barkaen povitr pustokachi topasnni kortale.”—Acts 17:10, 11.

Tea vellar Devachea mukhi munxeanim aplo adikar kitem mun vapurlo zait? Acts 17:2, 3 ant amkam sangta: “Aple sodamche sonvoiem pormonnem Paulun . . . xastra voir basabas keli ani somzoni diun xastrantlean iskuttaun dakoilem.”

Jesun passun xastrantlim utram aplea xinkoupachi bunniad oxi vapurlelem udaharan amkam dovorlam bogor bogor munon: “Boroilelem assa.” “Aple passot jeo vostu Povitr Pustokan boroileleo assat titleoi tane tankam vivarun sangleot.”—Matthew 4:4, 7; Luke 24:27.

Oxem, Jesun, Paulun ani poilea xekdeantlea bavarteanim aplea xinkoupachi bunniad oxi Povitr Pustok vapurlem. Te zano aslet ki “Devache suchounen boroilelem pustok xikvon diunk, chuki kaddun dakounk, vostu nittaer addunk, niai-nittint vaddounk upkarta mun, Devacho munis utʼttom zaun kossoleai borea kamank purto zaumchea passot.”—2 Timothy 3:16, 17; heim polloi 1 Corinthians 4:6; 1 Thessalonians 2:13; 2 Peter 1:20, 21.

Zedna Biblia ‘vostu zaghear uddounk xeckta’ tintunt Trinidadichi xinkoun ji aiz passun khori mun sangtat, hiche vixim passun ugteponni dakoileli vollok assunkuch zai. Pun Devjnani (theologians) ani hitiasgar hi xinkoun khorit bibliachi ximkoun muntat gai?

“Trinidad” Bibliant?

EK Protestant publication munta: “Trinidad hem utor Bibliant mellona . . . Chouto xeckdo porian Igorjeche Devjnan-nant (Dev xinkounen) hika zago mellonk nam.” (The illustrated Bible Dictionary) Ani eok Catholic adikar munta ki Trinidad “sida ani teach fara Devachem utor . . . noi mun.”—New Catholic Encyclopedia.

The Catholic Encyclopedia passun vivek korta munon: “Povitr Pustokan aiz passun ekui mun mellonk nam ji dakoita tegui Devache zon ektaim assat mun. Utor τρίας [triʹas] (zachem latin baxeantor trinitas) hem poile paut meuta Antioch-cho Theophilus achea boroupant sumar A. D. 180 . . . Thoddeach kala uprant hem Latin baxeantor trinitas Tertullian achea boroupant meuta.”

Kiteim zaum, Tertullian Trinidad xinkoitalo mun dakounk hi ek ruzvat noi. The Catholic Work Trinitas—A Theological Encyclopedia of the Holy Trinity, chotraen kolloita ki Tertullianamchim  thoddim utram uprant erani vapurleam mun Trinidadichi xinkoun vornan korunk. Uprant ti xidkaita: “Vapurleleam utram vorvim dorvoddaen xevot dakoup sarkem noi, karan to tim utram Trinidadiche devjnannek (theology) lagu korina.”

Hebrew Xastrantli Govai

“TRINIDAD” hem utor Bibliant mellonk nam khorem, pun Trinidad hi xinkoun Bibliant khorit xinkoilea mun dakounk kitem tori kolpona assa zait? Udaharenenk, Hebrew xastr (“Adlo Korar”) kitem kolloita?

The Encyclopedia of Religion mandun gheta: “Aiche Devjnani, Hebrew Bibliant Trinidadichi xinkoun xinkoinam mun sangunk kobul zatat.” Ani New Catholic Encyclopedia ossent munta: “Pornea Korarant Trinidadichi xinkoun xinkoileli nam.

Tech porim, Jesuit Edmund Fortman, aplea bukan, The Triune God, mandun gheta: “Porno Korar . . . amkam tin dev je vortoutat Bap, Put ani spirisant anche vixim ugddapem korun ou adkoll dakoun passun kaimch kolloinam. . . . Konnunch povitr pustok boroinare, Devtokle khal [Trinidad] assa mun borounk passun dhubaulet mun sangunk aiz passun kainch govai nam. . . . “Pornea Korarant” passun Trinidadichea zona vixim kossoli tori vollok assa mun pollumkuch povitr boroinare kitem munonk sodtat tache bair vochop.”—Italics ours.

Hebrew boroupachi topasni kelear passun ossench ugddapem zata. Oxem bibliachea poilea 39 bukanim passun je vortoutat prerit Hebrew boroupacho khoro Canon antunt passun Trinidadi vixim kainch vollok mellona.

Greek Xastrantli Govai

BOREM tor, Kristaum Greek boroup (“Novo Korar”) Trinidadi vixim kitem tori uloita zait?

The Encyclopedia of Religion munta: “Devjnani passun Novea Korarant Trinidadiche xinkounechi kainch xask nam mun mandun ghetat.”

Jesuit Fortman munta: “Novo Korar boroupi . . . amkam Trinidadiche xinkounne vixim chalti legun vollok dakoinam ki eka Deva thaim tin ek sarke Dev zon assat mun . . . ekach Deva thaim tin vegle vegle devosponni jivit ani hal chall aslole zon assat munchem Trinidadichem xinkoup amkam fuinch mellona.”

The New Encyclopedia Britannica xidkaita: “Novea korarant Trinidad muncho sobd nam, nam mun tiche vixim kainch xinkoun mellona.”

A Short History of Christian Doctrine autunt Bernhard Lohse munta: “Novea Korarant polloilear passun ekleak legun Trinidadichi khori xinkoun mellona.”

The New International Dictionary of New Testament Theology ossench sangta: “Novea Korarant Trinidadichi fuddem soroileli xinkoun passun nam. ‘Bap, Put ani Sprisant eka soimbache munop passun Povitr Pustokant nam oxem’ [Protestant Devjnani Karl Barth munta].”

Yale University Professor E. Washburn Hopkins thirsan dita: “Jesuk ani Paulak passun Trinidadiche xinkounne vixim kainch vollok nasli; . . . Te hea vixim kainch ulloinant.”—Origin and Evolution of Religion.

Hitiasgar Arthur Weigall Kolloita: “Jesu Kristan passun ossoli xinkoun kednanch kollounk nam, nam mun Novea Korarant ‘Trinidad’ ho sobd passun kuimch mellona. Amchea Somiachea mornamchea 300 vorsam uprant hi kolpona Igorzamnim apli korun ghetlea.”—The Paganism in our Christianity.

Oxe Hebrew boroupache 39 buk nam mun Kristaum Greek boroupache 27 prerit buk passun Trinidadiche xinkounnechem khorepon dinant.

Mullachea Kristavanim Xinkoilea Zait?

TRINIDADICHI xinkoun mull Kristavanim xinkoilea zait? Hitiasgarachem tossench Devjnaneamchem sangnem montint dorat:

“Kall sorta sortam Dhormu xinkounen fuddem soroileli Trinidadichi xinkoun mull Kristaumponant nasloli.”—The New International Dictionary of the New Testament Theology.

“Suruvatechea Kristavanim Trinidadichi Kolpona tanchea bavartak lagu korchi mun chintunk nam. Tani aplem devospon Dev Bapak ani Jesu Krist, Devachea Putak bettoilem ani te . . . povitr atmeank volkole; pun he tegui ek khori Trinidad ek sarke ani eka mekak ekvottit zatat muchem chintop thoim naslem.”—The Paganism in our Christianity.

“Suruvatek Kristaum bavart Trinidadicho naslo . . . Novo Korar kolloita tea pormonne apostlamchea tempar ani tache uprant ani er suruvatechea Kristaum boroupant passun oxem xinkounk nam.”—Encyclopædia of Religion and Ethics.

“‘Tin zonna modem ek Dev’ hem goddoup, chouto xekddo kobar zaumchea adim poriant Kristaum jivitant ani tea bavartant thirponant istapit zaunk nam ani khorench purnponant mandun gheunk nam.. . . Apostolic voddilam modem passun ossoli somzoni poixilean eumchea tosolem kitench naslem.”—New Catholic Encyclopedia.

 Ante—Nicene Voddilani Kitem xinkoilem

KRISTACHEA zolma uprant poileach xeckddeanni Ante-Nicene voddilank dhormache khore voddil mun mandun ghetlet. Zem kitem tani xinkoilem tem amkam chodd adavachem.

Justin Martyr, zo sumar 165 C. E. ontorlo, hanen mullam ki Jesu munxeachea soimban eumchea poilo eok rochlolo anje zo vortoulo “Deva kin veglo zanen sogleo vostu rochleat.” Tanen muntlam ki Jesu Deva kin khalto ani “tane kitench kelemnam bogor jem kitem tachea Rochnaran . . . tane korunk zai muntlem titlench.”

Irenaeus, zo sumar 200 C. E. ontorlo, hanen muntlam ki Jesu munxeachem soimb gheun eumchea poilo deva von veglo vortoulo ani tache von khalcho. Tanen dakoilem ki Jesu “Ekleach khorea Devak” sor noi mun, zo “vortouta sorvpodvedar soglea vostum voir, ani tache von vodd kon nam.”

Alexandria cho Clement, zo sumar 215 C. E. somplo, hanen, Jesu munxeachea soimban eumchea poilo “ek rochna” vortoulo muntlam pun Devak tane “rochne vin ani xevott naslolo ani ekloch khoro Dev” mullan. Tane muntlam ki Put “Sorvpodvedar Bapa uprantlo” pun to Taka sor noi.

Tertullian, zo 230 C.E. somplo, hanen passun Devachem vortepon xinkoilem. Tachi chotrai: “Bap puta von veglo (anink eok), zoso to vodd; zoso zolmank etolo zolmank addtelea von veglo urta; zo kon dadta, to dadlelea von veglo urta.” Tane anikui mullan: “Eok kall aslo, jea kallant Put naslot . . . Kiteach soglea vostum poilo, Dev ekloch aslo.”

Hippolytus, zo sumar 235 C. E. somplo, hanen muntlam ki Dev vortouta “ek Dev poilo ani ekloch, Rochnar ani Dhoni sogleamcho” “zaka tache borabor sor zatolo kon eok nam . . . pun to vortoulo ekloch aplech ostongui; zanen aple sotache khoxen rochleot vostu jeo poileo nasleot, zoso munxeachea soimban,” eumchea poilo Jesukui rochlolo.

Origen, zo sumar 250 C. E. ontorlo, hanen muntlam ki “Pai ani Put vortoutat dog zan . . . don vostu tamchea soimba pormonne,” ani ki “Bapaik sor korunk ghelear, [Put] vortouta eok supurlo uzvad so.”

Hitiasichea ruzvat ixeopa pormonne, Alvan Lamson The Church of the First Three Centuries vixim munta: “Atamchi chodd fankarleli Trinidadichi xinkoun . . . Justin [Martyr] ache baxe pormonne he xinkounnek kaim tenko dina: ani hi xidkauni ami Ante-Nicene voddilank passun laun gheum eta; mungue, soglea kristaum boroupeank, Jesu Kristachea zolma uprant tin xeckdde passun. Bapa vixim, Puta vixim ani sprisanta vixim te uloitat hem khorem, pun noi te ek sarke mun, noi eka soimbache, noi tegui mellun ek mun, atamche Trinidadik tenko dinare mandun ghetat tea pormonne. Portem poi tem vortouta khorem.”

Oxi, Bibliachi ani hitiasichi govai sarkem ugddapem korta ki Trinidadi vixim akhea Bibliachea kallar ani zaite xeckdde uprant passun he xinkounnechi vollok passun nasli mun.

[Blurb on page 7]

“Konnunch povitr boroinare Dev tokle modem Trinidad assa mun borounk passun dhubaulet mun sangunk kainch adar nam.”—The Triune God