ODHEAI 24
“Dhir Dhor!”
Pauluk jivexim marunk Judev lok ievzonn kaddttat ani Paulu Feliksa mukhar apli bazu manddtta
Ho odheai Itihas 23:11–24:27-acher adarit asa
1, 2. Apleak Jeruzalemant tras sosunk poddle tednam Paulu kiteak ojap zaunk na?
JERUZALEMANTLEA ragixtt zomea thaun salvar kelea uprant, Pauluk porot bondkhonnint ghatlo. Jeruzalemant dhumallo sosunk poddtta mhunn ho urbevont apostl ojap zaunk na. Karonn hea xarant taka “bondkhonn ani sonkoxttancho” fuddo korunk poddttolo mhunn taka poilinch khobor asli. (Itihas 20:22, 23) Aplea sovem khorench kitem-kitem ghoddttolem tem taka spoxtt toren khobor nasli tem khorem, punn Jezuchea nanva pasot tras sosunk poddttole mhunn to zannam aslo.—Itihas 9:16.
2 Pauluk Jeruzalemant dhortole ani taka “dusream raxttrantlea lokanchea tabeant ditole” mhunn Kristi provadeamnim pasun sanglolem. (Itihas 21:4, 10, 11) Thoddeach vella poilim, Judevancho ek zomo taka jivexim marunk sodhtalo ani uprant Mha-sobhent Paulun kitem mhunnttlolem taka lagon tancho vad-vivad zalo tednam, te vangddi ‘Pauluk marun uddoitole’ asle mhunn dison ieta. Tor atam Paulu Romant ek koidi asa, tacher kes ghatloli asa ani apleacher ghatlole arop khotte mhunn dakhounk tannem atam ulounk zai. (Itihas 21:31; 23:10) Tor hea sogleacho fuddo korunk Pauluk khorench urbechi goroz asli!
3. Porgottnnechem kam korit ravonk amkam koxi urba melltta?
3 Hea nimannea disamnim “Krist Jezuchim xis koxim Devachi bhokti korit jieunk sodhtat tankam sogleank dhumallo soschoch poddttolo” mhunn amkam khobor asa. (2 Tim. 3:12) Tor amkam pasun vella-vellar porgottnnechem kam korit ravonk urbechi goroz asta. Ani “visvaxi ani xanno chakor” prokaxonam ani mittinge udexim amkam sarkea vellar urba ditat mhunn ami khorench tanche khub upkari asat. (Mt. 24:45) Khoincheach dusmana lagim aplea soglea sevokank kabar korun uddounk zaunchem na, nhoi mhunn porgottnnechem kam bond korunk zaunchem na mhunn Jehovan amkam khatri dilea. (Iz. 54:17; Jer. 1:19) Punn apostl Paulu vixim kitem? Bori khobor porgott korit ravonk taka goroz ti urba mellʼlli kai? Hoi zalear, koxi, ani tea uprant Paulun kitem kelem?
‘Ievzonn Korun Ghetlolo Soput’ Nirfoll Zalo (Itihas 23:11-34)
4, 5. Pauluk kosli urba mellʼlli, ani ti taka sarkea vellar mellʼlli mhunn ami kiteak mhunnonk zata?
4 Mha-sobhentlean vattailʼlo tea ratik apostl Pauluk goroz ti urba mellʼlli. Karonn Bible sangta: “Somi Paulu fuddeant ieun ubo ravlo ani tannem mhunnttlem: ‘Dhir dhor! Karonn tunvem Jeruzalemant mhojea vixim bore bhaxen sakx dilea toxi Romant pasun diunk zai.’” (Itihas 23:11) Jezuchim him urbebhorit utram aikon Pauluk khatri mellʼlli, ki apunn Jeruzalemantlean salvar zaun Romant pavtolo ani thoim Jezu vixim sakx ditolo.
“Challisam poros chodd munis taka jivexim marunk lipon bosleat.”—Itihas 23:21
5 Pauluk hi urba sarkea vellar mellʼlli. Karonn dusrea disa 40 ‘Judev dadleamnim ek ievzonn korun soput ghetlo ki Pauluk jivexim marchea poilim tannim kitem-i khalem vo piele zalear tancher xirap poddttolo.’ Tannim ievzonn korun soput ghetlolo hantuntlean tannim Pauluk jivexim marunk ghott nichov kelʼlo mhunn dison ieta. Ani tanchi hi ievzonn xarti pavonk na zalear tancher xirap poddttolo vo tanche sovem kitem tori vaitt ghoddttolem mhunn tankam distalem. (Itihas 23:12-15) Tanchi ievzonn asli, ki te taka anik prosn vicharunk Mha-sobhent apoitole punn vatter taka dhorun tacho jiv kaddttole. Ani tanche he ievzonnek mukhel iadnikamnim ani vhoddilamnim maniotai dilʼli.
6. Apleak jivexim marunk ievzonn kaddlea mhunn Pauluk koxem kollʼllem, ani tornnatteamnim Pauluchea bhoinnichea cheddeachi dekh koxi gheunk zata?
6 Pauluchea bhoinnichea cheddean tanchi hi ievzonn aikoli tednam, tannem tea vixim vochon Pauluk sanglem. Ani Paulun tannem kitem aikolʼlem tem vochon Romi senapoti Klaudius Lisiasak sangonk lailem. (Itihas 23:16-22) Hea tornnatteachem nanv amkam Bible-ant diunk na. Punn tachea bhaxen aiz pasun Jehovache songottnnent zaitim tornnattim asat. Tim aplea jivitant teag korun Devachea lokam pasot dhiran vavurtat ani Rajeachem kam fuddem vochonk visvaxiponnan apleachean zata tem soglem kortat. Khorench, Jehova tancho khub mog korta mhunn kosloch dubhav na!
7, 8. Paulu surokxit uronk Klaudius Lisiasan kosli manddavoll keli?
7 Klaudius Lisias, 1,000 munxancho senapoti aslo. Pauluk marun uddounchi Judevanchi ievzonn taka kollʼllea uprant tannem rokddench 470 soinik, ghoddesvor ani bale gheun aslolea soinikank teach ratik Jeruzalema thaun Pauluk Sezarient gheun vochonk sanglem. Ani thoim pavlea uprant, tankam Pauluk Razpal Feliksa mukhar vhoronk sanglem. a Sezaria Romi sorkara khala aslolea Judeiachem rajdhani aslem. Thoim zaite lok Judev asle tem khorem, punn tanchea poros chodd Videxi lok thoim ravtale. Sezarient poristhiti xant asli ani Jeruzalemant asli toxi thoim asonk na. Karonn Jeruzalemant zaite lok dusrea dhormancho virodh kortale ani morcha kaddttale. Sezarient, Judeiant aslolea Romi foujechem mukhel ofis pasun aslem.
8 Romi kaido pallun, Lisiasan Feliksak chitt boroili. Tantunt tannem Paulu ek Romi nagrik aslo ani Judev lok “taka marun uddoupache asle” dekhun tannem Pauluchi rakhonn keli mhunn boroilem. Toxench, tannem boroilem ki Pauluk “mornnachem formonn mari sarkem vo bondkhonnint ghali sarko” taka kosloch guneanv mellonk na. Punn Judev lok Pauluk marunk sodhtale dekhun, to Pauluk, Razpal Feliksa fuddem dhaddtta ani tannem tachi kes polloun sarko nirnnoi gheuncho mhunn axa dovorta.—Itihas 23:25-30.
9. (a) Lisiasan Romi nagrikank aslolo kaido koso moddlo? (b) Amchi rakhonn korunk ami desachea kaideancho koso adar ghetat?
9 Lisiasan jem boroilem tantunt soglem sot aslem kai? Na. Oxem ami kiteak mhunnonk zata? Ek mhunnttlear, Paulu ek Romi nagrik aslo dekhun apnnem tachi rakhonn kelʼli mhunn Lisiasan sangloli ti fott asli. Toxench, Lisiasan Pauluk “don sanklleamnim bandcho” ani “chabkamnim marun tachi choukoxi korchi” mhunn hukum dilʼlo, tea vixim pasun tannem tea chittint borounk na. (Itihas 21:30-34; 22:24-29) Karonn tannem oxem kelʼlem tednam, Romi nagrikank aslolo kaido tannem moddlolo ani hea soglea vixim tannem razpalak sangonk na, karonn to apunn boro mhunn dakhounk sodhtalo. Aiz pasun khottea dhorma pasot urba aslolea lokank Soitan Devachea sevokank dhumallo diunk uzar korta. Devachi bhokti korunk amkam asloli svotontrtai tim kaddun uddounk sodhtat. Punn tea vellar Paulu bhaxen ami desachea oslea kaideancho adar ghetat, jea udexim amkam rakhonn melltta.
“Mhoji Kes Tujea Mukhar Manddunk Mhaka Khub Khuxi Bhogta” (Itihas 23:35–24:21)
10. Paulucher kosle gombhir arop ghatlole?
10 Jeruzalemantlean Pauluche aropi ieum poriant, Feliksan taka Sezarient, “Herodachea razvaddeant vhoron tacher nodor dovorchi” mhunn rakhonndarank hukum dilo. (Itihas 23:35) Ani panch disam uprant mha-iadnik Ananias, advogad Tertulus ani zaite vhoddil aile. Tertulusan survatek Feliks Judevam pasot zaitem kortalo mhunn sangon tachi vhoddvik keli. Karonn to chodd korun tacho favor melloun gheunk ani taka fulounk sodhtalo. b Tea uprant Pauluche kesi vixim ulounk Tertulusan mhunnttlem, ki Paulu “soglea trasanchi survat zaun asa. To akʼkhea sonvsarantlea Judevank sorkara add vochonk uksaita ani to Nazaretkaranchea dhormik zomeacho fuddari zaun asa. Tannem Devmondir pasun oxudʼdh korpacho proitn kelo, taka lagon ami taka dhorlo.” Hem aikon, “Judev lok pasun tachea add ulounk lagle ani heo sogleo vostu khoreo asat mhunn khatren sangonk lagle.” (Itihas 24:5, 6, 9) Paulu lokank sorkara add vochonk uksaita, eka bhirankull zomeacho to fuddari zaun asa, ani tannem Devmondir oxudʼdh korpacho proitn kela, he Paulucher ghatlole arop khub gombhir asle. Ani tea pasot taka mornnachi khast pasun favo zaunk xoktali.
11, 12. Apleacher khotte arop ghatle tednam Paulun kitem sanglem?
11 Tertulus uloilea uprant, Pauluk ulounk sondhi mellʼlli. “Mhoji kes tujea mukhar manddunk mhaka khub khuxi bhogta,” oxem mhunnon tannem survat keli. Uprant apnnacher ghatlole arop sogle khotte asat mhunn tannem spoxttponnim sanglem. Tannem mondir oxudʼdh korunk naslem, nhoi mhunn konnakuch sorkara add vochonk uksaunk naslo. Toxench, apunn Jeruzalemant “zaitea vorsam uprant” ailʼlo, ani bhuk ani dhumalleank lagon gorib zalʼlea Kristi bhav-bhoinnank “dan” gheun ailʼlo mhunn sanglem. Tea bhair, apunn mondirant voichea poilim “Kaidea pormonnem xudʼdh” aslo ani aplem “ontoskornn Deva mukhar ani munxam mukhar nitoll dovrunk proitn” kortalo mhunn tannem sanglem.—Itihas 24:10-13, 16-18.
12 Apunn aplea purvozanchea Devachi seva kortalo mhunn Paulun manun ghetlem, “jea vattek te dhormik zomo” mhunnttale. Toxench, apunn ‘Kaideant ani Provadeanchea Pustokant boroilʼleo sogleo vostu’ patieta mhunn sanglem. Ani apleacher arop ghatloleam bhaxen “nitivont ani onitivont munxank Dev jivont kortolo” mhunn apleak pasun ghott bhorvonso asa mhunn tannem sanglem. Uprant, apleacher ghatlolo arop sarko asa zalear dakhounk purave diunk tea aropeank sanglem. Tannem mhunnttlem: “Hanv Mha-sobhe mukhar ubo aslom tednam mhoji kitem chuk mellʼlli, tem hanga asloleam lokamnim sangchem. Te mhojer fokot ekuch arop ghalunk xoktat ki hanvem mottʼttea avazan tanchea modem ubo ravon oxem mhunnttlem: ‘Melolim jivont zatolim hea vixoi-ak lagon aiz mhoji tujea mukhar zhoddtti zata!’”—Itihas 24:14, 15, 20, 21.
13-15. Amkam bore khobre vixim sorkari odhikaream lagim ulounk poddlem zalear ami Pauluchi dekh koxi gheunk zata?
13 Ami Jehovachi bhokti kortat dekhun amkam sorkara mukhar vhelim zalear, ani ami hinvsa korunk vo sorkara add vochonk lokank uksaitat ani ek bhirankull zomo mhunn amcher arop ghaltat zalear, Paulu thaun ami zaitem xikonk zata. Tertulusa bhaxen tannem somrazacho favor melloun gheunk taka fulounk na. Punn to xant ravlo ani tannem odhikareank man dilo. Ani to uloilo tednam to doiall ritin, spoxtt ritin, ani sot uloilo. Toxench, tannem sanglem ki ‘Asia thaun ailolea thoddea Judevamnim’ zannim mondir oxudʼdh kelam mhunn tacher arop ghatlolo tannim Kaidea pormonnem thoim ieunk zai aslem. Ani tachea mukhar ieun tacher arop ghalunk zai aslo.—Itihas 24:18, 19.
14 Punn sogleam-von mhotvachem mhunnttlear, Paulu aplea bhavartha vixim ulounk bhieunk na. Hachea poilim, Mha-sobhent to jivontponn asa mhunn uloilʼlo tednam thoim mottʼtto bovall zalʼlo. Tori astana jivontponn asa mhunn apunn patieta tea vixim tannem dhiran sanglem. (Itihas 23:6-10) Punn apli bazu manddttana, Paulun jivontponnachea bhorvonxea vixim kiteak sanglem? Karonn to Jezu vixim ani Jezu melʼleantlo jivont zala mhunn porgott kortalo, jem tache virodhi manun gheunk toiar nasle. (Itihas 26:6-8, 22, 23) Khorem mhunnttlear, Paulu jivontponnacher patietalo ani chodd korun Jezucher ani Jezuchea jivontponnacher taka bhavarth aslo mhunn tacher ti kes chalu asli.
15 Paulu bhaxen ami dhiran porgottnni korunk zata. Ani Jezun aplea xisank sanglolea utrantlean ami pasun ghottai gheunk zata. Tannem mhunnttlolem: “Mhojea nanva khatir soglo lok tumcho dves kortolo. Punn zo xevott poriant thir ravtolo to salvar zatolo.” Punn ami kitem uloitolim tem chintun ami bhieunchi goroz na. Karonn Jezun amkam oxi khatri dilea: “Tumkam dhorun vhortat tednam kitem ulounchem mhunn poilinch usko korum nakat. Tea vellar kitem ulounchem tem tumkam kollttolem, karonn uloitat tim tumi nhoi, punn povitr xokti.”—Marku 13:9-13.
“Feliks Bhielo” (Itihas 24:22-27)
16, 17. (a) Pauluchi kes choltali tednam Feliksan kitem mhunnttlem ani kitem kelem? (b) Feliks kiteak bhielo astolo, punn tannem zaite pavtti Pauluk kiteak apoun haddlo?
16 Razpal Feliksan hachea poilim-i Kristanvanche xikounne vixim aikolʼlem. Bible sangta: “Feliks, Somiachea Vatte [Adim Kristanvank hem utor uzar kortale] vixim sot kitem tem bore bhaxen zannam aslo. Tori astana tannem oxem mhunnon tankam dhaddun dile: ‘Senapoti Lisias ieta tednam hanv hea vixoi-acher nirnnoi ghetolom.’ Tednam tea munxak bondkhonnint dovorcho punn taka thoddim kamam korunk diunchim ani tachea lokank taka modot korunk diunchi mhunn tannem soinikanchea odhikareak hukum dilo.”—Itihas 24:22, 23.
17 Thoddea disamnim, Feliks ani tachi bail Drusila, ji Judev asli tannim Pauluk apoun haddlo ani “Krist Jezucher bhavarth dovorchea vixim uloilo tednam tachem aikolem.” (Itihas 24:24) Punn “Paulu nitivontponn, svotacher tabo dovrop ani ieunchi asa ti zhoddtti, hea vixim ulounk laglo tednam Feliks bhielo.” Karonn tannem aplea jivitant zaitim vaitt kamam kelʼlim dekhun tachem ontoskornn taka khaunk laglem. Tor tannem oxem mhunnon Pauluk dhaddlo: “Atam tum voch, mhaka fuddem kednam-i sondhi melltta tednam hanv tuka porot apoitolom.” Tea uprant Feliksan Pauluk zaite pavtti apoun haddlo tem khorem, punn taka sot xikonk zai aslem mhunn nhoi. Tachea bodlek, Pauluk suttka mellonk tachea thaun poixe mellttole mhunn to axeun aslo.—Itihas 24:25, 26.
18. Feliks ani tache baile lagim Paulu ‘nitivontponn, svotacher tabo dovrop ani ieunchi asa te zhoddtte’ vixim kiteak uloilo?
18 Feliks ani tache baile lagim Paulu ‘nitivontponn, svotacher tabo dovrop ani ieunchi asa te zhoddtte’ vixim kiteak uloilo? Karonn Jezuchea pattlavdaramnim kitem korunk zai tem tim zannam zaunk sodhtalim. Ani Paulu zannam aslo ki tim onoitik kamam kortalim, nixttur aslim ani onʼneai kortalim. Tor Jezuchea pattlavdaramnim kitem kelʼlem Devak zai tem to tankam spoxtt ritin dakhoun diunk sodhtalo. Devachea dorjeam modem ani Feliks ani tachea bailechea vagnnuken vhodd ontor asa mhunn Paulun tankam aplea utrantlean dakhoun dilem, jea vorvim soglim munxam kitem chintʼtat, uloitat ani kortat, tea pasot tannim Devak hixob diunk zai mhunn tankam kollon ieunk zai aslem. Ani Feliks Pauluchi nit korcho aslo, tachea bodlek, Dev tanchi nit kortolo hem chodd mhotvachem aslem. Tor Feliks itlo kiteak “bhielo” astolo tem ami chintunk zata.
19, 20. (a) Aplem patki jivit soddinant tosle lok amkam porgottnnent mellttat tednam ami kitem korunk zai? (b) Feliks Paulu vixim kainch borem chintinaslo mhunn koxem kolltta?
19 Porgottnnent amkam Feliksa bhaxen lok mellonk xoktat. Poilim te sot xikonk sodhtat mhunn dhong kortat, punn khorem mhunnttlear, te aploch faido polloitat. Oslea munxam lagim ami chotraien ravonk zai. Punn teach borabor Paulu bhaxen, ami tankam Devache dorje kitem asat tem xanneponnan sangtat. Ghoddie sot tanchea kallzak lagon tim aplea jivitant bodol korit. Punn tim aplem patki jivit bodlunk toiar nant zalear, ami tankam soddun, jim sotak tanelʼlim asat tankam sodhtat.
20 Feliksachea monant kitem aslem tem amkam hea utrantlean kollon ieta: “Don vorsam soron gelim ani Feliksachea zagear Porsius Festus ailo. Feliks Judevank khuxal korunk sodhtalo dekhun tannem Pauluk bondkhonnintuch dovorlo.” (Itihas 24:27) Tor Feliks Paulu vixim kainch borem chintinaslo. Ani ‘Kristanv’ sorkara add vochonant ani dusreank sorkara add vochonk uksainant mhunn taka khobor asli. (Itihas 19:23) Toxench, Paulun khoinchoch Romi kaido moddunk na mhunn to zannam aslo. Tori astana, Feliks “Judevank khuxal korunk sodhtalo” dekhun tannem Pauluk bondkhonnintuch dovorlo.
21. Porsius Festus razpal zalea uprant Pauluk kitem ghoddlem, ani taka ghottai koxi mellʼlli?
21 Itihas odheai 24-achea, xevottachea versant amkam dakhoilam toxem, Feliksa uprant Porsius Festus razpal zalo tednam pasun Paulu bondkhonnintuch aslo. Tor taka zaite pavtti veg-vegllea odhikaream mukhar ulounk poddlem. Khorench, hea dhirvont apostlak ‘razam ani razpalam mukhar ubo kelo.’ (Lukas 21:12) Toxench, uprant ami polloitolim toxim, sogleam poros unch podvi aslolea odhikareank pasun Paulun sakx dili. Punn hem soglem ghoddon pasun Paulucho bhavarth oskot zaunk na. Karonn “dhir dhor,” mhunn Jezun taka sanglolea utrantlean taka ghottai mellʼlli mhunn amkam kosloch dubhav na!
a “ Feliks— Judeiacho Razpal,” hem boks polloiat.
b Feliksak lagon Judeiant sogleank “xantin jieunk melltta” mhunn Tertulusan tache upkar attoile. Punn hem sot naslem, karonn Judeiant adim kednanch zaunk na titli hinvsa Feliks razpal aslo tea vellar zalʼli. Toxench, Feliksan kelʼlea bodlavank lagon, Judev lok tache “khub upkari” asat, oxem-i tannem sanglem. Punn khorem mhunnttlear, choddxe Judev lok tacho khub dves kortale. Karonn to ek vaitt odhikari aslo. Ani te morcha kaddttale tednam to ekdom nixttur ritin tankam addaitalo.—Itihas 24:2, 3.
