JEZUCHEA zolmachi tarik Bible-ant boroiloli na. Punn Jezucho zolm Dezembrachea mhoineant zaunk na mhunn Bible amkam thodde purave dita.

Dezembrachea mhoineant, Jezu zolmololo tea Bethlehem ganvant, pausache, gormeche vo thonddeche dis asle tem zannam zavop chodd gorjechem. Judevanchea mhoinea pormonnem, tancho 9-vo mhoino Kislev, ho khub thonddecho ani pausacho mhoino aslo. (Kislev ho mhoino Novembr / Dezembr hea mhoineak melltta) Tachea uprant, Tebeth ho mhoino ietalo. (ho mhoino Dezembr / Janer mhoineak melltta) Hea mhoineant sogleant chodd thonddi poddttali ani kednam-kednam borofui poddttalo. Tea mhoineant thoinchea poristhiti vixim Bible kitem sangta tem ami zannam zaum-ia.

Bible-ant Ezra nanvachea munxan ek pustok boroilam. Ani thoim to Kislev mhoineant khorench tea zagear khub thonddi ani paus poddttalo mhunn dakhoita. Tannem boroilem, “to nnovea mhoineacho visavo (20) dis aslo; Sogllo lok, Devachea mondira mukhar axil’lea chovkant zomlo . . . ani motto pavs poddtalo dekhun te soglle koddkoddtale.” Tednam tea lokamnim, “ho pavsacho kall; amchean bhair ravunk zaina” oxem mhunnttlem. (Ezra 10:9, 13; Jeremias 36:22) Haka lagon, Dezembr mhoineachea  disamnim thoinche rakhnne ratchea vellar bhair ravonasle ani aplea hinddankui bhair dovorinasle.

Jezu zolmololo tea rati, teach ganvant rakhnne aplea hinddank gheun bhair asle mhunn Bible sangta. Bethlehem “ganvant rat-paro korun gonvlli aple hindd rakhtale” oxem Bible boroupi Lukas boroita. (Lukas 2:8-12) Hache voilean, rakhnne fokot disachech bhair asonasle punn ratche dekhun rat-paro korun hinddank rakhtale mhunn amkam kollon ieta. Dezembr mhoineant Bethlehem ganvant khub thonddi poddttali ani paus poddttalo zalear, rakhnne aplea hinddank gheun bhair koxe ravonk xoktat? Jezuchea zolmachea vellar kitem ghoddlem tem Dezembr mhoineant ghoddonk xokona. Tor hachea voilean, Jezu Dezembr mhoineant zolmonk na mhunn kollon ieta. *

 Jezu khoinchea disa melolo tem Devache utor Bible amkam sarkem sangta punn tachea zolma vixim chodd kainch sangonk na. Ami Solomon Razachim utram amchea ugddasak haddunk zatat. Tannem mhunnttlolem, “Unchamolachea pormollit tela poros, borem nanv odik xrextt. Zolmachea disa poros, mornnacho dis odik mhotvacho.” (Upodexok 7:1) Bible-a pormonnem, eka munxacho mornnacho dis chodd mhotvacho zaun asa. Taka lagon Bible amkam Jezun sonvsarant astana kel’lea seve vixim ani mornnam vixim mahiti dita punn tachea zolma vixim chodd mahiti dina.