ODHEAI 7
“Jezu . . . Vixim Bori Khobor” Porgottop
Ek porgottnnar zaun Filipan soglea porgottnnarank ek bori dekh dovorlea
Ho odheai Itihas 8:4-40-acher adarit asa
1, 2. Virodheamnim porgottnnechem kam bond korunk proitn kelo tednam kitem zalem?
VIRODHI Kristanvank khub dhumallo diunk lagtat ani Saulu sobhek khub ‘sotaita.’ Tem mhunnttlear, to tankam khor dhumallo dita. (Itihas 8:3) Hea pasot xis Jeruzalem soddun pollon vochonk lagtat. Tor thoddeank dislem astolem ki Saulu porgottnnechem kam bond korunk zo vavr korta tantunt taka ies mellttolo. Punn khorem mhunnttlear, Kristanvam pollon gelim tednam kitem tori ojapachem ghoddlem. Tem kitem?
2 Ximpoddlole xis jea vattarant gele thoim te “Devachea utrachi bori khobor porgottit ravle.” (Itihas 8:4) Hea vixim chintat, virodhi porgottnnechem kam bond korunk xoklenant itlench nhoi, punn tanchea dhumalleak lagon porgottnnechem kam vaddot gelem. Xis Jeruzalem soddun gele tednam, pois-pois aslolea vattarantlea lokank Rajeachi bori khobor aikonk sondhi mellʼlli. Ani ami fuddem polloitolim toxim, amchea-i disamnim oxench ghoddtta.
“Ximpoddlole Te Xis” (Itihas 8:4-8)
3. (a) Filip konn aslo? (b) Samarientlo choddso lok bori khobor kiteak aikonk pavonk na, punn hea vattarant kitem zatolem mhunn Jezun sanglolem?
3 ‘Ximpoddlolea xisam’ modem Filipui aslo. a (Itihas 8:4; “‘ Porgottnnar’ Filip” hem boks polloiat.) To Samariek gelo, jea xarant choddxea lokamnim bori khobor kednanch aikonk nasli. Karonn eka vellar Jezun aplea apostlank sanglolem: “Samariekaranchea xarant vochonakat. Tachea bodlek fokot Israelachea ghorannantlea sanddlolea menddram koddenuch vochat.” (Mt. 10:5, 6) Punn Samarient pasun bori khobor pavtoli hem Jezu zannam aslo. Karonn sorgar voichea poilim tannem oxem mhunnttlem: “Akʼkhea Judeiant ani Samariant, toxench prithumechea sogleant poisulʼlea vattarant pasun tumi mhojea vixim govai ditole.”—Itihas 1:8.
4. Filipan porgottnni keli tednam Samariekaramnim kitem kelem, ani tannim tachem kiteak aikolem astolem?
4 Filipan Samariek eka xeta porim polloilem, jem ‘piklam ani lunvnni korunk toiar asa.ʼ (Juanv 4:35) Ani to thoinchea lokank porgottnni korunk laglo. Tacho sondex aikon thoinchea lokank somadhan mellʼllem. Oxem kiteak? Karonn Judev lok Samariekaram lagim kosloch sombond dovrinasle ani zaite Judev lok tancho dves pasun kortale. Punn soglea lokam pasot asloli hi bori khobor aikona fuddem, Farizev kitem mantale tachea poros hem vegllem aslem mhunn Samariekaramnim polloilem. Karonn Farizev bhedbhav kortale ani heram poros apunn odik bore mhunn chintʼtale. Punn Filip toso naslo. Tannem urben Samariekarank porgottnni keli tednam to bhedbhav korinaslo mhunn tannem dakhoun dilʼlem. Ani heach pasot ghoddie, Samariekaramnim Filip sangtalo tacher “dhean” dilem.—Itihas 8:6.
5-7. Kristanvam eka zagear thaun dusrea zagear ximpoddlim tednam thoim bori khobor koxi porgott zali? Thoddim udharonnam diat.
5 Poilea xekddea bhaxen, amchea disamnim pasun dhumalleak lagon porgottnnechem kam bond zaunk na. Zaite pavtti Kristanvank dhumalleak lagon eka zagear thaun dusrea zagear vochonk poddlam vo tankam bondkhonnint ghatleant. Punn thoim pasun zaitea lokank bori khobor aikonchi sondhi mellʼllea. Udharonnak, Dusrea Vixv Zhuza vellar Nazi concentration camp-amnim, Jehovachim Sakxi dusreank ek bori sakx diunk pavlim. Thoim Sakxeank mellʼllolea eka Judev munxan oxem mhunnttlem: “Jehovachea Sakxeancho dhir polloun tim kitem patietat tem Bible-acheruch adarit asa mhunn mhaka khatri zali. Ani hem polloun, hanvui ek Sakxi zalom.”
6 Thoddea poristhitimnim Sakxeank virodh korpi pasun sotant aileat. Hea vixim amkam Franz Desch nanvachea eka bhavachem udharonn asa. Taka Austria-nt Gusen concentration camp-ant dhaddlo tednam tannem thoim eka odhikareak Bible xikonk modot keli. Uprant thoddea vorsamnim te dogui eka-mekak eka odhivexonant mellʼlle. Hea vellar, te kitle khuxal zale astole tem chintat, karonn atam te dogui porgottnnar asle!
7 Dhumalleak lagon, Kristanvank eka desa thaun dusrea desant vochonk poddlem tednam-i toxench zalem. Udharonnak, sumar 1970 hea vorsak, Malawi-nt bhav-bhoinnancher dhumallo ailo dekhun tim Mozambique-ant gelim. Punn uprant Mozambique-ant pasun dhumallo suru zalo tednam, tannim porgottnnechem kam chaluch dovorlem. Francisco Coana nanvacho ek bhav sangta, “Hem khorem ki ami porgottnni kortat mhunn zaite pavtti amkam pulisamnim dhorlim. Tori astana, zaitea zannamnim bori khobor aikoli tednam, Devan poilea xekddeantlea bhav-bhoinnank modot kelʼli toxi to amkam-i modot korta mhunn amkam khatri zali.”
8. Zhuzak lagon vo arthik poristhitik lagon aiz zaito lok bori khobor koso aikonk pavta?
8 Tor fokot virodh asa mhunn nhoi, punn her karonnank lagonui dusrea desamnim bori khobor porgott zata. Zoxem, zhuzak lagon vo arthik poristhitik lagon, lokank aplo des soddun dusrea desant vochonk poddtta. Tor tea lokank bori khobor porgottunk ek bori sondhi asa. He lok choddxe dusri bhas uloitat dekhun tankam porgott korunk ami tanchi bhas xikonk zata. Tor ‘soglea desantlea, kullantlea, porzantlea ani bhasantlea’ lokank porgott korunk tumi zata titlo proitn kortat kai?—Prok. 7:9.
“Oslo Odhikar Mhaka-i Diat” (Itihas 8:9-25)
“Apostl hat dovortana povitr xokti melltta ti polloun, Simanvan tankam poixe dile.”—Itihas 8:18
9. Simanv konn aslo, ani Filipan kelʼlim khoinchim vizmitam polloun to ojap zalo?
9 Samarient astana Filipan zaitim vizmitam kelim. Zoxem, tannem ar zalʼleank ani longddeank bore kele, toxench lokancher boslole noxtte dut kaddle. (Itihas 8:6-8) Him vizmitam polloun Simanv nanvacho ek jadu korpi khub ojap zalo. Lok taka khub man ditale ani tache vixim oxem mhunnttale: “Hea munxa bhitor Devachi Xokti asa.” Punn Filipan kelolea vizmitam udexim Simanv Devachi khori xokti pollounk pavlo. Tor tannem bhavarth dovorlo ani bautizm ghetlo. (Itihas 8:9-13) Punn Kristanv zaunk tacho hetu kitem aslo kai?
10. (a) Pedru ani Juanvan Samarient kitem kelem? (b) Pedru ani Juanvan novea xisancher aple hat dovorle ani tankam povitr xokti mellʼlli tem polloun Simanvan kitem kelem?
10 Samariechea lokamnim Devachem Utor manun ghetlem mhunn Jeruzalemant aslolea apostlamnim aikolem tednam tannim Pedruk ani Juanvak tanche lagim dhaddle. (“ Pedrun ‘Sorginchea Rajeacheo Chavio’ Uzar Keleo” hem boks polloiat.) Thoim pavlea uprant, Pedru ani Juanvan tea novea xisancher aple hat dovorle ani tankam dor-ekleak povitr xokti mellʼlli. b Hem polloun Simanv khub ojap zalo. Tednam tannem tankam mhunnttlem: “Hanv konnacherui hat dovorta tednam tankam povitr xokti mellttoli, oslo odhikar mhaka-i diat.” Ho odhikar mellonk to tankam poixe pasun diunk sodhtalo.—Itihas 8:14-19.
11. Pedrun Simanvak koslo solʼlo dilo, ani Simanvan kitem kelem?
11 Punn Pedrun Simanvak koddok solʼlo dilo. Tannem taka mhunnttlem: “Tujea chandicho tujea sangata nas zaum, karonn Devachem funkott dennem tum poixeamnim gheunk xokta oxem tunvem chintlem. Punn hea sevent tuzo kainch bhag na ani tuka kosloch vantto na, karonn Devachea nodre mukhar tujem kalliz promannik na. Taka lagon tujem hem vaittponn soddun poschatap kor, ani tujea kallzant ailolea hea vaitt chintpak lagon zata zalear tuka bhogsonnem di mhunn Jehova lagim vinovnni kor. Karonn tujem kalliz vikan bhorlam.” Khorem mhunnttlear, Simanv ek vaitt munis naslo. To sarkem tem korunk sodhtalo. Punn hea vellar tachea kallzant chukiche anvdde aile. Tor uprant tannem apostlank oxem sanglem: “Tumi mhunnttloli khoinchich vost mhojer iena zaunk upkar korun mhojea pasot Jehova lagim vinovnni korat.”—Itihas 8:20-24.
12. Khottea dhormamnim poixeamnim zobabdari melloun ghevop ani vikop kitlem chaltem asa?
12 Pedrun Simanvak dilʼlo solʼlo aiz soglea Kristanvank ek xittkaunni zaun asa. Ti mhunnttlear, ami sobhent ek zobabdari melloun gheunk konnakuch poixe diunche nhoi vo konnakui zobabdari diunk ami poixe gheunche nhoi. Punn khottea Kristanvam modem oxem korop khub chaltem asa. Udharonnak, The Encyclopædia Britannica (1878) sangta, ki Pope-ak vinchun kaddttale tednam, te hi zobabdari melloun gheunk poixe ditale. Zaite zann hem ukteponnim kortale ani oxem korunk tankam loz pasun disonasli.
13. Kristanvamnim kitem korchem nhoi?
13 Punn Kristanvamnim oxem korchem nhoi. Sobhent jea bhavank zobabdari diuncho odhikar asa, tanchea thaun zobabdari melloun gheunk ami tankam chodduch dennim diunchim nhoi vo tanchi chodduch vhoddvik korchi nhoi. Toxench sobhent zobabdari asat tannim, konn girest asa tankanch zobabdari diuncheo nhoi. Oxem korop chukichem zatolem. Devachea soglea sevokamnim apunn “lhan” mhunn somzonk zai. (Lukas 9:48) Jehova Dev aple povitr xokte udexim sarkea vellar favo tankam zobabdareo ditolo mhunn ami tacher patieun ravonk zai. Jim konn “chodd man” sodhtat tankam Devache songottnnent zago na!—Mho. 25:27.
“Tum Vachta Tem Tuka Somzota?” (Itihas 8:26-40)
14, 15. (a) ‘Ethiopiacho odhikari’ konn aslo, ani to Filipak koso mellʼllo? (b) Filipan sanglem tem aikon tea Ethiopiekaran kitem kelem, ani tea Ethiopiekaran bautizm goddboddan gheunk na mhunn ami kiteak mhunnonk zata? (Futtnott polloiat.)
14 Jehovachea dutan Filipak Jeruzalema thaun Gaza voita tea rostean vochonk sanglem. Hem aikon Filip vochonk bhair sorlo. Thoim kiteak vochonk zai mhunn Filipachea monant ghoddie prosn ailo astolo. Punn to Ethiopiekarachea odhikareak mellʼllo tednam, taka tachea prosnacho zobab mellʼllo. To Ethiopiekar “mottʼttea avazan Izaias provadeachem pustok vachtalo.” (“ Ethiopiekar Ek Hizddo Vo Ek ‘Odhikari’ Aslo?” hem boks polloiat.) Jehovachea povitr xoktechea margdorxona pormonnem, Filip tea munxachea rotha lagim gelo ani tea rotha sangata dhanvtana, Filipan tea Ethiopiekarak mhunnttlem: “Tum vachta tem tuka somzota?” Ethiopiekaran mhunnttlem: “Konnem-i mhaka hachi somzonni dilea bogor hanv koso somzotolom?”—Itihas 8:26-31.
15 Uprant, Ethiopiekar Filipak aplea rothacher choddonk sangta. Tea vellar tanchem ulovop kitlem borem gelem astolem tem tumi chintunk zata! Karonn Filip taka Izaiasan kelʼlea bhasaunnent, ‘menddroʼ vo “sevok” konnak suchit korta tem sangta ani ti bhasaunni Jezu Kristak koxi lagu zata tem somzaita. (Iz. 53:1-12) Ho Ethiopiekar Judev naslo, punn tannem Judev dhorm apnnailʼlo. Tea pasot, 33 K.X.-achea Ponʼnasavea Disa bautizm ghetlolea Kristanvam bhaxen, apnnem kitem korunk zai tem to-ui rokddoch somzolo. Taka lagon to Filipak mhunntta: “Polloi! Hanga udok asa; tor atam bautizm gheunk mhaka kitem addkholl asa?” Tor Filipan vell kaddinastana taka bautizm dilo. c (“ ‘Udkant’ Bautizm” hem boks polloiat.) Uprant Filipak, Ashdodant porgottnnechem kam korpachi ek novi zobabdari melltta, ji to korit ravta.—Itihas 8:32-40.
16, 17. Aiz devdut porgottnnechea kamant koxe modot korit asat?
16 Filipa bhaxen bori khobor porgottunk aiz Kristanvank sueog asa. Tor provas kortana vo khoinsorui amkam lok melltta tednam ami tankam Devachea Rajeachi bori khobor sangtat. Zaite pavtti hem sarkem dison ailam, ki devdutanchea adarak lagonuch amkam osle lok mellʼlleat je sot aikonk sodhtat. Ani hem ojapachem nhoi, karonn porgottnnechea kamant devdut margdorxon ditole mhunn Bible-ant spoxtt ritin sanglam. “Dor-eka desak, dor-eka kullak, dor-eke bhaxechea lokak” bori khobor pavloli Jehova Devak zai mhunn Bible sangta. (Prok. 14:6) Toxench, porgottnnechea kamant devdut amkam modot kortole mhunn Jezun pasun sanglolem. Gonvachi ani nerachi vopar ditana, lunvnnechea vellar, mhunnche, kallachea xevottachea vellar, “lunvnni korpi devdut zaun asat,” mhunn tannem sanglem. Toxench, devdut anik kitem kortole tem-ui tannem sanglem. Tannem mhunnttlem: “Dusreank patkant uddoitat ani noxttim kamam kortat toslea soglea lokank te tachea Rajea thaun ektthaim kortole.” (Mt. 13:37-41) Titlench nhoi, devdutam vorvim Jehova Dev oslea lokank ektthaim korta, zankam sorgar raza zauncho bhorvonso asa. Toxench, devdut ‘bhov vhodd lokache urponjik’ ani ‘dusrea menddrankʼ ektthaim kortat.—Prok. 7:9; Juanv 6:44, 65; 10:16.
17 Hem khorem mhunn amchea lagim puravo asa. Karonn porgottnnent amkam thoddim zannam mellttat, jim Deva vixim zannam zaunk magnnem kortalim mhunn amkam sangtat. Hea vixim ek onubhov polloum-ia. Don porgottnnaram eka lhan bhurgea sangata porgottnnent gelʼlim. Porgottnni korta-korta donpar zalo. Tor tea dogaim porgottnnarank, porgottnni bond korunk zai asli. Punn tea bhurgeak dusrea ghorant vochonk zai aslem ani tannench vochon tea ghorachea darar marlem. Tednam eke bailen dar ugoddlem ani tim porgottnnaram tichea lagim ulounk laglim. Ojapachem mhunnttlear, te bailen tankam sanglem, ki tika Bible somzonk modot korunk konnak tori dhadd mhunn ti Deva lagim magnnem kortali. Hea toren ti bail Bible xikonk lagli!
“Deva tum konnui zaum, mhaka please modot kor”
18. Porgottnnechea kamak ami sodanch kiteak valor diunk zai?
18 Hea poilim kednanch zaunk na titlea vhodd promannan aiz bori khobor porgott zata. Tor Kristi sobheche bhag zalʼlean tumkam devdutam sangata mellon hem kam korpacho ek vhodd sueog asa. Hea sueogacho valor korat! Tumi “Jezu vixim bori khobor” porgottunk khub vavr korit ravtat zalear, tumkam anik khoincheach kamant mellchina titli khuxalkai mellttoli.—Itihas 8:35.
a Ho Filip, apostl Filip naslo. Punn ami hea prokaxonachea Odheai 5-ant polloilʼlem toxem, to ‘borem nanv aslolea sat munxam’ modlo eklo aslo, zaka Jeruzalemant Hebrev ani Grik bhas uloitolea vidvank jevnnacheo vostu vanttunk vinchun kaddlolo.—Itihas 6:1-6.
b Purave dakhoun ditat ki tea tempar nove xis bautizm ghetale tednam, tankam povitr xokti mellttali. Hea vorvim tankam fuddarak Jezu sangata sorgar raza ani iadnik mhunn seva korunk bhorvonso mellttalo. (2 Kor. 1:21, 22; Prok. 5:9, 10; 20:6) Punn Samariechea hea novea xisamnim bautizm ghetlo tea vellar tankam povitr xokti mellonk na. Punn jednam Pedrun ani Juanvan tancher hat dovorle tednam tankam povitr xokti mellʼlli. Tea bhair, tankam povitr xokte udexim vizmitam korpachim dennim pasun mellʼllim.
c Ethiopiachea odhikarean bautizm gheupacho nirnnoi goddboddan gheunk naslo. Oxem ami kiteak mhunnonk zata? Karonn tannem poilim Judev dhorm apnnailʼlo, taka Devachea Utrachi bori zannvai asli ani Mesiasa vixim asloleo bhasaunneo to zannam aslo. Ani atam taka Devachea udʼdhexan Jezuchi bhumika kitem asa tem kollon ailʼlem. Dekhun to bautizm gheunk fuddem sorlo.
