NOVICH sthaponn kel’li Kristanv sobhek Jehovacho udhex purnn korunk ek mhotvachi zababdari asli. Punn rokddoch poilea xekddentlea Kristanvacher dhumallo ailo. Sobhe bhailea lokacho virodh ani sobhe bhitorle odhik sonkoxtt sonsun te Devak promannik ravtele kai? Kristanv Grik xastrant 21 potram asat ani tim amkam gorjechi budh ani hurba ditat.

Romkarank te Hebrevank him chouda potram dhormdut Paulun boroilim. Tim potram jea monxak vo sobhek boroileant tanchinch nanvam tea potrank dileant. Pauluchea potrant boroil’le thodde vixoianchi ami somjikai gheumia.

Bore vo vaxtt gunn ani sobhava vixim xiddkavnni. Jim konn pordvari, kamchari ani dusrim gombhir patkam kortat tankam “Devachea Rajeachem daiz bhogunk mellchem na.” (Galasiekarank 5:19-21; I Korintkarank 6:9-11) Devache bhokt khoimchea-i raxttrache zaum tanche modem ekvott asunkuch zai. (Romkarank 2:11; Efezkarank 4:1-6) Gorjek sampoddlelea bhavarteank mozot korunk tannim hanstea tonddan fuddem soronk zai. (II Korintkarank 9:7) Paulu sangta “Thambonastana magnnem korat.” Bhoktanim, khoreaninch tanchea kallzantlim bhavnam Jehovahk sangunk to urba ditalo. (I Tesalonikekarank 5:17; II Tesalonikekarank 3:1; Filipkarank 4:6,7) Devan magnnim aikunk zai zalear tim bhavartan korunk zai.—Hebrevank 11:6.

Kuttumbank zoit mellunk koso adar zatolo? Ghovanim bailecho mog aplea kuddicho korta tosoch korcho. Bailanim aplea ghovak odhik man diuncho. Bhurgeanim avoi-bapaik man diuncho, oxem kelear Devak manvota. Avoi-bapain mogan tanchea bhurgeank xistin ani bore dekhin Devachim totvam xinkounk zai.—Efezkarank 5:22–6:4; Koloskarank 3:18-21.

Devachea udhexacher uzvadd fanklo. Israel lokak Moizesache Somurtin zaite toren Krist ie-sor rakhonn keli. (Galasiekarank 3:24) Punn Kristanvank Devachi bhokti korunk te Somurtechi goroz na. Poile Judevanchea Somurti khala aslole—Hebrev Kristanvank boroitana, Paulun Somurtichea orthacher chodd uzvadd ghalo ani Devacho udhex Krista thaim koso xartik pavlo tem-ui dakoilem. Udharannak zonvaramche iodn zavun asli ek savlli ji Jezuchea iodnak suchoitali zache vorvim  patkamchem khorem bogsonnem mellta. (Hebrevank 10:1-4) Jezun aplem bolidan kelea uprant Devan Somurticho korar rod’d kelo, karann tachi anik goroz nasli.—Koloskarank 2:13-17; Hebrevank 8:13.

Sobhecho karbhar sarko cholounchi rit. Sobhechi zababdari gheunk khoxi asa te bore dorjeanche anik te atmik ritin iukt asunk zai. (I Timotak 3:1-10, 12, 13; Titak 1:5-9) Jehovah Devache bhozpianim sodanch heram bhavarteam sangatak mellun ieun eka mekak hurba divunk zai. (Hebrevank 10:24,25) Bhoktanchi zomat atmik ghottai ani xinkonn ditat tosli zavunk zai.—I Korintkarank 14:26, 31.

Paulu Timotak dusrem potr boroita tedna to Romant bondkhonnint aslo ani aplea monxubechi vatt polletalo. Bhov thodde aplo jiv trasant ghalun dhiran taka mellonk gele. Paulu aplo thoddo vell urla mhonn zanna aslo. Tannem mhunnttlem: “Xevott porian hanv borem zhuz zhuzlam, dhanvchi asli ti vatt hanvem dhanvun kaddlea, bhavarthant hanv thir ravlam.” (II Timotak 4:7) Tea uprant Pauluk tachea bhavarta pasot ghoddiek jivexim marla asot. Punn hea dhormdutachim potram aiz porian khorea Devachea bhoktank vatt dakoitat.

—Romkarank; I Korintkarank; II Korintkarank; Galasiekarank; Efezkarank; Filipkarank; Koloskarank; I Tesalonikerank; II Tesalonikerank; I Timotak; II Timotak; Titak; Filemonank; Hebrevank hacher adarlelem asa.