1, 2. Hea pavtti Paulucho provas vegllo kiteak aslo, ani taka koslo usko zalo astolo?

 “TUM Somraza koddem voitolo,” razpal Festusachim him utram aikon Somraza lagim gelea uprant kitem-kitem zatolem hea vixim Paulun zaitem chintlem astolem. Paulu tor atam don vorsam koidi mhunn bondkhonnint aslo. Punn atam tachi poristhiti bodolchi asli. (Itihas 25:12) To ek lamb provas korun Romant voicho aslo. Paulun zaite pavtti doriantlean provas kelʼlo ani taka soglech pavtti bore onubhov mellonk nasle. Tor, ho provas koso astolo mhunn Pauluk ghoddie usko zalo. Toxench, to Somraza lagim kitem uloitolo, tea vixim pasun tannem chintlem astolem.

² Paulun zaitea “doriantlea dhokeancho” fuddo kelʼlo. Udharonnak, to provas kortalo tem tarum tin pavtti futtlem. Ani ek rat ani ek dis to doriant urlo. (2 Kor. 11:25, 26) Toxench, adim tannem mixinori bhonvddi kelʼli tednam to svotontr nagrik aslo. Punn hea pavtti toxem asonk na. Karonn to ek koidi aslo ani tannem Sezaria thaun Romant vochonk 3,000 kilometr maiz provas korunk zai aslo. Tor to surokxit Romant pavtolo kai? Ani to thoim surokxit pavlo zalear pasun, Romant te tacher mornnachem formonn martole kai? Osle prosn amchea monant ietat karonn, Soitanachea sonvsarantlea sogleam-von chodd podvi aslolo sorkar Pauluchi nit korcho aslo.

3. Paulun kitem korcho nichov kelʼlo, ani hea odheai-ant ami kitem polloitolim?

³ Atam poriant tumi Paulu vixim jem vachlem tantuntlean to dukhi zaun niraxiponnant buddlo oxem tumkam dista? Apleak kosle tras ietole tem taka khobor naslem tem khorem, punn apleak tras ietole mhunn to zannam aslo. Ani jem tachea tabeant naslem tea vixim chodd uskeun to porgottnnent apli khuxalkai hogddaunk sodhinaslo. (Mt. 6:27, 34) Titlench nhoi, dor ek sondhi uzar korun tannem odhikareank pasun Rajeachi bori khobor porgottloli Jehovak zai mhunn taka khobor asli. (Itihas 9:15) Ani kosli-i oddchonn aslearui tannem hem kam korunk aplo nichov ghott kelʼlo. Amkam-i oxench korunk zai nhoi? Tor Paulu Romant provas kortana kitem-kitem zalem ani tachea udharonna thaun amkam koso faido zata tem polloum-ia.

4. Paulun koslea tarvant provas kelo, ani tachea sangata konn asle?

⁴ Pauluk ani her thoddea koideank Romi odhikari, Juliusachea hatant  dile ani tannem tankam Sezarient ailʼlea samonn vhorpachea tarvant choddoile. Hem tarum Asia Minor-achea ostomechea doria deger aslolea, Adramittium nanvachea dhokear thaun ailʼlem. Ho dhoko Lesbosachea zunvear aslolea Mitilene xarant aslo. Hem tarum utʼtorechea vatten ani uprant ostome vatten voitalem. Ani samonn pavounk ani choddounk veg-vegllea zagear thambtalem. Hem tarum lokam pasot vo koideam pasot toiar korunk naslem. (“ Doriantlean Provas Ani Veapar-Dhondeacho Marg,” hem boks polloiat.) Ek bori khobor mhunnttlear, hea opradeanchea zomeant, Paulu ekloch Kristanv naslo karonn tachea sangata tache don Kristi bhav provas kortale. Te mhunnttlear, Aristarkus ani Lukas. Ani hi ghoddnni Lukasanuch boroun dovorlea. Hea tarvant provas korunk Pauluchea hea donui ixttamnim poixe farik kelʼle vo te Pauluche sevok aslolean tannim funkott provas kelʼlo zalear amkam khobor na.​—Itihas 27:1, 2.

5. Paulu Sidonant konnak mellʼllo, ani tantuntlean amkam kitem xikonk melltta?

⁵ Doriant ek dis sarun ani utʼtore vatten sumar 110 kilometr pois provas korun, tarum Siriechea deger aslolea Sidonachea dhokear thamblem. Paulu ek Romi nagrik ani tacho kainch guneanv na mhunn Juliusak chodd korun khobor asli. Dekhun her guneanvkaream sangata vagtale te bhaxen, to Paulu sangata vagonk na. (Itihas 22:27, 28; 26:31, 32) Tor tannem Pauluk her Kristanvank mellonk porvangi dili. Itlo temp bondkhonnint aslolea Paulucho poramos korunk, bhav-bhoinnam kitlim khuxal zalim astolim tem ami chintunk zata. Tumi pasun dusreancho poramos korunk khuxal zatat kai? Tumi oxem kelear tumkam-i urba mellttoli.​—Itihas 27:3.

6-8. Sidona thaun bhair sorlea uprant, Paulu ani tache sangati khoim-khoim gele, ani Pauluk porgott korunk kosleo sondheo mellʼlleo?

⁶ Sidonachea deger thaun bhair soron tarum fuddem gelem. Uprant te Silisia pavle, zoim laginch Tarsus xarant Paulu vaddlolo. Uprant te khoim-khoim ravle tem Lukas sangona. Punn tancho jiv dhokeant aslo mhunn dison ieta. Karonn, Lukasan boroilem ki, “varo porto martalo.” (Itihas 27:4, 5) Vatavoronn sarkem naslem, tori astana bori khobor porgott korunk Paulun dor ek sondhi uzar keli mhunn kosloch dubhav na. Tannem  aplea sangata aslolea koideank, her lokank, tarvar kam kortoleank, soinikank, ani tarum tambtalem tednam taka mellttale titlea-i lokank porgott kelem astolem. Paulu bhaxen amkam melltta ti dor-ek sondhi uzar korun ami lokank bori khobor porgott kortat kai?

⁷ Tea uprant tem tarum Asia Minorachea dokxinne vatten aslolea Myra nanvachea doriachea dhokear pavlem. Thoim thaun Pauluk ani herank dusrea eka tarvant voiche poddle, jea vorvim te Romant pavonk xoktale ani zoim tankam vochonk zai aslem. (Itihas 27:6) Tea tempar, Romant choddxe gonv Ejiptta thaun ietale. Ani Ejtptta thaun gonv haddttalim tim tarvam, Myra doriachea dhokear ietalim. Juliusan oslench ek tarum sodhlem ani soinikank toxench koideank tea tarvant choddoile. Hem tarum poilea tarva poros khub vhoddlem aslem astolem. Karonn tantunt gonv asle, toxench 276 lok aslo. Te mhunnttlear, tarvant kam korpi munis, soinik, koidi ani ghoddie Romant voitalo to her lok. Poilim poros, hea tarvant chodd lok aslo dekhun, Paulun zata titlea lokank porgott kelem astolem mhunn ami khatri dhorunk zata.

⁸ Uprant, tarum Asia Minorachea dokxinne vatten aslolea Snidus-ant pavlem. Varo boro aslear, tarvant ho provas korunk sumar ek dis lagtalo. Punn Lukas sangta, “zaite dis sovkas-sovkas provas korun khub trasan amchem tarum Snidus zunvear pavlem.” (Itihas 27:7a) Tor, vatavoronn sarkem naslem mhunn dison ieta. (“ Mediterranean Doriachem Bhirankull Varem,” hem boks polloiat.) Oslea vatavoronnant, tarvant provas korop kitlem bhirankull aslem tem chintat.

9, 10. Kreta lagim pavtana kosleo oddchonneo aileo?

⁹ Tarvacho captain, Snidusachea ostome thaun vochonk sodhtalo. Punn thoim hajir aslolo Lukas sangta, “Varo amkam nitt fuddem vochonk dinaslo.” (Itihas 27:7b) Tem tarum doria deger thaun pois voitalem toxem, varo itlo nettan martalo dekhun tem tarum, utʼtor-ostome thaun dokxinnek vochonk laglem. Hea vellar, Krete-achea zunveak lagon tarum surokxit uronk pavlem. Zoxem adim oxench ghoddlolem tednam, Siprus zunveak lagon tarum surokxit urlolem. Krete-achea udentechea pontak aslolea Salmonechea vatten gelea uprant, poristhiti matxi bodolʼli. Karonn tarum atam zunveachea dokxinne vatten aslem ani thoim varo titlo nettan marinaslo. Tor hea vellar tarvant provas kortoleanchea jivak kitlo suseg zalo astolo nhoi! Punn thonddeche dis lagim pavlole dekhun doriantlean provas korop khub dhokeachem zatolem mhunn tarvant kam korpi zannam asle. Tor tankam usko zalʼlo.

¹⁰ Fuddem kitem zalem tea vixim Lukas bariksannen oxem sangta: “Khub trasan ami doria dege [Kreta] koddlean Surokxit Harbor mhunnttat tea zagear pavle.” Tea zunvea lagim aslolean tem tarum surokxit uronk pavlem tem khorem, punn tea tarvacher tabo dovrop khub kotthin aslem. Xekim tankam ek khoddpam asloli vell ani doriachi deg disli ani thoim tannim nangor ghatlo. Te hanga kitlo temp poriant ravle? Lukas sangta, te “zaite dis” ravle. Punn jitlo temp poriant te thoim ravle, titlench tankam provas korop anik kotthin zaunchem aslem. Karonn Setembr/Otumbr mhoineant doriantlean provas korop khub dhokeachem aslem.​—Itihas 27:8, 9.

11. Paulun aplea sangata provas korpeank kitem sanglem, tori astana tannim kitem nirnnoi ghetlo?

 ¹¹ Paulun adim Mediterranean doriantlean provas kelʼlo dekhun, thoinchean vochop sarkem zatolem vo na tem thoddea provas korpeamnim Pauluk vicharlem. Fuddem vochona zalear borem zatolem mhunn Paulun tankam sanglem. Karonn te fuddem gelear, tanchem ‘saman ani tarum’ borabor tancho jiv-ui dhokeant poddttolo mhunn tannem sanglem. Punn tarvachea captain-ak ani tarvachea dhoniak eka surokxit zagear pavosor ghoddie fuddem vochot ravonk zai aslem. Dekhun tannim Juliusakui somzailem ani te Finiksak pavonk zai oxem zaiteank dislem. Ho doriacho dhoko khub vhodd ani doria deger thaun khub pois aslo. Toxench, thoim thonddeche dis sarunk borem zatolem oxem ghoddie tannim chintlem. Tor dokxinne vattentlean thondd varo martalo tednam, te thoinchean bhair sorle.​—Itihas 27:10-13.

12. Kreta thaun bhair sorlea uprant kitem zalem, ani tarum surokxit uronk tarvacher kam kortoleamnim kitem kelem?

¹² Punn uprant ek “vhoddlem vadoll” zalem. Tea vellar te “Kauda nanvachea eka lhan zunvea” lagim pavle. Te Surokxit Harbora thaun sumar 55 kilometr pois asle. Tori astana, tem tarum dokxinne vatten vochon Afrikechea doria deger rombot mhunn te bhietale. Tor, oxem zaina zaunk, tarum choloupeamnim rokddench tarvachea fattlea vatten aslolem vhoddem voir kaddlem. Punn oxem korunk tankam sompem naslem. Karonn tantunt choddxem udok bhorlolem. Tor tem vhoddem samballunk tannim tem sanklleamnim ani doriamnim ghott bandlem. Toxench tannim tarvachi xidd denvoili ani tea vadollantlean surokxit uronk khub vavr kelo. Hea vellar te kitle bhielʼle astole tem chintat. Karonn itlem korun pasun “vadollak lagon tarum hevtten-tevtten dholot aslem.” Tisrea disak, tarvacher vozon unnem korunk tannim xidd voir choddoupacho razu doriant uddoilo.​—Itihas 27:14-19.

13. Vadoll zalem tednam tarvacher provas kortoleank kitem zalem astolem?

¹³ Tarvant soglim khub bhielʼlim astolim. Punn te salvar zatole mhunn Pauluk ani tachea sangateank khatri asli. Karonn apostl Paulu, Romant sakx ditolo mhunn Jezun adim Pauluk dorxonant sanglolem. Ani uprant hi bhasaunni ghoddon ietolich mhunn eka devdutan-ui khatri dilʼli. (Itihas 19:21; 23:11) Don suman poriant dis-rat khub pavs poddttalo ani vadoll thambonk naslem. Ani dhatt kupank lagon te suriak ani noketrank pollounk xokonasle. Tea bhair, tarum khoim aslem ani te khoinchea vatten provas kortale tem pasun tarum choloupeak kollonk na. Tor poristhiti khub vaitt asli. Thoim thonddai asli, pavs poddttalo, provas korun thoddim duent zalʼlim ani bhirantik lagon jevnna-khannam vixim konnakuch poddonk naslem.

14, 15. (a) Tarvacher provas kortoleam lagim uloitana, apnnem adim sanglolem tem Paulun tanchea ugddasak kiteak haddlem? (b) Paulun aplea aiknnareank bhorvonso dilo tantuntlean ami kitem xikonk zata?

¹⁴ Atam Paulu ubo ravta. Ani provas korop sarkem zaunchem na mhunn tannem adim sanglolim utram to tanchea ugddasak haddtta. Punn hem to tankam tomnne marunk sangona. Tachea bodlek, jem kitem ghoddlem tantuntlean tannim tachem aikolʼlem zalear tankam boreak poddttolem aslem mhunn to dakhounk sodhta. Tor uprant to mhunntta: “Hanv tumchea lagim dhir dhorat mhunn vinoti kortam. Karonn tumchea modlo eklo-i aplo jiv hogddauncho na, fokot tarvachem luksonn zatlem.” (Itihas 27:21, 22) Him utram aikon Pauluchea aiknnareank kitli bhuzvonn  mellʼlli astoli nhoi! Toxench, tankam bhorvonso diunk Jehovan apleak uzar kela mhunn Paulu pasun khub khuxal zalo astolo. Khorench, Jehovachea nodren dor-eka munxacho jiv moladik zaun asa mhunn ami zannam zavop khub gorjechem. Jehovak ‘konnachoch nas zalʼlo naka. Tachea bodlek, sogleank poschatap korunk sondhi mellʼlloli taka zai.’ (2 Ped. 3:9) Tor aiz ami zata titlea lokank fuddarachea bhorvonxea vixim sangop khub gorjechem. Karonn tancho jiv dhokeant asa.

¹⁵ ‘Devan dilʼli bhasaunni’ bhorvonso dita mhunn Paulun tarvacher aslolea zaitea lokank sanglem astolem. (Itihas 26:6; Kol. 1:5) Tarum moddonk pavlolem, punn tankam bhorvonso aslo. Karonn Paulun mhunnttlem, “Jea Devachi hanv bhokti kortam . . . tacho dut kal rati mhoje koddem ailʼlo. Ani tannem mhaka mhunnttlem: ‘Paulu, bhieum naka. Tum somraza mukhar vochon ubo ravtoloch. Ani tuka lagon tujea borabor provas kortat tancho sogleancho jiv Dev vachoitolo.’” Tannem tankam fuddem sanglem, “taka lagon, ixttamno, dhir dhorat, karonn devdutan mhaka jem sanglam tem Dev kortoloch mhunn mhaka purnn visvas asa. Punn amchem tarum eka zunveachea deger vochon futtʼttolem.”​—Itihas 27:23-26.

16, 17. (a) Paulun kednam magnnem kelem ani tacho porinnam kitem zalo? (b) Paulun sanglolem tem koxem ghoddon ailem?

¹⁶ He don suman khub bhirankull asle. Vareak lagon tem tarum sumar 870  kilometr pois pavlolem. Punn tea vellar ghoddie lharam martat tim tannim aikolʼlim dekhun, tem tarum khoinchea tori doria deger pavlam oxem tarvar kam korpeank dislem. Tor tem tarum khoddpar adollna zaunk, tannim tarvachea fattlea vatten nangor soddle. Ani tarvacho fuddlo bhag doria degechea vatten gunvddaun te surokxit thoim vhoronk sodhtale. Tea vellar, tarvar kam kortale te tarva voile pollon vochpacho proitn korunk lagle. Punn soinikamnim tankam addaile. Paulun soinikanchea odhikareank ani soinikank mhunnttlem, “He munis tarvant ravonant zalear tumi pasun salvar zaunk xokchena.” Atam tor tem tarum titlem halonaslem. Dekhun, Paulu tankam, tannim kitem-i khaunchem mhunn somzaunk laglo. Ani te sogle salvar zatole mhunn tannem tankam porot khatri dili. Uprant Paulun “sogleam mukhar Devache upkar attoile.” (Itihas 27:31, 35) Ani hea toren tannem Lukas, Aristarkus, ani aiz Kristanvank ek bori dekh dovorli. Tor Paulu bhaxen tumi dusream hujir magnnem kortat tednam dusreank urba ani bhuzvonn melltta kai?

¹⁷ Pauluchem magnnem zalea uprant, “sogleank dhir mellʼllo ani te-ui jevunk lagle.” (Itihas 27:36) Magir tem tarum sompeponnim doria dege lagim vochonk, tarvacher vozon unnem korunk tannim gonv doriant uddoile. Dis uzvaddlea uprant, tarvacher kam kortale tannim nangrache razu katorle ani doriant uddoile. Toxench, tannim tarvachea vereachem dor soddlem ani fuddlea xiddant varo bhoron tarum doria deger voichem mhunn tem ubem kelem. Punn tarvacho fuddlo bhag renvent romblo ani fattlo bhag lharam marun-marun futtonk laglo. Tor koideamnim penvon pollon voichem nhoi mhunn thodde soinik tankam jivexim marunk sodhtale. Punn Juliusan tankam toxem korunk diunk na. Punn sogleamnim penvon vo tarvachea veg-vegllea kuddkeanchea ani folleanchea adaran toddier ieunchem mhunn tannem tankam sanglem. Tor Paulun sanglolem toxench zalem. Te 276 “sogle lok bore bhaxen doria deger pavle.” Punn atam te khoinchea zagear asle?—Itihas 27:44.

18-20. Tarvacher provas korun ailoleank Malta-chea lokamnim “khas toren doia” koxi dakhoili, ani Devan Paulu udexim koslem vizmit kelem?

¹⁸ Te Sisiliachea dokxinne vatten aslolea Malta nanvachea zunvear pavle. (“ Malta  Zunvo Khoim Aslo?” hem boks polloiat) Te akʼkhe bhizlole ani koddkoddttale. Hea vellar tea zunvea voilea onvollkhi lokamnim tankam “khas toren doia” dakhoili. (Itihas 28:2) Thoim pavs poddttalo ani thonddi asli dekhun tannim tanchea pasot uzo ghatlo. Tor ujeak lagon tankam gormi mellʼlli. Toxench tea vellar ek vizmit ghoddlem.

¹⁹ Paulu-i tankam thoddi modot korunk sodhtalo. Tor tannem thoddim lakddam ektthaim korun ujeant ghatlim. Tednam thoinchean ek vikari sorop bhair sorlo. To tachea hatak ghuspolo ani tannem Pauluk ghans marlo. Tednam Deva koddlean Pauluk khast mellʼllea astoli, oxem tea zunvea voilea lokank dislem. a

²⁰ Pauluchea hatak sorpan ghans marlolo mhunn jea lokamnim polloilem, tannim tachi kudd “suztoli” mhunn chintlem. Eka pustoka pormonnem “suztoli” hea utrak uzar kelʼlem mull utor voizuki xetrant uzar kortale. Ani hantunt ojap zaupa sarkem kainch na. Karonn hem pustok, ‘mogall bhav Lukasan boroilem, zo ek dotor aslo.ʼ (Itihas 28:6; Kol. 4:14) Tor hem utor tachea monant rokddench ailem astolem. Punn Paulun tea vikari sorpak fafddilo ani taka kainch tras zaunk nant.

21. (a) Lukas bariksannen mahiti ditalo tem dakhoun diunk thoddim udharonnam diat. (b) Paulun koslim vizmitam kelim, ani tim polloun Maltachea lokamnim kitem kelem?

²¹ Hea zunveacher Publius nanvacho ek girest bhattkar ravtalo. To ghoddie Malta zunveacho Romi odhikari aslo. Tachea vixim sangtana, Lukasan taka “tea zunveacho mukheli” mhunnttlo. Ani Maltant tosleo don fatreo mellʼlleat, jeo dakhoun ditat ki, oslench utor tea zunvear adim uzar kortale. Publiusan, Pauluk ani tachea sangateank ieukar dilo ani tin dis meren tankam jevonn-khann dilem ani tanchi kallji ghetli. Punn Publiusacho bapui duent aslo. Hea vixim pasun Lukas amkam bariksannen mahiti diun sangta. Lukasan boroilem, “taka zor ietalo ani bhairam zatalem.” Tea vellar, Paulun magnnem kelem, tacher aplo hat dovorlo ani to boro zalo. Hem vizmit polloun thoincho lok ojap zalo ani tannim tea zunvea voilea duent lokank pasun bore zaunk Paulu lagim haddle. Toxench, tannim Pauluk ani tachea sangateank zaitim dennim dilim ani tankam provasak gorjecheo vostu pasun dileo.​—Itihas 28:7-10.

22. (a) Lukasan jem boroilem tachi eka professor-an koxi tokhnnai keli? (b) Fuddlea odheai-ant ami kitem polloitolim?

²² Atam poriant Pauluchea provasa vixim ami ji mahiti polloili ti sarki zaun asa. Ek professor sangta: “Lukasan jea ghoddnneam vixim sanglem teo khub bariksannen asat ani spoxtt ritin asat. Oxem Bible-achea anik khoincheach pustokant mellona. Zoxem poilea xekddeant tarum choloupeam vixim tannem zaiti bariksannechi mahiti dili. Ani Meditterannean doriachea udente vatten vatavoronn koxem aslem, tea vixim pasun tannem ji mahiti dilʼli ti sarki asli. Tor heo sogleo ghoddnneo ghoddttaleo tednam, Lukasan teo boroileo oxem dison ieta. Ani apostl Paulu sangata provas kortana tannem oxem kelem astolem. Toxem zalear, fuddlo provas kortana taka anikui zaitem borounchem aslem. Tor xekim Paulu Romant pavlo tednam kitem zalem tem ami fuddlea odheai-ant polloitolim.