1, 2. (a) Fokot nanv zannam zal’lean tumi eka munxak khoreaninch vollkhotat oxem kiteak mhunnonk zaina? (b) Jezu konn aslo mhunn lok somzota?

HEA sonvsarant zaite famad lok asat. Thodde aplea vaddeant, thodde aplea ganvant ani thodde desant famad astat. Ani thoddeank, ak’kho sonvsar vollkhota. Punn, eka famad munxachem, fokot nanv zannam zal’lean tumi tea munxak khoreaninch vollkhotat oxem mhunnonk zaina. Karonn, tea munxache gunn, ani tachi her mahiti tumkam asona.

² Jezu Krist, sumar 2,000 vorsam poilim hea prithumer jielolo, torui astana, sonvsarantlea zaitea lokamnim tachea vixim aikolam. Punn, to khoreaninch konn aslo hem tankam azunui khobor na. Thoddeank, to ek boro munis aslo oxem dista. Thodde, taka ek provadi mhunnttat. Toxench thoddo lok, Jezuk Dev manta ani tachi bhokti korunk zai mhunn sangta. Tuka kitem dista?

3. Tunvem Jehova Deva vixim ani Jezu vixim zannam zavop kiteak gorjechem?

³ Tunvem Jezu vixim sot zannam zavop gorjechem asa. Karonn Bible sangta: “‘Tuka, ekleach khorea Devak, ani Zaka Tunvem pattoilai tea Jezu Kristak  vollkhun ghevop,’ hench tem Sasnnik Jivit.” (Juanv 17:3) Jehova Dev, ani Jezu Krista vixim zannam zal’lean, fuddarak sobit bag zaunchi asa tea prithumer, tumi sasnak jieunk xoktolim. (Juanv 14:6) Itlench nhoi, amchem jivit koxem jieunchem ani dusream thaim koxem vagchem, hachea-i vixim Jezun amkam ek borem udharonn dovorlam. (Juanv 13:34, 35) Hea pustokachea poilea odheai-ant ami Deva vixim xiklim. Atam ami, Jezu vixim Bible khorench kitem xikoita, tem zannam zaum-ia.

4. “Mesias” ani “Krist” hacho orth kitem?

⁴ Mesias vo Krist ietolo hea vixim, Jezu  zolmochea adinch Bible-ant boroilolem aslem. “Mesias” hem Hebrev bhaxen, ani “Krist” hem Grik bhaxen mhunnttat. Hea donui utrancho ekuch orth asa, to mhunnttlear “Makhlolo.” Hea bhasailolea Mesiasak, Devan khas kam korunk makhlolo vo vinchun kaddlolo. Devan fuddara vixim bhasailolem tem purnn korunk, Mesiasan kitem kelem tem amkam fuddlea odheai-anim xikonk mellttolem. Toxench Jezu udexim, atam amkam koslim besanvam mellonk xokta, tem-ui ami zannam zatolim. Jezu zolmochea poilim, ‘Konn Mesias zait?’ ho prosn zaitea lokanchea monant aslo.

5. Jezu vixim tachea xisank kitem khatri asli?

⁵ Jezuch bhasailolo Mesias mhunn, tachea xisank khatri asli. (Juanv 1:41) Simanv Pedru nanvachea eka xisan Jezuk, “Tum Krist” oxem mhunnttlolem. (Matev 16:16) Jezuch khoro bhasailolo Mesias mhunn tache xis, khatren kiteak sangonk xokle? Ani toch Mesias mhunn, ami-i khatren koxem sangonk zata?

6. Jezu hoch Mesias mhunn vollkhonk Jehova Devan koxi modot keli tem somzaiat.

⁶ Jezu ieunchea poilim, Devachea provadeamnim Mesiasa vixim zaiti mahiti diloli. Ani tea mahiti voilean, Mesias konn to vollkhonk sompem zalem. Ek udharonn gheum-ia. Somza, tumchea eka soireak vimantoll, sttexon vo bos-sttopar thaun tumkam haddunk laila. Punn, tumi taka kednanch mellonk na vo pollounkui na. Toxem zalear tumi taka koxim vollkhotolim? To kitem nhesla vo koso dista tachea vixim thoddi mahiti diloli zalear, taka vollkhonk tumkam sompem zata aslem nhoi? Toxench, Jehova Devan, Mesias kitem kortolo ani tachea sovem kitem  ghoddttolem, hem provadeam udexim Bible-ant adinch boroun dovorlolem. Bhasailolea pormonnem zata tem polloun, Jezu hoch Mesias mhunn vollkhonk, tea vellar aslolea lokank modot zali.

7. Jezu vixim khoincheo don bhasaunneo ghoddon aileo?

⁷ Atam ami Mesiasa vixim kel’leo don bhasaunneo polloum-ia. Sumar 700 vorsam adim Mika provadean, Judeiant aslolea Bethlehem hea lhan ganvant, bhasailolo Mesias zolmotolo mhunn sanglolem. (Mika 5:1) Jezucho zolm khoim zalo? Teach ganvant! (Matev 2:1, 3-9) Dusrea bhasaunnent, zaitea vorsam adim Daniel 9:25-ant, (Jezu zolmolea uprant) 29-vea * vorsa Mesias konn to kollon ietolo mhunn boroun dovorlolem. Jezu Mesias mhunn kednam kollon ailem? Heach vorsa. Heo ani her bhasaunneo sangloleo toxeoch ghoddon aileo tache voilean, Jezu hoch bhasailolo Mesias mhunn kollon ieta.

8, 9. Jezuchea bautizma vellar kitem ghoddlem ani tache voilean to Mesias mhunn koxem kollon ailem?

⁸ Jezu hoch Mesias mhunn khatren sangonk, 29 hea vorsachea xevottak kitem ghoddlem tem polloum-ia. Jezu bautizm gheunk, Juanv Batista fuddean, Jordan nhoim-chea deger hea vorsa ailolo. Mesias konn to vollkhonk Jehova Devan, Juanvak adinch ek khunna diloli. Ani Jezuchea bautizma vellar Juanvan ti khunna ghoddon ietana polloili. Tea vixim Bible sangta, “Jezu snan gheun udkantlo bhair sorun iena fuddem, ovchituch sorg ugoddlo ani Devacho Atmo Apnnacher parvo koso denvun ieta to Tannem dekhlo. Ani okosmat sorgar thaun ek tallo oso  gazlo: ‘Ho Mhozo Put, soglle opurbaiecho; Tacher asa Mhojem dhadosponn.’” (Matev 3:16, 17) Tea vellar kitem ghoddlem tem polloun ani aikon, Jezuk Devan dhaddla mhunn Juanvak matui dubhav naslo. (Juanv 1:32-34) Devachi povitr xokti Jezucher denvon aili tea disa, to Mesias vo Krist zalo. Ani fuddarak, toch Raza ani raxttrancho fuddari zauncho aslo.—Izaias 55:4.

⁹ Bible-ant diloleo bhasaunneo koxeo purnn zaleo tem polloun, ani Jezuchea bautizma vellar Jehovan diloli govai aikon, Jezuch bhasailolo Mesias mhunn kollon ieta. Punn, Jezu khoim thaun ailolo? Ani taka kosle gunn asle? Hea gorjechea prosnanche zobab amkam Bible-ant mellttat.

10. Prithumer ieunchea poilim Jezu khoim aslo?

¹⁰ Jezu, hea prithumer ieunchea poilim sorgar aslo mhunn Bible xikoita. Mesias Bethlehemant zolmotolo, ani “Tacho oromb . . . bhov purvilea” vo adinchea kallancho, mhunn Mika provadean boroilolem. (Mika 5:1) Toxench, apunn prithumer ieunchea adim sorgar aslo mhunn Jezunui zaite pavtt sanglem. (Juanv 3:13; 6:38, 62 vachat; 17:4, 5) Jezu sorgar aslolo dekhun, Jehova thaim tacho ek khas sombond aslo.

11. Jezu Jehovacho khas put mhunn Bible koso dakhoita?

¹¹ Jezu Jehovacho khas put zaun asa. Devan taka sogleam poilim rochlolo dekhun taka ‘rochnnam modlo Malgoddo’ mhunnttla. * (Koloskarank 1:15)  Jezu anik ek ritin khas asa mhunn amchean sangonk zata karonn to Devacho ‘ekloch put’. (Juanv 3:16) Hacho orth, Devan Jezuk konnachoch adar ghenastana rochlo. Itlench nhoi, her sogleo vostu rochunk, Devan fokot Jezuk uzar kelo. (Koloskarank 1:16) Jezuk “sobd” oso-i mhunnttlolo asa. (Juanv 1:14) Hachea voilean, to Jehova Devacheo suchounneo ani sondex, munxank toxench ainzank pavoitalo mhunn amkam kollon ieta.

12. Dev ani tacho put ek nhoi mhunn amkam koxem kolltta?

¹² Zaite lok, Dev ani tacho put ekuch oxem mantat. Tumkam-i toxench dista? Hachea vixim Bible kitem xikoita tem ami polloum-ia. Ami xikleant tea pormonnem, putak Devan rochlo hem ami zannam zalim. Hachea voilean, Jezuk survat asa mhunn kollon ieta. Punn Devak, survat na ani xevottui na. (Stotr 90:2) Bapa poros apunn vhodd zauncho, oxem putan kednanch chintunk pasun na. Bible-ant dekhun, Bap puta poros vhodd mhunn boroilolem asa. (Juanv 14:28 vachat; 1 Korintkarank 11:3) Jehova ekloch “Sorvespor” ani Sorvpodvedar Dev. (Utpoti 17:1) Taka lagon, to ani tacho put ek nhoi. *

13. “Disonaslolea Devacho Jezu khoro jivo Rupkar” oxem Bible Devachea putak kiteak mhunntta?

¹³ Prithum ani noketramnim nettoilolem mollob roch’chea adim, Jehova ani tacho put lak’khanim vorsam sangatak asle. Tanchea modem kitlo mog aslo astolo nhoi! (Juanv 3:35; 14:31) Ho mogacho put aplea Bapa bhaxenuch aslo. Takach lagon, “Disonaslolea Devacho Jezu khoro jivo Rupkar” mhunn Bible sangta.  (Koloskarank 1:15) Ek put zoso zaitea ritimnim aplea bapai sarko asta, toxech Devachea putakui aplea Bapa sarkech gunn asle.

14. Jehovacho put prithumer munis mhunn koso zolmolo?

¹⁴ Jehovacho ekloch put, aplea khuxen, sorg soddun prithumer munis mhunn ailo. Punn sorgar ravpi ainz munis mhunn koso zolmonk xokta? Ho prosn ghoddie tumchea-i monant aila astolo. Oxem zaunk, Jehova Devan ek vizmit kelem. Tannem sorgar thaun aplea putachem jivit, Maria nanvache ankvar ostorechea kusveant ghatlem. Ticho, khoincheach dadlea sangata kuddicho sombond naslo. Takach lagon, Marien, patok naslolea bhurgeak zolm dilo, ani taka Jezu mhunn nanv dovorlem.—Lukas 1:30-35.

15. Jezu udexim Jehovak vollkhonk melltta oxem ami kiteak mhunnonk zata?

¹⁵ Hea prithumer astana, Jezun jem xikoilem ani kelem, tachea voilean taka vollkhonk amkam modot melltta. Ani Jezu udexim amkam Jehovachi chodd vollokh melltta, karonn to aplea Bapa sarkoch aslo. Taka lagon, Jezun aplea eka xisak mhunnttlem, “Jim konn Mhaka polletat, tim Mhojea Bapak polletat.” (Juanv 14:9) Jezuchem jivit, tachem kam, ani tachea gunnam vixim Matev, Marku, Lukas, ani Juanv him Bible-antlim pustokam amkam zaiti mahiti ditat.

16. Jezucho mukhel sondex kitem aslo ani tannem diloli xikounn konnam thaun aili?

¹⁶ Jezuk, ‘Guruji’ vo xikxok mhunn zaito lok vollkhotalo. (Juanv 1:38; 13:13) To kitem xikoitalo? Tacho mukhel sondex, “Rajeachem Xubhvortoman” vo Rajeachi bori khobor asli. Tem Raj mhunnttlear,  Devachem sorginchem sorkar, jem hea prithumer odhikar choloitolem ani khaltea monachea lokank, sasnachim besanvam ditolem. (Matev 4:23) Tannem dilolo ho sondex, konnam thaun ailo? Jezun mhunnttlem, “Mhoji xikounn Mhoji nhoi, punn Mhaka pattoila Tachi”, mhunnttlear Jehovachi. (Juanv 7:16) Soglea lokamnim Rajeachi bori khobor aikololi bapak zai mhunn Jezu zannam aslo. Devachem Raj mhunnttlear kitem, ani tachea udexim amkam koslim besanvam mellttolim, hachea vixim ami odheai 8-ant anik xiktolim.

17. Lokank xikounk Jezu khoim-khoim voitalo, ani dusreank porgottunk tannem itle tras kiteak kaddle?

¹⁷ Jezu lokank khoim xikoitalo? Ganvamnim, nogramnim, bazarant, ghoramnim ani lok mellttat thoim Jezu tankam xikounk voitalo. Lok aplea lagim ietole mhunn to ravonk na, punn Jezu apunn tanche  lagim gelo. (Marku 6:56; Lukas 19:5, 6) Itli mhenot gheun to lokank kiteak porgott kortalo ani xikoitalo? Karonn tannem hem kam kel’lem Devak zai aslem mhunn to zannam aslo. Ani Jezun sodanch, aplea Bapak zai toxench kelem. (Juanv 8:28, 29) To lokank anik ek karonnak lagon xikoitalo. Aplea lagim itlo lok ieta tem polloun, Jezuk tanchi kakut distali. (Matev 9:35, 36 vachat.) Tanchea dhormik fuddareamnim tankam kainch modot korunk nasli. Deva vixim ani tachea ud’dhexa vixim lokank xikounk dhormik fuddareanchem kam aslem, punn tannim tem korunk na. Lokank Rajeachi bori khobor divop mhotvachem mhunn Jezu zannam aslo.

18. Tuka Jezucho khoincho gunn ekdom boro dista?

¹⁸ Jezu ek doiall ani mogall kallzacho munis aslo. Taka lagon, lok tachea lagim ieunk fatti soro nasle. Lhan bhurgim pasun, tachea fuddeant umedin ietalim.  (Marku 10:13-16) Jezu bhed-bhav kori naslo. Poixeanchi as kortat tancho ani on’neai-acho to dves kortalo. (Matev 21:12, 13) Poilinchea tempar, lok bailank unne-ponnan lekhtale tednam pasun, Jezun tankam favo to man dilo. (Juanv 4:9, 27) Jezu khaltikaiecho munis aslo. Ek pavtt tannem, aplea xisanche paim dhuvun, eka chakrachem kam kelem.

19. Jezuk dusreanchem dukh borem somzotalem mhunn dakhounk ek udharonn diat.

¹⁹ Jezuk dusreanchem dukh borem somzotalem. Tannem Devachea povitr xokte udexim, zaitea zannanchim duensam borim kelim. (Matev 14:14) Udharonnak, eka duent munxan Jezuk mhunnttlem, “Tuka khuxi asot zalear, tujean mhaka nitoll korunk zata.” Hea munxachem dukh ani tras, Jezuchean pollounk zale na. Aplo hat taka lavun tannem zobab dilo, “Hoi, Mhaka khuxi asa; nitoll za.” Ani to duent munis boro zalo. (Marku 1:40-42) Tea munxak kitlem borem dislem astolem tem amchean chintunk zata.

20, 21. Jezu Devak visvaxi ravlo mhunn ami koxem sangonk zata?

²⁰ Devak sodanch visvaxi ravon, Jezun amkam ek borem udharonn dovorlam. Koslea-i poristhitint, ani koxttanchea vellar pasun, to aplea Bapak visvaxi ravlo. Soitanan tacher haddlolea, soglea tallnneancho tannem virodh kelo. (Matev 4:1-11) Ek pavtt, Jezuchea soireamnim pasun tacher visvas dovrunk na. Te “tachi mot firlea”, mhunnonk lagle. (Marku 3:21) Punn hem aikon Jezu fatti soronk na, to Devachem kam korit ravlo. Tachea dusmanamnim pasun, taka zaite tras dile ani vaitt utram uloun tacho okman kelo, torui to  thondd ravlo. Tannem tankam kainch vaitt mhunnonk na.—1 Pedru 2:21-23.

²¹ Dusmanamnim dilole he sogle koxtt sosun, Jezu moro porian Devak visvaxi ravlo. (Filipkarank 2:8 vachat.) Nimannea disak taka kitlem soschem poddlem tem chintat. Taka dhorlo, tachea add fottkiri govai dili, ani neai kortoleamnim khotteponnan taka guneanvkari kelo. Itlench nhoi, lokamnim tachim fokannam kelim, soinikamnim taka bhale tople, ani uprant eka lakddar khillailo. Xevottak, tannem “Sompadlem!” mhunnon aplo jiv soddlo. (Juanv 19:30, Itihas 5:30) Punn tisrea disa, Bapan taka ainz koso porot jivont kelo. (1 Pedru 3:18) Challis disam uprant, to sorgar gelo. Ani thoim to razvottkecho raza zaunk, “Devachea uzveak” boson ravlo.—Hebrevank 10:12, 13.

22. Jezu moro porian Devak visvaxi ravlolean kitem zalem?

²² Jezu moro porian Devak visvaxi ravlolean kitem zalem? Jezuchea mornna udexim, munxank sobit bag zal’lea prithumer sasnachea jivitachi vatt ukti zali. Hem koxem, tem amkam fuddlea odheai-ant kollon ietolem.