Odheai 6

Devachem Raz Kitem Vortouta?

Devachem Raz khuinchea zaguiar asa? (1) Tacho Raza conn? (2)

Raza sangatak raz corunk dusre vanto ghetat cai? Toxem Zalear, te kitle asat? (3)

Kitem dacoita qui ami xevotachea disanim zientão munnon? (4)

Munxa cullak lagon fudarak Devachem Raz kitem cortelem? (5-7)

1. Zednam to prithumicher aslolo, Jezun tachea patlaudarank Devachea Razak lagon magnnem corunk xincoilem. Êk Razvotki zavun asa êk razan mostokponn cholounchem serkar. Devachem Raz êk khas serkar asa. Tem sorgar stappon kela ani hea prithumicher razpatt choiloitelem. Tem Devachem não bhagevont vo povitr cortelem. Devachi khoxi sorgar zata toxi prithumicher zaunk tem karann zatolem.—Matev 6:9, 10.

2. Tachea Razvotkecho Raza Jezu zatolo munnon Devan bhas dila. (Lukas 1:30-33) Zednam Jezu prithumicher aslolo, tannem xiddh kelem qui to vortoutolo munnon êk doyall, nyayi, ani paripurnn Raza. Zednam to sorgak portolo, tednanch taka Dev Razvotkecho Raza munnon xivasonnar bosovunk nam. (Hebrevank 10:12, 13) 1914 salant, Jehovan Jezuk odhikar dilo zo tannem taka bhasailolo. Thuim thaun, Jehovacho nemlolo Raza munnon Jezu sorgar raz choloita.—Daniel 7:13, 14.

3. Jehovan prithumi thaun thode visvaxi dadle ani ostureank sorgar vochonk vinchun cadleat. Tim Jezu sangatak raza, yazak, ani saserdoth munnon munxacullacher razcarbar choloitolim. (Lukas 22:28-30; Prokasnni 5:9, 10) Tachea Razvotkentulea hea sangat razank Jezun ‘supullo hind’ mutla. Tancho ankhdo zavun asa 144,000.—Lukas 12:32; Prokasnni 14:1-3.

4. Jezu Raza zalo tednanch tannem Soitanank ani tachea khottea ainjank sorgachea bhair ani sokla prithumichea avatant xevtile. Teach passot 1914 thaun prithumicher itleo vostu vaxtt zaleo. (Prokasnni 12:9, 12) Zuzam, ducou, pidda, vadto odhorm—soglim êk “khunn” hacho bhag asa ji suchoita qui  Jezu rajpat choloita ani hi mandavoll tichea xevotachea disant asa.—Matev 24:3, 7, 8, 12; Lukas 21:10, 11; 2 Timotak 3:1-5.

5. Gouli koso mendhream thaun bokde veglle corta, tosoch veglle corun begginunch Jezu lokachi neet cortolo. ‘Mendhre’ te zavn asat zannim apnnank patienneche porza munnon xabit kela. Tankam prithumir sasnnanchi jeenn mevteli. ‘Bokde’ te zaun asat zannim Devachi Razvotki nakarla. (Matev 25:31-34, 46) Laginchea fudarant, Jezu bokdea baxen aslolea sogleank nisontonn cortolo. (2 Tesalonikkarank 1:6-9) Zor tuca Jezuche ‘mendhre’ hantutlo eklo zavunk zai, tor tuvem Razvotkechi khobor aikunk zai ani zem tum xinctai tem cortubant hadunk zai.—Matev 24:14.

6. Atam Prithumi zaitea desant vibhagit zalea. Dor êkak aplem sotachem serkar asa. Tim rastram bogor bogor ekamekaxim zuztat. Punn Devachi Razvotki soglea munxachea serkarank caddun vodoitoli. Ti akhea prithumicher êkuch serkar coxi razpat choloitoli. (Daniel 2:44) Tea uprant thuim zuz, crim ani maramari bilkul aschenant. Soglo lok sovoskaen ani ekvottan jientolo.—Mikeias 4:3, 4.

7. Jezuchea hozar vorsanchea razpatant, visvaxi munis paripurnn zatole, ani akhi prithumi êk bhuinkut zatoli. Hozar vorsanchea xevotak, taka Devan corunk sanglolem soglem Jezun kelʼlem astolem. Uprant to tachea bapaik Razvotki porot ditolo. (1 Korintkarank 15:24) Devachi Razvotki kitem corteli tea vixant kiteak tujea ixttank ani mogacheank sangonai?

[Pan 13-acher chitr polloiat]

Jezuchea razpata sokla, dusvas vo kurnatkai anink aschi nam