1-3. (a) Apostlank high kortta mukhar haddunk kitem karonn aslem, ani koslo prosn ieta? (b) Apostlamnim dhir koso dakhoilo tem ami kiteak zannam zaunk sodhtat?

 MHA-SOBHECHE neai korpi Jezuchea apostlancher ekdom ragar zaleat. Apostl high kortta mukhar ube asat ani tanchi kes cholta. Kiteak lagon? Juze Kaifas, zo tea vellar mha-iadnik ani Mha-sobhecho President mhunn seva kortalo, tannem tankam ragan sanglem: “Hea nanvan xikounchem bond korat mhunn ami tumkam koddok hukum dilʼlo.” Taka tanchi itli tiddok ailʼli ki to Jezuchem nanv pasun gheunk sodhinaslo. To fuddem mhunntta: “Tori astana, tumi akʼkhem Jeruzalem tumchea xikounnen bhorlam, ani hea munxachi rogtachi zobabdari tumi amchea mathear thapunk sodhtat.” (Itihas 5:28) Tor, te porgottnni bond korinant zalear, tankam khor xikxa favo zatoli mhunn te tankam sangonk sodhtale.

² Hea vellar apostl kitem kortole asle? Tankam porgottnni korunk Jezun adnea dilʼli ani taka ho odhikar Devan dilʼlo. (Mt. 28:18-20) Tor atam prosn ieta: Te Devachem aikotole asle vo munxanchem? Te tanchea dusmanak bhieun porgottnnechem kam korop bond kortole vo dhiran hem kam korit ravtole? Tea vellar, sogleam apostlam pasot Pedrun dhiran ani spoxtt toren zobab dilo.

³ Ami khorim Kristanvam zalʼlean, apostlanchea dusmanamnim mha-sobhent tankam dhomki dili tednam tannim tankam koso zobab dilo tem aiz ami zannam zaunk sodhtat. Karonn aiz pasun, Devan amkam dilʼlem porgottnnechem kam kortana amkam dhumalleacho fuddo korunk poddot. (Mt. 10:22) Amche virodhi amkam addaunk vo amchea kamacher bondi haddunk proitn korunk xoktat. Tor tea vellar ami kitem kortolim? Apostlamnim dhir koso dakhoilo ani te Mha-sobhent astana kitem ghoddlem tea vixim zannam zalolean amkam modot zaunk xokta. a

4, 5. Kaifas ani Saduki kiteak “nattkaien bhorle”?

⁴ Pedruk ani Juanvak poile pavtti porgottnni bond korunk sangloli tednam  tannim oxem mhunnttlolem: “Jem ami kitem polloilam ani aikolam, tea vixim ulounchem bond korunk zaunchem na.” (Itihas 4:20) Tea uprant, her apostlam sangata, Pedru ani Juanv mondirant xikoit ravle. Tannim vhodd-vhodd vizmitam kelim, duentank borim kelim ani lokancher boslole noxtte dut kaddle. Hem soglem tannim “Solomonachi Vatt” b mhunnttat tea zagear kelem. Titlench nhoi, punn Pedruchi savlli poddon pasun zaite lok bore zale. Ani je lok bore zalʼle tanchea modlea zaiteamnim, Pedrun sangloli bori khobor manun ghetli. Hea karonnak lagon, “Somiacher visvas dovorpi, zaite dadle ani bailo tanchea zomeant bhitor sorot ravlim.”—Itihas 5:12-15.

⁵ Kaifas aslo tea Sadukinchea zomeant aslole lok, toxench Kaifas pasun ‘nattkaien bhorlo’ ani tannim apostlank bondkhonnint ghatle. (Itihas 5:17, 18) Punn Saduki tancher itle ragar kiteak asle? Karonn Jezu jivont zala mhunn apostl xikoitale. Punn jivontponn asa mhunn Saduki manun ghenasle. Toxench, eklean salvar zaunk Jezucher visvas dovrunk zai mhunn apostl sangtale. Punn Jezuk fuddari mhunn manun ghetlo zalear, Romi lok tankam xikxa ditole mhunn Saduki bhietale. (Juanv 11:48) Dekhun Saduki apostlanchi porgottnni bond korunk sodhtale.

6. Aiz amkam fuddo korunk poddtta tea dhumallea fattlean chodd korun konnacho hat asta, ani hem zannam zaun ami kiteak ojap zainant?

⁶ Aiz pasun, Jehovachea sevokank fuddo korunk poddtta tea dhumallea fattlean chodd korun, khottea dhormanchea fuddareancho hat asta. Te aplo odhikar uzar korun, sorkarancher ani media-cher aplo probhav ghaltat ani amchem porgottnnechem kam bond korunk proitn kortat. Oxem ghoddtta tednam ami ojap zainant. Karonn khottea dhormanche fuddari xikoita tem fott asa mhunn somzonk, amchea sondexantlean lokank modot zata. Toxench, khaltea kallzache lok Bible-antlem sot apnnaitat tednam, khottea dhormanchea xikounnentlean ani chali-ritintlean tankam suttka melltta. (Juanv 8:32) Ani heach pasot, khottea dhormanche fuddari amcho dves kortat ani amcher dhumallo haddttat.

7, 8. Devdutachim utram aikon apostlancher kitem porinnam zalo, ani ami amkanch khoinche prosn vicharunk zai?

⁷ Apostlanchi kes suru zaunchea poilim te bondkhonnint asle tednam, dusman tanchea bhavarthak lagon tancho jiv kaddttole kai mhunn tannim ghoddie chintlem astolem. (Mt. 24:9) Punn tea ratik kitem tori ojapachem ghoddlem, jem tannim ghoddie kednanch chintunk naslem. Tem mhunnttlear, “Jehovachea dutan bondkhonnichim daram” uktim kelim. c (Itihas 5:19) Uprant devdutan tankam, “jivitacho sondhex Devmondirant lokank sangot ravat” mhunn spoxtt ritin margdorxon dilem. (Itihas 5:20) Hem aikon apunn kortale tem sarkem mhunn apostlank khatri mellʼlli. Toxench, kitem-i zalear pasun porgottnnechem kam chaluch dovrunk tankam ghottai mellʼlli astoli. Khorench, he ghoddnne uprant tancho bhavarth ghott zalo ani tankam dhir mellʼllo dekhun, “te sokallinch Devmondirant gele ani xikounk lagle.”—Itihas 5:21.

⁸ Amchea modlea dor-eklean svotakuch ho prosn vicharunk zai: “Mhojea mukhar oslich poristhiti aili zalear, porgottnni korit ravonk mhaka dhir ani bhavarth astolo  kai? Devdut amkam modot kortat ani margdorxon ditat, hem ami ugddas dovrunk zai. Oxem kelʼlean, ‘Devachea Rajea vixim bore bhaxen sakx diupachem’ hem mhotvachem kam korunk amkam ghottai mellonk xokta.—Itihas 28:23; Prok. 14:6, 7.

9-11. Mha-sobhent astana tanchem porgottnnechem kam bond korunk apostlank sanglem tednam tannim kitem mhunnttlem, ani aiz khorim Kristanvam tanchi dekh koxi ghetat?

⁹ Kaifas ani Mha-sobheche her neai korpi apostlank khast lavunk sodhtale. Ani hea pasot, tankam bondkhonnintlean haddunk te rakhonndarank dhaddttat. Punn devdutan tankam soddoile hea vixim tankam kainch khobor nasli. Te thoim pavtoch “bondkhonnichim daram bore bhaxen bond asat ani thoim rakhonndar ube asat” te tannim polloilem. (Itihas 5:23) Punn bondkhonnichim daram ugoddlea uprant, thoim apostl nasle. Hem polloun te kitle ojap zale tem chintat! Punn rokddench, Devmondirachea odhikareak, apostl porot Devmondirant Jezu Krista vixim xikoitat mhunn kollon ailem. Heach karonnak lagon, tankam bondkhonnint ghatlole. Tor Devmondiracho odhikari ani tache rakhonndar rokddech vochon apostlank dhorun haddttat ani porot Mha-sobhent vhortat.

¹⁰ Hea odheai-achea survatek ami polloilem toxem he ragan bhorlole dhormik fuddari apostlank porgottnnechem kam bond korunk spoxtt ritin sangtat. Punn apostl kitem kortat? Soglea apostlam pasot, Pedru mukhar soron dhiran oxem mhunntta: “Ami munxanchi nhoi punn Devachi adnea pallunk zai.” (Itihas 5:29) Ani tednam thaun aiz soglim Kristanvam apostlanchi dekh ghetat. Ami sorkari odhikareank khaltim ravchim mhunn Devan amkam sanglam tem khorem. Tori astana, Devachi khuxi korunk amkam addaunk odhikareank hokʼk na. Tor amchea disamnim pasun, ‘odhikar aslole’ munis amchea porgottnnechea kamacher bondi haddttat tednam bore bhaxen sakx diunk Devan amkam dilʼli adnea ami pallttat. (Rom. 13:1) Punn oxem kortana ami chotrai dovortat ani xittuk ravtat.

¹¹ Apostlamnim dhiran hea toren zobab dilo tem polloun, te neai korpi anik ragar zale ani apostlank “marun uddounk” tannim nichov kelo. (Itihas 5:33) Tor atam te tankam jivexim martole mhunn apostlamnim ghoddie chintlem astolem. Punn Jehovan tankam eke ojapache ritin modot keli.

12, 13. (a) Gamalielan, her neai korpeank kitem korunk sanglem, ani tannim kitem kelem? (b) Jehova aiz aplea lokank koxi modot korta, ani “nitivontponna khatir . . . dukh pasun sosunk poddlem zalear” pasun ami kitem ugddas dovrunk zai?

¹² Gamaliel, “Kaideacho xikxok aslo ani lokam modem taka borem nanv aslem.” d Ani dusre neai korpi taka khub man ditale. Karonn jednam Gamaliel-an ‘thoddea vella pasot apostlank bhair vhor mhunn hukum dilʼlo’ tednam tea neai korpeamnim tachem aikolem. (Itihas 5:34) Gamalielan tankam poilim kitem ghoddlem tem ugddasak haddlem. Thodde lok Romi odhikareanchea add voitale, punn tancho fuddari melea uprant tanchim zhogddim rokddinch bond zatalim. Tor neai korpeamnim apostlank addaunchem nhoi, punn tankam pasiens dakhounchem mhunn Gamalielan tankam sanglem. Karonn tancho fuddari Jezu halinch melʼlo. Gamalielan tankam khatren oxem sanglem: “Hea munxanchea vattek vochonakat mhunn hanv tumkam sangtam. Tankam soddat, karonn hi ievzonn vo hem kam munxam thaun asa zalear tem nirfoll zatolem. Punn tem Deva thaun asa zalear tumi tem bond korunk xokchenant. Tumi toxem kelem zalear tumi Deva add zhuztat oxem zaunk xokta.” (Itihas 5:38, 39) Tor neai korpeamnim tachem aikolem. Punn tannim poilim apostlank apoun haddle, “tankam mar ghatlo, ani Jezuchea nanvan ulovop bond korat” mhunn hukum ghalun tankam uprant soddle.—Itihas 5:40.

¹³ Gamaliela bhaxen odhikar aslolea munxank uzar korun aiz Dev aplea lokank modot korta. (Mho. 21:1) Aple xokten to odhikareank, neai korpeank ani kaido korpeank, apleak zai tem korunk fuddem kaddtta. (Ne. 2:4-8) Punn “nitivontponna khatir . . . dukh pasun sosunk poddlem zalear” pasun, ami don mudʼde ugddas dovrunk zai. (1 Ped. 3:14) Poilo mhunnttlear, amcher ietat te tras sosunk Dev amkam ghottai ditolo. (1 Kor. 10:13) Ani dusrem, virodhi Devachem kam “bond korunk xokchenant.”—Iz. 54:17.

14, 15. (a) Apostlank mar ghatlo tednam tankam koxem bhoglem ani kiteak? (b) Jehovachea lokank ieta to dhumallo tim khuxalkaien sostat mhunn dakhounk ek onubhov sangat.

¹⁴ Punn apostlank mar ghatlo tednam, niraxi zaun te atam porgottnnechem kam korop bond kortole mhunn tannim chintlem kai? Na. Portench zalear, “te khuxal zale, ani Mha-sobhentlean bhair soron gele,” mhunn Bible amkam sangta. (Itihas 5:41) Punn te “khuxal” kiteak zale? Tankam mar poddlo tednam, tankam dukh zali tem khorem. Tori astana, te Jehovak visvaxi asat ani Jezuchi dekh ghetat dekhun tankam dhumallo sosunk poddlo hem zannam zalolean tankam khuxalkai mellʼlli.—Mt. 5:11, 12.

¹⁵ Amchea poilea xekddeantlea Kristi bhav-bhoinnam bhaxen, aiz porgottnnechea kamank lagon amkam dhumallo sosunk poddtta tednam, ami khuxalkaien sostat. (1 Ped. 4:12-14) Punn konnui amkam dhomki ditat, dhumallo ditat vo amkam bondkhonnint ghaltat tednam amkam borem dista oxem nhoi. Tori astana, ami Jehovak visvaxi asat hem zannam zalolean amkam khuxalkai melltta. Hea vixim amkam bhav Henryk Dornik-achem udharonn asa. Taka eka nixttur sorkara thaun zaitim vorsam khor dhumallo sosunk poddlo. Agost 1944 hea vorsa, taka ani tachea  bhavak, concentration camp-ant dhaddunk odhikareamnim nirnnoi ghetlo mhunn to sangta. Tanchea eka virodhean tanche vixim oxem sanglem: “Tankam kitem-i korunk ami tancher dobhav ghalunk xokonant. Karonn tanchea bhavarthak lagon tankam moronk poddlem zalear pasun te khuxal astat.” Hea vixim bhav Dornik sangta: “Mhaka moronk naka tem khorem. Tori astana, mhaka dhumallo sosunk poddtta tednam, hanv dhiran ani xant ravon tacho fuddo kortam. Ani hanv Jehovak visvaxi asa hem zannam zalolean mhaka khuxalkai melltta.”—Jak. 1:2-4.

16. Apostlamnim bori khobor porgottunk nichov kelo mhunn tannim koxem dakhoilem, ani aiz ami tanchi dekh koxi ghetat?

¹⁶ Apostlamnim vell ibadd korinastana porgottnnechem kam porot suru kelem. Te bhienastana, “dor disa Devmondirant ani ghoran-ghor vochon . .  Jezu Krista vixim bori khobor porgottit ravle.” e (Itihas 5:42) Hea urbevont apostlamnim bore toren sakx diunk ghott nichov kelo. Ani Jezun tankam sanglolem toxem tannim lokanchea ghoramnim vochon tankam bori khobor porgott keli. (Mt. 10:7, 11-14) Hea toren, akʼkhem Jeruzalem tanchea xikounnen bhoronk pavlem. Aizui apostlanchi dekh gheun, Jehovachim Sakxi ghoran-ghor porgottnni kortat. Tor ami amchea vattarant, dor-eka ghorant voitat ani dor-ekleak bori khobor aikounchi sondhi ditat tednam, amkam bore toren sakx diunk zai mhunn ami dakhoun ditat. Ani Jehova amchea vavracher khorench besanv ghalta mhunn amkam sarkem dison ieta. Karonn hea nimannea disamnim, lakʼkhamnim lok bori khobor manun gheunk pavla. Ani tanchea modlea zaitea zannamnim tor, Sakxeamnim ghor-ghoramnim porgottnni keli tednam bori khobor aikoli.

17-19. Jeruzalemantle Kristi sobhent kosli oddchonn aili, ani ti suttavi korunk apostlamnim kitem korunk sanglem?

¹⁷ Bautizm ghetlolea xisam modem zaitim zannam pois thaun Jeruzalemant ailʼlim. Tor porot aplea ganvant voichea poilim, aplea novea bhavartha vixim te anik xikonk sodhtale. Ani heach pasot tankam modot zaunk, Jeruzalemant aslolea xisamnim ap-khuxen poixe dile. Oxem kelolean, goroz teo jevnnacheo ani her vostu tim gheunk xoktalim. (Itihas 2:44-46; 4:34-37) Punn heach vellar, thoim ek bhirankull  poristhiti uprasli. Ti mhunnttlear, ‘sodanch jevnnacheo vostu vanttʼttale tednam’ Grik bhas uloupi vidvancher “konn dhean dinasle.” (Itihas 6:1) Punn dusre vatten, Hebrev bhas uloupi vidvank goroz tem mellttalem. Tor Grik bhas uloupi vidvancher, ghoddie onʼneai zatalo vo tea sobhent bhedbhav zatalo. Ani heach pasot, hea nove sobhent futt pasun poddonk xoktali.

¹⁸ Tor Sonchalon Monddollan seva korpi apostl, hi oddchonn koxi suttavi kortole asle? “Devachem utor xikounchem soddun jevonn vanttunk laglear,” tem sarkem zaunchem na mhunn te somzole. (Itihas 6:2) Tor hem “gorjechem kam” polloun gheunk tannim xisank ‘povitr xokten ani zannvaien bhorlolea’ sat bhavank sodhunk sanglem. (Itihas 6:3) Hea purte aslolea bhavank fokot jevonn vanttpachench nhoi, punn chodd korun anikui kam korchem poddttolem aslem. Zoxem, poixe bore toren koxe uzar korche tem polloun ghevop, gorjecheo vostu vikteo ghevop ani tannim poixe koxe moddle tem boroun dovrop. Hea bhavam vixim bariksannen chintlea uprant, ani magnnem kelea uprant, hem “gorjechem kam” polloun gheunk tannim sat bhavank nemle. Tannim vinchun kaddlolea soglea bhavank Grik nanvam aslim. Tor hea bhavank vinchun kaddlolean, Grik bhas uloupi vidvank, tancher visvas dovrunk sompem zalem. f

¹⁹ Punn hea bhavank jevonn vanttunk nemlole dekhun, tankam atam porgottnnechem kam korunk poddchem naslem kai? Na, oxem nhoi! Karonn hea sat bhavam modem, Istev aslo, zo urben ani dhiran bori khobor porgottʼttalo mhunn Bible amkam sangta. (Itihas 6:8-10) Toxench, tanche modem Filip pasun aslo, zaka ‘porgottnnar’ mhunnttla. (Itihas 21:8) Tor hantuntlean, he satui bhav urben porgottnnechem kam pasun kortale mhunn amkam kollon ieta.

20. Vhoddilank ani sobhechea sevokank vinchun kaddttana Jehovache Sakxi apostlanchi dekh koxi ghetat?

 ²⁰ Aiz dekhrekh korpi bhavank vinchun kaddttana, Jehovache Sakxi apostlanchi dekh ghetat. Te vinchun kaddunk sodhtat tea bhavank, Jehovachem chintop asonk zai ani povitr xoktechim follam tanchea jivitant dison ieunk zai. Sonchalon Monddollachem nirdexon pallun, Bible-a pormonnem purte aslolea bhavank, vhoddil vo sobheche sevok mhunn vinchun kaddttat. Bible Devachea povitr xokte udexim boroila dekhun, hea bhavank povitr xokte vorvim vinchun kaddleat oxem ami mhunnonk zata. g (1 Tim. 3:1-9, 12, 13) He bhav sobhent gorjechim kamam korunk khub vavr kortat. Udharonnak, sobhent goroz aslolea zannttea bhav-bhoinnank modot korunk vhoddil manddavoll kortat. (Jak. 1:27) Toxench, thodde vhoddil Raj-ghoram bandunk, odhivexonachi manddavoll korunk, ani Hospital Liaison Somiti sangata kam korunk khub vavr kortat. Tea bhair, vhoddil gonvlli bhett kortat ani xikoupachea kamant fuddakar ghetat, ani sobheche sevok hea bhavank modot kortat. Hea bhavank sobhent ani songottnnent zaiteo zobabdareo asat. Punn tannim Devan dilʼli Rajeachi bori khobor porgott korchem kam pasun korit ravonk zai.—1 Kor. 9:16.

21, 22. Jeruzalemantle nove sobhecher Jehovan besanv ghatlem mhunn ami kiteak mhunnonk zata?

²¹ Jeruzalemantle nove Kristi sobhek, zaitea dhumalleacho fuddo korcho poddlo. Toxench, sobhent bhitor pasun tankam ek oddchonn aili. Tori astana, Jehovache modotin tim hea sogleacho fuddo korunk pavlim. Oxem ami kiteak mhunnonk zata? Karonn Bible amkam sangta: “Devachem utor ximpddot gelem ani Jeruzalemant xisancho ankddo-i rokddoch vaddot gelo, ani iadnikanchea eka vhodd zomean bhavarth dovorlo.” (Itihas 6:7) Itihas pustokant sanglolea zaitea ghoddnneam modem, hi ek ghoddnni zaun asa, ji amkam Jehovan hea sobhecher koxem besanv ghatlem tem dakhoita. (Itihas 9:31; 12:24; 16:5; 19:20; 28:31) Aiz pasun sonvsarbhor zata tea vaddavolli vixim ami aikotat tednam, amkam kitli urba melltta nhoi!

²² Poilea xekddeant, dhormik fuddareamnim Kristanvank dhumallo divop bond korunk na. Punn fuddarak, tankam anikui dhumalleacho fuddo korcho poddlo. Rokddoch Istevak khor virodh ailo ani hea vixim ami fuddlea odheai-ant polloitolim.