1-3. (a) Isteva mukhar kosli poristhiti aili, ani tannem tacho koso fuddo kelo? (b) Ami kitem zannam zaunchi goroz asa?

 ISTEV Mha-sobhe mukhar ubo aslo. Hea sobheche vangddi eka vhoddlea holant mellon ietale, jem ghoddie Jeruzalemachea mondira laginch aslem astolem. Hea Mha-sobheche 71 vangddi, Isteva bhonvtonnim asle. Hea munxank khub odhikar aslo ani tanchea modle choddxe zann Jezuchea xisank unnea molache mhunn lekhtale. Khorem mhunnttlear, hea neai korpeank ektthaim korpi mha-iadnik Kaifas aslo, zo thoddeach mhoineam poilim, Jezuk jivexim marunk formonn marlolea korttacho mukheli aslo. Tor Istev bhielo kai?

² Istev tea vellar bhieunk na mhunn tachea tondda voilean sarkem dison ietalem. Karonn neai korpeamnim tacher nodor marli tednam, tankam tachem tondd “eka devduta sarkem” dislem. (Itihas 6:15) Karonn adlea tempar, devdut Jehovacho sondex lokank kolloitale tednam te bhienastana ani xantponnim oxem kortale. Te oxe kiteak korunk pavle? Karonn devdut lokank kolloitale to sondex Jehovacho aslo. Istevak pasun oxench bhogtalem. Tacho dves kortale te neai korpi pasun hem pollounk xokle. Punn Istev itlo xant koso ravonk pavlo?

³ Ami hea prosnacho ani toxench Istev tea poristhitint koso pavlo tem zannam zalear amkam zaitem xikonk mellttolem. Punn korttant ieunchea poilim pasun Istevan aplea bhavartha vixim koxi govai dilʼli? Ani ami tachi dekh koxi gheunk zata? Hem pasun ami zannam zaunchi goroz asa.

4, 5. (a) Istev tachea sobhek ek besanv kiteak aslo? (b) Istev “Devachea kurpen ani xokten bhorlolo” mhunnttlear kitem?

⁴ Ami fattlea lekhant polloilʼlem toxem, Istev nove Kristi sobhek ek besanv koso zaun aslo. Karonn ek khas kam korunk apostlamnim vinchun kaddlolea sat khaltea dadleam modlo to eklo aslo. Toxench, taka Jehova koddlean zaitim khas dennim mellʼllolim. Itihas 6:8 amkam sangta, ki thoddea apostlam bhaxen to “vhodd vizmitam ani khunna” kortalo. Punn hea vixim tannem kednanch vhoddvik korunk na. Tachea bodlek, to sodanch khalti ravlo. Toxench, to “Devache kurpen ani xokten bhorlolo” mhunn Bible amkam sangta. Tor hacho orth kitem?

 ⁵ Devache “kurpen bhorlolo” mhunnttlear, Istev ekdom doiall ani movall aslo. Ani hea pasot lok tachem aikotalo. Jea toren to uloitalo tantuntlean to sot uloitalo ani tachem aikolear tankam faido zatolo mhunn tachim aiknnarim pollounk xoktalim. Toxench, to “Devache xokten bhorlolo,” oxem mhunnttlam. Karonn Jehovachea povitr xoktechea margdorxona pormonnem to kam kortalo. Taka jim dennim ani tank asli tea pasot taka kednanch gorv bhogonk na. Tachea bodlek, tannem sogli vakhannʼnni Jehova Devak dili. Toxench, tachea aiknnareanchi taka khub kallji asli. Ani heach pasot tache virodhi tacho dves kortale, karonn taka lagon tancho dhorm kabar zaun voitolo oxem tankam distalem.

6-8. (a) Istevachea virodheamnim tacher kosle don toreche arop ghatle, ani kiteak? (b) Istevachem udharonn aiz Kristanvank kiteak faideachem zaun asa?

⁶ Thodde munis Isteva sangata vad-vivad korunk lagle. Punn “Istevan zannvaien ani povitr xoktechea modotin tankam zobab dilo. Tachea mukhar tanchem kainch cholona zalem.” a Hem polloun te khub ragar zale ani tannim “konnak kollonastana” kainch guneanv naslolea Jezuchea hea xisacher arop ghalunk “thoddea munxank . . . fuslaile.” Toxench, tannim lokank, zanntteank ani xastreank, Istevak zobordosten Mha-sobhe mukhar vhoronk “uksaile.” (Itihas 6:9-12) Hea virodheamnim tacher don toreche arop ghatle. Ek mhunnttlear, to Devachea add uloitalo ani dusro mhunnttlear, to Moizesachea add uloitalo. Hem tannim koxem kelem?

⁷ Istev Jeruzalemant aslolea “povitr Devmondira” add uloun to Devachea add gela mhunn te tacher khotto arop ghaltat. (Itihas 6:13) Toxench, to Moizesachea ani Devan Moizesa udexim dilʼlea Kaideanchea add uloitalo ani Moizesan dilʼleo chali-riti to bodlunk sodhta mhunn tannim tacher arop ghatlo. He arop khub gombhir asle. Karonn tea kallar aslole Judev lok Devmondirak, Moizesachea udexim dilʼlea Kaideank ani tea Kaideam bhair tannim kelolea chali-ritink khub man ditale. Tor hea soglea karonnank lagon, taka moronn favo oxem te mhunnttale.

⁸ Dukhachem mhunnttlear, aiz pasun dhormik fuddari Devachea lokanchem kam bond korunk osleoch manddnneo kaddttat. Te Jehovachea Sakxeank dhumallo diunk sorkari odhikareank uksaitat. Punn te oxem kortat tednam ani amcher khotte arop ghaltat tednam, ami kitem korunk zai? Hea vixim ami Istevachea udharonnantlean zannam zaum-ia.

9, 10. Istevan dilʼlea bhaxonna vixim thodde khodd kaddpi kitem sangtat, ani ami kitem ugddas dovrunk zai?

⁹ Hea odheai-achea survatek ami polloilʼlem toxem, tannim Istevacher arop ghatlea uprant to bhieunk na, punn xant ravlo. Ani tachem tondd eka devduta sarkem oxem tankam dislem. Uprant Kaifas, Istevak polloun taka oxem vicharta: “Hem soglem khorem?” (Itihas 7:1) Tor atam Istevan ulounk zai aslem ani to dhiran uloilo.

 ¹⁰ Istevan tankam dilʼlea hea bhaxonna vixim thodde khodd kaddpi sangtat, ki tannem dilʼlem bhaxonn lamb aslem tem khorem, tori astana tachea bhaxonnantlean tacher ghatlolea aropank to zobab diunk pavonk na. Punn khorem mhunnttlear, bore khobre vixim koxem ulounchem ani ‘zobab koso diuncho,’ hea vixim Istevan amkam ek ekdom borem udharonn dovorlem mhunn kainch dubhav na. (1 Ped. 3:15) Devmondira add uloun to Devachea add uloilo ani Kaidea add uloun to Moizesa add gelo, oxem tacher arop ghatlolo mhunn ugddas dovrat. Tor tannem tankam zobab dilo tednam to Izraelachea itihasachea tin kallam vixim uloilo. Ani tannem thoddea khas mudʼdeancher zor dilo. Te khoinche tea vixim ami fuddem ek-ek korun polloum-ia.

11, 12. (a) Istevan Abrahamachem udharonn bore toren koxem uzar kelem? (b) Juzechem udharonn uzar korop borem zatolem mhunn Istevak kiteak dislem?

¹¹ Purvozancho kall. (Itihas 7:1-16) Survatek, Istev Abrahama vixim uloita. Karonn Judev lok Abrahamak tachea bhavarthak lagon khub man ditale. Hea vixoi-acher tanchem chintop ek-sarkem asa hem zannam zaun Istevan zor dilo, ki “mhoimen bhorlolea Devan” Mesopotamiant Abrahamak poile pavtti dorxon dilem. (Itihas 7:3) Khorem mhunnttlear, Abraham bhasailʼlea desant ek pordexi zaun aslo. To mondirant vochonaslo, ani tachea lagim Moizesa udexim dilʼle Kaide pasun nasle. Tor ek munis Devak visvaxi asonk zai zalear tannem mondirant vochonkuch zai vo Moizesa udexim dilʼle Kaide pallunkuch zai oxem konnuch sangonk xokonaslo.

¹² Toxench, Istevan tankam Juze vixim sanglem, zo Abrahamachea sonstintlean ailʼlo. Punn Istevan hem-ui tanchea ugddasak haddlem, ki Juzechea svotachea bhavamnim, je Izraelachea kullanche bapui asle, tannim hea nitivont munxak dhumallo dilo ani taka gulamponnant viklo. Tori astana, bhuk poddli tednam tankam salvar korunk Devan taka uzar kelo. Juze ani Jezu modem kitem ek-sarkem asa tem Istevak bore bhaxen khobor asli. Tori astana, tachea aiknnareamnim tachem aikopachem bond korina zaunk tannem tankam hea vixim survatekuch sangonk na.

13. Moizesa vixim uloun apleacher ghatlole arop khotte asle mhunn Istevan koxem dakhoilem, ani hea udexim to kitem sangonk sodhtalo?

¹³ Moizesacho kall. (Itihas 7:17-43) Istev Moizesa vixim zaitem uloilo. Oxem korun tannem xanneponn dakhoilem. Karonn Mha-sobheche zaite vangddi Saduki asle, je Moizesan boroilʼlim pustok soddun, Bible-antlim her soglim pustokam nakartale. Toxench, Istev  Moizesa add uloilʼlo oxem tacher arop ghatlolo mhunn ugddas dovrat. Tor hea utrantlean to Moizesacho ani Jehovan tachea udexim dilʼlea Kaideancho kitlo valor korta tem tannem spoxtt toren dakhoun dilem. (Itihas 7:38) Magir, Moizes 40 vorsancho aslo tednam, to salvar korunk sodhtalo tech lok tachea add gele mhunn Istevan dakhoun dilem. Toxench, 40 vorsam uprant pasun zaite pavtti te tachea odhikara add gele. b Hea toren Devache lok kitem kortale tea vixim Istev sovkas-sovkas korun tankam dakhoun diunk sodhtalo. Tem mhunnttlear, Jehova Devan fuddakar gheunk nemloleank te porot-porot nakartale.

14. Moizesachem udharonn diun Istevan khoincho mhotvacho mudʼdo sanglo?

¹⁴ Izraela thaun Moizesa bhaxen ek provadi ietolo mhunn Moizesan bhasaunni kelʼli, tea vixim Istev aplea aiknnareanchea ugddasak haddtta. To provadi konn astolo ani lok tachea sangata koxe vagtole? Hacho zobab Istev aplea bhaxonnachea xevottak dita. Punn hea vellar to anik ek mhotvacho mudʼdo sangta. To mhunnttlear, Jehova Dev khoinchi-i zomin povitr korunk xokta mhunn Moizesak kollon ailʼlem. Zoxem, Jehovan zollttea jhilkuttachi zomin povitr kelʼli, jea zagear to Moizesa lagim uloilʼlo. Tor Jehovachi bhokti ekach zagear korunk zai asli kai, zoxem Jeruzalemant aslolea Devmondirant? Hacho zobab ami zannam zaum-ia.

15, 16. (a) Istev aplea bhaxonnant povitr tombu vixim kiteak uloilo? (b) Istevan aplea bhaxonnant Solomonan bandlolea Devmondirachem udharonn koxem uzar kelem?

¹⁵ Povitr tombu ani Devmondir. (Itihas 7:44-50) Jeruzalemant Devmondir bandche poilim, Devan Moizesak povitr tombu bandunk sanglolem mhunn, Istevan aplea aiknnareanchea ugddasak haddlem. Ho povitr tombu ek sadho tombu aslo, zo eka zagear thaun dusrea zagear vhoronk zatalo. Punn Moizesan heach povitr tombunt Jehovachi bhokti kelʼli. Tor Devmondira mukhar ho povitr tombu kainch nhoi oxem konnuch mhunnonk xokonaslo.

¹⁶ Toxench, uprant Solomonan Jeruzalemant Devmondir bandlem tednam tannem magnneant kitem tori mhotvachem mhunnttlem. Tea vixim Istevan oxem sanglem: “Sogleant Vhoddlo Dev hatamnim bandlolea ghorant ravona.” (Itihas 7:48; 2 It. 6:18) Jehova ek mondira vorvim aplo udʼdhex purnn korunk xokta tem khorem, punn ek mondir na zalear pasun to aplo udʼdhex purnn korunk xokta. Tor munxamnim bandlolea mondira sarkea zagearuch Jehovachi bhokti korunk zai oxem ami chintunk zaina. Hea mudʼdeacher zor diunk, Istevan xevottak Izaias pustokantlean hea utrancho ulʼlekh kelo: “Jehova mhunntta, sorg mhojem xinvason ani prithum mhoji paim dovorpachi monnoi. Tor mhojea pasot koslem ghor tumi bandtole? Vo mhaka ravonk tumi khoim zago bandtole? Hanvem mhojeach hatamnim heo sogleo vostu rochunk nant kai?”—Itihas 7:49, 50; Iz. 66:1, 2.

17. Istevan aplea bhaxonnantlean (a) aplea aiknnareanchi vagnnuk sarki nasli mhunn koxem dakhoilem ani (b) apli koslich chuk nasli mhunn koxem dakhoilem?

¹⁷ Mha-sobhent atam poriant Istevan jem kitem sanglolem tantuntlean spoxtt ritin kollon ietalem, ki tachea aiknnareanchi vagnnuk sarki nasli. Jehova khoinche-i vatten aplo udʼdhex purnn korunk xokta, ani ami chali-riti pallunuch tachi bhokti  korunk zai oxem na mhunn Istevan dakhoun dilem. Istevachea aiknnareank Jeruzalemant aslolem sobit Devmondir khub avoddttalem. Ani Moizesachea udexim dilʼlea Kaideam bhair, munxamnim kelʼlea chali-ritink te khub man ditale. Punn Jehovan Kaide kiteak dilʼle ani Devmondir kiteak bandlolem, hem somzonk te chukle. Eke ritin Istev aplea aiknnareank oxem vicharunk sodhtalo: Jehovachem aikonchea poros, Kaideank ani Devmondirak man divop sarkem zatolem kai? Hea vorvim apnnem koslich chuk korunk na mhunn Istevan dakhoun dilem. Karonn Jehova sangta tem korunk tannem apleachean zatalem tem soglem kelʼlem.

18. Isteva thaun ami kitem xiktat?

¹⁸ Istevachea bhaxonnantlean ami kitem xiktat? Istevak Devachea Utrachi bori vollokh asli. Teach bhaxen, ami Devachea Utrachim borim vidʼdhearthi aslear ami tem bore toren uzar korunk pavtolim. (2 Tim. 2:15) Toxench, lokank dukhoinastana ami doiall toren tanchea lagim koxem ulounk zata, tem-ui ami Istevachea udharonnantlean xikonk zata. Istevache aiknnare ekdom krur asle. Tori astana, zata titlo vell tanche modem kitem ek-sarkem asa, tea vixoi-acher Istev tanchea lagim uloilo. Karonn he vixoi hea munxank khub mhotvache asle. Tea bhair, odhikar aslolea hea munxank tannem respedan “vhoddilamno” oxem mhunnttlem. (Itihas 7:2) Tor ami pasun Devachea Utrant aslolea sotam vixim uloitana, “movallaien ani kallzantlean man” uloupachi goroz asa.—1 Ped. 3:15.

19. Istevan Mha-sobhent asloleank dhiran kitem sanglem?

¹⁹ Punn lokank vaitt distolem hem chintun, ami tankam Bible-antlim sotam sangonastana ravonant. Toxench, Jehova koso neai kortolo hea vixim tankam avoddtta tea ritin sangonk ami amcho sondex bodolnant. Hea vixim amkam Istevachem khub borem udharonn asa. Tannem sogle purave diun pasun, Mha-sobhechea neai korpeancher kainch porinnam zaunk na mhunn tannem polloilem. Tor povitr xoktechea adaran tannem aplea bhaxonnachea xevottak tankam bhienastana sanglem, ki te tanchea purvozam bhaxen zaun asat, zannim Juzek, Moizesak ani her soglea provadeank nakarlole. (Itihas 7:51-53) Khorem mhunnttlear, Mha-sobhechea hea neai korpeamnim Mesiasak jivexim marlolo, zo ieuncho asa mhunn Moizesan ani her provadeamnim bhasaunni kelʼli. Khorench, tannim Moizesa udexim dilʼle Kaide pallunk nant mhunn spoxtt ritin dison ietalem.

20, 21. Istevachim utram aikon Mha-sobhent asloleamnim kitem kelem, ani Jehovan Istevak ghottai koxi dili?

²⁰ Istev fott uloitalo mhunn te neai korpi koxech bhaxen dakhoun diunk xoklenant. Hea pasot te ekdom ragar zale ani tanchea lagim anik xant ravonk zaunk na. Te Isteva add aple dant korkoraunk lagle. Tor hea vellar, tannim Jezuk khast laili toxich te apleakui khast laitole mhunn Istevak ghoddie kollon ailem astolem.

²¹ Tache sovem kitem ghoddchem aslem tacho fuddo korunk Istevak khorench dhirachi goroz asli. Ani Jehovan taka hea vellar dilʼlea dorxonantlean taka ghottai mellʼlli mhunn amkam kosloch dubhav na. Karonn hea dorxonant Istevan Devachi mhoima polloili. Ani Jezu Jehovachea uzvea hatak ubo asa tem tannem polloilem. Hea dorxona vixim thoim hajir asloleank sangtana tea neai korpeamnim aplea hatamnim aple kan bond kele. Tannim oxem kiteak kelem? Karonn thoddeach sumanam  poilim, Jezun apunn Mesias ani rokddoch Devachea uzvea hatak bostolo mhunn teach korttant sanglolem. (Marku 14:62) Ani Jezu sot uloilʼlo mhunn Istevachea dorxonantlean kollon ietalem. Tea bhair, teach Mha-sobhent Mesiasak dhorun taka jivexim marlolo. Tor te sogle mellon Istevachea angar gele ani tannim taka xara bhair vhoron fatraun jivexim marlo. c

22, 23. Istev aplea Dhonia bhaxen koxe toren melo, ani aiz Kristanvam Isteva bhaxen Jehovacher kiteak visvas dovortat?

²² Istevacho Dhoni Jezu, jea ritin melʼlo teach ritin Istevui melo, oxem ami mhunnonk zata. Karonn taka monachi xanti asli, Jehovacher purnn visvas aslo ani aplea virodheank bhogos mhunn tannem Jehova lagim magnnem kelem. Toxench, tannem mhunnttlem: “Somia Jezu, hanv mhozo jiv tujea hatant ghaltam.” Hea vellar pasun, Jezu Jehova sangata asa hem dorxon taka dixtti poddttalem astolem. Toxench, Jezuchim bhuzvonn diupa sarkim utram Istevak khobor asli astoli mhunn kainch dubhav na. Tim mhunnttlear: “Meloleank jivont korpi ani tankam jivit diupi hanvuch.” (Juanv 11:25) Xevottak, Istevan vhoddlean Deva lagim magnnem kelem ani mhunnttlem: “Jehova hea patkacho tankam guneanvkari korinaka.” Oxem mhunnttlea uprant to melo.—Itihas 7:59, 60.

²³ Jezuchea xisam modem Istev poilo martir aslo, zaka tachea bhavarthak lagon jivexim marlo. Punn dukhachem mhunnttlear, hea toren moronk Istev ekloch naslo. (“ Istevak ‘Martir’ Kiteak Mhunnttla?” hem boks polloiat.) Karonn aiz amchea disamnim pasun, rajkaronna fattlean vo dhorma fattlean pixe zalʼlea lokamnim ani nixttur virodheamnim, Jehovachea thoddea visvaxi sevokancho jiv kaddla. Punn Istevak Jehovacher visvas aslo tosoch amkam asa, karonn Jezu aiz Raza zaun asa ani Devan taka khub xokti dilʼli asa. Tor tachea visvaxi sevokank jivont korunk taka konnuch addaunk xokchona.—Juanv 5:28, 29.

24. Istevak fatraitale tednam Saulu kitem kortalo, ani Istevachea mornnak lagon kitem zaunk pavlem?

²⁴ Istevak jivexim marlo tednam, thoim Saulu nanvacho ek tornnatto aslo. Istevak fatraitale tednam thoim ubo ravon taka martoleank to sangat ditalo ani tanchea kopddeanchi rakhonn kortalo. Istev moron thoddea vella uprant, to rokddoch Jezuchea xisank khor dhumallo diunk laglo. Punn Istevachea mornnak lagon, tea Kristi sobhent zaito temp porian boro porinnam zalo. Tachea udharonnantlean, her Kristanvank moro porian Jehovak visvaxi ravonk modot zali. Toxench, Saulu uprant bodolʼlo ani taka choddxe pavtti Paulu mhunnttla. Istevak marunk tacho hat aslo dekhun taka khub dukh bhoglem. (Itihas 22:20) Ani hea vixim tannem uprant oxem mhunnttlem: “Poilim hanv Devachea add uloupi, tachea lokank dhumallo diupi ani tanchea vixim vaitt uloupi munis aslom.” (1 Tim. 1:13) Tor hantuntlean, Istevak ani tannem tea disa dilʼlem bhaxonn Paulu kednanch visronk na mhunn amkam kollon ieta. Khorem mhunnttlear, Istevan aplea bhaxonnant dilʼlea mudʼdeancher Pauluchim thoddim bhaxonnam ani boroupam asat. (Itihas 7:48; 17:24; Heb. 9:24) Vell soron gelo toso, Paulun, Isteva bhaxen bhavarth ani dhir dakhoilo. Toxench, ‘Devache kurpen ani xokten bhorloleaʼ tachea sevokanchi tannem dekh ghetli. Tor prosn ieta: “Ami pasun Istevachi dekh ghetolim kai?”