1, 2. Devak magnnem korop mhunnttlear amkam vorto man kiteak? Magnnea vixim Bible kitem xikoita tem ami kiteak zannam zaunk zai?

SORGAR aslolea soglea noketram modem amchi prithum khub lhan asa. Sonvsarachim soglim raxttram, “Sorga ani prithumecho Rochnnar” Jehova mukhar, baldentlea udkachea eka thembea sarkim asat. (Stotr 115:15; Izaias 40:15) Bible sangta, “Apnnak ulo martolea somestank, khorea monan ulo martat tankam, Sorvespor sodam laginch asa. Aplea bhoktanchi khuxi To korta, tanchi bob aikota ani tankam nivarta.” (Stotr 145:18, 19) Him utram amkam kitem kolloitat? Amcho rochnnar Dev, amchea laginch asa ani ami taka “khorea monan ulo martat” zalear to amchem aikota. Khorench, Devak magnnem korop mhunnttlear amkam kitlo vorto man nhoi!

² Jehova Devan amchim magnnim aikololim amkam zai zalear ami taka manvota tea ritin magnnem korop gorjechem. Devak manvota toxem magnnem korunk, Bible magnnea vixim kitem sangta tem ami zannam  zaunk zai. Magnnea vixim Devachem utor kitem sangta tem zannam zavop gorjechem, karonn magnnem amkam Jehova Deva kodden ixttagot korunk modot korta.

3. Ami Jehova Deva lagim magnnem korunk ek vhoddlem karonn kitem?

³ Jehova Devak, ami tachea lagim magnnem kel’lem zai. Tachea lagim magnnem korunk hem ek vhoddlem karonn zaun asa. Bible mhunntta, “Koslech huske kaddum nakat; sogllea tumchea magnneamnim tumkam goroz titlem-i Devak kollit korat, punn tumchim magnnim dhin’vaxi kallzan kel’lim zaum-di. Ani amchea gineana poros vorti Devachi xanti tumchim monam ani kallzam Jezu Krista sovem rakhtoli.” (Filipkarank 4:6, 7) Khorench, sorg ani sonvsarachea vortea raza lagim magnnem korop mhunnttlear amkam ek vhodd soeg ani tea pasot ami Devak upkari asonk zai.

4. Jehova lagim sodanch magnnem kel’lean tumchi ixttagot koxi ghott zaunk xokta?

⁴ Jehova lagim magnnem korunk anik ek karonn asa. Jehova Deva lagim sodanch magnnem kel’lean, tache lagim asloli amchi ixttagot ghott zata. Dog ixtt asat zalear, te fokot apleak goroz asa tednanch eka-meka lagim uloinant. Punn tankam eka-mekachi porva aslolean, te aplim chintnam, uske ani aplea kallzant asa tem eka-mekak sangot astat. Oxem kel’lean tanchi ixttagot ghott zaunk pavta. Jehova lagim asloli tumchi ixttagot ghott korunk tumi heach ritin vavrunk zai. Hea pustokachea adaran, Bible Jehova Deva vixim kitem  xikoita, taka kosle gunn asat ani to fuddarak kitem kortolo hem tumkam kollon ailem. Jehova Deva lagim tumi ixttagot korunk zata hem-ui tumi zannam zalim. Magnnea udexim tumi tumchea monantlim chintnam ani kallzantle uske sorginchea Devak sangonk zata. Ani oxem kel’lean, Jehova lagim tumchi ixttagot anik ghott zatoli.—Jakob 4:8.

5. Jehova sogleanchim magnnim aikona mhunn koxem kolltta?

⁵ Jehova sogleanchim magnnim aikota kai? Jehova Devan, aplea add gelolea Israelitkarank Izaias provadea udexim mhunnttlem, “Kitlim-i prarthnam tumi kelim mhonnun, Hanv tumkam kan diuncho na. Tumche hat rogtan bhorleat.” (Izaias 1:15) Hea utrancho orth kitem? Ami vaitt kamam kortat zalear Dev amchim magnnim aikochona. Amkam, Devan amchi magnnim aikololim zai zalear, ami taka manvota tem korop gorjechem.

6. Devan amchim magnnim aikololim zai zalear ami kitem korunk zai, ani tem ami koxem korunk zata?

 ⁶ Devan amchim magnnim aikololim zai zalear ami amcho bhavarth dakhoun diunk zai. (Marku 11:24 vachat.) Apostl Paulun boroilem, “Bhavartha viret konnacheanuch Devak manonk zaina, kiteak Deva-xim vetoleamnim Dev asa mhonn ani Apnnak sodtoleank To inam’ dita mhonn bhavarth dhorunk zai.” (Hebrevank 11:6) Dev asa, to amchim magnnim aikota ani tancho zobab dita, itlench manlem mhunn zaina. Amcho bhavarth, amchea kamamnim dison ieunk zai. Dor disa, ami jea toren amchem jivit jietat, tachea voilean amkam bhavarth asa mhunn amchean dakhounk zata.—Jakob 2:26.

7. (a) Jehova lagim magnnem korta astana ami respedan kiteak ulounk zai? (b) Magnnem kortana ami khaltikaien ani kallzant thaun magnnem korta mhunn koxem dakhounk zata?

⁷ Magnnem kortana, ami khaltikaien ani kallzant thaun uloilolim Jehova Devak zai. Chintun polloiat, tumi eka Raza vo odhikarea lagim uloitat zalear, tumi tachea odhikarak man diun, respedan ani khaltikaien uloitolim nhoi? Toxem zalear, Jehova lagim uloitat tednam ami anik chodd khaltikaien ani respedan ulounchi goroz asa. (Stotr 138:6) Karonn Jehova Dev Sorpodvedar zaun asa. (Utpoti 35:11) Ami khaltim asat zalear, Jehova Deva mukhar ami kitlim lhan tem, ami jea toren magnnem kortat tachea voilean dison ietolem. Oxi khaltikai amkam asa zalear, ami porot-porot tench magnnem mhunnchimnant, punn magnnem kortana ami amchea kallzant kitem asa tem Deva mukhar dovortolim.—Matev 6:7, 8.

8. Amchea magnnea pormonnem ami koxem vavrunk zata?

⁸ Devan amchim magnnim aikololim zai zalear anik  ek vost gorjechi asa. Ti mhunnttlear, ami magnnem kelea uprant, tea pormonnem vavrunk zai. Amchea magnneam pormonnem vavrunk, ami amchea lagim ghoddtta titlem-i korunk zai. Udharonnak, “Amcho dispotto giras aiz amkam di” mhunn magnnem kortat zalear, ami amchea lagim ghoddtta tem kam korop gorjechem. (Matev 6:11; 2 Tesalonikekarank 3:10) Ami vaittachea tallneant poddona zaunk Deva lagim magnnem kortat zalear, ami amkam oslea poristhitint ghalunk zainam jea udexim ami tallnneant poddonk xokta. (Koloskarank 3:5) Devan amchim magnnim aikonk, ami kitem korunk zai tem ami zannam zalim. Atam ami magnnea vixim thoddea prosnanche zobab polloum-ia.

9. Ami konnam lagim magnnem korunk zai ani konnam vorvim?

⁹ Ami konnam lagim magnnem korunk zai? Jezun aplea xisank, “Amchea Bapa sorginchea” oxem mhunnon magnnem korunk xikoilem. (Matev 6:9) Hache voilean, ami fokot Jehova Deva lagim magnnem korunk zai mhunn kollon ieta. Jehova Dev amkam, Jezu vorvim aplea lagim magnnem korunk sangta. Oxem kiteak zait? Karonn, ami odheai 5-ant xiklolea pormonnem, amkam patkantlean ani mornnantlean soddvonn diunk Jezu ailo. (Juanv 3:16; Romkarank 5:12) Jezu Kristak, Jehova Devan porom-iadnik ani monsubidar mhunn nemla. (Juanv 5:22; Hebrevank 6:20) Heach pasot, Bible amkam amchim magnnim Jezu vorvim bhettounk sangta. Jezun mhunnttlem, “Vatt, Sot ani Jivit Hanvuch; Konnuch Bapa-xim vochona  bogor Mhoje-vorvim.” (Juanv 14:6) Tor, Jehova Dev amchem magnnem aikotolo zalear ami Jezu vorvim fokot Jehova lagim magnnem korunk zai.

10. Deva lagim magnnem kortana ami umkeach toren boschi, vo ubi ravchi goroz kiteak na?

¹⁰ Deva lagim magnnem kortana ami umkeach toren boschi vo ubi ravchi goroz asa kai? Na. Magnnem kortana, ami hat zoddunuch vo ubim ravonuch magnnem korunk zai mhunn Jehova Dev sangona. Bible-ant dakhoilolea pormonnem, ami boson, bagoun, dimbi ghalun vo ubim ravon magnnem korunk zata. (1 Itihas 17:16; Nehemias 8:6; Daniel 6:10; Marku 11:25) Magnnem kortana, ami dimbi ghaltat vo ubim ravtat hem mhotvachem na, punn amchem kalliz koxem asa tem chodd mhotvachem. Amchea dispott’ttea jivitant vo akantak sampoddttat tednam ami monantlea-monant magnnem kortat tem ghoddie dusreank disona zait, punn tim magnnim pasun Dev aikota.—Nehemias 2:1-6.

11. Magnneant ami kitem magonk zata?

¹¹ Magnneant ami kitem magonk zata? Bible sangta, “Kitem-i ami Devache khuxe pormannem Tache lagim magum, To [Jehova] amkam aikota.” (1 Juanv 5:14) Tor, Jehovache khuxe pormonnem asa tea khoinchea-i vostu vixim ami magonk zata. Ami amcher ailole tras ani koxtt pois korunk magonk zata kai? Hoi. Jehova lagim magnnem korop mhunnttlear eka ghott ixtta lagim uloilolea sarkem. ‘Soglle amche kallzache huske’ ami taka kollounk zai. (Stotr 62:8) Borem tem korunk, ami Devachea povitr xoktecho adar magonk zata. (Lukas 11:13) Jivitant tharav ghetana amchean Deva lagim zannvai ani koxttanchea vellar thir  ravonk, ghottai magonk zata. (Jakob 1:5) Amchea patkank lagon ami, Jezu Kristachea bolidanacher bhavarth dovrun Deva lagim bhogsonnem magonk zai. (Efezkarank 1:3, 7) Magnneant, ami fokot amcheach vixim magchem nhoi. Ami amchea ghorcheam ani sobhentlea bhav-bhoinnam pasotui magop gorjechem.—Itihas 12:5; Koloskarank 4:12.

12. Magnneant ami Jehova Devak poilo zago koso diunk zata?

¹² Amchea magnneant ami Devachea nanva vixim, tachea razvottke vixim ani tache khuxe vixim magonk zai. Jehova Devan amchea pasot kel’lea soglea kamank lagon ami taka vakhannun, tache upkar attounk zai. (1 Itihas 29:10-13) Magnnem korunk xikoitana, Jezun amkam Devachem nanv povitr zaum, tachem raj amkam ieum ani tachi khuxi sorgar zata toxi sonvsarant zaum mhunn poilem magonk xikoilem. (Matev 6:9-13 vachat.) Heo vostu maglea uprantuch, Jezun amkam amchea gorzam vixim magonk xikoilem. Jehova Devak, amchea magnneant poilo zago diun ami fokot amcheach vixim chintinant punn tachea-i vixim chintat mhunn dakhoun ditat.

13. Ami kitlo vell magnnem korunk zai mhunn Bible sangta?

¹³ Ami kitlo vell magnnem korunk zai? Ami ekttim astana kel’lem magnnem, vo dusream mukhar kel’lem magnnem kitlem lamb asonk zai, hea vixim Bible-ant amkam khoinch kaido diunk na. Ami jevnnachea vellar kortat tem magnnem lhan asonk xokta. Punn ekttim astat tednam, amchem kalliz uktem korun, amchean Deva lagim khub vell magnnem korunk zata. (1 Samuel 1:12, 15) Lokank dakhounk kel’lim lamb magnnim nirfoll mhunn Jezun dakhoun dilem. (Lukas 20:46, 47) Oslim magnnim Devak manvonant. Taka lagon, ami  kallzant thaun magnnem korop gorjechem. Goroz ani poristhiti polloun, ami lhan vo vhodd magnnem korunk zata.

14. ‘Thambonastana magnnem korop’ mhunnchem kitem? Magnnea vixim amkam kitem borem dista?

¹⁴ Ami kitle pavtt magnnem korunk zai? ‘Dis-rat vinoti ani magnnem kor,’ ‘thambonastana magnnem kor,’ ‘sodanch magnnem kor’ oxim utram amkam Bible-ant mellttat. (1 Timotak 5:5; Romkarank 12:12; Lukas 18:1) Hacho orth oso nhoi, ki ami thambonastana dis-rat magnnem korit ravonk zai. Bible amkam sodanch Jehova Deva lagim magnnem korunk sangta. Magnneant ami, Devan dilolea soglea dennea pasot upkar attounk zai. Toxench, amchean tachea lagim modot, buzvonn ani ghottai magonk zata. Amchean zai titlo vell ani zai titlea pavtti Jehova Deva lagim ulounk zata, hem zannam zal’lean amkam kitlem borem dista nhoi! Devan hi sondhi amkam dilea mhunn ami tache khorench upkari asat zalear, magnnem korunk ami kednanch fatti sorchimnant.

15. Amchea magnneant vo dusro amchea pasot magnnem kortana xevottak “Amen” mhunnop kiteak gorjechem?

¹⁵ Magnneachea xevottak “Amen” kiteak mhunnonk zai? “Amen” mhunnttlear, ‘oxench zaum’ vo ‘maglam toxench zaum’. Ami ekttim astana vo dusream mukhar magnnem kortana xevottak “Amen” mhunnop gorjechem mhunn Bible dakhoun dita. (1 Itihas 16:36; Stotr 41:13) Magnneachea xevottak “Amen” mhunnon, ami magtat tem kallzant thaun magtat mhunn dakhoitat. Amchea pasot dusreamnim-i kel’lea magnneachea xevottak, ami monantlea-monant vo vhoddlean “Amen” mhunnop sarkem. Oxem korun  ami, amche ani magnnem kortoleache vichar, ekuch asa mhunn dakhoun ditat.—1 Korintkarank 14:16.

16. Jehova amchea magnneache zobab dita kai?

¹⁶ Jehova Dev amchea magnneank zobab dita kai? Hoi! “Tum [Dev] amchem prarthon aikotai” oxem  Devachem utor sangta. Khorench, Dev lak’khamnim lokanchim magnnim aikota ani tancho zobab dita mhunn, ami khatri dovrunk zata. (Stotr 65:2) Jehova veg-vegllea ritin amchea magnneank zobab dita.

17. Dev amchea magnneanche zobab diunk ainzank toxench aplea her sevokank uzar korta oxem ami kiteak mhunnonk zata?

¹⁷ Jehova amchea magnneanche zobab diunk ainzank, toxench sonvsarantlea aplea sevokank uzar korta. (Hebrevank 1:13, 14) Zaitea zannam sovem oxem ghoddlam. Te apleak, Bible-achi somzonni di mhunn Deva lagim magnnem kortale, ani rokddech tanchea darant Jehovache Sakxi pavle ani tankam zai asli ti somzonni mell’lli. Hea udharonnantlean, ainz porgottnnechea kamant modot kortat mhunn kolltta. Te amkam sot sodhtolea munxam thaim pavonk vatt dakhoitat. (Prokasovnni 14:6) Ami koslea-i gorjek sampoddleant, ani magnnem kortat zalear Jehova Dev amkam adar diunk, bhavarthant aslolea bhavak vo bhoinnik dhaddunk xokta.—Mhonn’nneo 12:25; Jakob 2:16.

18. Jehova Dev povitr xokte udexim, ani Bible-a udexim amchea magnneak zobab koxe dita?

 ¹⁸ Jehova Dev povitr xokte udexim, ani Bible-a udexim amchea magnneak zobab dita. Zaite pavtt to amkam aple povitr xokte udexim vatt dakhoita ani amcher ailolea trasank fuddo korunk ghottai dita. (2 Korintkarank 4:7) Dev amchea magnneanche zobab diunk Bible-a udexim amkam suchounneo dita ani tea adaran amchean bore tharav gheunk zata. Bible vo Bible-acher adarit pustokam vachtana, amkam modot zata tosle vers mellonk xoktat. Zaitea pavtt, Bible-antleo suchounneo amkam amchea sobhechea mittingentui mellttat. Toxench, amchi porva kortolo sobhecho vhoddilui Bible-achea adaran amkam gorjecho sol’lo diunk xokta.—Galasiekarank 6:1.

19. Amchea magnneache zobab mellona oxem amkam dista zalear ami kitem ugddas dovrunk zai?

¹⁹ Amchea magnneak azun zobab mellonk na oxem amkam dista zalear Jehova amchem magnnem aikona mhunn ami chintunk favo na. Jehova sodanch amchim magnnim aikota, ani favo tea vellar aplea khuxe pormonnem to tancho zobab dita mhunn ami ugddas dovrunk zai. Amcheo gorzo kitem ani teo koxeo purnn korcheo, tem Dev amchea poros boro zannam. Bible-ant sanglolea pormonnem ami magot ravchi goroz asa. (Lukas 11:5-10) Oxem korun, ami magtat tem amkam khorench zai ani Dev amchea  magnneak zobab ditolo ho amkam bhavarth asa mhunn ami dakhoun ditolim. Thodde pavtt, ami chintinant tea ritin Jehova amchea magnneank zobab dita. Udharonnak, ami Deva lagim amche dukh-tras pois kor mhunn magnnem kortat astolim. Oslea vellar, Dev te dukh-tras kaddun uddoina punn tea trasant thir ravonk amkam ghottai dita.—Izaias 12:2 vachat.

20. Ami sodanch magnnem kiteak korunk zai?

²⁰ Khorea monan ulo martoleanchim magnnim, ak’khea vixvacho rochnnar Dev aikota mhunn zannam zaun, amkam khub borem dista nhoi! (Stotr 145:18 vachat.) Devan amkam magnnem korchi moladik sondhi dilea dekhun, ami tachea lagim sodanch magnnem korunk zai. Oxem kelear, magnnem aikotolea Jehova Deva lagim amchi ixttagot anik ghott zatoli.