CHODD MAHITI
Mesiasachea Iennea Vixim Daniel Provadi Kitem Sangta?
JEZU zolmochea sumar 500 vorsam adim, Daniel provadi hea sonvsarant aslo. Jehovan taka dilolea mahiti voilean, Jezu kednam Mesias vo Krist zalo, hem zannam zaunk—modot melltta. Taka sanglolem, ‘Hem tum zanno za ani somzun ghe: “Portun ie ani Jerusalem novean bandun kadd”–ho sondex bhair sorlo tea vella thaun ‘obhixikt’ vo Mesias ie-sor sat satollim ani basotth satollim soron voitolim.’—Daniel 9:25.
Mesias kednam ietolo to vell kollttolo zalear, Danielan sanglolim tim satollim vo sumanam kednam suru zalim, tem zannam zaunk zai. Bhasaunne pormonnem tim sumanam, “Jerusalem novean bandun kadd - ho sondex bhair sorlo” tednam suru zalim. Punn ho sondex vo hukum kednam “bhair sorlo”? Nehemias provadea pormonnem, Jeruzalem novean bandun kaddpacho hukum, “Artaxerxes razache razvottkechea visavea (20) vorsa” dilolo. (Nehemias 2:1, 5-8) Itihas boroupi manun ghetat ki Jezu zolmochea 474 vorsam poilim, Artaxerxes raza zaun ek voros zal’lem. Toxem zalear, 455-ant tachem visavem voros sompta. Atam amkam, Mesiasa vixim Danielachea bhasaunnechi survat, 455 hea vorsak zali mhunn kollon ieta.
Mesias ieuncho ho vell kitlo lamb astolo tea vixim Danielan sanglam. Bhasaunnent “sat satollim ani basotth satollim” oxem mhunnttlam, ani tim soglim mellon 69 satollim vo sumanam zatat. Ho vell kitlo lamb astolo? Khubxea Bible-achea bhaxantoram pormonnem, ek suman sat disanchem nhoi punn vorsanchem asa mhunn kollon ieta. Dor ek suman mhunnche sat vorsam. Adlea kallache Judev lokank sumanam mhunnttlear vorsam, vo sat vorsancho ek bhag asta mhunn khobor asli. Udharonnak, dor satvea disak sabath monoitale toxe, dor satvea vorsakui te sabath monoitale. Danielachea bhasaunnent 69 sumanam asat. Ek suman 7 vorsanchem zalear, 69 sumananchim, 483 vorsam zatat. *
Ami hem mezun polloum-ia. Jezu zolmochea poilim 455 hea vorsa thaun, 483 vorsam mezlim zalear, ami Jezu zolmolea uprant 29 hea vorsak pavtat. Heach vorsak Jezun bautizm ghetlo ani Mesias zalo. (Lukas 3:1, 2, 21, 22) Itlea bariksannen hi bhasaunni ghoddon aili tem polloun amcho visvas kitlo ghott zata nhoi! *
^ per. 2 455 K.X.A thaun 1 K.X.A porian, 454 vorsam zatat. Jezu ieunchea poilim 1 K.X.A thaun 1 K.X. porian, 1 voros zata (hanchea modem 0 voros naslem) ani 1 K.X. thaun 29 K.X. porian, 28 vorsam zatat. Tor 454+1+28 him soglim mellon, 483 vorsam zatat. 70-vea sumanachea vorsak, mhunnttlear 33 K.X. taka ‘jivexim marlo’. (Daniel 9:24, 26) Jehovachea Sakxeamnim prokaxit kel’lim pustokam, Pay Attention to Daniel’s Prophecy! (Inglez bhaxen) odheai 11, ani Insight on the Scriptures Volume 2 (Inglez bhaxen), pan 899-901 polloiat.
^ per. 3 K.X.A. mhunnche Kristi Xoka Adim ani K.X. mhunnche Kristi Xok.
