1, 2. Aichea disamnim amkam konn asro dita?

CHINTAT, tumi cholon voita ani okosmat ek vadoll sutt’tta. Thoddeach vellan, pausachea kallea kupamnim mollob bhoron ieta. Zoglam ani goddgodd marunk lagta. Polloita mhunnosor, ghosghoxeanim paus suru zata. Tumi hea-vatten tea-vatten polloun asro sodhtat. Tednanch, rosteachea kuxik tumkam ek ghor dixtti poddtta. Tem ghor borem ghott bandlam ani thoimsor tumi asro ghetat. Tea ghorant pavtoch khorench tumkam kitlo suseg mellttolo nhoi!

² Jea disamnim ami ravtat, te vadollache dis koxe asat. Sonvsarbhor, vaitt ghoddnnuko khub vaddot asat. Punn, Jehova lagim amcho sombond ttuttcho na ani sasnachem jivit ami  hogddauchimnant, oso asro amkam mellonk xokta. Oso asro amkam konn ditolo? Bible-ant Stotr boroinnar Jehovak mhunntta, “Tum Mhozo Asro, mhozo Kil’lo, mhozo Dev: Tujer visvas dovortam!”—Stotr 91:2.

3. Ami Jehovak amcho asro koso korunk zata?

³ Ak’khea sonvsaracho rochnnar Jehova Dev, amkam asro dita. To sogleam poros xoktivont aslolean toch amkam soglea vaitta thaun rakhonn diunk xokta. Amchea add kitench ieunk to diuncho na. Amcher kitem-i vaitt ailear pasun, to tem, poilim aslem toxem sarkem korunk xokta. Jehovak amcho asro kortolim zalear ami kitem korchi goroz asa? Ami tacher purnn visvas dovrunk zai. Bible mhunntta, “Devachea mogan thir ravat.” (Judas 21) Jehova Deva lagim amchi ixttagot korun, ami tachea mogant ghott ravop gorjechem. Oxem kel’lean, to amcho asro zatolo mhunn ami khatri dovrunk zata. Punn tachea mogant ghott ravtolim zalear ami kitem korchem poddttolem?

4, 5. Jehova Dev aplo mog koso dakhoun dita?

⁴ Devachea mogan ravtolim zalear Jehovan amkam koso mog dakhoila, tem ami somzon gheunchi goroz asa. Hea pustoka udexim, Bible-antlean xikleant teo xikounneo tumi ugddas korunk zata. Jehova Dev amcho rochnnar zal’lean, tannem hi prithum ek ghor koxem amkam dilam. Ani tantunt tannem amkam, jevonn-khann, udok, sorvbhonvtim veg-vegllea torechim zonvaram ani sobit zhaddam dileam. Bible-acho boroinnar zal’lean, Devan amkam aplem nanv ani aplea gunnam vixim tantunt kolloilam. Toxench, amchea pasot tannem aplea ekleach putak dhaddun dilo, tachea-i vixim Bible-ant boroilolem asa.  (Juanv 3:16) Ani hachea udexim amkam ek boro fuddar mellttolo mhunn khatri zata.

⁵ Devan amchea pasot anikui zaitem kelam. Jehova Devan aplem sorginchem Raj mhunnttlear Mesiasachem Raj ghoddun haddlem. Ani tem Raj beginuch hea sonvsarantle sogle dukh-tras kaddun, hi ak’khi prithum ek sobit bag kortolem. Ami sasnak hea prithumer khuxalkaien ani xantin jieunk xoktolim! (Stotr 37:29) Toxench, aichea-i disamnim ami amchem jivit khuxalkaichem koxem korunk zata, tea vixim pasun Devan sanglolem asa. Aplea lagim khoinchea-i vellar ulounk Devan amkam magnnem korchem dennem dilam. Munxakullak ani dor eklea pasot aslolo aplo mog Jehova Dev hea soglea ritimnim dakhoita.

6. Jehova Devan tumkam dakhoilolea moga pasot tumi kitem kortolim?

⁶ Jehova Devan dakhoilolea moga pasot hanvem kitem korunk zai? Hea prosnak tumi kitem zobab ditolim? Zaitim zannam ghoddie, “Hanvem-i Jehova Devak mog dakhounk zai” mhunn sangtolim. Tumcho-i zobab hoch asa kai? Jezun sogleam poros vorti adnea diloli tantunt mhunnttlem, “Sogllea tujea kallzan, sogllea tujea jivachea bollan, ani sogllea tujea monan, Sorvespora tujea Devacho mog kor.” (Matev 22:37) Jehovacho mog korunk tumkam zaitim karonnam asonk xokta. Tumi soglea kallzan, bollan ani monan Jehovacho mog kortolim zalear, ho mog fokot tumchea kallzant aslear puro kai?

7. Jehova Devacho mog korop mhunnttlear kitem? Udharonn diun somzaiat.

 ⁷ Amchea kallzant Deva pasot mog asa mhunn, ami khoreaninch Devacho mog kortat oxem mhunnonk zaina. To mog dusreank dison ieunk zai. Udharonnak, ek ap’polachem zhadd zatolem zalear, ap’polachi bi gorjechi asa. Punn tumkam ap’pol khaunk zai aslo tednam, konnem-i tumkam ek ap’polachi bi haddun dili zalear tumi dhadoxi zatolim? Toxench Jehova pasot kallzant mog asop, hi fokot ek survat. Bible mhunntta, “Devacho mog korop mhonnge Tacheo adnia pallop. Ani Tacheo adnia zhodd nhoi.” (1 Juanv 5:3, 4) Ami Devacho khoroch mog kortat zalear, ami tacheo adnea pallttolim ani to mog amchea kamamnim dison ietolo.—Matev 7:16-20 vachat.

8, 9. Ami Jehova Devacho mog kortat ani tache upkari asat mhunn koxim dakhoitolim?

⁸ Devacheo adnea pallun ani tantuntle sol’le apnnaun  ami Jehova Devacho mog kortat mhunn dakhoun ditolim. Oxem korunk amkam ghoddie kotthin disot punn tem titlem kotthin na. Jehovacheo adnea, amkam amchem jivit bore toren ani khuxalkaien jieunk modot kortat, teo zhodd nhoi. (Izaias 48:17, 18) Jehovan dilolea sol’lea pormonnem jieun, tannem amchea pasot kelam tache ami upkari asat mhunn dakhoun ditat. Punn choddxim zannam Devachea sol’leam pormonnem jienant. Oslea lokam sarkim ami zaunk zaina. Jezu prithumer aslo tednam-i oxe lok asle. Jezun bore kel’lea 10 zannam modlea, ekleanuch ieun Jezuche upkar attoile. (Lukas 17:12-17) Hea eka munxa sarkim, ami-i upkari aschi goroz asa. Ami tea nov zannam sarkim onupkari zaunchim nhoi.

⁹ Toxem zalear, ami Jehovacheo khoincheo adnea pallunk zai? Hea pustokant ami, Jehovachea khubxea adnea vixim xikleant. Thoddeo adnea ami porot ugddasak haddunk zata. Devachea mogant ghott urtolim zalear ami tacheo adnea pallop gorjechem.

10. Jehova Devachem ginean gheit ravop kiteak gorjechem?

¹⁰ Jehova Deva vixim xikot ravlear ami tache ghott ixtt zaunk xokta. Ani hem xikop ami kednanch bond korunk zaina. Thonddechea disamnim ami bhair asat zalear, ami ujea koddenuch ubim ravon gormi ghetolim nhoi? To uzo ami bond zaunk diunchimnant. Ani to uzo palvona zaunk ami tantunt anik lakddam ghalit ravtolim. Lakddam uzo pettoun dovorta teach toren, Jehova Devachem “ginean” gheit ravlear, tachea pasot aslolo amcho mog ghott korunk modot zatoli.—Mhonn’nneo 2:1-5.

11. Jezuchea xikounnecho tachea xisancher kitem porinnam zalo?

 ¹¹ Aplea xisamnim Deva pasot ani tachea utra pasot aslolo tancho mog vaddoit ravlole Jezuk zai aslem. Porot jivont zalea uprant, Jezun aplea don xisank, aplea vixim ghoddon ailoleo thoddeo bhasaunneo sangleo. Tannem oxem kel’lean tancher kitem porinnam zalo? Tannim mhunnttlem, “To vatter amche kodde uloitalo ani Povitr Pustokancho orth amkam ditalo tednam, amchem kalliz bhitorle-bhitor hulpotalem nhoi?”—Lukas 24:32.

12, 13. (a) Deva pasot ani tachea utra pasot zaitea sonvsari lokancho mog kitem zala? (b) Amcho mog xell-moddo zainam zaunk kitem korop gorjechem?

¹² Bible khorench kitem xikoita tem tumi poilinch aikolem tednam, tumchem kalliz khuxalkaien bhorlem astolem nhoi? Zaiteank oxench zalem. Punn tea uprant tumi ti khuxalkai ani to mog vaddoit ravchi goroz asa. Ami sonvsari lokam sarkim zaunk zainam. Tanchea vixim adinch Jezun mhunnttlolem, “zaiteancho mog xell-moddo zatolo.” (Matev 24:12) Jehova Deva pasot ani tachea utra pasot aslolo tumcho mog xell-moddo zainam zaunk tumi kitem korchem poddttolem?

¹³ Tumi Jehova Deva vixim ani Jezu vixim xikot ravchi goroz asa. (Juanv 17:3) Toxench, Devachea utrantlean tumi xiktat tacher, tumi niall korunk zai. Tumchean tumkanch prosn korunk zata. ‘Hantuntlean mhojean Jehova Deva vixim kitem xikonk zata? Mhojea soglea kallzan, bollan ani monan Jehova Devacho mog korit ravonk mhaka hantunt anik kitem modot melltta?’ (Stotr 119:97 vachat.) Oxe toren niall kelear, Devachea mogant ghott ravonk tumkam modot zatoli.

14. Jehova Devachea mogant ghott ravonk magnnem amkam koxem modot korta?

¹⁴ Jehova Deva lagim sodanch magnnem korun  tumi tachea pasot tumcho mog ghott korunk zata. (1 Tesalonikekarank 5:17) Deva lagim magnnem korop ho ek vhodd soeg mhunn ami hea pustokachea odheai 17-ant xikleant. Dog ixtt eka-meka lagim sodanch mon-soddun uloitat tednam tanchi ixttagot ghott zata. Teach toren, ami Jehova Deva lagim sodanch magnneant uloilim zalear, tachea thaim amchi ixttagot vaddttoli. Ami porot-porot ekuch torechem magnnem korunk zaina. Ami magtat tem kallzant thaun ieunk zai. Ek lhan bhurgo aplea bapai lagim uloita tea toren ami Jehova lagim magnneant ulounk zai. Deva lagim magnnem kortana ami respedan, monantlean ani kallzantlean ulounchi goroz asa. (Stotr 62:8) Sodanch Bible-antlean xikop ani Deva lagim kallzantlean magop khub gorjechem. Ani oxem kel’lean, Devachea mogant ghott ravonk amkam modot zata.

15, 16. Rajeachem porgottnnechem kam itlem molachem ani ek bhanddar oxem ami kiteak mhunnonk zata?

¹⁵ Ami ekttim boson kortat to Bible-acho obheas ani magnnem Devache bhoktecho ek bhag zaun asa. Punn hem dusreank disona. Anik ek toren ami Devachi bhokti kortat. Tem mhunnttlear, ami patietat tem dusreank kolloun. Tumi Bible-antlean xikleant tea vixim konnam-i lagim uloileant kai? Oxem kel’lean tumkam khub khuxalkai mell’llea astoli. Jehova Deva vixim ami xikleant tem dusreank sangtat tednam, soglea Kristavank dilolea eka gorjechea kamachi ami survat kortat. Tem kam mhunnttlear Devachea Rajeachi bori khobor porgottop.—Matev 24:14; 28:19, 20 vachat.

 ¹⁶ Apostl Pauluk porgottnnechem kam molachem aslem. Tannem hea kamak ek bhanddar oxem mhunnttlam. (2 Korintkarank 4:7) Jehova Deva vixim ani tachea ud’dhexa vixim dusreank sangop hem ek sogleant borem kam zaun asa. Hem tumkam, sogleant borea dhonian dilolem kam ani tem kel’lean tumkam khub besanvam mellttolim. Hem kam korun, tumi Deva vixim zannam zaunk sodhtat tea lokank, Deva thaim ixttagot zoddunk ani jivitache vatter cholonk modot kortolim. Hea kamantlean kitlem dhadosponn melltta nhoi! Jehova Deva vixim ani Bible-antlea sotam vixim dusreank sangon tumcho bhavarth ghott zatolo ani Deva pasot aslolo tumcho mog vaddttolo. Hem soglem polloun Jehova khub khuxi zata. (Hebrevank 6:10) Choddso vell hem kam korit ravlim zalear Devachea mogant anik ghott zait ravonk tumkam modot zatoli.—1 Korintkarank 15:58 vachat.

17. Porgottnnechem kam taktiken korop kiteak gorjechem?

¹⁷ Porgottnnechem kam taktiken korop gorjechem. Bible mhunntta, “sondex porgott kor; lokak to manom vo na manom, to tum tanchea kanar ghalit rav.” (2 Timotak 4:2) Lokamnim aikom vo na aikom, ami porgott korit ravonk zai. Oxem korop kiteak gorjechem? Devachem utor mhunntta, “Sorvesporacho Vhoddlo Dis lagim pavla, sarko lagim asa, begobeg ieta.” (Zefania 1:14) Jehova Dev hea sonvsarantlem soglem vaittponn beginuch kaddun uddoitolo. Hachea vixim lokank kollovop gorjechem. Soglea lokamnim Jehova Dev Sorvpodvedar mhunn atanch vollkhon gheunk zai karonn tacho dis “chodd lambai korinastana” ietolo.—Habakuk 2:3.

18. Ami ektthaim ieun Devachi bhokti korop kiteak gorjechem?

¹⁸ Jehova Devachi bhokti korunk ami ektthaim  ailolim taka zai. Takach lagon Bible sangta, “Pritimog dakhounk ani boreo kornnio korunk ekamekak hurba diunk vavrum-ia. Zomati bhorun ektthaim zaunchi amche modem sonvoi asa ti thoddim zannam moddtat. Ami toxem korchem nhoi. Portench zalear, jitlo ‘Somiacho Dis’ lagim pavta mhonn polletanv, titlim ami ekamekak dhir dium-ia.” (Hebrevank 10:24, 25) Amchea bhav-bhoinnam sangata mittingent ektthaim zatat tednam, Jehova Devak mhoima diunk ani tachi bhokti korunk amkam bori sondhi asa. Oxem korun ami eka-mekak urbeborit korunk xoktat.

19. Sobhentlea bhav-bhoinnam thaim amcho mog ani ixttagot vaddounk ami kitem korunk zai?

¹⁹ Ami Jehovachea sevokam sangata sobhent mellon ietat tednam tanchea thaim amcho mog ani ixttagot vaddot voita. Jehova Dev amche bore gunn polloita toxench ami-i amchea bhav-bhoinnanche bore gunn pollounchi goroz asa. Sobhent ietat tim chuk korunk xokonant oxem ami somzonk zainam. Soglim Devachea utra pormonnem cholcho proitn kortat. Punn ami soglim kednam na kednam chuktat. (Koloskarank 3:13 vachat.) Jehova Devacho mog kortat tanchea sangata, tumchi ixttagot vaddoiat ani tednam Deva thaim tumchi ixttagot vaddttoli. Devacho mog kortolea bhav-bhoinnam sangata tumi Devachi bhokti korit ravlim zalear, Devachea mogant ghott ravonk tumkam modot zatoli. Kallzant thaun Jehova Devachi bhokti korun, tachea mogant ghott ravlear tumkam zaitim besanvam mellttolim.

20, 21. “Khorem jivit” mhunnttlear kitem ani tem amkam kiteak zai?

²⁰ Apleak visvaxi ravtolea sevokank Jehova Dev jivit  ditolo. Punn hem koslem jivit? Tumi atam jietat tem khorem jivit mhunn tumkam dista kai? Ami svas ghetat, khatat ani pietat mhunnttoch hench amchem jivit oxem tumkam dista astolem. Ani jivitant amkam khuxalkai bhogta tednam, hench khorem jivit oxem ami mhunnonk xokta. Punn Bible-a pormonnem polloilem zalear, khoreponnim munis aiz jieta tem khorem jivit nhoi.

²¹ Devachem utor amkam, “ekuch khorem Jivit” zoddun gheunk sangta. (1 Timotak 6:19) Him utram, “khorem jivit” fuddarak mellttolem mhunn amkam dakhoun dita. Ami sompurnn zalea uprant, Devan amkam jieunk rochlolim toxim jietolim. Sobit zal’lea bagent, ami bore bolaiken ani khuxalkaien sasnak jietolim. Ani hem sasnachem jivit amchem “khorem jivit” zaun asa. (1 Timotak 6:12) Devan amkam kitlo boro bhorvonso dila nhoi!

22. Tumkam “khorem jivit” koxem mellttolem?

²² Amkam “khorem jivit” koxem mellonk xokta? Hea vixim Kristanvank sangtana, Paulu mhunntta, “Borem tem korat, borea kornniamnim girest zaiat.” (1 Timotak 6:18) Oxem kortolim zalear, ami Bible-antlean xikleant tem amchea jivitant apnnavop gorjechem asa. Toxem zalear, boreo korneo korun ami “khorem jivit” zoddunk zata mhunn Paulu sangonk sodhtalo kai? Na. Hem jivit amchean zoddunk zaina punn tem amkam Devan ‘funkea dakhoilolea doiallaiek’ lagon melltta. (Romkarank 5:15) Visvaxi ravon, Jehova Devachi seva kortat tankam to besanvamnim bhorta. Tumkam “khorem jivit” mell’llolem taka zai. Ani Devachea mogant ghott asat tankanch hem khuxalkaiechem jivit mellttolem.

23. Devachea mogant ravop kiteak gorjechem?

 ²³ Ami amkanch prosn korunk zai zoxe, ‘Bible sangta tea pormonnem hanv Devachi bhokti korta kai? Dor ek disa, ami Bible-ant sanglam tea pormonnem choltat zalear, ami sarkea vatter asat mhunn amkam kollon ietolem. Jehova amcho asro zatolo. Hea vaittovea sonvsarant to aplea visvaxi lokank aplea asrea khala dovortolo. Jehova Dev amkam fuddarak novea sonvsarant jivit ditolo. Tea vellar ami soglim kitlim khuxal astolim nhoi! Nimannea disamnim ami Devak visvaxi ravlim mhunn amkam borem distolem. Khorench atam ami Devachea mogant ghott ravlim zalear, fuddarak amkam “khorem jivit” mhunnttlear, sasnachem jivit mellttolem.