APLEM jivit bodol’lea uprant, to hurben Devachea Rajachem xubhvortoman porgott’talo. Eka kallar dusreank dhumallo ditalo monis, takach atam dhumalle sosunk poddle. Hea thoko naslelea dhormdutan Devachea Rajachem xubhvortoman porgottunk, lagim ani pois zaiteo porgottnecheo bhonvddeo marleo, je udexim monxakulla khatir Devacho survatecho udhex ghoddon ietolo.

Listrent, poilich porgottnechi bhonvddi kortana, Paulun zolmank thaun longddo aslelea monxak boro kelo. Te lok Pauluk ani tachea borobor provas kortelea sangateak Barnabasak dev mhonnon huel marunk lagle. Lok tankam dev mhonnon iodn bhettoitale te dogaimcheanui addaunk zaina zale. Uprant Pauluchea dusmanachem aikun, heach zomean taka fatrailo ani melo mhonn somzun taka soddun gele. Paulu salvar zalo ani vellar xarant ieun dhirvont utranim xisank ghottai dili.

Thodde Kristanv Judev videxi bhavarteam lagim Moizesache adniacho bhag pallunk kobul zavunk zai mhonn vadd vivad korunk lagle. Ho proxn gheun Paulu Jerusaleant dhormdutam ani zanntteanxim gelo. Devachea utrachi bariksannin topasni kelea uprant ani Devachea Povitr Atmeachea adaran tannim sobhank, kudde devam vixim, rogot xevchea vixim, ani gomtti pillun marlele monzati vixim ani pozoddpona vixim pois ravunk borovun bori budh dili. Osleo adnia “gorjecheo” punn he updes pallunk Moizesachi Somurt pallpachi goroz nasli.—Dhormdutancho Itihas 15:28, 29.

Porgottneche dusre bhonvddent, Paulun Bereiak, atam Grik mhunnttat thoim bhett dili. Thoim ravtelea Judevanim Devachem utor hurben man’nun ghetlem ani tem khorem zalear polleunk tim dor-disa Povitr Pustok barkaien topastalim. Anink ek pavtt taka virodh ailo dekhun taka Atenant vochunk poddlem. Atenant vidvan lokachea mukhar, Paulun ek khoddegant bhaxon divun, ikmotin, somjikaien ani boreak poddta toslem ulovunk ek dekh dovorli.

Porgottneche tisre bhonvdde uprant, Paulu Jerusaleak gelo. Thoim to mondirant gelo tedna, kaim Judev uchamboll zale ani taka te jivexim marunk sodtale. Romi soinik modem poddle ani Pauluchi topasni keli. Apunn Romi nagrik dekhun, tannem Romi razpal Felixa fuddeant apli rakhonn korunk maglem. Paulucher ghatlole arop sidh korpak Judevam lagim koslech purave nasle. Ani ek Romi razpal Festus apleak Judevanchea hatanim ghalina zavunk Paulun mhollem: “Hanv Somrazacho nirnnoi magtam.” Festusan zabab dilo “Somraza fuddeant tum ubo ravtoloi.”—Dhormdutancho Itihas 25:11, 12.

Uprant Pauluk choukoxi korunk tarvan Italiek vhelo. Provas kortana tarum futtlem, taka Malta zunvear hinvalleant ravchem poddlem. Xekim Romank pavlo tedna to don vorsam porian bhaddeachea ghorant ravlo. Zorui taka rakhunk soinik dovorlolo torui to hurbevont dhormdut sodanch apnnak mellunk ietalim titleankui Devachem Raj porgott’tit ravlo.

—Dhormdutancho Itihas 11:22–28:31, hacher adarlelem asa.