1, 2. Aiz lokank koslem dukh-tras soschem poddtta, ani tim kosle prosn vichartat?

EKA desant zal’lea zhuzant, hozaramnim bailo ani bhurgim melim. Tankam sogleank eka vhoddlea fonddant sangatak purun, tanchea fonddar khubxe barik khuris lailole. Dor eka khursar, “Kiteak?” oso prosn boroilolo aslo. Thodde pavtt ho prosn munxank khub dukh haddtta. Zhuz, bhuimkamp, duens, ani kirmik lagon tancho konnui morta, tanchem ghor nas zata vo dusre tras ietat tednam, tim dukhi zaun ho prosn vichartat. He tras tancher kiteak aile tem tankam zannam zaunk zai asta.

² Devan munxancher ailole tras kiteak kaddunk nant? Jehova zor, sorvpodvedar, mogall, zannvaiecho ani niticho Dev zalear, sonvsarant itlem vaittponn ani on’neai kiteak asa? Tumchea-i monant osle prosn aileat astole.

3, 4. (a) Devan dukh-tras kiteak kaddunk nant, ho prosn vicharop chukichem nhoi mhunn koxem kolltta? (b) Vaittponn ani tras polloun Devak koxem dista?

³ Devan dukh-tras kiteak kaddunk na, oso prosn  vicharop chukichem kai? Osle prosn vichartoleank, Devacher bhavarth na, vo tim tacho okman kortat, oxem thoddeank disot. Punn, Devachea adlea visvaxi lokamnim-i oxe prosn vicharlole mhunn Bible vachtana amkam kollon ieta. Udharonnak, Habakuk provadean Jehovak vicharlem, “Kiteak mhonn Tum mhaka onit polleunk ditai? Kiteak mhonn Tum zulumxai sostai?”—Habakuk 1:3.

⁴ Osle prosn vicharle dekhun, Jehova Habakuk provadeacher ragar zalo kai? Habakukan vicharlole prosn Bible-ant boroun dovorleat, tachea voilean Dev tacher ragar zaunk na mhunn kolltta. Titlench nhoi, Jehova Devan tacho bhavarth ghott kelo ani taka sarki somzonni dili. Jehova Dev amkam-i hea ritin modot korunk axeta. “Taka tumchi kallji asa” mhunn Bible sangta. (1 Pedru 5:7) Vaittponn, ani tea udexim ailole dukh-tras polloun, munxam poros chodd, Devak vaitt dista. (Izaias 55:8, 9) Toxem zalear, hea sonvsarant itle tras kiteak asat?

5. Munxancher moronn kiteak ailem tem sangonk thodde kitem karonnam ditat, ani Bible kitem xikoita?

⁵ Itle tras kiteak asat tem zannam zaunk, veg-vegllea dhormanche lok aplea dhormik fuddaream lagim voitat. Thodde fuddari sangtat, munxancher dukh ailolem Devak zai ani tanchea jivitant kitem ghoddttolem tem tannem adinch boroun dovorlam. Thodde mhunnttat, Devacho gutt Dev zannam. Devak sorgar anik ainz zai dekhun to thodde pavtt lhan bhurgeancher pasun moronn haddtta, oxem-i thodde sangtat. Punn, atam porian xikleant tea pormonnem, Dev kednanch vaitt korina mhunn ami zannant. Bible sangta, “Devachean kednanch vaitt korunk zaina Sorvbollixtt kednanch on’neai adarunk xokona!”—Job 34:10.

6. Hea sonvsarant zata tea vaittponnacho zobabdar Dev mhunn lok kiteak mhunnttat?

⁶ Hea sonvsarant zata tea vaittponnacho Dev zobabdar mhunn, lok kiteak mhunnttat? Karonn, hea sonvsaracher Dev raj choloita oxem lokank dista. Punn, hea vixim Bible kitem xikoita tem tankam khobor na. Ami odheai 3-ant xiklolea pormonnem, Soitan hea sonvsaracher raj choloita.

7, 8. (a) Sonvsarant Soitanache gunn koxe dison ietat? (b) Patkak lagon ani vell ani ghoddiek lagon dukh-tras aileat mhunn amchean koxem mhunnonk zata?

⁷ Bible sangta, “Ami Devachim, ani ak’kho sonvsar Noxtteachea tabeant asa.” (1 Juanv 5:19) Chintun polloilear tumkam hem khorem disona? Soitan ‘ak’khea sonvsarak fosoita’ ani sonvsarantle lok tacheach sarkem noxttemponn kortat. (Prokasovnni 12:9) Soitan ekdom ragixtt, ghatki ani nixttur, takach lagon sonvsar aiz nixtturponnant ani ghatkiponnant buddla. Sonvsarant dukh-tras asonk hem poilem karonn zaun asa.

 ⁸ Odheai 3-ant xiklolea pormonnem, Adanv ani Eve Devachea add gelim ani tednam thaun munis patki zalo. Dukh-tras ieunk hem dusrem karonn. Patki munis dusreancher odhikar cholounk sodhta ani tea pasot zhuzam, zulum, ani dukh-tras vaddot geleat. (Updexok 4:1; 8:9) Tisrem karonn mhunnttlear, ‘vell ani ghoddi’ sangon iena. (Upodexok 9:11 vachat.) Udharonnak, ek munis cholon voita astana tachea tokler nal’l poddon, to moronk xokta. Sonvsaracher Dev raj choloina dekhun, khoinchea-i zagear vo vellar vaitt ghoddonk xokta ani taka lagon khobor nastana lok vaittak sampoddtta.

9. Sonvsarantle dukh–tras kaddun uddoina zaunk Deva lagim ek borem karonn asa, mhunn amchean kiteak mhunnonk zata?

⁹ Dukh-trasank lagon Dev zobabdar na mhunn zannam zal’lean, amkam buzvonn melltta nhoi! Lokancher tras haddttat tim zhuzam, bhuimkamp, sonvsarant zaupi zulum ani kirmea pasot Dev zobabdar na. Punn, Jehova Devan he dukh-tras kiteak kaddunk nant? To sorvpodvedar zal’lean, hem soglem kaddun uddounk taka xokti asa. Tor hem soglem to kiteak kaddun uddoina? Dev mogall mhunnttoch, oxem korunk kitem-i tori borem karonn astolem.—1 Juanv 4:8.

10. Soitanan kitem prosn ubo kelo ani koso?

¹⁰ Devan sogle dukh-tras kiteak kaddun uddounk nant te zannam zatolim zalear, te suru zale tednam kitem ghoddlem tem ugddasak haddum-ia. Soitanan, Adanv ani Evek Deva add vochonk fosoilim tednam ek mhotvacho prosn ubo zalo. Soitanan Devak podvi vo xokti na oxem mhunnonk na, karonn Jehova sorv-xoktivont mhunn to zannam aslo. Tannem, Jehova Devachea raz-odhikara vixim prosn kelo. Dev fott marta  ani aplea porje thaun borem tem lipoita oxem sangon tannem, Jehova sarke ritin raj choloina mhunn boglantt ghatlem. (Utpoti 3:2-5 vachat.) Dev munxancher raj choloina zalear, munis anik khuxal astolo oxem to dakhounk sodhtalo. Hea toren, Soitanan Devachea raz-odhikaracher prosn ubarlo.

11. Devan Adanv, Evek ani Soitanak tednanch kiteak marun uddounk na?

¹¹ Adanv ani Even Devachi adnea moddun, apnnak Devan raj choloilolem naka, punn borem-vaitt kitem tem tim apunnuch tharaunk xokta mhunn dakhoun dilem. Jehova atam hea vixim kitem kortolo? Apunn sarke ritin raj choloita ani aplea add geleant tim chukleant mhunn to koso dakhoitolo? Devan Adanv, Evek ani Soitanak tednanch marun uddoun, novim munxam rochunk zai aslim oxem ghoddie thoddeank disot. Punn Jehova Devak, sonvsar Adanv ani Eve udexim vaddon, tim ani tanchi sonsot sobit bag zal’le prithumer ravlolim zai aslim. (Utpoti 1:28) Jehova jem  kitem bhasaita tem sodanch purnn korta. (Izaias 55:10, 11) Punn Devan aplea add geleant tancho nas kelo zalear, tachea raz-odhikaracher ubo kel’lo prosn koso suttavo zatolo aslo?

12, 13. Munxancher raj cholounk Jehovan Soitanak kiteak odhikar dilo tem ek udharonn diun somzaiat.

¹² Hem somzonk ek udharonn gheum-ia. Chintat, ek xikxok bhurgeank kotthin gonnit koxem soddounchem tem xikoita. Punn ek mosto bhurgo zo huxar asa, tem gonnit xikxok sarkem korina mhunn sangta. Oxem sangon, ho bhurgo apunn tem gonnit bore toren soddounk xokta mhunn dakhoita. Thoddea bhurgeank to bhurgo sarko uloita oxem dista ani tim-ui xikxokachea add ulounk lagtat. Atam to xikxok kitem kortolo? Tachea add uloitat tea bhurgeank tannem bhair ghatlim zalear urlolim bhurgim kitem chintolim? Tankam to bhurgo ani tache sangati sarke asle oxem distolem. Xikxok chukla ani to apli chuk dusreank kollot mhunn bhieta oxem somzon tim tacher visvas dovorchimnant. Punn zor xikxokan, tea mostea bhurgeak tem gonnit soddounk dilem zalear borem zatolem oxem tumkam disona? Xikxokan toxench kelem.

¹³ Xikxokan zoxem kelem toxench Jehovan kelem. Ugddas dhorat, Adanv, Eve ani Soitan, Eden bagent Devachea add gelim tednam kotteamnim ainz polloitale. (Job 38:7; Prokasovnni 5:11) Jehova hea prosnancho jea ritin zobab dita, tacho porinnam soglea ainzancher ani munxancher zauncho aslo. Jehovan kitem kelem? Soitanachem raj munxank boreak poddttolem vo na tem dakhoun diunk, Devan taka sonvsaracher raj cholounk odhikar dilo.  Toxench, tannem munxank Soitanachea odhikara khala sonvsaracher raj cholounk soddun dilim.

14. Jehovan Soitanak sonvsaracher raj cholounk dilolean kitem kollon ieta?

¹⁴ Ami polloilolea udharonnant, to mosto bhurgo ani tache sangati chuk kortat mhunn xikxok zannam aslo. Punn tem gonnit soddounk tea bhurgeak vell dilear, klasint aslolea her bhurgeank konn sarko tem kollon ietolem hem-ui to zannam aslo. Oxem korun, gonnit xikounk fokot xikxokakuch odhikar asa mhunn her soglea bhurgeank kollttolem aslem. Hachea fuddem, aplea add voitolea khoinchea-i bhurgeak xikxokan bhair kaddlear, tannem oxem kiteak kelem tem bhurgeank somzotolem. Toxench, Soitan ani tache sangati chukleat, ani munis munxancher raj cholounk xokona hem kollon ailea uprant, visvaxi munxank ani ainzank boreak poddttolem mhunn Jehova zannam aslo. Jeremiasa sarkim, tim-ui hem sot somzotolim. Tannem mhunnttlem, “Sorvespora, mon’xancheo vatto tanchea hatant nant, aplim panvlam nitt vatter ghalunk tanche adhin na mhonn ami zannonv.”—Jeremias 10:23.

15, 16. (a) Jehovan azun porian dukh-tras kiteak kaddunk nant? (b) Kirmi sarkeo vaitt ghoddnneo Jehovan kiteak addaunk na?

¹⁵ Jehovan azun porian dukh-tras kiteak kaddunk nant? Vaitt ghoddnneo zaunchea poilim to kiteak addaina? Ami porot xikxokachem udharonn pollounk zata. Tea xikxokan don vostu korunk nant. Poilem mhunnttlear, mosto bhurgo gonnit soddoitana xikxokan taka addaunk na. Ani dusrem, tannem tea bhurgeak gonnit soddoitana modot korunk na.  Toxench, Jehova Devan apunn don vostu korcho na mhunn tharailem. Poilem, Soitan ani tache sangati apunn sarke mhunn dakhounk sodhtat tednam tannem tankam addaunk na. Tankam vell divop gorjechem aslem. Hozaramnim vorsanchea itihasant munxan, khub toreche sorkar ghoddun haddle ani raj choloilem. Tannim vidnean ani her xetrant khub udorgot kelea, torui astana on’neai, bhuk, kirmi ani zhuzam vaddot geleant. Hem soglem polloun, munxachean raj cholounk zaina mhunn amkam kollon ieta.

¹⁶ Dusrem, Soitan hea sonvsaracher raj choloitana Jehovan taka modot korunk na. Devan kirmea sarkeo vaitt ghoddnneo addailoleo zalear Soitan ani tache sangati sarke mhunn dison ieta aslem. Ani munxam, hea sonvsaracher bore toren raj cholounk xoktat oxem lokank distolem aslem. Soitan lokank oxench dakhounk sodhta. Punn ti ek fott zaun asa. Ani Jehova oslea fotticho sangat kednanch diuncho na, karonn ‘Dev kednanch fott marina.’—Hebrevank 6:18.

17, 18. Aiz porian ghoddlolea vaittponnak lagon jem luksonn zalam tea vixim Jehova kitem kortolo?

¹⁷ Aiz porian ghoddlolea vaittponnak lagon jem luksonn zalam tea vixim Dev kitem kortolo? Jehova Dev sorpodvedar zaun asa. Taka lagon, vaitt zalam tem tachean borem korunk zata ani to kortoloch. Ami adim xikleant toxim, pidd’ddear zal’li amchi prithum Dev, sobit bagent bodoltolo.  Munxancher ailolem patok, Jezuchea bolidana udexim kaddun uddoitolo, ani meleant tankam porot jivont kortolo. Dev Jezu udexim, “Devcharachea kortubancho bhosm” kortolo. (1 Juanv 3:8) Hem soglem korunk Jehovan ek sarko vell tharailolo asa. Devan Soitanachea sonvsaracho rokddoch nas korunk na, punn sosnikai dakhoili dekhun aiz amkam Deva vixim sot zannam zaun, tachi bhokti korunk melltta. (2 Pedru 3:9, 10 vachat.) Aiz Dev, apleachi bhokti korunk axetoleank sodhta, ani tankam hea vaitt sonvsarant thir ravon, koxttank fuddo korunk modot korta.—Juanv 4:23; 1 Korintkarank 10:13.

¹⁸ Thoddeank ghoddie disot, Devan Adanv ani Evek, aplea kaideam add vochonant toxim rochlolim zalear, itle dukh-tras ieunche nasle. Tor Devan oxem kiteak korunk na? Hea vixim zannam zaunk Devan amkam dilolea eka khas denneacho ugddas korum-ia.

19. Jehovan amkam koslem dennem dilam ani tem moladik mhunn tumi kiteak mantat?

¹⁹ Odheai 5-ant ami xikleant toxim, Devan amkam zai tem vinchun kaddunk hok’k dila. Hem kitlem moladik dennem nhoi! Chintun polloiat. Devan zaitim zonvaram rochleat punn tankam borem kitem ani vaitt kitem tem vinchun kaddunk kollona. Devan munxank ek mexin koxem rochunk na. Ani toxim rochlolim zalear amkam borem distolem aslem kai? Na. Ami kosle munis zatolim, jivitant kitem kortolim, konnam lagim ixttagot kortolim, hem vinchun kaddunk Devan amkam hok’k dila. Borem tem vinchun, ami khuxal ravlolim Devak zai.

20, 21. Devan dilolem dennem tumi koxim uzar kortolim ani tumi toxem kiteak korunk zai?

 ²⁰ Ami khuxe monan Devachi seva korinant zalear ti seva taka manvona. (2 Korintkarank 9:7) Udharonnak, eka avoik vo bapaik kednam borem distolem? Tancho bhurgo aple khuxen tankam mog dakhoita tednam, vo konnem tori oxem korunk sanglam mhunn to korta tednam? Toxem zalear, Devan dilolem dennem tumi koxim uzar kortolim? Soitanan, Adanvan, ani Even vaitt tem vinchun kaddlem ani Jehova Devak nakarlo. Tumi kitem kortolim?

²¹ Devan dilolea denneacho boro upeog korunk tumkam bori sondhi asa. Jehova sangta tem korunk aiz zaitea lokamnim vinchun kaddlam. Tunvem-i hea lokank sangat diunk zata. Soitan fottkiro, ani to sonvsaracher raj cholounk xokona mhunn dakhoun, te Jehovachem kalliz khuxal kortat. (Mhonn’nneo 27:11) Tunvem-i Devak manvota tea ritin jieunk zata. Hem tumchean koxem korunk zata tem ami fuddlea odheai-ant polloum-ia.