TISREA disa Jezuchea mornna uprant, tachea xisantleo kherit ostoreanim fondda veli fator kaddun uddoilea mhonn dekhlem. Tannin fondd rito aslo tem-ui pollelem!

Tankam don devdut disle. “Nazaretkar Jezuk tumi sodtat,” ek dutan mhollem “Taka punorjivont kelo.” (Marku 16:6) Vell korinastanam, teo ostoreo hi khobor dhormdutank kollounk dhanvleo. Vatter tankam Jezu meulo. “Bhieum nakat!” tannem mhollem. “Vochun Mhojea bhavank Galilieiak vochat mhonn sangat. Thoi te Mhaka dekhtole.”— Matev 28:10.

Uprant teach disak, dog xis Jeruzalea thaun Emaus ganvant vetale. Ek porko monis tanche borobor cholunk laglo ani te kitem uloitat tem vicharunk laglo. Khoreponnim to punorjivont zal’lo Jezu aslo punn dusreach rupan aslo dekhun tannim taka vollkhunk na. Dukhabhorit zavun tannim Jezu vixim uloitale mhonn sanglem. Tedna to porko monis Mesiasa vixim xastrant boroilolem ugddapem korunk laglo. Khorench Mesiasa vixim bhakitam kel’lim toxinch Jezun purim kelim. * Porko monis atmik kuddin punorjivont zal’lo Jezuch oxem xisank gomlea uprant To nanch zalo.

Te dog xis rokddech Jeruzaleak portole. Thoim dhormdut dharam bond korun zomlole tankam meule. Te dogui kitem ghoddlem tem tankam sangtale, itlean Jezu hajir zalo. Ojeap zavun hem sot man’nunk xisank kottin zalem! “Osle dubav tumchea monant uprastat te kiteak?” Jezun vincharlem. “Boroil’lem asa tem oxem: Krist koxtt moronn sonstolo ani tisrea disa To mel’leantlo punorjivont zatolo.”—Luk 24:38, 46.

40 dis punorjivont zalea uprant, Jezu aplea xisank veg vegllea vellar dixtti poddlo. Ek pavtti, 500 zannam poros odhik lokak To dislo! Ghoddiek hea vellar tannem tankam hi mhotvachi adnia dili. “Vochun . . . sogllea raxttrank Mhoje xis korat, . . . ani Hanvem tumkam dileat teo soglleo adnia pallunk tankam xikoiat. Ani zanno zaiat, sodanch-sodam, hoi, kallam-iuganche sompadnne porian, Hanv tumchea sangata asam.”—Matev 28:19, 20.

Aplea 11 visvaxi dhormdutanche xevottche bhettent Jezun tankam adnia dili: “tumcher denvun ietolo tea Povitr atmeachem boll tumi ghetoleat, . . . ani sonvsarachea ximam porian tumi Mhoje govai zatoleat.” (Dhormdutancho Itihas 1:8) Tea uprant Devan Jezuk voir ubarun velo ani tanchea dolleam mukhavelo ek kupan taka lipoilo.

—Matev avesvor 28; Marku avesvor 16; Luk avesvor 24; Juanv avesvor 20 ani 21; I Korintkarank 15:5, 6 hacher adarlelem asa.