1, 2. Bible ek moladik dennem oxem ami kiteak mhunnonk zata?

TUMCHEA ghott ixttan, tumkam ek bori-i vost diloli ugddas asa? Tea disa tumi kitlim khuxal zalim astolim! Khoincho-i ixtt kitem-i borem dita tednam, to tumchi ixttagot kitli moladik manta tem kollon ieta. Ani mogan dilolea tea denneak lagon, tumi tache khub upkari astat.

² Toxench Bible Devan dilolem ek dennem. Her pustokamnim mellona, tosli mahiti hea pustokant asa. Udharonnak, hi prithum, noketramnim nettlolem mollob, poilo dadlo ani bail, hem soglem Devan koxem rochlem tem Bible dakhoita. Amchea jivitantlea sonkoxttancho fuddo korunk modot korta, toslim utram tantunt asat. Toxench Devan bhasailam tem korun, to hea prithumer boreponn koso haddttolo, tem-ui Bible somzaita. Khorench, hem kitlem borem dennem nhoi!

3. (a) Jehovan amkam Bible dila tachea voilean kitem kolltta? (b) Hem zannam zal’lean amkam kiteak khuxalkai bhogta?

³ Bible moladik dennem mhunnonk anik ek karonn asa. Tantunt amkam Jehova Deva vixim xikonk melltta. Devan amkam Bible dila hachea voilean, apli vollokh  ghetloli taka zai mhunn kollon ieta. Deva thaim ixttagot zoddunk, Bible amkam modot korta.

4. Bible-a vixim tuka kitem borem dista?

⁴ Aiz zaitea lokam lagim Bible asa. Sonvsarbhor, ak’kho Bible vo tache thodde bhag, sumar 2,600 bhasamnim vachunk mellttat, ani tachi chhapnni sumar 500 kotti zalea. Ak’khea sonvsarant, 95 ttok’kea lokam koddem Bible asa. Dor sumanak, odmasan dha lakham poros chodd Bible, lokanchea hatant pavtat. Khorench, Bible-a sarkem anik khoinchench pustok na!

5. Bible Devachea “preronnan boroilam” mhunnttlear kitem?

⁵ Bible, hem pustok Devachea “preronnan boroilam.” (2 Timotak 3:16 vachat.) “Preronnan” borovop mhunnttlear, Devan apli povitr xokti uzar korun, kitem borounchem tem kolloilem. (2 Pedru 1:21) Zoxem, eka vhodd komponichea saibak, dusrea komponik chitt borounk zai tednam to kitem korta? To aplea khala kam korta taka, kitem borounchem tem sangta. Tea chittint tacho sevok, aplea monantlem nhoi, punn saiban kitem  sanglam tem boroita. Taka lagon, ti chitt saibachi mhunnonk zata. Toxench Devan, Bible borounk munxank uzar kele. Tea munxamnim aplea monantlem nhoi punn Devan sanglam tem boroilem. Takach lagon ami, ak’kho Bible “Devachem utor” mhunnonk zata.—1 Tesalonikekarank 2:13.

6, 7. Bible-antli ekvottai ojapachi mhunn ami koxem sangonk zata?

⁶ Bible borounk sumar 1,600 vorsam laglim. Tache boroupi veg-vegllea kallar jiele. Tantuntle thodde xetkamti, thodde nustekar ani thodde zonvaranche rakhnne asle. Her boroinnar, raza, neai-korpi ani Devacho sondex sangpi asle. Lukas nanvacho boroupi dotor aslo. He sogle veg-vegllim kamam kortale torui, survatek thaun xevottak porian Bible-ant boroilam tantunt ekvottai asa. *

⁷ Bible-antlem poilem pustok amkam, munxachea jivitant tras koxe suru zale tem kolloita. Ani tantuntlem nimannem pustok, hi prithum sobit bag koxi zatoli tem dakhoita. Bible-ant, hozaramnim vorsancho itihas boroilolo asa, ani tantuntli dor ek ghoddnni amkam Devachea ud’dhexa vixim kolloita. Hachea voilean, Bible-ant boroilam tantunt ekvottai asa mhunn kollon ieta. Devachem utor oxench asonk zai nhoi!

8. Bible-ant boroilam tem vidneana pormonnem sarkem asa mhunn dakhounk udharonnam diat.

⁸ Bible-ant vidneana vixim boroilam, ani tem-ui  sarkem asa. Vidnean xiktat tannim, zaitea tempa uprant sodhun kaddlam tem, poilim thaun Bible-ant aslem. Udharonnak, adim, thoddea raxttranchea lokank nitollsann ani bolaike vixim khobor nasli, punn Levi-Xastr pustokant Israel porjek oslea vixoi-ancher adinch kaide dilole. Thodde lok, prithum kiteacher tori dovorloli asa mhunn somzotale. Punn Bible-ant, Dev “kainch na thoim prithum umkallaun dovorta” mhunn adinch sanglolem. (Job 26:7) Bible ek vidneanachem pustok nhoi, torui, tantunt vidneana vixim boroilam tem soglem, sarkem asa. Karonn, tem Devan dilolem pustok.

9. (a) Bible-ant itihasa vixim sarkem boroilam mhunn ami kiteak mhunnonk zata? (b) Boroupeanchem promannikponn tumkam Bible-a vixim kitem kolloita?

⁹ Bible-ant itihasa vixim boroilam tem-ui sarkem asa, ani amchean tacher visvas dovrunk zata. Tantunt boroiloleo ghoddnneo, khoim ani kednam ghoddleo tem-ui sarkem sanglam. Bible-ant fokot lokanchim nanvanch nhoi, punn tanchea sonsti vixim-i boroun dovorlam. * Sonvsarantle itihaskar, aplo des vo lokam vixim boroitana, tancheo chuki lipoitat. Punn Bible boroupeamnim toxem korunk na. Tannim apleo toxench aplea lokancheo chuki, promannikponnan boroileat. Udharonnak, Moizes nanvachea boroupeak tachea chukik lagon xist favo zal’li. Ani hea vixim tannem ukteponnim Lokgonnti pustokant boroun dovorlam. (Lokgonnti 20:2-12) Oslem promannikponn, itihasa vixim boroilolea khoincheach pustokant pollounk mellona. Punn, Bible-ant melltta, karonn tem Devan dilolem pustok.

10. Bore toren jieunk amkam Bible-ant modot melltta oxem kiteak mhunnonk zata?

¹⁰ Bible hem pustok, Devachea preronnan boroilam dekhun ‘xikovnn diunk, chuki kaddun dakhounk, lokak nittaier haddunk tem upkarta.’ (2 Timotak 3:16) Khorench, Bible-ant boroilam tem, amkam bore toren  jieunk modot korta. Tantunt amkam munxa vixim zaiti somzonni melltta, karonn tacho boroupi Jehova Dev zaun asa. Amcho rochnnar zal’lean, amchea monant ani kallzant kitem asa tem, amchea poros taka borem somzota. Khuxal ravonk amkam kitem gorjechem, tem to zannam. Toxench, ami khoinchea kortubam thaun pois ravonk zai, tem-ui taka khobor asa.

11, 12. (a) Matev 5-7 odheai-ant, Jezu koslea vixoi-ancher uloilo? (b) Bible-ant anik khoinche vixoi boroilole asa? (c) Bible-antle updes sodanch faideache oxem ami kiteak mhunnonk zata?

¹¹ Matev 5 te 7 odheai-ant, Jezun dilolea updesam vixim chintat. Jivitant khuxal ravonk kitem korchem, eka-meka modlim zhogddim koxim suttavim korchim, magnnem koxem korchem ani girestkaiek gorje bhair kiteak mhotv diunk zaina, oslea vixoi-ancher to uloilo. Jezuchim utram tednam-i faideachim aslim ani atam-i faideak poddttat.

¹² Ghorabo koso sukhi korcho, kamachea zagear koxem vavurchem, ani dusream thaim koxem vagchem, hachea-i vixim Bible-ant boroilam. Tantunt boroilam tem sogleank boreak poddtta, ani tantuntle updes sodanch faideache. Bible-antli zannvai kitli moladik ti dakhounk Jehova Izaias provadeak mhunntta, “Hanv Sorvespor Dev, jem tumchea boreak tench tumkam xikoitam.”—Izaias 48:17.

13. Jehovan Izaias provadeak Babilona vixim kitem kolloilolem?

¹³ Fuddem kitem zaunchem asa tem Bible-ant adinch boroun dovorlolem, ani atam porian tantuntleo zaiteo bhasaunneo ghoddon aileat. Ek udharonn polloum-ia. Jezu zolmochea 800 vorsam poilim, Izaias provadea udexim, Jehovan Babilon xaracho nas zatolo mhunn  kolloilolem. (Izaias 13:19; 14:22, 23) Hem koxem zatolem, tem-ui bariksannen sanglolem. Dusmanache soinik Babilon xarachi nhoim sukoun, zhogddim korinastana tacher zoit vhortole mhunn sangon dovorlolem. Titlench nhoi, Babilon xarak haroitolea razachem nanv Sirus, hem-ui kolloilolem.—Izaias 44:27–45:2 vachat.

14, 15. Izaiasan Babilona vixim sanglolem tem koxem khorem zalem?

¹⁴ Bhasaunni korun sumar 200 vorsam uprant, Izaias provadean sanglolem toxench ghoddlem. Jezu zolmochea adim, 539 hea vorsa, Otumbrachea 5 tarker ratchem, Babilonachea bhonvtonnim soinikanchi fouz ieun ravli. Tancho senapoti, Persiacho raza Sirus aslo. Devan bhasailolem soglem khorem zaunk laglem. Punn zhogddim korinastana te soinik Babilonacher koxe zoit vhortole?

¹⁵ Babilonacheo vontti vhodd aslolean, thoinchea lokank apunn surokxit asat dislem. Taka lagon, kainch  chinta korinastana eke rati te fest monoitale. Ani teach rati, Sirus razan tanchea xarantlean vochpi nhoim-chem udok dusrea vatten soddlem. Tachem udok rokddench unnem zalem ani sogle soinik cholon Babilonachea darvonttea kodden pavle. Punn atam, Sirusache soinik bhitor koxe sortole? Tea rati, xaracho darvontto uktoch urlo, ani tankam bhitor soronk sompem zalem.

16. (a) Izaias provadean Babilona vixim anik kitem bhasailolem? (b) Izaias provadean bhasailolem tem koxem ghoddon ailem?

¹⁶ Fuddarak Babilonachem kitem zatolem tem-ui bhasailolem. Bible sangta, “Thoinsor anink konnuch vosti korcho na, pinddkeche pinddkent konn lok thoim ravcho na. Konn Arbi monis aplo tombu thoim tanncho na, khoinchech gonvlli aplea hinddank thoim add poddunk diunche nant.” (Izaias 13:20) He bhasaunnent, Babilon xarachem sasnak nisontton zatolem mhunn sanglolem. Ani, tem aizui dison ieta. Babilon xar Boghdad xara thaun 80 kilometr dokxinnek, Iraq hea desant asa. Aiz pasun thoim konnuch ravona. Izaias  provadea udexim Jehovan, “Hanv taka zhaddun uddoitolom” mhunn sanglolem tem ghoddon ailem.—Izaias 14:22, 23. *

17. Bible-antleo bhasaunneo ghoddon aileat tem polloun amcho visvas kiteak ghott zata?

¹⁷ Bible-antleo bhasaunneo ghoddon aileat tem polloun, amcho visvas kitlo ghott zata nhoi! Jehova Devan adim sanglolem tem soglem korun dakhoilem. Ani fuddara vixim sanglam, tem-ui to kortolo mhunn ami khatri dovrunk zata. (Lokgonnti 23:19 vachat.) Khorench, ‘Dev zo kednanch konnank fottoina, tannem kallache survatek thaun’ bhasailolea sasnik jivitacher, amkam bhorvonso asa.—Titak 1:2. *

18. “Devachem utor” khas mhunn dakhounk apostl Paulun kitem boroilam?

¹⁸ Hea odheai-ant, Bible ek khas pustok mhunn amkam kollon ailem. Hem pustok, fokot boroupant ekvottai aslolem, vidneanik ani itihasik ritin sarkem vo jivitant boreak poddtta toslench nhoi, punn anik ek ritin khas asa. Apostl Paulu boroita, “Khorench Devachem utor jivem ani bollixtt. Tem donui vattamnim pazlole torvari poros rombta. Zoim  monxacho prann ani otmo toxench sandhe ani mendu doxim zatat, thoim porian tem rigunk xokta. Tem mon’xachea kallzache otrek ani chintnam topasun tanche vixim aplo nivaddo dita.”—Hebrevank 4:12.

19, 20. (a) Amchi topasnni korunk Bible amkam koso modot korta? (b) Bible hea Devachea moladik denneache upkari mhunn ami koxim dakhoitolim?

¹⁹ Bible-ant, Devachim ‘utram’ vachun, amchea jivitant bodol ieunk xokta. Tantunt boroilam tem, amchich topasnnim korunk amkam modot korta. Ami Devacho mog kortat oxem ghoddie mhunnot. Punn, Bible xikon ami koxim choltat tem-ui pollounk zai karonn tachea voilean amchea monant ani kallzant khorench kitem asa tem kollon ietolem.

²⁰ Khorench, Bible hem Devan dilolem pustok. Tem vachun, tachi sarki somzonni gheunchi goroz asa. Hea moladik denneache tumi upkari mhunn dakhounk, Bible xikot ravonk zai. Oxem kel’lean, munxam pasot Dev kitem korcho asa tem tumkam borem somzotolem. Devacho ud’dhex kitem, ani to koso purnn zatolo hacho zobab amkam fuddlea odheai-ant mellttolo.