1-3. Jezu sorgar voitana kitem-kitem ghoddtta, ani ami khoinchea prosnanche zobab polloitolim?

 JEZU melo tednam tache apostl khub dukhi asle. Punn Jezu jivont zalea uprant te ekdom khuxal ani sontosbhorit zale! 40 dis, Jezu tankam veg-vegllea vellar dixtti poddlo, tannem tankam xikoile ani urba dili. Jezu sangata vell sarunk tankam khub borem dislem ani te taka soddunk sodhinasle. Punn Jezu sangata ho tancho nimanno dis aslo.

² Zoitunachea Dongrar ektthovlʼle astana, Jezu sangta tem dor ek utor tache apostl bariksannen aikotat. Te tachea koddlean xikot ravonk sodhtat. Punn Jezu aplem ulovop sompoita ani aple hat ubarun tankam besanvam dita. Uprant sovkas-sovkas korun, to prithume voilean voir soronk lagta ani tache apostl taka polloit ravtat. Punn okosmat ek kup modem ieta ani Jezu tankam disona. Tori astana, te mollbak polloit ravtat.—Lukas 24:50; Itihas 1:9, 10.

 ³ Hea ghoddnne uprant Jezuchea apostlanchem jivit sarkem bodolʼlem. Karonn atam tancho Dhoni, Jezu Krist tanchea sangata hea prithumer naslo. Tor te atam kitem kortole? Jezun suru kelʼlem kam fuddem vhoronk tannem tankam toiar kelʼle mhunn ami khatri dovrunk zata. Tor tannem tankam hem mhotvachem kam korunk koxe toiar kele, ani tannim hem kam koxem kelem? Toxench, aiz Kristanvamnim tanchea thaun kitem xikonk zata? Hea prosnanche zobab amkam Itihasachea poilea odheai-ant mellttat, jea vorvim amkam urba mellttoli.

4. Lukas Itihas pustokachi survat koxi korta?

⁴ Lukasan Itihas pustok Theofilasak boroilʼlem, jea munxak tannem Lukas hem Xubhvortoman boroilʼlem. a Hem amkam tachea survatechea utramnim kolltta. Hea Xubhvortomanachea xevottak sanglolea ghoddnneam vixim thoddeach utramnim sangon, to Itihas pustokachi survat korta dekhun Jezuchea mornna uprant ghoddlolea ghoddnneam vixim to Itihas pustokant sangta mhunn kollon ieta. Hem sangtana, to matxim dusrim utram uzar korta ani novi mahiti dita.

5, 6. (a) Jezuchea xisamnim aplo bhavarth ghott korunk kitem korunk zai? (b) Khorea Kristanvancho bhavarth ‘zaitea puraveancher’ adarit asta mhunn ami kiteak mhunnonk zata?

⁵ Jezuchea xisank tancho bhavarth ghott samballunk koxi modot zatoli? Itihas 1:3 Jezu vixim sangta: “Apleak jivont kela mhunn tannem tankam zaite purave dile.” Fokot Lukas, zo ek “mogall . . . dotor” aslo, tannench Bible-ant “purave,” hem utor uzar kelem. (Kol. 4:14) Choddxim, him utram dotor uzar kortale. Hea utrancho orth, he purave khatri dovorpa sarke, visvas dovorpa sarke ani chuki vinnem asle. Jezun aplea vixim pasun oslech purave dile. Karonn to aplea xisank zaite pavtti dixtti poddlo. Thodde pavtt ekleak vo dog zannank, thoddea vellar soglea apostlank ani eka vellar tor 500 poros chodd zannank dixtti poddlo. (1 Kor. 15:3-6) Khorench, he kitle khatri dovorpa sarke purave nhoi!

⁶ Jezu hea prithumer jielo, amchea patkam pasot melo ani taka jivont kelo mhunn amche lagim pasun purave asat kai? Hoi! Bible-ant, zannim Jezuk aplea dolleamnim polloilo ani tachim utram aikolim, tem amkam vachunk melltta. Tor ami tea vixim kholaien obheas kelo ani magnnem korun niall kelo zalear, amcho bhavarth ghott zaunk pavtolo. Karonn khorim Kristanvam zalʼlean ami dolle dhampun kiteacheruch bhavarth dovornant. Punn amcho bhavarth ‘zaitea puraveancher’ adarit asta. Ani sasnachem jivit melloun gheunk oslo bhavarth asop khub gorjecho.—Juanv 3:16.

7. Porgott kortana ani xikoitana Jezun amkam kosli dekh dovorlea?

⁷ Apleak jivont kela mhunn purave dilea uprant, Jezu aplea xisank ‘Devachea  Rajea vixim sangot ravlo.’ Udharonnak, Mesiasak tras sosun moronk poddttolo mhunn kelʼleo bhasaunneo tannem tankam anik bore toren somzaileo. (Lukas 24:13-32, 46, 47) Mesias zaun tannem jem kelem tea vixim sangtana, tannem Devachea Rajeacher zor dilo. Karonn Devan taka aplea razvottkecho Raza mhunn vinchun kaddlolo. Ani ho tachea porgottnnecho mukhel vixoi aslo. Tor aiz tache xis pasun, hoch mukhel vixoi porgott kortat.—Mt. 24:14; Lukas 4:43.

8, 9. (a) Apostlanchea monant khoinche don chukiche vichar asle? (b) Tanche he chukiche vichar nittaier haddunk Jezun tankam koxi modot keli, ani aiz Kristanvamnim tantuntlean kitem xikonk zata?

⁸ Zoitunachea Dongrar Jezu ani tache apostl nimanne pavtt mellon aile tednam tannim Jezuk vicharlem: “Somia, tum heach vellar Israelak tanchem raj porot ditolo?” (Itihas 1:6) Hantuntlean, apostlanchea monant don chukiche vichar asle mhunn kollon ieta. Poilem mhunnttlear, Israel raxttrak hea prithumer Devachem Raj porot cholounk mellttolem, ani dusrem, tem Raj ‘teach vellar’ razvottki choloitolem mhunn tankam dislolem. Tor Jezun tanche chukiche vichar koxe nittaier haddle?

⁹ Tancho poilo vichar chukicho asa tem tankam beginuch kollon ietolem mhunn Jezu chodd korun zannam aslo. Karonn fokot 10 disam uprant, eka novea raxttrachi, mhunnche, otmik Israelachi survat zaunchi asli. Tor Israel raxttra sangata, Devacho sombond beginuch kabar zauncho aslo. Tancho dusro vichar nittaier haddunk, Jezun tankam mogan oxem sanglem: “Vell vo kall zannam zauncho odhikar tumkam na. To tharauncho odhikar Bapan aplea lagim dovorla.” (Itihas 1:7) Toxench, apunn morchea thoddea disam poilim, Jezun sanglem ki xevott kednam ietolo to ‘dis ani vell’ konnakuch khobor na, punn “fokot Bapak khobor asa.” (Mt. 24:36) Tor khoinchi ghoddnni khoinchea vellar ghoddonk zai, tem Jehova tharaita. Aiz pasun Kristanvamnim, xevott kednam ietolo hea vixim gorje bhair uskeunchi goroz na. Na zalear amkam zannam zaunchi goroz na tea vixim ami gorje bhair usketat mhunn dison ietolem.

10. Ami apostlam bhaxen kitem korunk zai, ani kiteak?

¹⁰ Punn tanchea hea chukichea vicharank lagon, ami tankam unnea nodren lekhchem nhoi. Karonn tancho bhavarth ghott aslo. Ani tannim aplem chintop sarkem kelem. Toxench, tanchea chukichea vicharank lagon tannim prosn vicharlo khoro, punn hea vorvim te kitle zagrut asle tem dison ieta. Karonn Jezun tankam zaite pavtti, “zagrut ravat” mhunn sanglolem. (Mt. 24:42; 25:13; 26:41) Tor hantuntlean kollon ieta ki te sarke zagrut asle ani Devachem Raj kednam suru zatolem mhunn te khatreche purave sodhtale. Aiz ami pasun tanchi dekh gheunk zai, karonn ami “nimannea disamnim” jietat ani amkam zagrut ravchi anik chodd goroz asa.—2 Tim. 3:1-5.

11, 12. (a) Jezun aplea xisank kitem korunk sanglem? (b) Aplea xisank porgott korunk sangchea poilim tancher povitr xokti ietoli mhunn Jezun tanchea ugddasak kiteak haddlem?

¹¹ Apostlamnim kiteacher chodd dhean diunk zai tem Jezun tankam sanglem. Tannem mhunnttlem: “Tumcher povitr xokti ietoli tednam tumkam boll mellttolem  ani Jeruzalemant, ani akʼkhea Judeiant ani Samariant, toxench prithumechea sogleant poisulʼlea vattarant pasun tumi mhojea vixim govai ditole.” (Itihas 1:8) Tor Jezu melʼleantlo jivont zala mhunn tannim sogleant poilim Jeruzalemant, zoim taka jivexim marlolo, uprant akʼkhea Judeiant, tea uprant Samariant ani magir sogleant poisulʼlea vattaramnim khobor diunk zai asli.

¹² Porgottnnechea kama vixim sangchea poilim, Jezun aplea apostlank tancher povitr xokti ietoli mhunn porot ugddasak haddlem dekhun kitlem borem zalem nhoi! Pollounk gelear, “povitr xokti,” him utram Itihas pustokant 40-am poros chodd pavtti vachunk mellttat. Tor povitr xoktecho adar nastana, porgottnnechem kam zaunchench naslem mhunn hea pustokantlean spoxtt ritin kollon ieta. Khorench, ami povitr xokte pasot magnnem korop kitlem gorjechem nhoi! (Lukas 11:13) Aiz amkam hea xoktechi anikui chodd goroz asa.

13. Aiz Jehovachim Sakxi kitlea vhodd promannan porgottnnechem kam kortat, ani hea kamant ami zata titlo vavr kiteak korunk zai?

¹³ Jezuchi adnea pallun, apostlamnim “prithumechea sogleant poisulʼlea vattarant” porgottnni keli. Punn aiz ho vattar anikui vhodd asa. Aiz pasun Jehovachim Sakxi, prithumechea soglea poisulʼlea vattaramnim vochon khuxalkaien Devachea Rajeachi bori khobor porgottʼttat. Karonn soglea munxank, hi bori khobor pavloli Devachi khuxi mhunn tim zannant. (1 Tim. 2:3, 4) Lokancho jiv salvar korchea hea kamant bhag gheunk, tumi zata titlo vavr kortat kai? Hoi zalear, hea kamant tumkam melltta ti khuxalkai ani dhadosponn anik khoincheach kamant mellchem na mhunn ugddas dovrat. Ani hem kam korunk Jehova tumkam apli povitr xokti ditolo. Tor, porgottnnechem kam bore toren korunk ami kosleo vatto apnnaunk zai ani hea kama vixim amkam koxem disonk zai, tache vixim amkam Itihas pustokant anik mahiti mellttoli.

14, 15. (a) Jezu porot koso ietolo mhunn devdutamnim sanglem, ani tacho orth kitem? (Futtnott pasun polloiat.) (b) Jezu jea toren sorgar gelo “teach toren” to porot koso ailo?

¹⁴ Ami hea odheai-achea survatek polloilʼlem toxem, Jezu prithumer thaun voir sorta ani thoddea vella uprant to xisank dixtti poddona. Tori astana, tache 11 apostl mollbak polloit ravtat. Tea uprant tankam don devdut dixtti poddttat ani tankam mogan somzaitat: “Galiliekaramno, tumi hanga ube ravon mollbak kiteak polloitat? Ho Jezu zaka tumchea modlean mollbar ubarun vhelo, taka jea toren tumi mollbar voitana polloila teach toren to porot ietolo.” (Itihas 1:11) Tor thoddea dhormamnim xikoitat toxem, Jezu kuddin porot ietolo mhunn te devdut sangtale kai? Na, toxem nhoi. Oxem ami kiteak mhunnttat?

¹⁵ Devdutamnim apostlank sanglem, ki Jezuk tannim jea toren mollbar voitana polloila “teach toren” to porot ietolo. Punn, teach kuddin ietolo mhunn tannim sangonk na. b Tor to sorgar koxe toren gelo? Devdut apostlam lagim uloile tednam Jezu tankam dixtti poddonaslo teach toren, to porot ieuncho aslo. Ani toxench ghoddlam. Tea bhair, zoxem Jezu prithumer thaun sorgar aplea Bapaxim gela mhunn fokot apostlankuch kollon ailʼlem, teach bhaxen aiz Bible-achi bori vollokh asa, tankach, Jezu Devachea Rajeacho Raza zala ani ami khoinchea  vellar jietat tachi sarki somzonni asa. (Lukas 17:20) Tor Jezuchi razvottki suru zali mhunn amche lagim kosle purave asat tem ami zannam zaunk zai ani tea vixim dusreankui sangonk zai. Tednam, ami nimannea disamnim jietat mhunn tankam-i kollon ietolem.

16-18. (a) Itihas 1:13, 14 pormonnem, Kristanvam bhokti korunk ektthaim zatalim tantuntlean amkam kitem kolltta? (b) Jezuchi avoi Marie thaun ami kitem xiktat? (c) Ami aiz ektthaim mellon ievop kiteak gorjechem?

¹⁶ Jezu sorgar gelea uprant tache apostl “khuxalkaien Jeruzalemant porot gele.” (Lukas 24:52) Tor, Jezun tankam margdorxon dilʼlem ani xikounn dilʼli ti tannim pallʼlli kai? Jezuche xis eka “unchlea rumant” ektthaim zalʼle mhunn Itihas 1:13, 14 amkam dakhoun dita ani oslea vellar kitem zatalem tea vixim amkam thoddi mahiti melltta. Tea disamnim, Palestine-ant aslolea choddxea ghorant ek ‘unchlo rum’ astalo ani thoim vochonk bhaile vatten panvdde astale. Tor ho rum ghoddie, Markuchea avoichea ghoracho asonk xokta, jea vixim Itihas 12:12-nt sanglolem asa. Tem ghor konnachem-i zaum, to ek sadho rum aslo ani Jezuchea xisank upkarlo. Punn tanche modem konn aslo, ani thoim tannim kitem kelem?

¹⁷ Thoim fokot apostl vo dadlech nasle, punn tanchea modem ‘thoddeo bailo-i’ asleo, zoxem Jezuchi avoi Marie. Ani Bible-ant, tiche vixim hanga nimanne pavtt vachunk melltta. Ti tea unchlea rumant asli tantuntlean kollon ieta ki Marie aplench vhoddponn sodhinasli. Punn ti Devachi bhokti korunk khaltikaien her bhav-bhoinnam sangata ektthaim zatali. Chintat, hea vellar tiche char put tichea sangata asle mhunn tika kitli bhuzvonn mellʼlli astoli. Eka tempar Jezu jivo astana tannim tacher bhavarth dovrunk naslo. (Mt. 13:55; Juanv 7:5) Punn to jivont zalea uprant, tache he sovte bhav tacher bhavarth dovrunk lagle.—1 Kor. 15:7.

¹⁸ Tachea xisamnim ektthaim mellon ieun kitem kelem, tem zannam zaunk ami Itihas 1:14 polloum-ia. Thoim mhunntta: “Te sogle ekach udʼdhexan magnnem korit ravle.” Khorench, ektthaim mellon ievop Kristanvanchea bhoktecho ek mhotvacho bhag zaun asa. Ami ektthaim mellon ietat tednam, eka-mekak urba ditat, Jehova Deva thaun xikounn ghetat, ani sogleam-von mhotvachem mhunnttlear, amchea sorginchea Bapa, Jehovachi bhokti kortat. Ani hea vellar ami magnnem kortat ani gitam gaitat tim Jehova Devak khuxalkai haddttat ani hem amkam khub gorjechem. Tor hea ritin mellon ieun Jehovachi bhokti korunk ani eka-mekak urba diunk ami kednanch chukounchem nhoi!—Heb. 10:24, 25.

19-21. (a) Pedrun fuddakar ghetlo tantuntlean ami kitem xiktat? (b) Judasachea bodlek dusrea apostlak kiteak vinchun kaddunk zai aslo, ani taka jea toren vinchun kaddlo tantuntlean ami kitem xiktat?

¹⁹ Atam, Jezuchea xisank ek mhotvacho mudʼdo suttavo korunk zai aslo. Ani hem korunk apostl Pedru fuddakar gheta. (Vers 15-26) Heach Pedrun, Jezuk tin pavtti nakarlolo. (Marku 14:72) Punn tannem aplea jivitant bodlav kelo ani poschatap kelo. Jehovan Pedruk fuddakar gheunk uzar kelo hem zannam zaun amkam kitli bhuzvonn melltta nhoi! Pedru bhaxen ami pasun thodde pavtti chuktat. Punn ami kallzantlean poschatap kortat tednam, Jehova boro ani ‘udar kallzan bhogxitolo’  mhunn ami sodanch ugddas dovrunk zai.—Iz. 55:7.

²⁰ Tor Judasan Jezucho ghat kelʼlo dekhun, tachea bodlek ek novo apostl vinchun kaddunk zai mhunn Pedruk kollon ailem. Ani ho munis oslo asonk zai aslo, zannem Jezucho pattlav kelʼlo ani to jivont zala tem polloilʼlem. (Itihas 1:21, 22) Karonn Jezun oxi bhasaunni kelʼli: “Mhojea fattlean ietat te tumi, 12 xinvasonacher bostole ani Israelachea 12 kullancho neai kortole.” (Mt. 19:28) Toxench Jehovan bhasaunni kelʼli, ki 12 apostl zannim Jezucho pattlav kelʼlo, te fuddarak Novea Jeruzalemache ‘12 buniadiche’ fator zatole. (Prok. 21:2, 14) Hea toren Judasa vixim ji bhasaunni kelʼli, ki ‘tachi zutti vo zago anik konn gheum,ʼ hi bhasaunni purnn zata tem pollounk Devan Pedruk modot keli. —St. 109:8.

²¹ Tor novea apostlak koso vinchun kaddlo? Tannim Israel lok uzar kortale ti ek rit uzar keli, mhunnttlear, sorti ghalop. (Mho. 16:33) Hea toren sorti uzar kelʼleo, mhunn Bible-ant nimanne pavtti sanglam. Tea uprant, xisancher povitr xokti aili tednam, hi rit uzar korpachi bond zali astoli. Punn hea vellar apostlamnim sorti kiteak ghatleo, tem amkam tanchea magnnea vorvim kollon ieta. Tannim mhunnttlem: “Jehova Deva, tum sogleanchim kallzam vollkhota, hea don munxam modlo tunvem konnak vinchla tem amkam sang.” (Itihas 1:23, 24) Tor Jehovan konnak vinchla tem zannam zaunk tannim sorti ghatleo. Hea vorvim Mathiasachem nanv ailem. To 70 xisam modlo eklo aslo astolo, zankam Jezun porgott korunk dhaddlole. Hea ritin Mathias “tea Bara” apostlam modlo eklo zaun pavlo. c—Itihas 6:2.

22, 23. Aiz sobhent fuddakar ghetat tankam ami khaltim ravon tanchem kiteak aikonk zai?

²² Hea ghoddnnentlean amkam kollon ieta ki Devachea lokank eka songottnnechi goroz asa, zantunt fuddakar gheunk bhav astat. Aiz pasun sobhent fuddakar gheunk oslea bhavank vinchun kaddttat. Punn tankam vinchun kaddche poilim te Bible-a pormonnem purte asat vo na hem vhoddil polloitat ani povitr xoktechea margdorxona pasot magnnem kortat. Hea vorvim, vhoddil mhunn vinchun kaddla tea bhavak povitr xokte udexim vinchun kaddla mhunn bhav-bhoinnam manun ghetat. Tor ami hea bhavank khaltim ravonk zai ani tanchem aikonk zai, tednanch sobhent ekvott astolo.—Heb. 13:17.

²³ Jezu jivont zalea uprant tannem aplea xisam sangata vell sarlo ani tankam dhir mellʼllo. Toxench, sobha songottit zalea tem pollounui tankam ghottai mellʼlli. Hea vorvim, fuddem kitem ghoddchem aslem tea pasot te toiar asle. He mhotvache ghoddnne vixim ami fuddlea odheai-ant polloitolim.