JEZUCHEA mornnacho dis ugddasak haddat mhunn Kristanvank adnea diloli. Hea disak “Somiachem Rat Jevonn” oxem-i mhunnttlam. (1 Korintkarank 11:20) Hea disacho  ugddas korop kiteak gorjechem? To kednam ani koso monoupacho?

Jezucho zolm zaun, 33 hea vorsa, Judev lokanchea Paskachea rati, tannem hea somarombachi survat keli. Hem Paskachem fest vorsak ek pavtt, Nisan mhoineachea 14 tarker zatalem. Ho mhoino, Mars mhoineachea poilea sumana uprant, chondrim dixtti poddtta tednam suru zatalo. Tea disa thaun 13 dis mezun, suria buddlea uprant te Paskachem fest monoitale.

Jezun aplea apostlam sangata Paskanchem fest monoilea uprant, Judas Iskariotak bhair kaddlo ani Somiachea Rat Jevnnacho somaromb monoilo. Paskachea festachea zagear atam, ‘Somiachea Rat Jevnnacho’ somaromb monoupacho aslo. Hem fest vorsak ekuch pavtti zatalem taka lagon, ho somaromb vorsak ekuch pavtt korpacho aslo.

Matev boroita, “Te jevtastana Jezun undo ghetlo, Devak dhin’vasun to moddlo, to xisank dilo ani mhollem: ‘Gheiat ani khaiat, hi Mhoji Kudd.’ Magir Tannem patr ghetlem ani Devak dhin’vasun tem tankam dilem ani mhollem: ‘Tumi somest hantlem piet: hem Mhojem Rogot, Korarachem Rogot; sogllea mon’xank patkachem bhogsonnem zoddun gheunchea khatir tem Hanvem varounchem asa.’”—Matev 26:26-28.

Hea vellar Jezun, unddeak apli kudd ani soreak aplem rogot kelem, oxem thodde mantat. Punn apostlank ho unddo vantt’ttana, Jezuchi kudd asa toxich asli. Toxem zalear, tannim Jezuchea kuddichem mas khalem ani tachem rogot piele mhunn ami koxem sangonk xokta? Eka munxachem mas dusrea munxan khavop chukichem zatalem ani tem Devachea kaidea add aslem. (Utpoti 9:3, 4; Levi-Xastr 17:10) Lukas 22:20-ant Jezun mhunnttlem, “Hem patr Mhojea Rogtan Novo Korar: hem Mhojem Rogot tumche pasot Hanvem varounchem asa.” Tor, Jezun oxem mhunnttlolem tednam, tem patr bodlon “Novo Korar” zalem kai? Toxem zaunk na, karonn korar korop mhunnttlear ek vost nhoi, to uloun, na zalear boroun kortat.

 Unddo ani soro fokot ek khunna koxi asli. Ho unddo, Jezuchi sompurnn kudd dakhoun ditalo. Paskachem jevonn zalea uprant, urlolea unddeantlo ek unddo Jezun uzar kelo. Tantunt khomir vo fug naslem. (Suttka 12:8) Bible choddxe pavtt, patkachi vo khotteponnachi sor fugik korta. Teach bhaxen, Jezun bolidan kel’li sompurnn kudd dakhounk, fug naslolo ho unddo uzar kel’lo. Tachea kuddint kainch patok naslem.—Matev 16:11, 12; 1 Korintkarank 5:6, 7; 1 Pedru 2:22; 1 Juanv 2:1, 2.

Tambddo soro Jezuchem rogot dakhoun dita. Novo korar lagu zaunk, hem rogot gorjechem aslem. Apnnem hem rogot, “Patkachem bhogsonnem” mellchea pasot varoilem mhunn Jezun sanglolem. Ani taka lagon eka munxan, Devachea nodre mukhar patkantlean nitoll zaun, Jehova sangata novea korarant bhitor soronk zata. (Hebrevank 9:14; 10:16, 17) Hea korara udexim, 1,44,000 visvaxi Kristanv sorgar vochonk xoktat. Thoim te raza ani iadnik zaun, munxam pasot zaitim besanvam haddttole.—Utpoti 22:18; Jeremias 31:31-33; 1 Pedru 2:9; Prokasovnni 5:9, 10; 14:1-3.

Hea unddeant ani soreant konn vanntto gheunk xokta? Je konn novea korarant asat vo sorgar voiche asat, tanninch ho unddo khaunk zata ani soro pieunk zata. Sorgar vochon raza zaunk vinchun kaddleat mhunn, Devachi povitr xokti tankam khatri korun dita. (Romkarank 8:16) Te Jezu sangata kel’lea Rajeachea korarant-ui asat.—Lukas 22:29.

Punn hea prithumer sasnak jieunk mellttolem tea lokam vixim kitem? Te-ui Jezuchea adnea pormonnem, Somiachea Rat Jevnnak ietat, punn to unddo khainant ani soro pienant. Jehovache Sakxi, vorsak ek pavtt, Nisan mhoineachea 14 tarker suria buddlea uprant, Somiachea Rat Jevnnacho somaromb monoitat. Sonvsarbhor thoddech lok sorgar voitole, torui astana, ho somaromb soglea khorea Kristanvank khub moladik asa. Hea somaromba udexim, Jehovan ani Jezu Kristan dakhoilolo mog soglim ugddasak haddttat.—Juanv 3:16.