JEZUK sonvsaracher koslem karya korunk dhaddlolo? Tannem khud sanglem: ‘Devachea Rajeachem Xubhvortoman hanvem porgottunk zai, tor heach pasot Devan Mhaka dhaddla.’ (Luk 4:43) Razvott porgott korpacho Jezucho mukhel vixoi aslo, tea vixim tannem char vostu xinkoil’leo, tacher ami dhean diumia.

1. Jezu nemlolo Raza. Bhakit kel’lo to Mesias apunnuch mhonn Jezun spoxtt kolloilem. (Juanv 4:25, 26) Provadi Danielan dorxonan pollelolo to raza apunnuch mhonn Jezun anikui dakovun dilem. Jezun aplea dhormdutank sanglem ki apunn ek dis Mhoimevont sodrer bostolo ani tev-ui sodrer bostele. (Matev 19:28) Tannem hea razanchea zomeank ‘supurlo hindd’ mhonn ucharlem ani taka “anikui menddram” aslim tim hea hinddantlim nhoi mhonn tannem kolloilem.—Luk 12:32; Juanv 10:16.

2. Devachem raz khori nit vaddoitelem. Hi razvottki vhoddantli vhodd onit kaddun uddoitelem mhonn Jezun kolloilem. Hea vorvim, Eden bhagent Soitanan Devachea nanvacher je guneanv thapleat te, ti razvottki kaddun uddoitoli ani Jehovachem nanv Povitr korteli. (Matev 6:9, 10) Jezu dispottim dadleank, ostoreank, girestank ani goribank tonddak polleun ontor kori nastanam xinkoitalo. Tachem poilem karya Israel lokank xinkoupachem asunui tannem samaritanank anik videxeank pasun xinkoilem. Tachea kallar aslelea dhormxastream porim tannem tondd pollovun favor korunk na.

3. Devachem raz hea sonvsarachem bhag nhoi. Jezuchea kallar rajkarannant ekdom uchambollai asli. Tacho ganv porkea odhikara khala aslo. Lokanim taka raz karbarant misoll korunk proitn kelo tedna to koddsorun gelo. (Juanv 6:14, 15) Tannem eklea raz karbareak sanglem “Mhojem raj hea sonvsarantlem nhoi.” (Juanv 18:36) Tachea pattlavdarank-ui tannem sanglem: “tumi sonvsarache nhoi.” (Juanv 15:19) To apli rakhonn korunk dekhun tankam zhuzachim hattiaram upeog korunk dinaslo.—Matev 26:51, 52.

4. Kristachi razvottki mogacher attaploli asa. Lokank, tanchea ojeacho bhar hollu korun somadhan kortolo mhonn Jezun bhas dili. (Matev 11:28-30) To aplea utra pormonnem jielo. Tannem jivitachea huskeamcher zoit vhorunk, sombondh sudharunk, girestkaienche axencher zhuzonk, anond soddunk, hache voir mogachi ani faideachi budh dili. (Matev avesvor 5 te 7) Tannem mog dakoil’lo dekhun soglle torimcho lok tachexim ietalo. Apnnak man moriadian ani doien to vagoitolo hi khatri dhorun, ekdom dukhovlele legun tache-xim zomtale. Jedna Jezu raiponnamche podven ietolo, tedna soglleank to ek vorto odhikari mhonn kolltelem.

Dev razvottke vixim Jezun anik ek toren bollan xinkoilem. Tannem zaitim ochoriam kelim. Tannem tim kitea passot kelim? Ami polloumia.

—Matev, Marku, Luk ani Juanv, hacher adarlelem asa.