1. Adlea kalla voilea Kristanvam modem ani aiz Jehovachea Sakxeam modem kitem ek-sarkem asa?

 ADLEA kalla voilea Kristanvamnim dhiran porgottnni keli. Tannim khaltikaien Jehovan povitr xokte udexim dilʼli modot ani margdorxon manun ghetlem. Tankam dhumallo aslear pasun tannim porgottnni korop bond korunk na. Ani tannim Jehova Deva koddlean zaitim besanvam onnbhovlim. Oxench, aiz Jehovachea Sakxeam sovem ghoddtta.

2, 3. Bible-antlea Itihas pustokant kitem khas asa?

² Bible-antlea Itihas pustokant, poilea xekddeantlea Kristanvanche onnbhov vachun tumkam zaiti urba mellʼlli astoli ani tumcho bhavarth ghott zalo astolo nhoi! Hem pustok ekdom khas asa, karonn Jezu sorgar gelea uprant adlea Kristanvamnim kitem kelʼlem tem fokot heach pustokant boroilʼlam.

³ Itihas pustokant, 32 zage, 54 xaram, ani 9 zunveam thaun 95 munxanchim nanvam asat. Hea pustokant chalte lok, khotte dhormache gorvixtt lok, gorvixtt rajki fuddari ani ragixtt virodheam vixim sanglolem asa. Punn sogleant mhotvachem mhunnttlear, hea pustokant apostlanchea kallar jielʼlea tumchea bhav-bhoinnam vixim boroilʼlem asa, zankam tumche bhaxen zaite tras asonui tim urben bori khobor porgottit ravlim.

4. Apostl Paulu, Tabitha, ani adlea kalla voilea her visvaxi sevokam sangata amchem natem ghott asa oxem amkam kiteak dista?

⁴ Punn urbevont apostl Pedru ani Paulu, mogall dotor bhav Lukas, udar kallzacho Barnabas, dhirvont Istev, doiall Tabitha, poramos korpi Lidia, ani anikui zaitim visvaxi sakxi, sumar 2,000 vorsam adim jielʼlim. Tori astana, amchem ani tanchem natem ghott asa oxem amkam dista. Karonn tancheach sarkem kam korunk Jezun amkam-i adnea dilea, ti mhunnttlear xis korpachem kam. (Mt. 28:19, 20) Ani hem kam korunk amkam vhoddponn bhogta!

5. Adlea kalla voilea Jezuchea xisamnim khoim-khoim porgottnni keli?

⁵ Jezun aplea pattlavdarank kosli adnea dilʼli tem chintat. Tannem sanglem: “Tumcher povitr xokti ietoli tednam tumkam boll mellttolem ani Jeruzalemant, ani akʼkhea Judeiant ani Samariant, toxench prithumechea sogleant poisulʼlea vattarant pasun tumi mhojea vixim govai ditole.” (Itihas 1:8) Poilim mhunnttlear, povitr xokte udexim Jezuchea xisamnim  “Jeruzalemant” sakx dili. (Itihas 1:1–8:3) Uprant tannim povitr xoktechea margdorxona pormonnem “akʼkhea Judeiant ani Samariant” bori khobor porgott keli. (Itihas 8:4–13:3) Ani toxench, hi khobor tannim “prithumechea sogleant poisulʼlea vattarant” pasun pavounk suru keli.​—Itihas 13:4–28:31.

6, 7. Aiz ami porgottnni kortat tednam amchea lagim kitem-kitem asa jem poilea xekddeantlea Kristanvam lagim naslem?

⁶ Punn poilea xekddeantlea tumchea hea bhav-bhoinnam lagim uzar korunk akʼkho Bible naslo. Karonn tea vellar akʼkho Bible boroun somponk naslo. 41 K.X.-ant, Matevachem pustok boroun zalʼlem. Toxench, Itihas pustok sumar 61 K.X.-ant boroun sompoilʼlem. Ani thoddea vella poilim, Paulun apleo chitti boroun sompoilʼleo. Tor poilea xekddeantlea dor-eka Kristanvam lagim Devachea Utrachi akʼkhi kopi nasli. Toxench, aikonk umed dakhoitat tankam diunk Bible-achea adarit prokaxonam pasun naslim. Jezuche xis zaunchea poilim, Judev Kristanvamnim sobha-ghorant Hebrev bhaxent boroilʼlea pustokantlim versam aikolʼlim tem khorem, punn titlench puro naslem, karonn uprant porgottnni kortana tannim ghoddie tondd-patt kelʼlea versancho tankam ulʼlekh korunk poddttalo. (2 Kor. 3:14-16) Tor tannim Bible-acho bore toren obheas korunk zai aslo.

⁷ Punn aiz, amchea modlea choddxea zannam lagim ek Bible asa ani toxench Bible-achea adarit zaitim prokaxonam asat. Ami 240 desamnim ani zaitea bhasamnim porgottnni korun xis kortat.

8, 9. (a) Povitr xoktechea adaran Jezuche xis kitem korunk pavle? (b) Devachea povitr xoktechea adaran visvaxi ani xanno chakor aiz kitem korta?

⁸ Jezun aplea xisank porgottnnechem kam dilem tednam tannem tankam oxem mhunnttlem: “Tumcher povitr xokti ietoli tednam tumkam boll mellttolem.” Devachea povitr xoktechea margdorxona udexim, Jezuchea pattlavdaramnim prithumechea soglea vattarant porgottni keli. Itlench nhoi, povitr xokte udexim Pedrun ani Paulun, duentank borim kelim, lokancher boslole noxtte dut kaddle, ani meloleank pasun jivont kelim. Punn hea soglea kamam poros apostlamnim ani her xisamnim povitr xokte udexim anik ek mhotvachem kam kelem. Tem mhunnttlear, lokank sot xikoun tankam sasnachem jivit mellonk modot keli.​—Juanv 17:3.

⁹ 33 K.X.-achea, Ponʼnasavea Disa, Jezuchea xisank ‘povitr xokten tank dilʼlea pormonnem tim veg-vegllea bhasamnim ulounk laglim.’ Taka lagon, tim “Devachea vhodd kamam vixim” dusreank sakx diunk pavlim. (Itihas 2:1-4, 11) Aiz amkam vizmitam udexim veg-vegllea bhasamnim ulounk mellona tem khorem, punn Devachea povitr xoktechea adaran visvaxi ani xanno chakor zaitea bhasamnim Bible adarit prokaxonam toiar korta. Udharonnak, dor mhoineak, Pahrogopur ani Zagrut Ravat!, hea masikancheo lakʼkhamnim kopi chhaptat. Ani amchi website jw.org-cher, Bible adarit prokaxonam ani video sumar 1,000-a poros chodd bhasamnim mellttat. Taka lagon soglea desanchea, kulliechea ani bhaxentlea lokank “Devachea vhodd kamam vixim” porgottunk amkam modot zata.​—Prok. 7:9.

10. 1989-a thaun Bible bhaxantora vixim visvaxi ani xannea chakran kitem tharailem?

¹⁰ 1989 hea vorsa thaun, Novo Sonvsar Bhaxantor Bible-acho anikui zaitea  bhasamnim bhaxantor korchea kamant, visvaxi ani xannea chakran khub mhotv diunk tharailem. Tednam thaun atam meren, Bible 200 poros chodd bhasamnim bhaxantor kela ani lakʼkhamnim kopi chhapleat ani fuddarak anikui chhaptolim. Hem soglem fokot Jehova ani tachea povitr xoktechea modotik lagon zaunk pavlam.

11. Amchim prokaxonam bhaxantor zaunchea vixim kitem kollon ieta?

¹¹ Sumar 150 poros chodd desamnim ani zageamnim, hozaramnim Kristanvam ap-khuxen bhaxantor kamant vavr kortat. Jehova Deva vixim, Jezu vixim ani sorgar suru zalʼlea tachea ‘Rajea vixim bore bhaxen sakx diunk’ Devache povitr xokte udexim fokot heach songottnnek modot melltta mhunn ami ojap zainant!​—Itihas 28:23.

12. Paulu ani her Kristanvam sakx diupachem kam koxim korunk pavlim?

¹² Pisidiachea Antiokant, Paulun Judevank ani videxiank porgott kelem tednam, “sasnachem jivit favo aslolea sogleamnim bhavarth dovorlo.” (Itihas 13:48) Itihas pustokachea xevottak Lukas sangta ki Paulu “Devachea Rajea vixim . . . ukteponnim ani addkholl nastana” porgott kortalo. (Itihas 28:31) Tea vellar to khoim aslo? To Romant aslo, jem sonvsarachea vorixtt razvottkechem Rajdhani aslem. Jezuchea pattlavdaramnim, bhaxonnam diun vo her vatto uzar korun porgottnni keli tem soglem tim povitr xoktechea modotin ani margdorxona udexim korunk pavlim.

13. Amkam dhumallo ieta tednam ami kiteak magnnem korunk zai?

¹³ Jezuchea xisank dhumalleacho fuddo korunk poddlo tednam tannim Jehova lagim boll maglem. Tacho porinnam kitem zalo? Te Devachea povitr xokten bhorle ani tankam boll mellʼllem, jea vorvim te bhienasta porgottnni korit ravonk pavle. (Itihas 4:18-31) Aiz pasun amkam dhumallo ieta tednam, porgottnnechem kam korit ravonk, ami Deva lagim zannvai ani ghottai magonk zai. (Jak. 1:2-8) Jehova aple povitr xokte udexim amkam modot dita dekhun ami porgottnnechem kam korit ravonk pavtat. Amcher kitlo-i khor virodh vo dhumallo ailear pasun, porgottnnechem kam korop ami soddun dinant. Tor amcher dhumallo ieta tednam, ami Devachi povitr xokti toxench bori khobor porgott korit ravonk amkam zannvai ani dhir di mhunn Jehova lagim magonk zai.​—Lukas 11:13.

14, 15. (a) “Istevak jivexim marlea uprant,” Kristanvank dhumallo ailo dekhun kitem borem zaunk pavlem? (b) Amchea disamnim Siberiantlea zaitea lokank bori khobor koxi pavli?

¹⁴ Istevak dusmanamnim jivexim marchea poilim tannem dhiran sakx dilʼli. (Itihas 6:5; 7:54-60) Tea uprant, Kristanvank “zaito dhumallo ailo.” Tednam apostl Jeruzalemantuch ravle. Punn her sogle xis Judeiant ani Samariant ximpoddle. Punn oxem zalem mhunn bori khobor porgott zaunchi bond zaunk na. Filipan Samariant vochon ‘Krista vixim porgott korun’ zaitea zannank xis zaunk modot keli. (Itihas 8:1-8, 14, 15, 25) Itlench nhoi, hea vixim Bible amkam sangta: “Istevak jivexim marlea uprant te bhavankui sotaitale. Taka lagon, te veg-vegllea zagear ximpoddle zoxem, Finisia, Siprus ani Antiok. Thoim te fokot Judev lokankuch Devachem utor sangtale. Punn, tantuntle thodde je Siprus ani Sirenantle asle te Antiokant aile ani Grik uloupi lokank, Somi Jezu vixim bori khobor sangonk lagle.” (Itihas 11:19, 20) Tor tea vellar dhumalleak lagon bori khobor veg-vegllea zagear porgott zaunk pavli.

 ¹⁵ Amchea disamnim pasun oxench ghoddlem. Khas korun, 1950 tem 1959-ant, adlea kalla voilea Soviet Union-an, hozaramnim Jehovachea Sakxeank Siberiant dhaddle. Taka lagon Siberia-chea veg-vegllea zageamnim bori khobor porgott zait geli. Khorem mhunnttlear, sorkaran Sakxeank Siberiant dhaddunk nasle zalear, Siberiant itlea vhodd promannan porgottnni zaunchi nasli! Karonn 10,000 kilometr pois provas korunk Sakxeam lagim title poixe nasle. Tea vixim ek bhav sangta: “Jehovachea Sakxeank Siberiantlea veg-vegllea zagear dhaddlole dekhun eke ritin sorkaran thoim bori khobor porgott zaunk modot keli.”

16, 17. Jehovan porgottnnechea kamacher besanv ghatlem mhunn Itihas pustokantlean koxem kollon ieta?

¹⁶ Poilea xekddeantlea Kristanvancher, Jehova besanv ghaltalo mhunn sarkem dison ieta. Paulu ani heramnim sotachem bim roilem ani taka udok ghatlem, punn “Dev vaddoit ravlo.” (1 Kor. 3:5, 6) Jehova Devan porgottnnechea kamacher besanv ghatlolem dekhun zaitim zannam Jehovachi seva korunk laglim mhunn Itihas pustokantlean amkam kollon ieta. Udharonnak, “Devachem utor ximpddot gelem ani Jeruzalemant xisancho ankddo-i rokddoch vaddot gelo.” (Itihas 6:7) Veg-vegllea zageancher bori khobor porgott zali toxi, “akʼkhea Judeiant, Galilient, ani Samariachea sobhamnim xanticho kall suru zalo. Teo sobha bhavarthant ghott zait geleo ani Jehovachea bhirantin cholot ravleo. Tankam povitr xokte thaun bhuzvonn mellʼlli. Oxe toren teo vaddot geleo.”​—Itihas 9:31.

¹⁷ Siriachea Antiokant dhirvont sakxeamnim, Judev lokank ani Grik uloupi lokank porgott kelem. Hea vixim Bible sangta: “Tea bhair, Jehovacho hat tancher aslo, ani khub lokamnim bhavarth dovorlo ani Somiachea vatten aile.” (Itihas 11:21) Fuddem kitem zalem tea vixim Itihas 12:24 oxem sangta: “Jehovachem utor posrot gelem ani khub lokamnim bhavarth dovorlo.” Toxench, Paulu ani heramnim videxi lokank bore bhaxen sakx dili dekhun ‘Jehovachem utor ximpddot gelem ani disan-dis ghott zait gelem.’—Itihas 19:20.

18, 19. (a) Aiz “Jehovacho hat” amcher asa mhunn ami kiteak mhunnonk zata? (b) Jehova aplea lokank modot korta tem dakhoun diunk ek onubhov sangat.

¹⁸ Aizui, “Jehovacho hat” amcher asa mhunn kosloch dubhav na. Oxem ami kiteak mhunnonk zata? Karonn, aiz pasun zaito lok bhavarth dovorta ani Jehovak aplem jivit somorpit korun bautizm gheta. Toxench, Jehova amkam modot korta dekhun amcher ieta to virodh ani khor dhumalleacho ami fuddo korunk pavtat. Ani Paulu, toxench adlea kalla voilea Kristanvam bhaxen ami porgottnni korit ravonk pavtat. Tor Jehova amkam sodanch modot kortolo. (Itihas 14:19-21) Soglea torechea kotthin poristhitimnim tache hat amkam sodanch tenko ditole. (D.S. 33:27) Tor Jehova aplea vhodd nanva khatir aplea lokank kednanch soddchona mhunn ami sodanch ugddas dhorum-ia.​—1 Sam. 12:22; St. 94:14.

¹⁹ Jehova aplea lokank koso modot korta tea vixim ek onubhov polloum-ia. Bhav Harald Abt porgottnni kortalo dekhun, Nazi sorkaran taka Dusrea Vixv Zhuza vellar, Sachsenhausen-achea concentration camp-ant dhaddlo. May 1942-ant, ek secret pulis, tachi bail Elsa-ger gelo, tanchea lhan dhuvek tichea koddlean  kaddun gheun, Elsa-kui bondkhonnint ghatli. Tika zaitea concentration camp-amnim dhaddli. Tea vixim ti sangta: “Germany-chea concentration camp-amnim hanv ek mhotvachem lisanv xikonk pavli. Tem mhunnttlear, ami khub kotthin poristhitincho fuddo kortat tednam, Jehovachi povitr xokti amkam modot korta. Mhaka koidi korun vhorchea poilim, hanvem ek bhoinnichi chitt vachloli. Hea chittint tinnem sanglolem ki amkam khub tras sosunk poddttat tednam, Jehovachi povitr xokti amkam xant ravonk modot korta. Punn tea vellar ti bhoinn vaddoun-choddoun sangta oxem mhaka dislem. Punn jednam mhaka svota trasancho fuddo korunk poddlo, ti sangtali tem khorem mhunn mhaka kollon ailem. Tor, amcher ek kotthin poristhiti azun-ui ieunk na zalear, tem koxem zata tem ghoddie ami somzonk pavchimnant. Punn hem khorem zaun asa. Ani mhojea-i sovem oxench ghoddlem.”

20. Paulu ghorant koidi aslo tednam tannem kitem kelem, ani tachea udharonnantlean amchea thoddea bhav-bhoinnank kosli urba melltta?

²⁰ Paulu urben “Devachea Rajea vixim porgott” kortalo mhunn Itihas pustokachea xevottak amkam sanglam. (Itihas 28:31) Romant to ghorant koidi aslo dekhun, ghor-ghoramnim porgott korunk taka mellonaslem. Tori astana taka bhett diunk ietale tankam to porgott kortalo. Aiz amchea thoddea bhav-bhoinnank duensam, oskotaeo ani zanntte piraiek lagon, tankam ghorant vo khatticheruch ravonk poddtta. Tori astana, tim Devacho mog kortat ani sakx diunk tanchi itsa poilim bhaxen ghott asa. Oslea bhav-bhoinnam pasot ami magnnem korunk zata ki tankam osle lok mellche, je Deva vixim ani tachea udʼdhexa vixim zannam zaunk sodhtat.

21. Aiz porgottnnechem kam korop itlem mhotvachem kiteak asa?

²¹ Punn amchea modlea choddxea zannam lagim ghoran-ghor porgottnni korunk ani xis korchea kamant dusrea vattamnim bhag gheunk zata. Tor, ‘prithumechea sogleant poisulʼlea vattaramnim’ sakx diunk ami amchea lagim zata tem soglem korum-ia. Karonn ami Devachea Rajeachim porgottnnaram zaun asat. Toxench, ami nimannea disamnim ravtat mhunn aichea “khunna” vorvim amkam sarkem dison ieta. (Mt. 24:3-14) Tor aiz hem kam korop anikui mhotvachem zaun asa. “Somiachea sevent . . . khub kam” asa. Tor amchea lagim asa tea vellacho ami zata titlo boro upeog korum-ia.​—1 Kor. 15:58.

22. Jehovacho dis ieunk ami ravtat toxim, ami kitem korunk nichov korunk zai?

²² Tor “vhodd ani bhirankull Sorvesporacho Dis” ieunk ami ravtat tea meren, dhiran ani visvaxiponnan sakx diunk ami nichov korum-ia. (Joel 2:31) Karonn, “utor khub urben manun ghetlem” tea Bereiantlea lokam bhaxen aiz pasun amkam zaite lok mellonk xoktat. (Itihas 17:10, 11) Tor porgottnnechem kam somposor ani eka orthan him utram aikom-sor, ami porgottnni korit ravom-ia. Tim mhunnttlear, “Xabʼbas, borea ani visvaxi chakra!” (Mt. 25:23) Karonn, xis korchea kamant aiz ami urben amchean zata tem soglem kelem zalear ani Jehovak visvaxi ravlim zalear, ami sasnak khuxal ravonk pavtolim, hem zannam zaun ki Devachea Rajea vixim “bore bhaxen sakx” diunchea kamant bhag gheunk amkam ek vhodd man mellʼllo.