Ho Sounsar Vanchun Urtolo Cai?

Dusrea Kuinchach pidʼdien sounsarachea xevotta vixim itlem ulvonnem aikunk nam. Zaite bhietat que sounsaracho xevott annu zuz sangramant zatolo munnon. Dusre chinttat ghodie produxann sounsarachem nissontonn cortelem munnon. Torui dusre khontint podleat que arthik gondoll munxa cullachea zomeank eka mekachea virodhak ghaltolo munnon.

Khoroch ho sounsar xevott zatolo cai? Zor tor toxem zalem zalear tacho orth kitem zatolo? Adim kednai punni eka sounsaracho xevott zalolo cai?

Ek Sounsar Xevott Pavlo—Dusrean Tacho Zago Ghetlo

Oi, eok sounsar xevott pavlolo. Niall corat Noeachea disanim sounsar zo bharim khotto zalolo. Bible sozmonni dita: “Ani tea kallachea sounsaracho udkachea budʼdten nax zalo.” Anikui Bible sangta: “[Devan] adlea sounsarak bogsunk nam, punn noxtea prithumicher poryallo dhadlo tednam focot promannik ponnachea porgottnarak, Noek ani, anink sat zannank taronn dilem.”—2 Pedru 2:5; 3:6.

Chintun polloiat tea sounsarachea xevottacho orth kitem zavun aslolo ani kitem zavun naslolo. Tacho orth munxa cullacho xevott oso zavun naslolo. Noe ani tachem cuttumbh jagatik budʼdte thavn vachun urlolem. Tosoch urlolo graha prithum ani sobit noketranchem ontroll. To aslolo “eok noxtea munxancho sounsar” zo noxt zalo, zavun asloli eka khottea vostunchi mandavoll.

Xekim Noechi sonsot chod zali, dusro sounsar vadlo. To dusro sounsar vo vostunchi mandavoll, xegit amchea disam poriyant urla. Ticho itihas zuzam, kirm, ani modfod hanni bhorla. Hea sounsarak kitem ghodtelem? To vanchun urtolo cai?

 Hea Sounsaracho Fuddar

Noechea disa sounsaran nax bhoglo, hem sanglea uprant Bibliacho khulaso fuddem sangta: “Punn teach utran atancho sorg ani sounsar ujean lasun uddovunk dovorleat.” (2 Pedru 3:7) Khorench, zoxem dusrea Bible boroinnaran suttavem kelem: “Sounsar [zo aiz asa to] nanch zatolo.”—1 Juanv 2:17.

Bibliacho orth oso noim que ossol bhuim vo noketranchem ontroll nanch zatolim, zoxim tim Noechea disa passun nam zavunk nant. (Stotram 104:5) Khorem munche ho sounsar, tachea sangatak, “Sorg,” vo Soitanachea dobava tolla serkari raza ani tancho “sounsar,” vo munxancho somaz, nax zatolo zoxe porim ujean. (Juanv 14:30; 2 Korintkarank 4:4) Zitlea khatren budʼdtechea adlo sounsar nax zalolo, titleach khatren ho sounsar vo vostunchi mandavoll nax zatoli. Jesu Christan poriyant “Noechea disanchea” poristiti vixim uloila zoxi eok daconn kitem ghodtelem hea sounsarak xevott eunchea matxem adim.—Matev 24:37-39.

Khunnechi suchounni zednam Jesu uloilo Noechea disak lagon, to aslolo eok porthipall tachea apostolanchea sovalak: “Hem kednam ghodtelem tem, ani tujea ienneachi ani sounsarachea xevottachi khunn conn ti amcam sang?” (Matev 24:3, King James Version) Jesuche patlavdar zannam aslole que ho sounsar nax zatolo munnon. Hea dacounnechi tankam bhirant disli cai?

Hachea virodhak, zednam Jesun sounsarachea xevottachea adim ghodtelea ghodneanchem vornnon kelem, tednam tannem tankam sontos pavonk urba dili ‘carann tanchi sutka lagim pavleli.’ (Lukas 21:28) Oi, sutka Soitan ani tachea vostunchea noxttea mandavolli thaun eka sounsarachea novea mandavollint!—2 Pedru 3:13.

Punn kednam hea sounsaracho xevott zatolo? Kitem “Khunn” Jesun dili tachea ‘einneank, ani sounsarachea xevottak’?

 “Khunn”

Hanga bhaxantor kelolo Greek sobd “einnem” munche pa·rou·siʹa, ani tacho orth “hazir” munche khoreponni thuim asop. Tea passot zednam “khunn” disti podli, tacho orth oso nuim que Christ rokdoch eupak, punn to ailo passun ani hazir asa. Tacho orth oso que tannem raz cholloupak survat keli dixti podonam toxi, sorgincho raza zaun ani to veginch tachea dusmanacho xevott cortolo.—Prokasnni 12:7-12; Stotram 110:1, 2.

“Khunn” munnon Jesun focot ekuch ghodnni divunk nam. Tannem zaiteo sounsarik ghodneo ani poristiteo vornnon keleat. Teo sogleo ghoddon eitolea, tea teompak Bible boroinnaranim mutla “Xevottache dis.” (2 Timotak 3:1-5; 2 Pedru 3:3, 4) “Xevottachea disanchi” khunn munnon Jesun bhakit keloleo thodeo vostu niall corat.

“Des desancher, raj rajeancher uprastelim.” (Matev 24:7) Hallinchea teopar zuz vod akarachem zala titlem adlea kallar kednanch zavunk naslelem. Eka itihaskaran nondh kelea: “Poilem sounsarik maha zuz [survat zalem 1914] zavun aslolem ‘sompurnn’ zuz.” Torui astana dusrem sounsarik maha zuz chodant chod vidwas corpi zalem. Ani zuz sounsaracho vidwas corituch assa. Oi, Jesuchim utram ojapanchea ritin ghodon ailim!

“Zevonnam khannancho dukoll podtolo.” (Matev 24:7) Poilea sounsarik maha zuzacho patlav corun soglea itihasant ekade hodant hod zait toslo dukoll ailo. Dusrea sounsarik maha zuzak pasun patlav corun bhirancull dukoll ailo. Sounsarantulea lok vostechea panchvea vanteak chabuk marlolea bukecho porinnam corun, dor vorsak 14 million bhurgeank zivenxim marta. Khorench, “Zevonnam khannancho ducoll” podlo!

 “Hodantule hod bhuinkamp zatole.” (Lukas 21:11) Patlea xekdea poros soran sor, sumar dha vante chod mele dor vorsak bhuinkampant 1914 thaun. Hodantule thode motint dhorat: 1920, China, 200,000 moronn pavle; 1923, Japan, 99,300 abghatki moronn pavle; 1939, Turkey, 32,700 abghati mele; 1970, Peru, 66,800, moronn pavle, ani 1976, China, sumar 240,000 (vo thodeo batmi mandavolli pormonnem, 800,000) abghatki moronn pavle. Khorench, “Hodantule hod bhuinkamp”!

“Hanga-thoim voxachi pida eiteli.” (Lukas 21:11) Poilea sounsarik maha zuza uprant rokdoch, sumar 21 million lok melo, spenish zorient. Science Digest ahawal: “Soglea itihasant itli kodok, tatkall, moronn bhett nasloli.” Tea uprant kalzachi pida, kankr, AIDS, ani zaitea dusrea santhichea rogan xemboranim million marle.

“Khotteponnachi vadavoll.” (Matev 24:12) Amcho sounsar 1914 thaun kirm ani zulum hantuntlo eok munnon gomon aila. Zaitea suvatancher disachem poriyant golʼlen conacuch bindhast disona. Ratcho lok aplea gharant kullop marlolea ani sankoll bosoilolea dara bhitor ravtat, bhair soronk bhietat.

Xevotachea disanim zaiteo dusreo vostu ghodpak bhakleat, ani tantuntleo sogleo ghoddot asat. Hem munche sounsaracho xevott lagim asa. Punn, sontosan thuim vanchun urlole astole.  “Sounsar nam zavn vetolo” hem sanglea uprant Bible bhass dita: “Zo conn Devachi khoxi cortolo to sasnank urtolo.”—1 Juanv 2:17.

Tea pasot Devachi khoxi xinconk ani ti corunk amcam goroz asa. Tea uprant ami hea sounsarachea xevotantulean vanchun uronk eita, Devachim novea sounsarachim bessanvam sasnank bhogunk. Bible bhass dita que tea tempar “Dev . . . [lokachea] dolleantulim soglim dukam pustolo, moronn anink aschem nam, khont, rodnem, dukh, anink aschim nant.”—Prokasnni 21:3, 4.

Zorui tori suchounni divunk nam zalear soglim Bible avatarannam New World Translation of the Holy Scriptures hantutlim asat.

[Picture Credit Line on Page 5]

Photvancho bhovman: Airplane: USAF photo. Child: WHO photo by W. Cutting. Earthquake: Y. Ishiyama, Hokkaido University, Japan.