1. Ami ainzam vixim kiteak zannam zaunk zai?

EKA munxak ami borim vollkhotolim zalear tachea ghorabea vixim zannam zavop gorjechem. Toxench, Jehova Devak ami borim vollkhotolim zalear, sorginchea ainzam vixim zannam zaunchi goroz asa. Bible-ant ainzank, ‘Devache Put’ mhunnttleat. (Job 38:7) Devan tankam kosli zobabdari dilea? Adlea kallar ainzamnim munxank kednam-i modot kelea? Ainz tumkam modot korunk xoktat kai? Ani kortat zalear, koxe toren?

2. Ainz konnem rochleat ani te kitle asat?

² Bible-ant ainzam vixim zaite pavtt sanglolem asa. Tanchea vixim chodd zannam zaunk ami Bible-ant polloum-ia. Ainzank konnem rochleant tem sangtana Koloskarank 1:16 mhunntta, “Sorgar prithver soglleo rochnna . . . Tachech [Jezu Krista] vorvim rochun aileat.” Tor, soglea ainzank Jehova Devan, aplo malgoddo put Jezu Krista udexim rochleant mhunn kollon ieta. Sogle mellon kitle ainz astole? * Kotteamnim ainz  asat, ani te sogle bollvont mhunn Bible dakhoita.—Stotr 103:20.

3. Ainzam vixim Job 38:4-7 kitem sangta?

³ Prithum rochli tednam ‘Devache put khuxalbhorit zaun Devak zoizoikar’ kortale mhunn Bible sangta. (Job 38:4-7) Tor munxank roch’chea adim, ani toxench prithum pasun roch’chea poilim, ainz asle. Hea versant, ainz khuxalbhorit zaun, sangatan, Devacho zoizoikar kortale mhunn sanglam. Hachea voilean, ainz khuxal toxench dukhi-i zaunk xoktat mhunn kollon ieta. Tea vellar, he sogle ainz ekvottan, Jehova Devachi seva kortale.

4. Munis koxe vavurtat hachi Devachea visvaxi ainzank porva asa mhunn amkam koxem kolltta?

⁴ Adanv ani Evek rochlim tednam thaun, munxam koxim vavurtolim hem Devache visvaxi ainz zannam zaunk sodhtale. Toxench, munxam pasot Devacho ud’dhex koso purnn zatolo hem-ui te zannam zaunk axetale. (Mhonn’nneo 8:30, 31; 1 Pedru 1:11, 12) Zoso sonvsar vaddot gelo, zaite lok Devachea sangnnea pormonnem cholona zale. Hem polloun visvaxi ainzank khub dukh zalem. Punn ek munis vaitt rosto soddun, Jehova Deva lagim portun ieta tednam, “Devache dut sontosbhorit” zatat. (Lukas 15:10) Devachi seva kortolea munxanchi tankam porva asa. Takach lagon Jehovan, zaitea pavtt aplea visvaxi sevokank adar ani ghottai diunk, dutank uzar keleat. (Hebrevank 1:7, 14 vachat.) Hea vixim, ami thoddim udharonnam polloum-ia.

5. Ainzamnim munxank koxi modot keli tachim udharonnam diat.

 ⁵ Sodom ani Gomorracho nas zauncho aslo tednam, don ainzamnim Lot ani tachea dhuvank, tea xarantlean bhair soronk modot keli. (Utpoti 19:15, 16) Ek pavtt, Daniel provadeak xinvanchea khonddint uddoilolo. Punn, ainzamnim taka salvar kelo. Tednam Danielan mhunnttlem, “Mhojea Devan Aplea dutak dhaddlo ani tannem xinvanchi dhaddam bond kelim.” (Daniel 6:22) Anik ek pavtt, eka ainzan apostl Pedruk bondkhonnintlo bhair kaddlo. (Itihas 12:6-11) Toxench, bautizma uprant Jezun Devachem kam suru korchea adim, ainzamnim ieun taka ghottai dili. (Marku 1:13) Ani Jezu morchea thoddea vella poilim, eka ainzan taka “dhir” dilo. (Lukas 22:43) Hea gorjechea vellar, Jezuk ainzam koddlean kitli ghottai mell’lli astoli nhoi!

6. (a) Devdut Devachea lokanchi aiz koxi rakhonn kortat? (b) Khoinchea prosnanche zobab ami polloitolim?

⁶ Aiz Devachea lokank, devdut disonant khore. Punn, Devache zaite bollvont ainz tachea lokank rakhonn ditat, chodd korun te amkam Deva thaun pois korunk xoktat toslea vostum thaun rakhtat. Bible sangta, “Sorvesporachi bhokti kortoleank Tacho dut veddho ghalun rakhta.” (Stotr 34:7) Amkam rakhonn kiteak zai? Karonn amkam vaitt korunk sodhtat tosle noxtte ainzui asat. He noxtte ainz konn zait? Te khoim thaun aileat? Ani te amkam koxe tras korunk xoktat? Hea vixim zannam zaunk, munxank rochlea uprant kitem ghoddlem tem ami polloum-ia.

7. Soitanan kitlea lokank Deva add vochonk fosoile?

⁷ Ami hea pustokachea odheai 3-ant xiklolea pormonnem, eka ainzak sonvsaracher raz cholounchi as zali ani to Devachea khuxe add gelo. Uprant hea ainzak Soitan ani Devchar mhunn nanv poddlem. (Prokasovnni 12:9) Evek naddlea tednam thaun sumar 1,600 vorsam porian, Soitanan zaitea lokank Devachea add vochonk fosoile. Thoddech munis Devak visvaxi ravle, zoxe Abel, Enoch ani Noah.—Hebrevank 11:4, 5, 7.

8. (a) Thodde ainz devchar koxe zale? (b) Buddttentlean salvar zaunk prithumer ailolea ainzank kitem korchem poddlem?

⁸ Noah-achea disamnim, dusre ainz Jehova Devachea khuxe add gele. Sorgar aplo zago soddun, tannim prithumer ieun munxam-sarki kudd ghetli. Tannim oxem kiteak kelem? Utpoti 6:2 mhunntta, “Devachea putamnim mon’xancheo dhuvo sobit-sundor asat teo polleleo ani tankam avoddleo ani tanche lagim te logn zale.” Punn tanchem vaitt kortub ani toxench munxam modem vaddtta tem vaittponn polloun Jehova vogich ravlo na. Tannem prithumer ek vhodd buddtti haddli, ani soglea vaitt munxancho nas kelo. Tea buddttent fokot Devache visvaxi lok salvar zale. (Utpoti 7:17, 23) Buddttentlean salvar zaunk, tea vaitt ainzank vo devcharank munxanchi kudd soddun sorgar porot voichem poddlem. Devache khuxe add vochon tannim Soitanak sangat dilo, ani taka lagon Soitan hea vaitt ainzancho prodhan mhunnche ‘devcharancho prodhan’ zalo.—Matev 9:34.

9. (a) Vaitt ainz sorgar gele tednam kitem zalem? (b) Vaitt ainzam vixim ami kitem zannam zatolim?

 ⁹ Vaitt ainz sorgar porot gele tednam, Devan tankam, aplea visvaxi ainzam modem zago diunk na. Soitanak kel’lea porim Devan tankam-i bhair ghatle. (2 Pedru 2:4) Atam te ainz, munxanchi kudd gheunk xokona, tori punn te lokank vaitt kamam korunk fosoitat. Khorem mhunnttlear, tanchea adaran Soitan ‘ak’khea sonvsarak fosoita’. (Prokasovnni 12:9; 1 Juanv 5:19) Tem koxem? He vaitt ainz lokank fosounk naddbudheo uzar kortat. (2 Korintkarank 2:11 vachat.) Te kosleo naddbudheo uzar kortat tem ami polloum-ia.

10. Ghaddiponn mhunnttlear kitem?

¹⁰ He vaitt ainz, lokank fosounk ghaddiponn uzar kortat. Ghaddiponn mhunnttlear bhut-vid’dea uzar korun vo ghaddiponn kortolea munxam udexim, devcharam lagim ulovop. Ghaddiponn kortoleancho Dev dves korta ani oslea vostum thaun pois ravonk sangta. (Galasiekarank 5:19-21) Nustekar, nustem dhorunk gori vapurta toxe he vaitt ainz ghaddiponn uzar korun munxank fasant ghaltat. Goriek lavunk nustekar, veg-veglleo vostu vapurtat toxench he vaitt ainz veg-veglleo vatto uzar korun lokank aplea tabeant kortat.

11. Fuddar zannam zaunk lok kitem kortat ani ami toxem kiteak korunk zaina?

¹¹ Ghaddiponn korchi ek vatt mhunnttlear fuddar parkhop. Lok fuddar zannam zaunk noketram polloitat, hat polloitat, thodde khas torechim karddam  vapurtat, thodde kanchechea gol harseant polloitat, ani toxench thodde sopnant disloleo khunna sodhtat. Zaitea zannank hem soglem korop vaitt nhoi oxem dista. Punn, fuddar parkhovpi ani vaitt ainz, sangata mellon asat. Udharonnak, eka cheddvacher devchar vo vaitt atmo aslo dekhun tem fuddar parkhunk xoktalem mhunn Itihas 16:16-18 sangta. Punn ho devchar bhair soron gelea uprant, tea cheddva lagim fuddar parkhunk zaina zalem.

12. Meloleam lagim ulovop kiteak chukichem?

¹² Vaitt ainz anik ek toren lokank fosoitat. Tem mhunnttlear, melolea munxachem dhong gheun. Zaitea lokank meloleam vixim chukichi somzonni asa. Melolim munxam apleak tras kortolim oxem tankam dista. Thodde pavtt, melolim tankam dixtti poddlim vo tannim tancho avaz aikolo oxem-i tim sangtat. Taka lagon, melolim khorench jivim asat, ani tankam tras vo modot korunk xokta mhunn tim somzotat. Punn hem khorem nhoi. Karonn vaitt ainz vo devchara kodden melolea munxacho avaz kaddunk zata. (1 Samuel 28:3-19) Melole munis kainch korunk xokona mhunn ami odheai 6-ant zannam zalim. (Stotr 30:9) Tor, konnui ‘melolea munxank apouncho’ proitn korta zalear to Devache khuxe add voita ani vaitt ainzanchea fasant poddtta. (Dusri Somurt 18:10, 11 vachat; Izaias 8:19) Vaitt ainzanchea hea fasak poddona zaunk chotur ravat.

13. Eka vellar vaitt ainzanchea bhirantin jietolea munxamnim kitem kelem?

¹³ Vaitt ainz lokank fosoitat, ani toxench bhivoitat.  Tancho “thoddoch kall” urla ani tea uprant te kainch korunk xokchenant mhunn Soitan ani tache sangati zannant. Takach lagon te poilim poros chodd ragixtt zaun lokank fosoitat. (Prokasovnni 12:13, 17) Tori astana, hozaramnim lok je eka vellar vaitt ainzanchea vo devcharanchea bhirantin jietale, te atam tanchea fasantlean bhair sorleat. Tem koxem? Ani atam ghaddiponn kortolea munxan, tanchea fasantlean bhair soronk kitem korunk zai?

14. Efez xarachea Kristanvam sarkim ami vaitt ainzanchea tabeantlim koxim bhair soronk xokta?

¹⁴ Vaitt ainzanchea tabeantlim bhair soronk, ani tancho virodh korunk kitem korunk zai tem Bible amkam dakhoita. Ami Efez xarantlea Kristanvanchem  udharonn polloum-ia. Tea xarant ravtole lok Kristanv zaunche adim ghaddiponn kortale. Punn uprant tea Kristanvamnim tem soddun dilem. Hem tannim koxem kelem? Bible sangta, “jadu kortolea modlea zaitea zannamnim aplim pustokam punzaun haddlim ani soglleam hujir tankam uzo lailo.” (Itihas 19:19) Him jadu korchim pustokam lasun, devcharanchea tabeantlim bhair soronk sodhtat tankam, hea Kristanvamnim ek borem udharonn dovorlem. Jehova Devachi bhokti korunk sodhtat tannim ghaddiponnacheo sogleo vosto nas korunk zai. Teo mhunnttlear, ghaddiponnacher adarit pustokam, pich’cheram, chitram vo gitam. Toxench, devchara thaun rakhonn mellonk, golleak vo hatant bandlolo doro-i nas korchi goroz asa.—1 Korintkarank 10:21.

15. Vaitt ainzam add zhuzonk amkam kiteachi goroz asa?

¹⁵ Efez xarachea Kristanvamnim jadu korchim pustokam laslea uprant thoddea vorsamnim, “khottea atmeam kodde amchem zhuz” chalu asa mhunn Apostl Paulun tankam boroilem. (Efezkarank 6:12) Vaitt ainzamnim tankam fasant uddounchem bond korunk naslem. Te tankam azunui aplea tabeant korunk sodhtale. Tor hea Kristanvamnim atam kitem korunk zai aslem? Paulu mhunntta, “Devcharache [Soitanache] soglle zollte bann tumchean palounk zaunche khatir, tumchea hatant sodam bhavarthacho ddhal dhorat.” (Efezkarank 6:16) Jitlo amcho bhavarth ghott astolo, titleach bollan ami vaitt ainzancho virodh korunk xoktolim.—Matev 17:20.

16. Ami amcho bhavarth koso ghott korunk zata?

 ¹⁶ Amcho bhavarth ghott korunk ami kitem korunk zata? Eka ghorachi vonnott ghott urtoli zalear tachi buniad ghott asonk zai. Toxench, amcho bhavarth ghott astolo zalear amkam Bible-ant boroilolem asa tachi sarki somzonni asop gorjechem. Amcho bhavarth ghott korunk, ami Bible sodanch vachunk zai ani tachi sarki somzonni gheunk zai. Ek ghott vonnott koxi, ho bhavarth amkam vaitt ainzam thaun rakhtolo.—1 Juanv 5:5.

17. Vaitt ainzancho virodh korunk ami anik kitem korop gorjechem?

¹⁷ Efez xarant aslolea Kristanvank anik kitem korchem poddlem? Tim ravtat tem xar devcharponn-ant buddlolem, taka lagon tankam vaitt ainzam thaun chodd rakhonn zai asli. Tea pasot, apostl Paulu tankam boroita, “Atmeachea preronna pormannem sogllea somoiar magnnem ani vinovnni korat.” (Efezkarank 6:18) Aiz ami-i devcharponnant buddlolea sonvsarant ravtat dekhun, Jehova lagim kallzant thaun magnnem korop gorjechem. Ani magnnem kortana ami Jehovachem nanv ghevop mhotvachem. (Mhonn’nneo 18:10 vachat.) Deva lagim ami, ‘Noxtteachea hantantlim amkam rakh’ mhunn magot ravonk zai. (Juanv 17:15) Ani Jehova amchem magnnem aikon amkam nivartolo.—Stotr 145:19.

18, 19. (a) Devcharam add zhuztana amkam zoit mellttolem mhunn ami kiteak khatri dovrunk zata? (b) Fuddlea odheai-ant amkam khoinchea prosnacho zobab mellttolo?

¹⁸ Vaitt ainz amkam tras korunk xoktat. Punn ami  Devachea khuxe pormonnem cholon tachea lagim sorlim zalear, devcharacho virodh korunk amkam sompem zatolem. Ami bhieunchi goroz na. (Jakob 4:7, 8 vachat.) Vaitt ainz amkam sodanch tras korunk xokonant. Noah-achea disamnim tankam khast favo zal’li, ani fuddarak tanchi zhoddtti zaunchi asa. (Judas 6) Ugddas dovrat, Jehovache visvaxi ainz amchi rakhonn kortole. (2 Raza 6:15-17) Devcharam add zhuztana ami zoitivont zal’le visvaxi ainzank zai, ani oxem korunk te amkam urba ditat. Tor ami, Jehovak ani tachea visvaxi ainzank lagim ravop gorjechem. Toxench, ami soglea torechea ghaddiponnacho virodh korun, sodanch Devachea utra pormonnem cholonk zai. (1 Pedru 5:6, 7; 2 Pedru 2:9) Ani tednam amkam devcharam add zhuzant zoit mellttolem.

¹⁹ Punn, vaitt ainzank lagon ani vaittponnak lagon sonvsarant ailole tras, Devan kiteak kabar korunk na? Hea prosnacho zobab ami fuddlea odheai-ant polloitolim.