1, 2. Jehovan aple ixtt mhunnttlolea thoddea munxanchim udharonnam diat.

TUMI konnak aplo ixtt mhunn vinchun kaddttolim? Tumkam manvota tem kortat tim munxam tumkam borim distat nhoi? Jea munxak promannikponn ani doiallponn osle bore gunn asat, tanche kodden ixttagot korunk tumi khorench axetolim.

² Devan thoddea munxank aple ixtt mhunn vinchun kaddleat. Udharonnak, Jehovan Abrahamak aplo ixtt mhunnttla. (Izaias 41:8; Jakob 2:23 vachat.) David, Jehovak khuxi haddtta tem kortalo dekhun Devan taka aplea kallzak manvota toslo munis mhunnttlo. (Itihas 13:22) Toxench, Jehova Danielak, “kherit bhaxen venchun kaddlolo monis” mhunntta.—Daniel 9:23.

3. Jehovan thoddea munxank aple ixtt kiteak mhunnttle?

³ Abraham, David ani Daniel hankam Jehovan aple ixtt kiteak mhunnttle? Devan Abrahamak mhunnttlem, “tunvem Mhoji adnia pall’lii.” (Utpoti 22:18) Je lok khaltikaien Jehovachem utor pallttat,  tanche thaim to ixttagot korta. Israelitkarank tannem mhunnttlem, “Mhojea utrak pallo diat, ani Hanv tumcho Dev zatolom ani tumi Mhoji porza.” (Jeremias 7:23) Devachem utor pall’llem zalear, tunvem-i tacho ixtt zaunk zata.

4, 5. Jehova aplea lokank koxi ghottai dita?

⁴ Devache ixtt zal’lean amkam kitem besanvam mellonk xoktat tea vixim chintat. “Sogllea kallzan Apnnak sodtoleank To [Jehova] ghottai dita” mhunn Bible sangta. (2 Itihas 16:9) Jehova amkam koxi ghottai diunk xokta? Stotr 32:8-ant Dev mhunntta, “Hanv [Jehova] tuka updes ditolom, khoinchi vatt dhorchi ti tuka dakhoitolom. Mhoje dolle tujer dovrun tuka budh diun choloitolom.”

⁵ Him utram Jehovak amchi kitli kallji asa, tem dakhoun dita nhoi! To tumkam vatt dakhoitolo ani tea vatten choltana tumkam samballttolo. Tumcher ieupi koxttancho fuddo korchea pasot, to tumkam modot korunk axeta. (Stotr 55:22 vachat.) Tumi kallzantlean Jehovachi seva keli zalear, Stotr boroupea sarkim tumi-i khatren mhunnonk xoktolim, “Hanv Sorvesporak sodanch mhojea dolleam mukhar dovortam; To mhojea uzveak asa mhunnttoch Hanv kodinch halona.” (Stotr 16:8; 63:8) Apleak manvota toslem jivit jieunk, Jehova Dev tumkam modot korunk xokta. Punn tumi oslem jivit jielolem Devachea dusmanak naka, ani taka lagon to tumcher zaiteo addkolleo haddunk xokta.

6. Soitanan munxancher kitem prosn kelo?

⁶ Soitanan Jehovachea raz-odhikaracher koso prosn ubarlo tem ami odheai 11-ant xiklolim. ‘Dev fott marta ani Adanv ani Evek kitem borem ani kitem vaitt tem tharaunk dina astana, onit korta’ mhunn Soitanan Devacher boglant ghatlem. Adanv ani Evek bhurgim zolmon, sonvsar vaddot gelo toso, ‘munis kiteak lagon Devachi seva korta?’ oso Soitanan prosn kelo. To mhunnonk sodhtalo, ‘Lok Devachi seva mogan korina. Mhaka sondhi dilear, hanv khoinchea-i munxak Devachea add vochonk, fosounk xoktam’. Oso prosn tannem Job nanvachea munxa vixim kelo. Ho Job konn aslo, ani Soitanan tachea vixim kitem prosn kelo?

7, 8. (a) Job boro munis aslo mhunn koxem sangonk zata? (b) Soitanan Joba vixim kitem davo kelo?

⁷ Sumar 3,600 vorsam adim Job hea prithumer jielo. To ek boro munis aslolean, tachea vixim Jehovan mhunnttlem, “Tache oslo sonvsarant anink konnuch na; boro ani promannik monis to; to Devak bhieta ani vaittak patt korta.” (Job 1:8) Job Devak manvololo munis aslo.

⁸ Jobak Devan kainch unnem korunk na dekhun to Devachi seva korta mhunn Soitanan davo kelo. Tannem Jehovak mhunnttlem, “Tache [Joba] bhonvtim ani tachea ghora bhonvtim ani sogllea tachea bhattam-vit’tam bhonvtim Tunvem ek voi ghalunk na? To korta titleacher-ui Tunvem axirvad ghalai ani sogllo ganv tachea hinddamnim bhoron ot’ta. Tuzo hat vistarun tache girestkaiek bott mat lai  ani to Tujea tonddar Tuka xirap ghalta vo na tem polle.”—Job 1:10, 11.

9. Soitanachea hea prosnak zobab diunk Jehovan kitem kelem ani kiteak?

⁹ Job fokot aplea faideak lagon Devachi seva korta mhunn Soitan mhunntta. Jobacher tras aile zalear to Devachea add voitolo oxem to dakhounk sodhtalo. Soitanachea hea prosnak zobab diunk Jehovan kitem kelem? Soitanan Jobachea visvaxiponnacher prosn ubarlolo mhunnttoch, tacher tras haddunk Jehovan Soitanak porvangi dili. Oxe toren, Job Devacho khoro mog korta vo na, tem sarkem kollon ietolem aslem.

10. Jobacher kosle tras aile ani tancho Jobacher kitem porinnam zalo?

¹⁰ Soitanan veg-vegllea ritin Jobachi porikxa keli. Jobachim zonvaram chorun vhelim ani urlolim moron gelim. Tachea sevokank jivexim marle. Oxe toren Job gorib zalo. Uprant eka vaddollant, tachim dha-ui bhurgim moron gelim. Itlem soglem ghoddlem torui, “Joban patok korunk na, nhoi mhonn Devak kosloch opman korunk na.”—Job 1:22.

11. (a) Jobacher Soitanan khoincho dusro prosn ubarlo ani tea vixim Jehovan kitem kelem? (b) Bhirankull duens ailear pasun Joban kitem korunk na?

¹¹ Soitanan har manunk na. Jobachi girestkai na zali, tache sevok ani toxench tachim bhurgim moron gelim, torui Job thir ravlo mhunn Soitanan polloilem. Tannem chintlem, Jobacher duens dhaddlem zalear to Devak soddun ditolo. Jehovan Soitanak porvangi dili, ani Soitanan Jobacher ek bhirankull duens  dhaddlem. Torui astana, Joban Deva voilo aplo visvas halonk diunk na. Tannem mhunnttlem, “Mhojea promannikponnan hanv thir ravtolom.”—Job 27:6.

12. Soitanan kel’lea prosnacho Joban koso zobab dilo?

¹² Soitan apnnacher tras haddtta mhunn Jobak khobor naslem. Toxench Soitanan Devachea razodhikaracher prosn ubarla hem-ui taka khobor naslem. Tacher ailolea soglea dukh-trasam pasot Dev zobabdar mhunn to somzotalo. (Job 6:4; 16:11-14) Tori astana to Jehovak visvaxi ravlo. Ani oxem kel’lean, Joban apunn fokot aplea faideak lagon Devachi seva korina mhunn dakhoun dilem.

13. Job Devak visvaxi ravlolean kitem zalem?

¹³ Job Devak visvaxi ravlolean, Soitanachea prosnacho sarko zobab diunk Jehovak favo zalem. Job Jehova Devacho khoro ixtt aslo ani tachea visvaxiponnak lagon Devan taka zaitim besanvam dilim.—Job 42:12-17.

14, 15. Soitanan soglea munxancher boglant ghatlam mhunn koxem kollon ieta?

¹⁴ Soitanan fokot Jobachea promannikponnacher prosn korunk na. Tannem tumchea-i promannik-ponnacher prosn kela. Hem amkam Mhonn’nneo 27:11-ant kollon ieta. Thoim mhunnttlam, “Xannom zaunk xik mhojea puta, ani mhojem kalliz khoxi kor, Tea udexim, mhaka okmanaitat tankam, mhoje lagim zobab astolo.” Him utram Bible-ant, Job moron khub vorsam uprant boroilolim. Hachea voilean, Soitan ani tache sangati azun porian Devacho okman kortat ani  tachea visvaxi sevokanchea promannikponna vixim prosn kortat mhunn amkam kollon ieta. Jehovak manvota tea ritin jielim zalear, ami Soitan fottkiro mhunn dakhoun, Jehova Devachem kalliz khuxal kortolim. Ani oxem korunk, amkam amchea jivitant bodol korcho poddlear pasun, tumi tem khuxen kortolim nhoi!

¹⁵ Soitanan mhunnttlem, “Aplo jiv vattaupak monis kiteim korta.” (Job 2:5) “Munis” oxem mhunnon Soitan, fokot Jobak nhoi punn soglea munxancher boglant ghaltalo. Soitanan soglea munxanchea promannikponnacher prosn kelo. Tumi Devache kaide moddlole Soitanak zai ani taka lagon to tumcher zaite tras ani tallnneo haddtta. Hem to koso korta?

16. (a) Soitan khoincheo don vatto uzar korun munxank Deva koddlean pois vhorta? Soitan tumcher koxeo addkolleo haddunk xokta?

¹⁶ Lokank Devachea add vhoronk, Soitan zaiteo vatto uzar korta ani tea vixim ami odheai 10-ant polloilem. Ek vatt mhunnttlear, to eka “goroz ghaltolea xinva sarko, apnnak konn-ui girasunk sampddot gai mhonn polleun tumche bhonvtonnim firot asa.” (1 Pedru 5:8) Soitan thodde pavtt tumchea ixttam ani soiream udexim tumcher dobhav haddtta. Tumi Bible xiktat ani tea pormonnem choltat tem polloun, tim tumcher addkoll haddunk xoktat. * (Juanv 15:19, 20) Dusri vatt mhunnttlear, Soitan thodde  pavtt “tezvont devdutachem sovong gheun dixtti poddta.” (2 Korintkarank 11:14) Soitan veg-veglle fas uzar korun Devan dakhoilolea jivitache vatte thaun amkam kuxin kaddtta. Oso ek fas zaun asa niraxiponn. Niraxiponnak lagon, ami Devachi seva korunk upkarona oxem amkam disonk xokta. (Mhonn’nneo 24:10) Soitan ‘goroz ghaltolea eka xiva’ sarko ieum vo ‘tezvont devduta’ sarko ieum, tacho ud’dhex ekuch. To tras vo tallnni dhaddun tumkam Devache sevent addkoll haddunk sodhta karonn tumi Devachi seva bond kel’li taka zai. Tor, Joba bhaxen Soitanak fottkiro mhunn dakhoun, tumi Devak koxim visvaxi ravtolim?

17. Jehovacheo adnea pallop kiteak gorjechem?

¹⁷ Devak manvota tea ritin jivit sarun, tumi Soitanak fottkiro mhunn dakhounk xoktat. Hem tumi koxem korunk zata? Bible sangta, “Sogllea tujea kallzan, sogllea tujea otmean, sogllea tujea bollan Sorvespora tujea Devacho tum mog” kor. (Dusri Somurt 6:5) Deva pasot tumcho mog vaddtta toso, tachea kaideam pormonnem cholonk tumkam urba mellttoli. Apostl Juanvan mhunnttlem, “Devacho mog korop mhonnge Tacheo adnia pallop.” Ani ami kallzant thaun Jehovacho mog kortat zalear ‘Tacheo adnia pallop zhodd nhoi.’—1 Juanv 5:3, 4.

18, 19. (a) Jehovan amkam kosleo adnea dileat? ( pan 140 polloiat.) (b) Amchea lagim zaina tem Jehova amkam korunk sangona mhunn koxem kolltta?

¹⁸ Jehovan amkam kosleo adnea dileat? Thoddeo adnea amche vagnnuke vixim asat. Pan 140-acher,  “ Jehovak manvona ti vagnnuk nakarat” hem boks polloiat. Tantunt, Jehova dves korta tim kortubam dakhoileant. Thoddim kortubam tumkam ghoddie titlim vaitt oxim dischimnant. Punn thoim dilolea vachpancher niall kelea uprant, Dev heo adnea amchea boreak lagon dita mhunn tumkam kollon ietolem. Tea adnea pormonnem jivitant bodol korunk tumkam kotthin zaunk xokta. Torui astana,  Devak manvota tem kelem zalear tumkam jivitant dhadosponn ani khuxalkai mellttoli. (Izaias 48:17, 18) He bodol korunk amchean zaina oxem nhoi. Oxem ami kiteak mhunnonk zata?

¹⁹ Amchea lagim zaina tem Jehova amkam kednanch korunk sangona. (Dusri Somurt 30:11-14 vachat.) Amchean kitem korunk zata vo zaina tem Dev amchea poros boro zannam. (Stotr 103:14)  Apleo adnea pallunk Dev amkam modot korunk xokta. Apostl Paulun mhunnttlem, “Aiz porian tumcher aileat teo tallnnio sogllea mon’xank ietat tosleoch. Devacher visvas dovrat: tumchean sosunk zata tea-von khor tallnni tumcher ieunk To kednanch nirmicho na; punn kosli-i tallnni aili zalear, ti sosunk To tumkam boll ditolo ani oxem tantlim bhair sorunk To tumkam vatt dakhoitolo.” (1 Korintkarank 10:13) Thir ravonk Jehova tumkam apli vorti xokti diun modot kortolo.—2 Korintkarank 4:7.

20. Tumi kosle bore gunn apnnaunk zai ani oxem korop kiteak gorjechem?

²⁰ Jehovak manvona tea vagnnuke thaun pois ravop, itlench puro nhoi. Dev jea vostuncho mog korta, tancho ami-i mog korunk zai. (Romkarank 12:9) Eka munxak, tumchea sarkech gunn, vagnnuk ani sobhav asa zalear, tumi tanche ixtt zaunk sodhtolim nhoi? Jehova-i tosoch korta. Taka lagon, Jehovak boreo dista tea vostuncho mog korat. Jehova konnak aple ixtt mhunntta tem amkam Stotr 15-ant kolltta. (Stotr 15:1-5 vachat.) Jehovache ixtt povitr xoktechea adaran aplea jivitant zaite bore gunn apnnaitat. Te xokte udexim tankam, mog, khuxalkai, xanti, sosnikai, moipas, boreponn, visvas, dulobai ani ap-domaunni, he bore gunn apnnaunk modot zata.—Galasiekarank 5:22, 23.

21. Devak bore distat tosle gunn apnnaunk tumkam koxi modot zatoli?

²¹ Bible sodanch vachun ani tachi xikounn gheun, Jehovak bore dista tosle gunn apnnaunk tumkam  modot zatoli. Tumchea pasot Devachi khuxi kitem asa ti zannam zal’lean, Dev chint’ta tech bhaxen tumi-i chintunk pavtolim. (Izaias 30:20, 21) Tumchea kallzant Jehova Deva pasot mog vaddtta toso, taka borem dista tem korunk tumkam urba mellttoli.

22. Jehovak manvota tea pormonnem jielear tumkam kitem mellttolem?

²² Jehovak manvota tem korunk sompem nhoi. Toxem korunk jivitant amkam thodde bodol korchi goroz asa. Ami adleo vaitt sonvoim-eo ani gunn soddun, novim munxam zaunk zai mhunn Bible sangta. (Koloskarank 3:9, 10) Stotr boroinnarean mhunnttlem, Jehovachi adnea palltta to munis, “vhodd inam zhoddta.” (Stotr 19:11) Jehovak manvota tea pormonnem jielear tumkam khub besanvam mellttolim. Titlench nhoi, Soitanan ubarlolea prosnak zobab diun tumi Jehovachem kalliz khuxal kortolim.